Jefté kichiuak se netenkaualis
Tanojnots 53
Jefté kichiuak se netenkaualis
¿IKSA timotenkauani iuan aksa tein satepan mitskisak ouij tikchiuas? Yejua nejon kipanok nejin takat tein yetok itech taixkopin, uan yejika tayokoxtok. Motokaytia Jefté, se takat yolchikauak tein katka imin tamelaujkauj israelitas.
Jefté nemia itech xiujmej keman israelitas amo kiueyichiuayajok Jiova. Oksepa kichiujtoyaj tein amo kuali. Yejika Jiova kikauak maj taltikpakneminij tein kayomej Amón kinchiuilianij tein amo kuali. Israelitas kitsajtsilijkej Jiova: ‘Titajtakojkej moixpan. ¡Xitechmakixti!’
Israelitas kinextijkej ika amo kuali momachiliayaj ika nochi tein amo kuali kichiuayaj, yejika oksepa peuak kiueyichiuaj Jiova. Uan yejua oksepa kinpaleuij.
Israelitas kijitakej Jefté maj moteuiti imiuan amonitas tein amo yolkualmej. Jefté kitelnekia maj Jiova kipaleuiani itech neteuil. Yejika motenkauak iuan Jiova: ‘Komo tinechpaleuia maj nitatani, nej nimitsmakas yekinika taltikpaknenkej tein kisas nochan uan nechnamikikiuj keman nimokepas ijkuak nitatanis’.
Jiova kikakik tein Jefté motenkauak, uan yej kipaleuij maj tatani. Keman Jefté mokepak, ¿tikmati akoni yekinika taltikpaknenkej kinamikito? Katka iichpoch tein ipa setsin. Jefté chokak: ‘¡Nokonetsin! ¡Nimoteltayokoltijtok! Sayoj ika, nimotenkauaka iuan Dios, uan yekintsin amo ueliok nimotenkepa’.
Keman iichpoch Jefté kimatik toni motenkaujka, yekinika no motayokoltij, ta monekia kikauas ipopaj uan itasojikniuan. Sayoj ika panoskia nochi inemilis kitekitilijtoskia Jiova, itech itabernáculo tein moajsia Siló. Yejika kiiluij Jefté: ‘Komo timotenkauaka iuan Jiova, moneki tikchiuas’.
Yejika iichpoch Jefté yajki Siló, uan ompa kitekitilijtoya Jiova nochi inemilis itech itabernáculo. Siuamej israelitas kikalpanouayaj naui tonal itech se xiuit, uan ompa iuan yetoyaj. Iichpoch Jefté tel kualtsin kitekitilijtoya iDios, Jiova, yejika israelitas kitasojtayaj.
