1-3. 1) ¿Keyej temomauan kiyekitaj imin koneuan maj chipaujkej uan maj kipiakan se kuali neketsalis? 2) ¿Keyej Jiova kineki maj tiitekitikauan timopiakan tichipaujkej, uan toni techolinia maj ijkon tikchiuakan?

ACHTO ke se konetsin yas kansaika, temomaj kiyekita maj mopaka uan maj kiuika chipauak itaken uan maj kuali moita. ¿Keyej? Yekinika, porin kiajsikamati ke komo mochipaua, kipaleuia maj kualtsin moskalti, uan ojpatika porin kimati ke ika ineketsalis konetsin, uelis kuali ika motajtos itatuan oso amo.

² Jiova kineki maj tiitekitikauan no timopiakan tichipaujkej. Kemaj, ta itech Biblia techiluia ke monextis chipauak “iuan akin chipauak” (Salmo 18:26). * ¿Keyej techteliluia Jiova  maj timochipauakan? Yekinika porin techtasojta uan kimati ke kuali techyas. Uan ojpatika, porin ika toneketsalis kemej tiiTaixpantijkauan, kichiuas maj taltikpakneminij kuali ika tajtokan Jiova. Tein melauj, tejuan amo tiknekij tikmouispoloskej Dios niono itokay tein chipauak. Ta tiknekij tikueyitaliskej uan yejika moneki tikpiaskej chipauak toneketsalis uan totachiualis (Ezequiel 36:22; xikonixtajtolti 1 Pedro 2:12).

³ ¿Toni techolinia maj tiksentokakan timopiakan tichipaujkej? Yekinika, porin tikmatij ke Dios kintasojta akin chipaujkej. Ojpatika, porin tiktasojtaj Jiova uan tiknekij maj kiueyitali nochi tein tikchiuaskej itech tonemilis. Uan expatika, porin tiknekij tiksentokaskej itech inetasojtalis Dios. Yejika, maj tikitakan keyej motelneki maj timochipauakan, kani ajsi uan keniuj uelis tiksentokaskej timopiaskej tichipaujkej. Nejin techpaleuis maj tikitakan komo moneki timotekitiliskej itech seki taman.

4, 5. 1) ¿Toni okachi techolinia maj timochipauakan? 2) ¿Keniuj kinextia nochi tein Jiova kichijchiuak ke kineki maj nochi chipauak?

⁴ Se taman kemej Jiova technextilia maj timochipauakan, yejua neskayot tein techkauilia. Kemaj, ta Biblia techiluia maj “tiyolchipaujkej ijkon kemej yejuatsin yolchipauak” (Efesios 5:1). Ika tein kijtoua nejin texto, ¿toni okachi techolinia maj timochipauakan? Tikmatiskej ke tikueyichiuaj Jiova akin senkis yektik uan chipauak (xikonixtajtolti Levítico 11:​44, 45).

⁵ Keman tikmouisouaj nochi tein Jiova kichijchiuak, tikitaj ke yejuatsin chipauak, uan no technextilia keniuj tamati yejuatsin uan itachiualisuan (Romanos 1:20). Se neskayot, maj ika titajtokan taltikpak kampa tinemij. Jiova kitalij tein tapaleuis maj poliui tein pitsotik. Kitalij seki taman tein kichipauas ejekat uan at. Uan no, kinchijchiuak seki microbios tein kikuaj tein amo kualtiaok oso tein pitsotik, uan kikepaj teisa tein amo teijtakouaok. Kemej tel kuali kichiuaj tekit, hasta tamatinij no kinkuij uan kintachipaualtiaj itech ueyiamej tein pitsotik oso okseki taman tein kijtakojkej taltikpakneminij porin xijxikuimej uan yejuansaj motasojtaj. Moyekita ke Jiova “akin  kichijchiuak taltikpak” kiita ke motelneki maj nochi chipauak (Jeremías 10:12). ¿Melauj ke no ijkon moneki maj tikitakan?

6, 7. ¿Keniuj kiyeknextij Tanauatil tein kiselij Moisés ke itekitikauan Jiova monekia mopiaskej chipaujkej?

