Nechikolmej tein mochiuaj achto ke tikisaskej tanojnotsalis se netetayokolil tein Jiova techmaka, ijkon kemej nochi okseki nechikolmej tein tikpiaj, porin ijkuak ueli timonextiliaj netasojtalis uan timopaleuiaj (Heb 10:24, 25). Nejin nechikol moneki uejkauas kemej makuil oso chikome minuto. Itech nejon minutos ipa moixtalijya keniuj uan kani motanojnotsas, uan no ipa mochiuakya netataujtil. Uan moneki okachi amo uejkauas komo tokniuan achto kipiakej ininnechikol. Akin kiixyekanas moneki kitemakas se tamachtilis tein kinpaleuis akin tanojnotsatiuij. Kemej neskayot, sábados kisaj miakej akin itech semana amo kiskaj. Ijkuak xa tapaleuis maj ika motajto toni uelis se kijtos itech tanojnotsalis. ¿Toni okseki taman uelis ika motajtos?

• Tein kijtoua taxelol “Keniuj uelis tipeuaskej titajtoskej” tein kipia amaix Tein timomachtiaj itech nechikol Tonemilis uan toTanojnotsalis.

• Keniuj uelis tikuiskej teisa tein yankuixtok panok keman titajtoskej iuan se taltikpaknenkej.

• Keniuj uelis titanankiliskej keman techiluiskej teisa porin amo kinekij techkakiskej.

• Keniuj uelis tikinnankiliskej akin amo kineltokaj Dios, akin kineltokaj evolución, akin tajtouaj okse tajtol oso akin kipiaj se taneltokalis tein amo moixmati kampa titanojnotsaj.

• Keniuj uelis tikuiskej jw.org, JW Library^® oso Biblia.

• Keniuj uelis tikuiskej semej nepaleuilmej tein ika titamachtiaj.

• Keniuj uelis titanojnotsaskej ika teléfono, ika carta, kampa miakej panouaj, oso toni uelis tikijtoskej keman oksepa tikalpanoskej se taltikpaknenkej oso keniuj uelis titamachtiskej ika Biblia.

• Uelis techelnamiktiskej maj timoyekpiakan, maj tikpatakan tein tikixtalijtoyaj tikijtoskej, maj kuali timonejnemiltikan, maj tiyolpakikan itech tanojnotsalis, oso okseki taman.

• Se tamachtilis oso se video tein kipia folleto Maj okachi kuali titaixtajtoltikan uan titamachtikan.

• Keniuj uelis tikyolchikauaskej uan tikpaleuiskej akin iuan titanojnotsaskej.

• Se tajkuilol tein mouika ika tanojnotsalis oso tein kipanok se tokniuj itech tanojnotsalis tein tayolchikauas.