Tokniuan siuamej semi tapaleuiaj maj moteixmatilti iTekiuajyo Dios (Sl 68:11). Yejuan akin okachi miakej kinmachtiaj ika Biblia. Uan no okachi miakej tokniuan siuamej akin tekitij kemej precursores regulares. Miakej betelitas, misioneras, tapaleuiaj keman mochijchiuaj kalmej kampa tikueyichiuaj Dios, oso kitajtolkepaj amaixmej. Uan tokniuan siuamej akin semi kuali mouikaj iuan Jiova kinyolchikauaj ininchankauan uan tokniuan itech nechikol (Pr 14:1). Maski tokniuan siuamej amo ueli mochiuaj tayekananij oso tapaleuianij itech nechikol, uelis kichiuaskej okseki taman. Tokniuan siuamej, ¿keniuj uelis okachi nankitekitiliskej Jiova?

• Uelis nanmochikauaskej nankipiaskej okachi kualneskayomej (1Ti 3:11; 1Pe 3:3-6).

• Uelis nankinpaleuiskej okseki tokniuan siuamej akin yankuixtokok peuak kitekitiliaj Jiova (Tit 2:3-5).

• Uelis nanmochikauaskej okachi nantapaleuiskej itech tanojnotsalis, uan no okachi kuali nantanojnotsaskej.

• Uelis nanmomachtiskej okse tajtol.

• Uelis nantapaleuitiuij kampa monekij okachi tanojnotsanij.

• Uelis nankititaniskej amat tein ika se tajtani se tapaleuitiuj Betel oso itech kalchiualis.

• Uelis nankititaniskej amat tein ika se tajtani se kiselis Tamachtilis tein kiseliaj akin kiteixmatiltiaj iTekiuajyo Dios.

SATEPAN KE TIKONITAS VIDEO SIUAMEJ AKIN CHIKAUAK “KITEKITILIJTINEMIJ TOTEKOTSIN”, XIKONNANKILI NEJIN NETAJTANIL:

• ¿Keniuj mitsonyolchikauaj tokniuan siuamej akin nesij itech video?