⁶ ¿Toni okse taman techolinia maj timochipauakan? Tikmatiskej ke Jiova toueyiTayekankauj, nochipa kineki maj itekitikauan chipaujkej. Se neskayot, Tanauatil tein kinimakak israelitas kinextiaya ke tein chipauak moteluika iuan taueyichiualis. Monekia maj tayekankej tiopixkat ojpa mopakani achto ke tekitiskia itech Tonal keman Moixtsakuaya Tajtakolmej (Levítico 16:4, 23, 24). No kinextiaya ke nochin tiopixkamej monekia momapajpakaskej uan mometspajpakaskej, achto ke kimakaskiaj Jiova tapialmej kemej nemaktilmej oso netetayokolilmej (Éxodo 30:17-21; 2 Crónicas 4:6). No kijtouaya kemej 70 tachiualismej tein se israelita kiuikaya maj mopitsotili inakayo. Keman ijkon moajsia, amo uelia teuantia itech niose taman taueyichiualis, uan kemansa hasta ueliskia kipoloskia inemilis (Levítico 15:31). Uan no, Tanauatil kijtouaya ke akin mopitsotiliskia, monekia kichiuas miak taman, tein iuantia mopakas uan kipakas itaken; uan komo amo kichiuaya, “moneki[a] ixpoliuis itech nechikol” (Números 19:17-20).

⁷ Maski Tanauatil tein kiselij Moisés amo kipiaok ichikaualis, techpaleuia maj tikajsikamatikan tein kinemilia Dios. Itech nejin tanauatil, kiyeknextiaya ke motelnekia maj mopianij chipaujkej akin kiueyichiuayaj. Uan yejuatsin amo mopatatok (Malaquías 3:6). Axkan kemej achto, sayoj kiselia taueyichiualis “ten chipauak” uan tein amo pitsotik (Santiago 1:27). Yejika, moneki maj tikitakan tein Dios kichia maj tikchiuakan axkan.

8. ¿Itech toni taman kichia Jiova maj tichipaujkej?

⁸ Biblia kinextia ke amo sayoj moneki timochipauaskej itech tonakayo. Ta kinextia ke komo tiknekij timopiaskej tichipaujkej iixpan Dios, moneki maj nion teyi ika timopitsotilikan itech tonemilis. Kemaj, Jiova kichia maj timopiakan tichipaujkej  itech naui taman: itech totaueyichiualis, tonemilis, totanemilil uan itech tonakayo. Maj tikitakan sejse toni kijtosneki.

9, 10. ¿Toni kijtosneki maj chipauak totaueyichiualis, uan itech toni amo titeuantij tein tikchiuaj kemej Cristo?

⁹ Maj chipauak totaueyichiualis. Nejin kijtosneki maj amo tikmanelokan taueyichiualis tein melauak iuan tein amo melauak. Maj tikinelnamikikan israelitas tein moajsiaj temako Babilonia. Keman kisaskiaj uan yaskiaj Jerusalén, monekia kitakamatiskej nejin tanauatil tein kinimakak Dios: “¡Xikisakan, amo xikmatokakan nion teyi tein pitsotik! [...] Ximopiakan nanchipaujkej” (Isaías 52:11). ¿Keyej yaya mokepatij Jerusalén? Yekinika, porin oksepa yaya kiueyichiuatij Jiova ompa. Yejika, taueyichiualis tein kimakaskiaj monekia maj chipauak, maj amo kimanelouanij ika nochi tein pitsotik tein Dios amo kiitstani, tein iuantiaya tamachtilismej, tachiualismej uan costumbres tein ualeuayaj itech imin taneltokalis babilonios.

¹⁰ Axkan tein tikchiuaj kemej Cristo, no moneki timotelpiaskej maj amo tikmanelokan taueyichiualis tein melauak iuan tein amo melauak (xikonixtajtolti 1 Corintios 10:21, NM). Kemej noyan moita ichikaualis, komo amo timoyekpiaj uelis techijtakos. Kemaj, ta itech miak altepemej kipiaj uejkaujtalnamikilismej, tachiualismej uan taueyichiualis tein ualeua itech tamachtilis tein amo melauak, uan semej yejua tein kineltokaj ke ijkuak aksa momikilia youi nemiti kansaika (Eclesiastés 9:5, 6, 10). Sayoj ke tein yekmelauj tikchiuaj kemej Cristo, amo titeuantij itech costumbres tein ualeuaj itech taneltokalis tein amo melauak. * Yejika maj amo timokauakan maj oksekin techchiualtikan maj tiktapanauilikan tanauatilmej itech Biblia, tein techpaleuia maj chipauak totaueyichiualis (Hechos 5:29).

11. ¿Toni kijtosneki maj chipauak tonemilis, uan keyej motelneki?

