Tanojnots 76

Kiixpolojkej Jerusalén

PANOUA majtakti xiuit achtopaya ijkuak tekiuaj Nabucodonosor, kiniuikak Babilonia israelitas tein okachi tamachtilmej. ¡Uan axkan, xikita! Jerusalén tatatok, uan israelitas tein amo mikkej kiniuikatokej Babilonia uan ompa moajsitij temako.

Xikelnamiki, yejua nejin tein tanauatianij tanejmachtijkaj ika mochiuaskia, komo yejuan kisentokayaj kichiuayaj tein amo kuali. Sayoj ika israelitas amo kinkakkej tanauatianij. Kisentokayaj kiniueyichiuayaj tiotsitsin, uan amo Jiova. Yejika kininamikia tatsakuiltilis. Tikmatij nejin porin Ezequiel, se itanauatijkauj Dios techiluia amo kuali tachiualismej tein kichiuayaj israelitas.

¿Tikmati akoni katka Ezequiel? Semej telpochmej tein Nabucodonosor kiniuikak Babilonia panoua majtakti xiuit achtopa keman mochiuaskia nejin ueyi poliuilis. Daniel uan eyi itasojikniuan, Sadrac, Mesac uan Abednego, no kiniuikakej Babilonia itech nejon xiuit.

Keman Ezequiel yetoyaok Babilonia, Jiova kinextilij amo kuali tachiualismej tein mochiujtoya itech templo Jerusalén. Jiova kinextilij nejin ika se mouiskatekit. Tein melauj, Ezequiel yetoyaok Babilonia, sayoj ika Jiova kiitaltij nochi tein mochiujtoya itech templo. ¡Tel amo kualtsin tein kiitak!

Jiova kiiluij Ezequiel: ‘Xikyekita pitsotik tachiualismej tein israelitas kichiujtokej nikan itech templo. Xikita itech nochi tepamit kinchijchiujkej kouamej uan okseki okuilimej. ¡Uan xikinita, israelitas kiniueyichiujtokej!’ Ezequiel uelik kiitak nochi, uan kijkuiloj tein mochiujtoya.

Jiova kitajtanij Ezequiel: ‘¿Tikinita tayekananij israelitas tein kiichtakachiujtokej?’ Kemaj, yej uelik kiitak nejin. Moajsiaj 70 takamej, uan nochin kiniueyichiujtoyaj tiotsitsin. Kijtouayaj: ‘Jiova amo techita, ta amo yetokok touan’.

Satepan, Jiova kinextilij Ezequiel seki siuamej tein yetoyaj itech ipuerta templo. Ompa tokotsyetoyaj uan kiueyichiujtoyaj tiotsin Tamuz. Ezequiel no kinitak ikalakyan itemplo Jiova, kemej 25 takamej. ¡Moixpilojtoyaj tonalkisayampa uan kiueyichiujtoyaj Tonaltsin!

Jiova kijtoj: ‘Nejin israelitas amo nechpoujkaitaj. ¡Amo sayoj kichiuaj tein amo kuali, ta kichiuakij itech notemplo!’ Yejika Jiova motenkauak: ‘Nikintatsakuiltiti ika nochi nokualanyo. Uan amo nikiniknelis keman ixpoliuiskej’.

Sayoj kemej eyi xiuit satepan keman Jiova kinextilij Ezequiel nochi nejin tachiualismej, israelitas kiixnamikkej tekiuaj Nabucodonosor. Yejika kinteuito. Se xiuit uan tajko satepan, babilonios kixitinijkej tepamit tein kiyoualouaya Jerusalén uan kichichinojkej altepet. Tel miakej israelitas mikkej, uan tein amo, kiniuikakej Babilonia uan ompa moajsikej temako.

¿Keyej Jiova kikauak maj israelitas kijyouianij se tel ueyi poliuilis? Porin amo kikakkej Jiova niono kitakamatkej itanauatiluan. Nejin kinextia ika motelneki maj nochipa tikchiuakan tein Dios techiluia.

Yekinika kinkaujkej maj mokauanij se ome eyi itech tal tein pouia Israel. Uan tekiuaj Nabucodonosor kixtalij se judío tein motokaytij Guedalías maj kinitani israelitas. Sayoj ika yejuan kimiktijkej Guedalías. Yejika israelitas kinimouiliayaj babilonios maj momakepanij ika tein kichiujkej. Yejika kichikaujkauijkej Jeremías maj imiuan cholouani Egipto.

Ijkon, itech tal tein pouia Israel amo akinok mokauak. Uan 70 xiujmej mokauak taseltijkan. Sayoj ika Jiova motenkaujka ika satepan keman panoskia 70 xiujmej, kichiuaskia maj israelitas oksepa mokepanij itech imin tal. Sayoj, ¿toni kipanotoyaj israelitas keman moajsiaj Babilonia? Maj tikitakan.

2 Reyes 25:1-26; Jeremías 29:10; Ezequiel 1:1-3; 8:1-18.