Romanos 4:1-25
4 ¿Uan toni tikijtoskej ke motanilij touejkaujtat Abrahán?
2 Porin komo Dios kiitaskia ke Abrahán katka yolmelauak porin kichiuak tein kuali, Abrahán kipiaskia keyej moueyimatis,* maski amo iixpan Dios.
3 Porin ¿toni kijtoua Tajkuilolamatsin? “Abrahán takuaujtamatik iuan Jehová* uan yejua kiitak ke yolmelauak”.
4 Keman se takat tetekitilia, tein kitaxtauiaj amo kitayokoliaj,* ta motanilij.*
5 Sayoj ke Dios amo kiita ke aksa* yolmelauak porin kichiua tein kuali, ta kiita ke yolmelauak porin iuan takuaujtamati, maski tajtakolej.
6 David kijtoj ke akin Dios kiita ke yolmelauak maski amo motanilijtok, semi yolpaki. Yejua kijtoj:
7 “Yolpakij akin kintapojpoluilianij tein amo kuali tein kichiujkej uan akin kinelkauilianij inintajtakoluan;
8 yolpaki akin Jehová* amo kielnamikilia itajtakol”.
9 Komo ijkon, ¿sayoj yolpakij akin kintekkejya oso no akin amo kintekinij?* Porin tikijtouaj: “Dios kiitak ke Abrahán yolmelauak porin takuaujtamatik”.
10 ¿Kemanian Dios kiitak ke yolmelauak? ¿Keman kitekkajya oso keman ayamo kitekiaj? Nejin mochiuak keman ayamo kitekiaj.
11 Dios kiluij maj moteki.* Ika nejin kiyeknextij ke katka yolmelauak porin takuaujtamatik keman ayamo kitekiaj. Ijkon mochiuak inintat nochin akin takuaujtamatij maski amo kintektokej, uan ijkon Dios ueliskia kinitas ke yolmelaujkej.
12 Abrahán no inintat akin kintekkejya. Uan amo sayoj inintat yejuan, ta no akin takuaujtamatij kemej yejua. Topaj Abrahán takuaujtamatik maski ayamo kitekiaj.
13 Dios kiitak ke Abrahán yolmelauak porin takuaujtamatik, yejua ika motenkauak iuan uan iniuan ikoneuan ke kinkauiliskia nochi taltikpak. Dios amo kiluij nejon porin kitakamatia iTanauatil Moisés.
14 Komo tein Dios motenkaua sayoj kinmakaskiaj akin kichiuaj tein kijtoua Tanauatil, nenkaj se takuaujtamatiskia, uan hasta tein Dios motenkaua poliuiskia.
15 Tein melauj, se kitapanauilis Tanauatil kichiua maj tetatsakuiltikan, sayoj ke kampa amo onkak nion se tanauatil amo no teyi se kitapanauilia.
16 Yejua ika, Dios motenkauak iuan Abrahán porin takuaujtamatik uan ijkon no kinextilij itatiochiualis tein amo technamiki. Ijkon moyekmatik ke nochin ikoneuan no kinmakaskiaj nejon tein Dios motenkauak, amo sayoj akin kitakamatij Tanauatil, ta no akin takuaujtamatij kemej Abrahán takuaujtamatik. Yejua topaj tinochin.
17 (Ijkon kemej ijkuiliujtok: “Nimitsixtalij kemej ininuejkaujtat akin nemiskej itech miak altepemej”). Abrahán takuaujtamatik iuan Dios, akin kichiua maj oksepa nemikan akin momikilijkejya. Uan keman ika tajtoua tein ayamo mochiua, yejua kijtoua kemej yeskia mochiuakya.*
18 Abrahán kichiaya uan takuaujtamatia ke yeskia ininuejkaujtat akin nemiskej itech miak altepemej, maski nejin moitaya ke amo ueliskia mochiuas. Yejua kineltokak tein kiluijkaj: “Ijkon tel miakej yeskij mokoneuan”.
19 Uan kisentokak takuaujtamatik maski kiitaya ke amo ueliskiaok kinpias konemej (porin kipiaya kemej 100 xiujmejya). No kiitaya ke Sara semi xiuejya* katka uan amo ueliskiaok kinpias konemej.
20 Sayoj ke kemej takuaujtamatia itech tein Dios motenkauak, amo omeyolouak,* ta okachi mochikauak porin takuaujtamatik, yejua ika kiueyitalij Dios
21 uan senkis kineltokaya ke Dios ueliskia kichiuas tein motenkaujka iuan.
22 Yejua ika, “Dios kiitak ke yolmelauak”.
23 Sayoj ke, tajtolmej “Dios kiitak” amo moijkuilojkej sayoj para yejua,
24 ta no para tejuan, akin Dios techitas ke tiyolmelaujkej porin itech titaneltokaj akin kichiuak maj toTekotsin Jesús oksepa nemi.*
25 Yejua kitemaktijkej maj kimiktikan porin titajtakolejkej, uan oksepa nemik* para maj Dios techita ke tiyolmelaujkej.
Tajtolmelaualismej
^ Oso “moueyinekis”.
^ Oso “amo se tatiochiualis tein amo kinamiki”.
^ Oso “kitauikiliaj”.
^ Oso “akin”, “akaj”.
^ Oso “kinchiuilijkejya circuncisión oso no akin amo”. Xikonita circuncisión.
^ Oso “maj mochiuili circuncisión”.
^ Oso xa “kichiua maj onka tein amo onkak”.
^ Oso “nanajya”, “nanotsinya”.
^ Oso “amo kinemilijtoya ox melauak oso amo melauak nejon”.
^ Itech griego, “akin kiajokuik toTekotsin Jesús”.
^ Itech griego, “moajokuik”.