¹¹ Maj chipauak tonemilis. Nejin kijtosneki maj tikauakan tachiualismej tein amo kuali, semej yejua nochi taman auilnemilis. Uan nejin motelneki tikchiuaskej komo tiknekij  tiksentokaskej itech inetasojtalis Dios (xikonixtajtolti Efesios 5:5). Kemej tikitaskej itech okse capítulo, tein tikchiuaj kemej Cristo motelneki maj ‘tikcholuikan auilnemilis’. Kemaj, ta akin auilnemij uan amo moyolnonotsaj, “amo yetoskej itech iTekiuajyo Dios” (1 Corintios 6:9, 10, 18, NM). Jiova kinita ke “tetajyaltijkej porin pitsotikej”, uan komo amo mochipauaj kiseliskej “ojpatika mikilis” (Revelación [Apocalipsis] 21:8, NM).

12, 13. ¿Toni techchiualtia tanemililmej, uan toni techpaleuis maj tiksentokakan tikpiakan chipauak totanemilil?

¹² Maj chipauak totanemilil. Tanemililmej techuika maj tikchiuakan teisa. Komo tikauaj maj ixua amo kuali tanemililmej itech totsontekon uan toyolo, techuikas maj tikchiuakan teisa tein pitsotik (Mateo 5:28; 15:18-20). Sayoj ke komo tikpexontiaj tanemililmej tein kuali uan tein chipauak, techuikas maj timonejnemiltikan timelaujkej (xikonixtajtolti Filipenses 4:8). ¿Toni techpaleuis maj tiksentokakan tikpiakan chipauak totanemilil? Yekinika, maj tikixtopeuakan neixpetanilis tein kipitsotilia totanemilil. * Uan ojpatika, moneki mojmostaj timomachtiskej Biblia, ta nejon techpaleuis maj tikpiakan kuali tanemililmej (Salmo 19:8, 9).

¹³ Kemej tikitakejya, komo tiknekij tiksentokaskej itech inetasojtalis Dios, moneki timopiaskej tichipaujkej itech totaueyichiualis, itech tonemilis uan itech totanemilil. Nejin eyi taman okachi ika motajtos itech okseki capítulos tein kipia nejin amaix. Sayoj ke axkan maj ika titajtokan tein ika naui; maj chipauak tonakayo.

14. Xikonmelaua keyej maj amo tiknemilikan ke amo akin itekiuj komo timochipauaj oso amo.

¹⁴ Motelneki maj timopiakan tichipaujkej itech tonakayo uan kampa tinemij. Sekin kinemiliaj ke amo akin itekiuj komo se mochipaua oso amo. Sayoj ke akin kichiua kemej Cristo, moneki maj amo ijkon kinemili. Kemej tikitakej achto, Jiova  kineki maj timochipauakan amo sayoj porin kuali techyoui, ta no porin kiniuika oksekin maj kuali ika tajtokan Jiova. Maj tikelnamikikan konetsin tein ika titajtojkej achto. Komo nochipa taloj nentinemiskia uan amo kipiaskia kuali ineketsalis, ¿melauj ke amo kuali ika motajtoskia itatuan? No ijkon, komo amo kuali tikpiaskiaj toneketsalis oso tonemilis, ¿melauj ke amo kuali ika motajtoskia Jiova uan totanojnotsalis? Moneki nochipa tikelnamiktoskej nejin tajtolmej tein Dios kichiuak maj moijkuilo: “Amo teyi tiktaliaj tenika uelis tikintsajtsakuilijtiyaskej oksekin [...]. Ika ya nojon amo aken uelis techtejteneujtinemiskej [...]. Ta, tejuan timofuerzajuiaj de titanextilijtiyaskej ke tejuan tiitekitikauan de Dios” (2 Corintios 6:3, 4). Yejika maj tikitakan toni kijtosneki maj timopiakan tichipaujkej itech tonakayo uan kampa tinemij.

15, 16. ¿Toni iuantia se mochipauas itech se inakayo uan kampa tinemij, uan keniuj moneki eski totaken?

¹⁵ Maj chipauak tonakayo uan toneketsalis. Eski timaseualmej  oso tinemiskej itech se ueyi xolal, tikpiaskej tomin oso kemej uelisaj tiixpanoskej, moneki mojmostaj timopakaskej. Tel miakkan kampa tinemij, tikpiaj at uan xapoj tein ika timochipauaskej tejuan uan tokoneuan. No moneki se momapajpakas achto ke se takuas oso se kichijchiuas tapalol, uan satepan ke se yas nekalauiloyan oso se kitapatilis se pilkonet. Nejin tapaleuia maj amo momiakili virus uan okseki microbios tein tekokolismakaj kemej poxkokolis, uan no tapaleuia maj amo se miki. Komo kampa tinemij amo tikpiaj se nekalauiloyan moneki maj tikchijchiuakan se (Deuteronomio 23:12, 13).

