1, 2. ¿Toni moneki tikchiuaskej tein techpaleuis maj tichikaujtokan uan maj tipaktokan, uan keyej motelneki?

TINOCHIN tiknekij tichikaujtoskej uan tipaktoskej. Sayoj ke tein techpaleuis maj ijkon tiyetokan, moneki tikuaskej takual tein techmakas chikaualis, tikchiuaskej miak ejercicios, uan nochipa timoyekpiaskej. Sayoj ke moneki se chikaujkayot, ta komo timosenkauaj, uelis kijtakos tonemilis. Moajsi okse taman tein moneki tikchikaujtoskej. ¿Toni nejin?

² Momachtijkej Judas kijtoj toni moneki tikchikaujtoskej. Maj tikitakan achto versículo kampa kiniluia itatojtokakauan Cristo maj ‘kisentokakan itech inetasojtalis Dios’. Ompa kijtoua ke uelis kichiuaskej nejon, komo ‘kichikauaj inintakuaujtamatilis itech Dios’ (Judas 20, 21, NM). ¿Toni uelis tikchiuaskej tein techpaleuis maj mochikaua totakuaujtamatilis uan tiksentokaskej itech inetasojtalis Dios? Maj tikitakan eyi taman.

3-5. 1) ¿Keniuj kineki Satanás maj tikitakan itanauatiluan Jiova? 2) Keniuj moneki tikitaskej itanauatiluan Jiova uan keniuj timomachiliskej komo ijkon tikitaj? Xikontali se neskayot.

³ Yekinika taman, moneki maj tikchikauakan totakuaujtamatilis itech itanauatiluan Jiova. Itech nejin amaix ika timomachtijkejya miak itanauatiluan melaujkej tein techiluia keniuj timonejnemiltiskej. Sayoj ke moneki timotajtaniskej:  ¿keniuj tikitaj nejon tanauatilmej? Satanás kiyolpaktiskia maj tikmachilikan ke principios uan tanauatilmej tein techmaka Jiova, kemej eskia techkitskijtok uan niono techkaua maj timoolinikan. Kemej kiitak ke ika nejin takajkayaualis uelik ika kiniuetsiltij itech xochital tein moajsia Edén, kisentoka kitekitiltia (Génesis 3:1-6). Sayoj ke, ¿uelis techkajkayauas tejuan? Komo kuali tikseliaj itanauatiluan Jiova, amo techuetsiltis.

⁴ Maj tiktalikan se neskayot. Maj timonemilikan ke timoixpetanitij kansaika kampa tel takualtsinkan, uan tikitaj ke yetok se tatsakuil uejkapan uan chikauak tein techtsakuilia maj amo tipanokan nepakaok. Keman yekinika tikitaj amo tikuelitaj, sayoj ke keman okachi tinaltachiaj, tikitaj ke ichtaka tapijpixtok se tekuani. Axkan kemaj tikajsikamatij ke nejon tatsakuil yetok porin amo kinekij maj techkua. Sayoj ke ¿yekmelauj moajsi se tekuani? Kemaj, ta Biblia tanejmachtia: “Ximoyektachilijtokan porin ne amokuali Satanás namechtauelitstinemi, uan yejua ne tsajtsitinemi uan namechyoualojtinemi kemej yeskia se kuoujtajtekuani ten kitemojtinemi akoni kixijxikos” (1 Pedro 5:8).

⁵ Kemaj, Satanás se tekuani tein tel tamouilil. Uan Jiova techmaka tanauatilmej tein techpaleuia maj amo tiuetsikan itech “nochi ne [i]takajkayaualis” (Efesios 6:11). Yejika, keman titanemiliskej itech nejon tanauatilmej, maj timochikauakan tikitaskej ke toTajtsin techmaka porin techteltasojta. Tikajsikamatij ke techmaka porin techpaleuia uan techualkuilia yolpakilis. Yejika momachtijkej Santiago kijkuiloj ke akin “momachtijtinemi [...] [uan] kitakamatinemi [...] ne chipaktsin tanauatil de Dios [...] [tein] techtojtontinemi [...,] [kipias] ueyi pakilis” komo kichiua kemej momachtia (Santiago 1:25).

