Itech nejin xiuit, peuas tikpiaskej okachi tonalmej uan ijkon tikchiuaskej tein moneki achto ke tikelnamikiskej imikilis Cristo. Keman mochiuas itajkotian semana, amo mochiuas nechikol Tonemilis uan toTanojnotsalis, uan keman mochiuas itamian semana, amo mochiuas nechikol kampa motemaka se tanojnots uan nemachtil ika amaix Tanejmachtijkej. ¿Toni uelis tikchiuaskej itech nejon tonalmej? Ijkon kemej mochiuak itech yekinika siglo, axkan moneki tikchiuaskej seki taman achto ke ajsis nejon tonal tein motelneki (Lu 22:7-13; km 3/15 pág. 1). Uan no, moneki itech titanemiliskej nejon tonal. ¿Keniuj uelis tikchiuaskej?

• Maj tiknemilikan keyej motelneki ompa tiyetoskej (1Co 11:23-26).

• Maj tiktataujtikan Jiova uan maj tikitakan keniuj iuan timouikaj (1Co 11:27-29; 2Co 13:5).

• Maj tikixtajtoltikan itech Biblia uan amaixmej kampa ika motajtoua tein kijtosneki keman tikelnamikij imikilis Cristo uan maj itech titanemilikan (Jn 3:16; 15:13).

Seki tokniuan kiixtajtoltiaj itech Biblia tein nesi itech folleto Maj timomachtikan iTajtol Dios mojmostaj keman moelnamiki imikilis Cristo uan itech tanemiliaj. Oksekin kiixtajtoltiaj versículos tein moajsij itech recuadro tein nikan nesi. Uan oksekin, kiixtajtoltiaj tamachtilismej itech amaix Tanejmachtijkej tein ika tajtouaj nejon tonal uan netasojtalis tein Jiova uan Jesús technextilijkej. Tein yeski taman tein timomachtiskej, techpaleuis maj okachi timotokikan iuan Jiova uan iKonetsin.