¹⁶ No moneki maj nochipa tikpakakan totaken. Tein okachi tayekantok, amo maj tel patiyoj oso maj yankuik, ta maj chipauak uan maj kuali moita (xikonixtajtolti 1 Timoteo 2:​9, 10). Nochipa uan kampa yeski tiyetoskej, tiknekij maj toneketsalis ‘kikualnexti in tanextililismej de Totajtsin Dios Totemakixtijkatsin’ (Tito 2:10).

17. ¿Keyej moneki maj tayekyeto uan maj tikchipaujtokan tochan uan okseki taman tein tikpiaj?

¹⁷ Maj tikchipauakan tochan uan tein tikpiaj. Moneki tikchiuaskej nochi tein tiueliskej maj tachipaujkan tokalijtik uan maj tayekyeto. Nejin moneki tikchiuaskej eski tikpiaskej se kuali kali oso kemej uelisaj. No moneki tikchipauaskej totepos kalampa uan taijtik, uan okachiok komo ika tiyouij nechikolmej oso titanojnotsatij. Tein melauj, moneki maj tikchipauakan nochi tein tikpiaskej. Ika nejon, kiniuikas oksekin maj kuali ika tajtokan Dios. Nejin motelneki tikchiuaskej, porin titamachtiaj ke kemej Jiova kitasojta tein chipauak, ‘kintajtamis nekes ten taijtakojtinemij nikan taltikpak’, uan kitekitiltis iTekiuajyo maj kichiua se xochital (Apocalipsis 11:18; Lucas 23:43, NM). Yejika, moneki tikchipaujtoskej tochan uan tein tikpiaskej, ijkon moitas ke tikchiujtokejya kemej monekis tikchiujtoskej itech xochital.

18. ¿Keniuj tiknextiaj ke tikpoujkaitaj toKalnechikol?

¹⁸ Maj tikchipauakan toKalnechikol. Kemej tiktasojtaj Jiova, techolinia maj tikpoujkaitakan toKalnechikol. Tiknekij maj nochipa tachipaujkan uan maj kuali kiitakan akin techkalpanouaj.  Kemej tiknekij maj nochipa kuali moita, moneki titachipauaskej kemej ixyetok keniuj se tachipauas uan tikyektaliskej keman monekis. Keman titapaleuiaj itech nejin tekit, tiknextiaj ke tikpoujkaitaj kali kampa tikueyichiuaj Jiova ika chipaujkayot. Yekmelauj se ueyi tatiochiualis tikchipauaskej, ‘tikyektaliskej uan tikyekchijchiuaskej’ kali kampa timonechikouaj (2 Crónicas 34:10). Uan nejin no moneki tikchiuaskej itech kalmej kampa tikpiaj toueyinechikoluan.

19. ¿Toni moneki amo tikchiuaskej uan ijkon amo tikpitsotiliskej tonakayo, uan keniuj techpaleuia Biblia itech nejon?

¹⁹ ¿Toniok iuanti se mochipauas itech se inakayo? Moneki se kiixtopeuas nochi taman tein kijtakos uan kipitsotilis se inakayo. Yejika amo titachichinaj, amo titeltayij tayil tein teiuintij, niono tikuij komo amo ika timopajtitij teisa tein satepan mochiua kemej se vicio uan teijtakoua. Maski itech Biblia amo ixnesi itokay nochi taman vicios tein motelita axkan, kemaj kipia principios tein techpaleuia maj tikajsikamatikan keyej Jiova kiita ke pitsotikej uan amo kiitstani. Axkan maj tikitakan makuil principios tein tiknekij tiktojtokaskej porin tiktasojtaj Dios uan tein techpaleuis maj techseli.

20, 21. ¿Toni kineki Jiova maj tikixtopeuakan, uan toni techiluia tein techolinia maj tikauakan?

²⁰ “Notasojikniuan, xikitakan de keniuj Totajtsin Dios moyektenkauak touan [...]. Ika por nijin tajtolmej moneki maj tiksentokakan tichipaujkanentinemikan [...]. Porin ne tajtakolnemilis techmaujtinemi ika tajtakol tech totakayo [oso tonakayo] uan tech totalnamikilis.” (2 Corintios 7:1.) Kemej tikitaj, Jiova kineki maj tikixtopeuakan nochi taman tein kipitsotilis “tonakayo” oso kijtakos “totalnamikilis”. Yejika tikauaj nochi taman tein teuika maj se kikui kemej se vicio tein tekokolismaka uan tein kijtakoua se itanemilil.