6. ¿Keniuj okachi kuali tikchikauaskej totakuaujtamatilis itech tanauatilmej uan principios tein Dios techmaka? Xikontali se neskayot.

⁶ Tein okachi techpaleuis maj tikchikauakan totakuaujtamatilis itech tanauatilmej, uan itech Jiova toUeyi Tetanauatilmakakauj, moneki maj nochipa tikchiuakan tein technauatia. Nejin iuantia tiktakamatiskej “tanauatil de Cristo”. Semej yejua tein technauatia maj ‘titamachtikan tanextililismej tein  technajnauatia’ (Gálatas 6:2; Mateo 28:19, 20). Tiitatojtokakauan Cristo techyolmajxitiaj ke moneki timonechikoskej uan ijkon tikueyichiuaskej Dios uan timoyolchikauaskej se iuan okse, uan nejin tikitaj ke motelneki (Hebreos 10:24, 25). Okse tanauatil tein Dios techmaka, yejua tein techiluia maj nochipa tikchiuakan netataujtil ika nochi toyolo (Mateo 6:5-8; 1 Tesalonicenses 5:17). Keman tiktakamatij nejin tanauatilmej, okachi senkis tikneltokaj ke Jiova techteltasojta. Tikajsikamatij ke techualkuilia yolpakilis uan yolseuilis, se teisa tein amo keman uelis tikajsiskej itech nejin taltikpak kampa tel amo takualyan. Kemaj, totakuaujtamatilis itech itanauatiluan Jiova mochikaua keman tiknemiliaj ke techtelpaleuia ijkuak tiktakamatij.

7, 8. ¿Keniuj iTajtol Dios kiniyolseuia akin kinemiliaj ke ouij kinkisas kitekitiliskej nochi xiujmej?

⁷ Kemansa sekin motekipachouaj porin kinemiliaj ke ouij kinkisas kitakamatiskej itanauatiluan Jiova nochi xiujmej, uan kimouiliaj maj tajtakokan. Komo techejko nejon tanemililmej, moneki tikelnamikiskej nejin tajtolmej: “Nejua, Jiova, nimoDios, Akin mitsmachtia tein tejua mitspaleuis, Akin mitsixyekana itech ojti kampa moneki tinejnemis. ¡Komo yekmelauj tiktakamati notanauatiluan! Moyolseuilis yeski kemej se ueyiat, uan momelaujkayo yeski kemej olas itech ueyiat” (Isaías 48:17, 18).  ¿Kemansa timonemilianij yolseuilis tein kitemaka nejin tajtolmej?

⁸ Nikan Jiova motenkaua ke komo tiktakamatij tikpiaskej ome tatiochiualismej. Yekinika, toyolseuilis eski kemej se río: tein seujtok, tel miak uan nochipaya. Ojpatika, tomelaujkayo eski kemej olas itech ueyiat. ¿Toni kijtosneki? Komo tejuan tiyouij ueyiatenoj uan ompa tikitstokej, tikitaj ke olas uitse se uan okse. Nejon techtanemililtia ke nochipa ijkon mochiujtos. Tikmatij ke moajkotamottos atenoj nochi xiujmej. Yejika, itech nejin tajkuilol technextilia ke tomelaujkayo —tein kijtosneki tikchiuaskej tein melauak itech tonemilis— nochipa tikpiaskej. Komo timochikauaj tiktekitiliaj Jiova nochipaya, amo keman techkauas maj tiuetsikan (xikonixtajtolti Salmo 55:22). Yejika, tikitaskej nejin netenkaualis tein techyolseuia, techpaleuia maj tikchikauakan totakuaujtamatilis itech Jiova uan itech itanauatiluan tein melaujkej.

9, 10. 1) ¿Keyej tel kuali maj tinochin tikchikauakan toyekuikalis iuan Dios? 2) ¿Keniuj techpaleuia maj tikitakan teisa kemej Dios kiita?

