Tanojnots 116

Keniuj uelis tinemiskej nochipaya

¿TIKMATI toni nejin siuapil uan itasojikniuan kixtajtoltiaj? Kemaj, no yejua nejin amaix tein tikixtajtoltijtok... Tanojnotsmej tein ualeuaj itech Biblia. Uan no kixtajtoltiaj nejin tanojnots... “Keniuj uelis tinemiskej nochipaya”.

¿Tikmati toni momachtiaj? Yekinika, ika moneki tikixmatiskej Jiova uan Jesús, uan ijkon uelis tinemiskej nochipaya. Biblia kijtoua: ‘Yejua nejin ojti tein teuika itech nemilis nochipaya. Xikixmati Dios tein sayoj yejua melauak, uan iKoneuj Jesucristo’.

¿Keniuj uelis tikixmatiskej Jiova uan iKoneuj Jesús? Se taman, moneki tikixtajtoltiskej nochin Tanojnotsmej tein ualeuaj itech Biblia. Nejin amaix tel ika tajtoua Jiova uan Jesús, ¿melauj? Uan kijtoua miak taman tein yejuan kichiujkej uan kichiuaskej. Sayoj ika moneki tikixtajtoltiskej okse taman.

¿Tikita okse amaix ne talpan? Yejua Biblia. Xikilui aksa maj mitsixtajtoltili taxelolmej tein kipia Biblia tein itech motaksaltiaj nejin tanojnotsmej. Biblia techmatiltia nochi tein techpaleuis maj tiktekitilikan Jiova kemej kipaktia, uan tikseliskej nemilis nochipaya. Yejika moneki maj timomatikan timotelmachtiskej Biblia.

Sayoj ika, tikixmatiskej Jiova Dios uan Jesucristo, amo yejuasaj moneki. Uelis tikinixmatiskej uan tiktelmatiskej tein tamachtiaj uan ayamo tikpiaskej nemilis nochipaya. ¿Tikmati toni okse taman moneki tikchiuaskej?

No moneki tinemiskej ijkon kemej timomachtijtokej. ¿Tikelnamiki akoni katka Judas Iscariote? Katka semej 12 tatitanilmej tein Jesús kinijitaka. Judas kitelmatia tein Jiova uan Jesús tamachtiaj. Sayoj ika, ¿toni kipanok? Satepan mochiuak xijxikui uan kitemaktij Jesús ika 30 platajtomin. Judas amo kiselis nemilis nochipaya.

¿Tikelnamiki akoni katka Guehazí, tein ika timomachtijkej tepitsin itech Tanojnots 69? Yej kinekik kipias taken uan tomin tein amo iaxka katka. Nochi nejon kikuik ika se xolopijyot, yejika Jiova kitatsakuiltij. No ijkon techtatsakuiltis komo amo tiktakamatij itanauatiluan.

Sayoj ika no moajsikej miakej taltikpakneminij tein nochipa kitekitilijkej Jiova ika nochi imiyolo. Tiknekij tikchiuaskej kemej yejuan, ¿melauj? Konet Samuel kikauak se kuali neskayot. Xikelnamiki kemej tikitakej itech Tanojnots 55, yej kipiaya sayoj naui oso makuil xiuit keman peuak kitekitilia Dios itech itabernáculo. Yejika, maski tikonetok, amo kijtosneki ika ayamo uelis tiktekitilis Jiova.

Kemaj, uan okachi tiknekij tiktojtokaskej Jesucristo. Maski katka konetok, kemej tikitakej itech Tanojnots 87, yetoya templo uan ika tanojnotstoya iTajtsin tein nemi iluikak. Maj tiktojtokakan ineskayo. Nochin akin tiueliskej, maj ika tikinojnotsakan toDios tein yolkuali uan ueyichiujkej uan iKoneuj Jesucristo. Komo tikchiuaj nochi nejin, uelis tinemiskej nochipaya itech yankuik xochital tein Dios kiualkuiti nikan Taltikpak.

Juan 17:3; Salmo 145:1-21.