²¹ Itech nejin texto, techiluia se taman keyej moneki maj ‘tiksentokakan tichipaujkanentinemikan’ itech nochi. Tikitaj ke ipeujyan 2 Corintios 7:1 kijtoua: “Xikitakan de keniuj  Totajtsin Dios moyektenkauak touan”. ¿Toni motenkaua touan? Tein tikajsij itech seki versículos achto: “Nejuatsin namechchiua ke nannoaxkauan ya. Uan Nejuatsin niyeski ninamotat” (2 Corintios 6:17, 18). ¡Tel kualtsin! Motenkaua ke techyekpias kemej se tepopaj tetasojtakej kiniyekpia ikoneuan. Sayoj ke techiluia ke techyekpias komo tikauaj “tajtakolnemilis [tein] techmaujtinemi ika tajtakol tech totakayo [oso tonakayo] uan tech totalnamikilis”. Tel amo kuali eskia komo se vicio tein amo kiitstani Jiova, tikauaskiaj maj kijtako tatiochiualis tein tikpiaj maj tel kuali timouikakan iuan.

22-25. ¿Katiyejua principios tein kipia Biblia techpaleuia maj amo tiuetsikan itech vicios?

²² “Xiktasojta moueyitekotsin Totajtsin Dios ika nochi moyolo, uan ika nochi motanejnekilis, uan ika nochi motanemililis.” (Mateo 22:37.) Jesús kijtoj ke yejua nejin tanauatil tein okachi ueyi (Mateo 22:38). Kemaj, Jiova kinamiki maj tiktasojtakan ika nochi toyolo, ika nochi totanejnekilis, uan ika nochi totanemilil. Nejin kijtosneki ke moneki tikauaskej nochi taman tein kichiuas maj okachi niman timomikilikan, oso tein kijtakos totanemilil tein Dios techtayokolijtok.

²³ ‘[Jiova] techmakatok tonemilis, toijiyo uan nochi tein tikpiaj tomako ya.’ (Hechos 17:24, 25.) Kemej tonemilis techtayokolijtok Dios akin techtasojta, tein tikchiuaj kemej Cristo tiktelpatiuitaj. Yejika tikauaj nochi taman tein tekokolismaka. Komo amo tikchiuaskiaj tiknextiskiaj ke nion tepitsin tikpatiuitaj nemilis (Salmo 36:9).

²⁴ “Xiktasojta moknitsin ijkon kemej tejuatsin timotasojta.” (Mateo 22:39.) Keman aksa kipia se vicio, tel miakpa amo sayoj yejua moijtakoua, ta no akin imiuan moajsi. Se neskayot, keman aksa tachichina uan imiuan yetok oksekin, yejuan no kijyotilanaj pokti. Akin kichiua nejon kitapanauilia itanauatil Dios tein kijtoua maj se kitasojta se iknitsin, uan kinextia ke amo melauak kitasojta Dios (1 Juan 4:20, 21).

²⁵ “[Xi]kintakamatiyakan ne uejueyi tayekananij uan tekiuanij.” (Tito 3:1.) Kemej itech miak altepemej se kitapanauilia imin tanauatil tekiuanij komo se kipia oso se kikui drogas,  yejika tein tikchiuaj kemej Cristo amo titeuantij itech nejon (Romanos 13:1).

26. 1) ¿Toni moneki tikchiuaskej komo tiknekij tiksentokaskej itech inetasojtalis Dios? 2) ¿Keyej uelis tikijtoskej ke amo teyi ijkuitik maj se kipia se nemilis chipauak iixpan Dios?

²⁶ Komo tiknekij tiksentokaskej itech inetasojtalis Dios, moneki maj amo sayoj timochipauakan itech seki taman tein tikchiuaj itech tonemilis, ta itech nochi taman. Semi melauak ke ouij se kikauas se vicio uan maj amo oksepa se uetsi itech, sayoj ke kemaj uelis se mokixtilis. * Amo teyi ijkuitik maj se kipia se nemilis chipauak. ¿Keyej? Porin Jiova kimati ke kuali techyas, yejika techtajtania maj timochipauakan (xikonixtajtolti Isaías 48:17). Uan no, techyolpaktia tikmatiskej ke titapaleuiaj maj kuali ika motajto Dios akin techteltasojta uan tikteltasojtaj.