⁹ Ojpatika taman, moneki tikchiuaskej kemej kijtoua nejin itajtoluan Dios: “Maj tikchikauakan toyekuikalis iuan Dios” (Hebreos 6:1, NM). Nejin tinochin uelis tikchiuaskej, amo kemej timokixtiliskej tajtakol itech nejin tonalmej, ta tikmatij ke amo akin ueli kichiua. Uan ijkon kemej tikchikaujtiaskej toyekuikalis iuan Dios, okachi tikuelitaskej tiktekitiliskej Jiova. ¿Keyej?

¹⁰ Akin kipia se kuali yekuikalis iuan Dios, kiita teisa kemej yejuatsin kiita (Juan 4:23). Pablo kinextij ke “ten moyekantinemij ika ne chikaualis de nintalnamikilis de tajtakol, [...] sayoj yoltanemilijtinemij itech [...] nintalnamikilis de tajtakol. Pero [...] ten moyekantinemij ika ne chikaualis den Yektikatsin Espíritu, [...] sayoj yoltanemilijtinemij itech nintamachilis ten kualkui in Yektikatsin Espíritu” (Romanos 8:5). Akin tanemiliaj kemej se taltikpaknenkej tein amo kitekitilia Dios, amo ueli kipiaj yolpakilis porin itech imin nemilis sayoj kiitaj  maj mochiua imin tanejnekilis, amo kipiaj nechialis uan sayoj kinemiliaj motomintiskej. Sayoj ke akin kiitaj teisa kemej Dios kiita, tel yolpakij, ta nochi tein kichiuaj mouika iuan itanejnekilis Jiova, “Dios tein yolpaki” (1 Timoteo 1:11, NM). Kinekij kiyolpaktiskej uan yolpakij maski kipanouaj tayejyekolis. ¿Keniuj ueli mochiua nejon? Porin kimatij ke komo amo kikauaj Dios maski tajyouiaj, kinextiaj ke Satanás se xolopij uan kiyolpaktiaj Jiova (Proverbios 27:11; xikonixtajtolti Santiago 1:2, 3).

11, 12. 1) Xikonmelaua toni techiluia Pablo maj tikchiuakan ika ‘totanemilil’, uan toni kijtosneki tajtol griego tein mokepa kemej ‘tamachtil’. 2) ¿Keniuj uelis konetsin kimachtis inakayo maj tekiti kemej moneki uan hasta kichiualtis tein kinekis?

¹¹ Sayoj uelis tikchikauaskej toyekuikalis iuan Dios komo timotekitiliaj. Ijkon kinextia nejin tajtolmej tein kipia Biblia: “In [“chikauak”, NM] tapaloltsin kipaleuia in takaj uan siuamej ten [...] yek yolmajsitokkej ya ika nintakuaujtamatilis. Uan [kemej] [“kimachtijtokej inin tanemilil”, NM] yejuan kuali uelij ya kixejekojtiyaskej de toni kuali tamachilis uan de toni amokuali tamachilis” (Hebreos 5:14). Pablo kinextia ke moneki ‘tikmachtiskej’ totanemilil. Uan kikui se tajtol griego tein pane kikuiaj akin yayaj gimnasio itech yekinika siglo ne Grecia, porin kijtosnekia “tamachtil kemej se gimnasta”. Axkan maj tikitakan toni monekia kichiuaskej.

¹² Keman tiyolij, tonakayo amo tamachtil. Se konetsin amo kiyekmati kani kipia imauan oso imetsuan, amo kitekitiltia imauan kemej moneki, uan hasta moixtatsinia sayoj ke amo kimati akoni kichiuak nejon uan mokualantia. Sayoj ke yolik kimachtijtiuj inakayo ijkon kemej kisentoka kiolinia: yekinika manejnemi, ompa kitemaka se ome eyi taksalis uan satepan ueli motaloua. * Uan amo ompa tami, ta uelis okachi kimachtis inakayo. Nejin nesi itech se gimnasta. Keman tikitaj  ke kuali uejkapan ajkotsikuini, momalakachoua ejekaixko uan kikisa kemej moneki, senkis tikneltokaj ke monekik tel miak horas uan miak tonalmej kimachtis inakayo. Biblia kinextia ke tel tapaleuia “kuak tikmachtiaj [...] totakayo [oso tonakayo] maj molini uan maj techtakamati ika kuali ijkon kemej tejuan tiknekij”, sayoj ke kinextia ke okachi tel tapaleuia maj tikmachtikan totanemilil (1 Timoteo 4:8).

