Tanojnots 26

Job amo kikauak Dios

¿TIKIKNELIA nejin kokoxkej? Motokaytia Job, uan siuat yejua inamik. ¿Tikmati toni kiiluijtok Job? ‘Xiktejtelchiua Dios uan ximiki.’ Maj tikitakan keyej ijkon kijtoj, uan keyej Job kitelijyouij.

Job katka se takat tein amo keman kikauak Jiova uan katka tatakamatkej. Yej nemia itech tal tein pouia Uz, se tal tein amo uejka moajsia Canaán. Jiova kiteltasojtaya Job, sayoj ika, nemia aksa tein kitauelitaya. ¿Tikmati akoni?

Katka Amokuali Satanás. Xikelnamiki, Satanás se ángel amo yolkuali tein kitauelita Jiova. Yej uelik kichiuak maj Adán uan Eva amo kitakamatinij Jiova, uan moluiaya ika nochin taltikpakneminij ueliskia kinchiuaskia maj amo kitakamatikan Dios. Sayoj ika, ¿uelik kichiuak? Amo. Sayoj xikelnamiki tein timomachtijkejya, ika miakej takamej uan siuamej amo kikaujkej Dios. ¿Kanachimej ueli tikinelnamiki?

Satepan keman Jacob uan José momikilijkej Egipto, Job yejua katka takat tein moajsia itech nochi taltikpak tein amo kikauaya Dios. Jiova kinekia kimatiltis Satanás ika amo nochin taltikpakneminij ueliskia kinchiuaskia amo yolkualmej. Yejika kiiluij: ‘Xikita Job. Xikita, yej amo keman nechkaua’.

Satanás motenpaleuij: ‘Amo mitskaua porin tiktatiochiuijtok uan kipia miak taman tein kuali. Sayoj ika, komo tikuilia, mitstejtelchiuas’.

Yejika Jiova kiiluij: ‘Xiouj xikuiliti nochi tein kipia. Xikchiuili nochi tein tiknekis, uan tikitaskej komo nechtejtelchiua. Sayoj, amo tikmiktijti’.

Yekinika, Satanás kichiuak maj sekin takamej kiichtekilianij seki itapialuan Job, no kichiuak maj mikikan iichkauan. Uan kichiuak maj se tetsaujkaejekat kinimiktiani majtakti iokichpipiluan uan isiuapipiluan. Satepan, kimakak nejin kokolis. Job kitelijyouij. Yejika inamik kiiluij: ‘Xiktejtelchiua Dios uan ximiki’. Sayoj ika, Job amo kinekik. No, eyi itasojikniuan xolopijmej kiiluitoj ika yej kichiuak teisa tein amo kuali. Sayoj ika, Job amo kikauak Dios.

Nejin kitelyolpaktij Jiova, uan satepan kitatiochiuij Job, kemej tikita itech taixkopin. Kipajtij uan yej kinpiak okseki majtakti ikoneuan tel kuakualtsitsin, uan kimakak okse achiok kemej achto kinpiaya tapialmej, kemej ichkamej uan camellos.

¿Tej amo keman tikauas Jiova kemej Job? Komo ijkon tikchiua, Dios no mitstatiochiuis. Uelis tinemis nochipaya keman semanauak Taltikpak eski tel takualtsinkan kemej katka xochital itech Edén.

Job 1:1-22; 2:1-13; 42:10-17.