Mopaleuij konet Moisés
Tanojnots 28
Mopaleuij konet Moisés
XIKITA konet tein chokatok uan kimajpilkitskijtok nejin ichpoch. Motokaytia Moisés. ¿Tikmati akoni nejin ichpoch kuakualtsin? Iichpoch Faraón tein kayot Egipto.
Imomaj konet kitatijtinemia eyi metstika, porin amo kinekia maj kimiktianij egipcios. Sayoj ika, imomaj kimatia ika ueliskiaj kiajsiskiaj Moisés. Yejika, ¿tikmati toni kichiuak uan ijkon mopaleuij?
Kichijchiuak se chikiuit kemej amo kalakiskia at. Satepan ompa kitekak Moisés uan kitalij chikiuit xiujkaual itech ueyi atenoj Nilo. Uan kiiluij Míriam, ikniuj Moisés, maj ompakauin yetoni uan maj kiitani toni kichiuiliskiaj.
Amo uejkauak, iichpoch Faraón maltito ueyiatenoj Nilo. Uan ompa kixajsik chikiuit xiujkaual. Kiiluij semej isiuatakeualuan: ‘Xinechualkuili ne chikiuit’. Keman kitapoj, ¡kiitak se konet tel kuakualtsin! Konet Moisés chokatoya, uan iichpoch Faraón kiknelij. Amo kinekik maj kimiktikan.
Satepan ajsik Míriam, kemej moita itech taixkopin. Míriam kitajtanij iichpoch Faraón: ‘¿Uelis niknotsatiuj se israelita uan maj yejua kiskalti konet?’
Tanankilij iichpoch Faraón: ‘Xikchiua nejon kualtakayot’.
Míriam niman motaloj kiiluito imomaj. Keman imomaj Moisés ajsik kampa yetoya iichpoch Faraón, yej kiiluij: ‘Xikuika konet uan xikiskalti, uan nimitstaxtauis’.
Ijkoni mochiuak, konet Moisés kiskaltij imomaj. Satepan keman Moisés tepitsin moskaltijkaya, imomaj kiuikilij iichpoch Faraón, tein kiselij kemej ikoneuj. Yejika Moisés moskaltij ichan Faraón.