13. ¿Keniuj uelis tikmachtiskej totanemilil?

¹³ Itech nejin amaix tikitakejya miak tajtolmej tein techpaleuia maj tikmachtikan totanemilil uan ijkon tikmatiskej ox kuali yetok teisa oso amo. Ika nejin uelis tikitaskej teisa kemej Dios kiita uan amo keman tikauaskej. Nochipa keman tiknemiliskej tikchiuaskej teisa, ika itapaleuil netataujtil, maj tikitakan principios uan tanauatilmej tein techmaka Dios. Maj timotajtanikan: “¿Katiyejua tanauatilmej oso principios nechpaleuis itech nejin? ¿Keniuj uelis nikchiuas kemej kijtoua? ¿Kiyolpaktis noTajtsin tein niknemilia nikchiuas?” (xikonixtajtolti Proverbios 3:​5, 6; Santiago 1:5). Komo timomachtiaj timotajtaniskej nejin, yolik tikmachtijtiaskej totanemilil. Ijkon okachi mochikaujtias toyekuikalis iuan Dios uan tikitaskej teisa kemej yejuatsin kiita.

14. Komo tiknekij maj kisentoka moskalti toyekuikalis iuan Dios, ¿toni taman moneki kemej eskia tikueliliskej, uan toni taman tanemilil moneki tikixtopeuaskej?

¹⁴ Maski tikpiaskejya chikauak toyekuikalis iuan Dios, moneki tiksentokaskej tikchikaujtoskej. ¿Keniuj uelis tikchiuaskej? Motelneki maj tikyekitakan toni ika timotamakaj. Tikitakejya ke Pablo kinextij ke “in [“chikauak”, NM] tapaloltsin kipaleuia in takaj uan siuamej ten [...] yek yolmajsitokkej ya ika nintakuaujtamatilis”. Yejika, tein techpaleuis maj totakuaujtamatilis  mochikaua, moneki maj tikmajseuakan chikauak tapaloltsin tein Dios kitemaka. Uan no, moneki tikpiaskej tamatilis, tein kijtosneki, tikchiuaskej tein timomachtiskej. Uan nejon motelneki, ta kemej Biblia kinextia “tamatilis yejua tein okachi moneki”. Yejika, maj timomachtikan kemej eskia tikueliliskej kualtsitsin tamachtilis tein Dios techmaka (Proverbios 4:5-7; 1 Pedro 2:2). Sayoj ke maski tikpiaskej ueyi taixmatilis uan tamatilis, maj amo timoueyinekikan ika nejon. Nochipa monekis tikyekitaskej maj amo ixua itech toyolo ueyinekilis uan okseki amo kuali tanemililmej. Ijkon kinextij Pablo keman kijtoj: “Ximoyoltatemolikan ika nejmach para nankitaskej kox melauj nankipiaj ok takuaujtamatilis” (2 Corintios 13:5).

15. ¿Keyej motelneki maj tikpiakan netasojtalis komo tiknekij tiksentokaskej tikchikauaskej toyekuikalis iuan Dios?

¹⁵ Maski aksa kualtsin chikaujtok uan paktok, moneki kisentokas motamakas uan moyekpias. No ijkon panoua ika toyekuikalis iuan Dios. ¿Toni techpaleuis maj tiksentokakan tikpiakan chikauak toyekuikalis uan maj okachi moskalti? Tein okachi tayekantok yejua netasojtalis. Kemaj, netasojtalis tein tikpialiaj Jiova uan tokniuan moneki mochikaujtias. Komo amo tikpiaskiaj, nochi taixmatilis uan totachiualisuan, amo teyi kualtiaskia uan kinkuejmoloskia oksekin (1 Corintios 13:1-3). Kemaj, netasojtalis techtelpaleuia maj tikchikauakan toyekuikalis iuan Dios uan maj tikitakan teisa kemej yejuatsin kiita.

