Itech inechikol Dios kampa tipouij amo onkakej tayekananij akin kintaxtauiaj. Ta okachi kuali, mochiua kemej kichiuayaj yekinika itatojtokakauan Cristo, kinixtaliaj tayekananij akin uelis ‘kinyolmajxitiskej in tokniuan, nekes tein toTekotsin moinaxkatilij’ (Hechos 20:28). Nejin tayekananij kipiaj kuali taixejekolis uan se kuali uikalis iuan Dios akin kinixyekanaj uan kinyekpiaj akin pouij itech nechikol, ‘ika sayoj tein kuali tanejnekilis uan amo ika ne tekiuil. Uan amo no kinyolmajxitijtinemij in taneltokanij porin kinektinemij nintomin san. Ta, tekititinemij ika nochi inintanejnekilis’ (1 Pedro 5:1-3). ¿Toni kichiuaj uan ijkon techpaleuiaj?

Techyekpiaj uan techmatampauiaj. Tayekananij kinpaleuiaj ika Biblia akin pouij itech nechikol uan kiitaj maj amo mouejkatilikan iuan Dios. Yejuan kimattokej ke Dios kinkauilij nejin tekit tein motelneki, yejua ika amo sayoj tanajnauatiaj, ta techpaleuiaj maj kuali tiyetokan uan maj tiyolpakikan (2 Corintios 1:24). Ijkon kemej se tajpixkej kinyekpia sejse iichkauan ika miak nejmachkayot, tayekananij motekipachouaj kinixmatiskej sejsemej itekitikauan Dios (Proverbios 27:23).

Techmachtiaj keniuj tikchiuaskej itanejnekilis Dios. Itech sejse semana, tayekananij kiixyekanaj tamachtilismej itech nechikolmej, tein tapaleuiaj maj tikpiakan chikauak totakuaujtamatilis (Hechos 15:32). Nejin takamej tel tekitinij no kiixyekanaj tanojnotsalis, touan tanojnotsaj uan techiluiaj keniuj uelis tataman tikchiuaskej totanojnotsalis.

Techyolchikauaj tisejsemej. Tayekananij techkalpanouaj uan no touan tajtouaj itech Kali kampa tiMosentiliaj, nejon techpaleuia maj tisejsemej tikpiakan se kuali uikalis iuan Dios porin techpaleuiaj uan techyolseuiaj ika Biblia (Santiago 5:14, 15).

Tayekananij kichiuaj miak taman itech nechikol, sayoj ke miakej no moneki kixeloskej tonal uan ijkon motekipanoskej, uan no kinpiaj ininchankauan akin moneki kinyekpiaskej. Nejin tokniuan tel chikauak tekitij, yejua ika moneki tikinpoujkaitaskej (1 Tesalonicenses 5:12, 13).

• ¿Toni tekit kichiuaj tayekananij itech nechikol?

• ¿Keniuj kinextiaj tayekananij ke toka motekipachouaj tisejsemej?