Tanojnots 99

Moajsiaj ajko itech se kali

PANOKA ome tonal, uan axkan jueves youak. Jesús uan 12 itatitaniluan ualajkej nikan ajko itech se kali, uan kimajseuakoj tiotakyot tein itokay Pascua. Tein kistok, Judas Iscariote, uan kiniluiti tiopixkamej keniuj kikitskiskej Jesús.

Se tonal achto, Judas kinininojnotska tiopixkamej uan kiniluijka: ‘¿Toni nanechmakaskej komo namechpaleuia xikitskikan Jesús?’ Kiiluijkej: ‘Sempoual uan majtakti platajtomin’. Ompa, Judas mosentilij imiuan uan ijkon kiniuikaskia kampa yetoya Jesús. ¿Amo timoluia ika tel amo kuali tein kichiuak?

Keman kitamichiujkej Pascua, Jesús kipeualtij okse takualis tein motelneki. Kinimakak itatitaniluan koyotaxkal uan kiniluij: ‘Xikuakan, porin nejin kijtosneki nonakayo tein namoka niktemakati’. Ompa, kikuik se tapalkat vino, uan kiniluij: ‘Xitayikan, porin nejin kijtosneki noesyo, tein namoka mimilauis’. Biblia kitokaytia nejin ‘itakualis toTekotsin’.

Keman israelitas kichiuayaj Pascua ika kielnamikiaj ijkuak iángel Dios ‘panok’ imin chajchan keman moajsiaj Egipto, uan kinimiktij imin tayekankakoneuan egipcios. Sayoj ika axkan Jesús kinekia maj itatojtokakauan kielnamikinij ika yej iminka momikilij. Yejika tanauatij maj ijkon kichiuanij xijxiujtika.

Keman kitamichiujkej iTakualis toTekotsin, Jesús kiniluij itatitaniluan maj moyolchikauanij uan maj eskiaj chikaujkej ika imin takuaujtamatilis. Ika tamik, mokuikatijkej uan ika kiueyichiujkej Dios uan kiskej. Acha panokaya tajkoyoual. ¿Kani yajkej?

Mateo 26:14-30; Lucas 22:1-39; Juan capítulos 13–17; 1 Corintios 11:20.