Santiago 5:1-20
5 Axkan xitakakikan namejuan akin nantominpiaj, xichokakan uan xitayokoyakan porin namopan uetsikiuj tein amo kuali.
2 Nochi tein nankipiaj palanikya uan namotasal kikuajkejya okuilimej.
3 Namooro uan namoplata palanikya,* uan nejon kinextis ke amo kuali tein nankichiuaj uan namechixpolos.* Tein namejuan nankisentilianij yeski kemej se tit* itech tonalmej keman tatamitiya.*
4 Xikakikan, takeualmej akin tekitikej namotalpan tsajtsitokej porin amo nankintaxtauijkej, uan Jehová* akin kinixyekana iangeluan ne iluikak kikakik keniuj chikauak tsajtsij para maj kinpaleuikan.
5 Nikan taltikpak nankipiaj miak taman tein patiyoj uan sayoj namoyolpaktijtinemij. Namotomaujkejya kemej yeskia tapialmej uan ejkokya tonal keman namechmiktiskej.
6 Nankitatsakuiltianij uan nankimiktianij akin yolmelauak. Yejua ika, yejua namechixnamiki.
7 Yejua ika nokniuan, ximochiakan hasta keman mokepasya* toTekotsin. Xikitakan, akin tatoka kisentoka kiyolikachia kuali takilot tein kitokak hasta maj ejko tonalmej keman peua mixkioui uan tonalmej keman chikauak kioui.
8 Namejuan no ximochiakan, ximoyolchikauakan porin amo uejkaua mokepasya* toTekotsin.
9 Nokniuan, amo ximokualantijtinemikan para maj toTekotsin amo namechtatsakuilti. Xikitakan, Juez ejkotiya.*
10 Nokniuan, xikchiuakan kemej tanauatianij* akin tajtojkej itokaykopa Jehová.* Yejuan taxikojkej maski tajyouijkej uan amo yolijsiujkej.
11 Tikinitaj ke yolpakij* akin taxikouanij. Namejuan nankikakinij keniuj Job taxikoj uan no nankimatij keniuj Jehová* kipaleuij. Nejon namechpaleuia xikmatikan ke Jehová* semi tetasojta uan teiknelia.
12 Nokniuan, tein namechiluiti motelneki. Amo xikijtokanok “kitstikaj iluikak” oso “kitstikaj taltikpak” uan amo xiksentokakan ximoyektenkauakan ika nion teyi. Ta okachi kuali, keman nankijtoskej “kemaj”, maj kemaj, uan keman nankijtoskej “amo” maj amo, para maj Dios amo namechtatsakuilti.
13 ¿Semej de namejuan tajyouijtok? Maj kisentoka motataujti. ¿Semej de namejuan yolpaki? Maj mokuikati* salmos.
14 ¿Semej de namejuan mokokoua? Maj kinnotsa tayekananij itech nechikol uan maj yejuan kitataujtikan Dios maj kipaleui, uan maj kitalilikan aceite itokaykopa Jehová.*
15 Uan netataujtil tein kichiuaskej porin takuaujtamatij kipaleuis maj nenkenti* akin mokokoua,* uan Jehová* kiajokuis. Uan no, komo tajtakolchiuak, Dios kitapojpoluis.
16 Yejua ika xikiniluikan oksekin namotajtakoluan, uan ininka ximotataujtikan oksekin para ijkon nanpajtiskej. Semi tapaleuia keman chikauak motataujtia akin yolmelauak.
17 Elías katka kemej tejuan, uan keman chikauak motataujtij maj amo kioui, amo kiouik eyi xiuit uan tajko.
18 Uan keman oksepa motataujtij, kiouik uan motachiuak itech nejon tal.
19 Nokniuan, komo nansemej peua nankikauaj ojti tein melauak uan okse namechpaleuia ximokepakan,
20 xikmatikan ke akin kichiua maj okse kikaua itajtakol, kimakixtis uan no kipaleuis maj Dios kitapojpoluili nochi itajtakoluan.
Tajtolmelaualismej
^ Oso “moxoxakya (moxixakya)”.
^ Itech griego, “kikuas namonakayo”.
^ Oso “tekol”.
^ Oso “itamian tonalmej”.
^ Tajtol griego, parousía. Xikonita keman Cristo mokepasya.
^ Tajtol griego, parousía. Xikonita keman Cristo mokepasya.
^ Oso “yetokya kaltenoj”.
^ Xikonita tanauatijkej.
^ Oso “tatiochiualmej”.
^ Oso “cantaro”.
^ Oso “pajti”.
^ Oso xa “sioujtok”.