16. ¿Toni taman tanemililmej kimoyaua Satanás, uan toni nepaleuil techmaka Jiova?

¹⁶ Expatika taman, moneki tikyekpiaskej totanemililuan uan ijkon uelis timochiuaskej yekmelauj itatojtokakauan Cristo. ¿Keyej? Porin Satanás akin taixyekana nikan taltikpak, kitelmati kimoyauas tanemililmej tein teyolkokoj, tein amo teyolchikaua, tein kitamia se itakuaujtamatilis itech oksekin, uan tein teuika maj se tel yolijsiui (Efesios 2:2). Uan nejon tanemililmej  tel tamouililmej ijkon kemej okuilimej tein kikuaj kuouit tein ika chijchiujtok se kali. Sayoj ke Jiova techmakatok se teisa tein techpaleuis, uan nejin yejua nechialis.

17. ¿Keniuj kijtoua Biblia ke tamati nechialis, uan keyej motelneki?

¹⁷ Biblia kijtoua ke nemakixtilis tein ‘tikyolikachixtiyouij’, techtelpaleuia itech neteuil tein tikpiaj iuan Satanás uan nochi tein iaxka. Kijtoua ke ijkuitik kemej se “teposkuatsakuiloni” (1 Tesalonicenses 5:8). Ne uejkauj, se soldado mokuatapechtiaya ika taken oso kuetax uan mokuataliliaya teposkuatsakuiloni, uan ijkon keman kimotaskiaj, ompasaj motsakuiliskia uan amo kixokoliskia. Kimatia ke komo amo kiuika nejon itech neteuil, tel ijsiujka tapoloskia. Ijkon kemej nejin tepos kitsakuaya itsontekon tateuijkej, nechialis kitsakua totanemililuan.

18, 19. ¿Keniuj kinextij Jesús tein kijtosneki se kipias nechialis, uan keniuj no ijkon uelis tikchiuaskej?

¹⁸ Jesús senkis kinextij toni kijtosneki tikpiaskej nechialis. Maj tikelnamikikan nochi tein kijyouij itech youak keman tamiskia inemilis nikan taltikpak. Semej iteltasojikniuan kitemaktij ika tomin. Okse kijtoj imin ixpan miakej ke amo kiixmatia. Uan oksekin kikaujkej uan cholojkej. Tein nemiaj itech ixolal, kinekepilijkej uan tajtankej ika tajtol chikauak maj kitajyouiltianij uan maj kimiktianij soldados romanos. Amo titenpanoskiaj komo tikijtouaj ke yejua kipanok okachi ueyi tajyouilis ke tein tejuan tikpanoskej. ¿Toni kipaleuij maj taxiko? Hebreos 12:2 techiluia: “Yejuatsin kipouak ke amo teyi pinaualis kuak kikuoujpampilojkej. Ta, [...] kiyekmatoya ya ke satepan kuak kitamitajyouiltiskej ya, ijkuakon [...] kipia[s] ueyi yolpakilis uan no moyoluelitas. Uan kuak tami tajyouij ya, [...] yajki eluiyaktsinko uan motalito iyekmakopaka Totajtsin Dios”. Kemej tikitaj, yejua amo keman kielkauak ke satepan “kipia[skia] ueyi yolpakilis uan no moyoluelitas[kia]”.

