Uelis tikixmatis Jiova komo tikixtajtoltia Biblia. Ne tel uejkauj, Dios kinixpejpenak seki takamej maj kijkuilouanij itanemililuan. Nejon tajkuilolmej moixmatij kemej Biblia. Axkan uelis tikixmatiskej Dios komo tikixtajtoltiaj Biblia. Nejin kipia itajtol Jiova oso itanauatil, uan yejika no moixmati kemej iTajtol Dios. Uelis tikneltokaskej tein kijtoua Biblia, porin Jiova amo keman takajkayaua. «Dios amo keman motajtolpapatatinemi.» (Hebreos 6:18.) Ijkoni yej, iTajtol Dios kipia tein melauak (Juan 17:17).

Dios techmakatok miak netetayokolilmej tein kitelpiaj ipatiuj, uan semej, yejua Biblia. Kemej eskia se amat tein se tepopan tetasojtakej kinijkuilouilia imin pipiltsitsin. Techiluia ika Dios motentalij kichiuas Taltikpak takualtsinkan kampa uelis tinemiskej, nejin kijtosneki ika eski se xochital. Techiluia tein Dios kichiuj ne tel uejkauj, tein kichiujtok yekintsin uan tein kinchiuiliti amo uejkaua ipipiluan tein amo kikauaj. No techpaleuia maj tikmelauakan tonekuejmololuan uan maj tikajsikan yolpakilis (2 Timoteo 3:16, 17).

 Itaixpantijkauan Jiova yejuan itasojikniuan Dios; uan mitspaleuiskej xikajsikamati tein Biblia kitenextilia. Sayoj moneki xikinilui maj mitsmachtikan tein kijtoua Biblia. Amo mitstaxtaualtiskej keman mitsmachtiskej (Mateo 10:8). No uelis tiyas nechikolmej tein kipiaj itaixpantijkauan Jiova tein kichiuaj kemej Cristo. Nejin mochiuaj kampa kiueyichiuaj Dios, motatokaytia Kali kampa mosentiliaj iTaixpantijkauan Jiova. Komo tiouj nechikolmej, okachiok tikixmatis Dios uan ijsiujka.

Komo titanemilia itech tachiualismej tein Dios kichijchiuj, okachi uelis tikixmatis. Se neskayot, Biblia kijtoua: «Dios [...] kichijchiuak in iluikak uan in taltikpak» (Hechos 14:15). Keman Jiova kichijchiuj «iluikak», no kichijchiuj Tonaltsin. Axkan ¿toni technextilia Dios ika nejin? Ika Jiova kitelpia uelilis. Sayoj yejua uelik kichijchiuj teisa tein tel chikauak kemej Tonaltsin. Ika nejin no technextilia ika Jiova kitelmati, ta monekik maj kitelpia tamatilis uan ijkon uelik kichijchiuj Tonaltsin, tein techmaka totonik uan tanex, uan amo keman seui.

Ika tein Jiova kichijchiuj kinextia ika techtasojta. Xitanemili itech nochi tataman kuoujtakilomej tein onkak itech Taltikpak. Jiova ueliskia techmakaskia sayoj se taman kuoujtakilot, oso niose. Uan amo ijkon, ta yej techmakatok miak tataman kuoujtakilomej uan tataman chijchiujtokej, seki uejueyi uan seki tsikitsitsin, tataman tapaloj uan tataman uelik. Nochi nejin kinextia ika Jiova techtasojta, uan no semi kiuelita kitemakas teisa, kitstok tein techpoloua uan tel kualtakat (Salmo 104:24).