¹⁹ Sayoj ke ¿toni kiyolpaktiskia? Kimatis ke ika itaxikolis, tapaleuiskia maj moueyitali itokay Dios tein yektik uan senkis kinextiskia ke Satanás se xolopij. ¡Amo moajsi okse nechialis tein kitelyolpaktiskia Jesús kemej nejin! Uan no kimatia ke amo uejkaua iTajtsin kiteltatiochiuiskia uan oksepa  kikauaskia maj tel kualtsin mouika iuan yejuatsin kemej amo akin ijkon ueli kichiua. Keman moajsia itech okachi ueyi tayejyekolis, kemej eskia mokitskilij nechialis tein kiyolpaktiskia. Uan tejuan no ijkon moneki tikchiuaskej. Kemej Jesús, maj amo keman tikelkauakan yolpakilis tein Jiova techiluia ke tikpiaskej. Yejua techmaka tatiochiualis maj titapaleuikan maj moueyitali iueyi tokay Dios uan maj monexti ke Satanás se xolopij. ¿Keniuj uelis tikchiuaskej? Maj timotakitskilikan itech toTajtsin kemej toUeyi Tayekankauj, uan maj timoeuakan itech inetasojtalis maski tikpiaskej tayejyekolis tein okachi ueyi.

20. ¿Toni techpaleuis maj tikpiakan se kuali tanemilil uan maj amo tikpolokan nechialis?

²⁰ Jiova amo sayoj techtatiochiuis ika miak pakilis komo amo keman tikauaj, ta kitelneki kichiuas (Isaías 30:18; xikonixtajtolti Ma­laquías 3:​10). Kiteluelita kinimakas itekitikauan nochi tein kinejnekij tein mouika iuan imelaujkayo (Salmo 37:4). Yejika, maj tiksentokakan tikpiakan totachialis itech nechialis tein tikpiaj. Maj amo keman tikpiakan tanemililmej tein teyolkokoj, tein teijtakoj uan kejkeptok tein kimoyaujtok nochi tein iaxka Satanás tein amo uejkaua tamis. Komo tikitaj ke pane techmaujtok nejon, maj tiktajtanikan Jiova ika nochi toyolo maj techmaka “ne yolseuilis ten kachi kuika uelilis” tein kitsakuas toyolo uan totanemilil (Filipenses 4:6, 7).

21, 22. 1) ¿Toni tein tel kualtsin kichiaj “uel miak tagayot”? 2) ¿Toni tein kichiuas Dios amo uejkaua okachi tikonpatiuita, uan toni moneki tikontalis itech moyolo tikonchiuas?

 ²¹ ¡Tel kualtsin nechialis tein tikpiaj! Komo titeuantitokej itech “uel miak tagayot” tein makisaskej keman ualas “ueyi tatsakuiltilis”, maj tiknemilikan nemilis tein tikpiaskej (Apocalipsis 7:9, 14). Semi ouij tiknemiliskej keniuj tel kualtsin timomachiliskej keman amo moajsisok ichikaualis Satanás uan iamokuali ejekauan. Ijkon tikijtouaj porin axkan amo akin ueli kijtoua ke amo kipia itayejyekolis Satanás. Keman tamis itaixnamikilis, tel kualtsin eski se kichiuas taltikpak se xochital keman ne iluikak ualtaixyekantos Cristo iuan 144,000 nikan taltikpak. ¿Uan melauj ke tiktelnekij maj tami kokolismej, tikinseliskej tochankauan oso totasojikniuan keman moajokuiskej uan tikpiaskej se tel kualtsin nemilis kemej Dios kinekia achto? Keman tepitsin poliuis maj senkis amo tikpiakan tajtakol, amo uejka poliuisok keman mochiuas tein Dios motenkaujtok. ¿Toni nejin? Tikpiaskej “ueyi nemajkaualis kemej ikoneuan Dios” (Romanos 8:21, NM).

²² Jiova kineki maj tikselikan nemajkaualis tein okachi ueyi. Uan komo tiknekij tikseliskej nejon, moneki titatakamatiskej. ¿Melauj ke motelneki maj timochikauakan tiktakamatiskej Jiova mojmostaj? Yejika ¡maj tiksentokakan tikchikaujtokan totakuaujtamatilis itech Dios, uan ijkon uelis tiksentokaskej itech inetasojtalis Dios nochipaya!