TAMACHTILIS 3
¿Keniuj kiixtalijtok Dios maj tinemikan?
1. ¿Keniuj kiixtalijtok Dios maj tinemikan?
KEMAN Dios kinchijchiuak Adán uan Eva, kinekia maj kualtsin neminij. Kintalij maj nemikan kampa takualtsinkan. Kinekia maj kinpianij konemej, maj kichiuanij nochi taltikpak se xochital uan maj kinyekpianij tapialmej. Uan yejuatsin kisentoka kineki maj nochin kualtsin nemikan (Génesis 1:28; 2:8, 9, 15). (Xikonita tajtolmelaualis 6.)
2. 1) ¿Keniuj tikmatij ke Dios kichiuas tein kijtoj? 2) ¿Akonimej nemiskej itech taltikpak, uan kanachi tonalmej?
2 ¿Tikonnemilia ke ejkos tonal keman tinemiskej itech se xochital? Jiova techiluia: “Nikijtojya uan nikchiuas” (Isaías 46:9-11; 55:11). Dios kichiuas tein kijtoj, uan nion teyi uelis kitsakuilis. Uan no, Jiova kijtoua keyej kichijchiuak taltikpak. Yejuatsin “amo sayoj nenkaj kichijchiuak” (Isaías 45:18). Kineki maj nemikan miakej itech nochi taltikpak. Sayoj ke ¿akonimej kineki Dios maj nemikan nikan, uan kanachi tonalmej? Biblia kijtoua ke akin yolkualmej uan akin tatakamatij “ininaxkatis taltikpak, uan ompa nemiskej nochipaya” (Salmo 37:29; Apocalipsis 21:3, 4).
3. Kemej tiksentokaj tikokolispeuaj uan timomikiliaj, ¿toni xa timotajtaniaj?
3 Sayoj ke, tiksentokaj tikokolispeuaj uan timomikiliaj. Miakkan, miakej moteuiaj uan momijmiktiaj. Dios amo yejua nejon kinekia maj pano. ¿Keyej amo mochiujtok tein Dios kinekia? Sayoj Biblia kipia tanankilil.
SE AKIN PEUAK KIIXNAMIKI DIOS
4, 5. 1) ¿Akoni kichiuak maj se kouat tajtouani iuan Eva? 2) ¿Keniuj se akin yolkuali uelis mochiuas se tachtekkej?
4 Biblia kijtoua ke moajsi se akin kiixnamiki Dios uan “kitokaytijke in amokuali, uan no kitokaytijke Satanás”. Itech xochital tein moajsia Edén, Satanás kichiuak maj se kouat kinojnotsani Eva (Apocalipsis 12:9; Génesis 3:1). Satanás kichiuak maj Eva kinemiliani ke kouat tajtojtoya. (Xikonita tajtolmelaualis 7.)
5 Sayoj ke ¿Dios kichijchiuak Satanás? Amo. Keman Dios kichijchiuak taltikpak, ompa iluikak moajsiaj miakej ángeles. Satepan, semej nejon ángeles peuak mopata uan mochiuak Diablo (Job 38:4, 7). ¿Keniuj uelik mochiuak nejon? Xikonnemili, ¿keniuj se akin yolkuali mopata uan mochiua tachtekkej? Amo ipa ijkon yolik. Sayoj ke, komo semi kineki teisa tein amo iaxka uan kisentoka itech tanemilia, nejon amo kuali tanejnekilis okachi mochikaua. Uan keman kiita ke uelis, tachteki. Ijkon se akin yolkuali mochiua se tachtekkej (xikonixtajtolti Santiago 1:13-15). (Xikonita tajtolmelaualis 8.)
6. ¿Keniuj se ángel peuak kiixnamiki Dios?
6 Yejua nejon tein kipanok nejon ángel. Keman Jiova kinchijchiuak Adán uan Eva, kiniluij maj kinpianij konemej uan maj momiakilianij itech nochi taltikpak (Génesis 1:27, 28). Nejon ángel xa kinemilij: “Nochin uelis nechueyichiuaskej nejua uan amo Jiova”. Kemej kisentokaya itech tanemiliaya nejon, okachiok kinekia se taman tein sayoj kinamiki kiselis Jiova. Kinekia maj yejua kiueyichiuakan. Yejua ika kikajkayauak Eva uan yejua kineltokilij (xikonixtajtolti Génesis 3:1-5). Keman kichiuak nejon, mochiuako Satanás uan Diablo, se akin kiixnamiki Dios.
7. 1) ¿Keyej momikilijkej Adán uan Eva? 2) Xikonmelaua ika se neskayot keyej tiueuentsintiaj uan timomikiliaj.
7 Dios kinnauatijka Adán uan Eva maj amo kikuanij itakilo semej koujmej tein moajsiaj itech xochital. Kiniluijka ke komo kikuayaj momikiliskiaj. Sayoj ke yejuan amo kitakamatkej uan kikuajkej takilot (Génesis 2:17; 3:6). Adán uan Eva tajtakojkej uan satepan momikilijkej, ijkon kemej Jiova kiniluijka (Génesis 3:17-19). Keman Adán uan Eva kinpiakej konemej, yejuan no mochiujkej tajtakolejkej, uan yejua ika no momikilijkej (xikonixtajtolti Romanos 5:12). ¿Keyej ininkoneuan Adán uan Eva no mochiujkej tajtakolejkej? Xikonnemili nejin: komo se tetat kipia se kokolis oso kokoxkayot tein no kipiayaj itatuan, ikoneuan no kipiaskej nejon kokolis. Yejua nejon tein techpanok. Keman Adán amo kitakamatik Dios, mochiuak tajtakolej. Kemej tinochin tiikoneuan Adán, tinochin titajtakolejkej. Yejua ika tiueuentsintiaj uan timomikiliaj (Romanos 3:23). (Xikonita tajtolmelaualis 9.)
8, 9. 1) ¿Toni kinekia Satanás maj kinemilianij Adán uan Eva? 2) ¿Keyej Jiova amo niman kinixpoloj taixnamikinij?
8 Keman Satanás kichiuak maj Adán uan Eva amo kitakamatinij Jiova, peuak kichiua maj oksekin no kiixnamikikan. Satanás kinekia maj Adán uan Eva kinemilianij ke Dios amo kuali kinixyekantoya, ke kinkajkayaujtoya uan amo kinekia maj yolpakikan. Satanás kiteajsikamatiltij ke Dios amo moneki techiluis toni moneki tikchiuaskej. No kiteajsikamatiltij ke Adán uan Eva ueliskiaj ininselti kiixtaliskej toni kuali uan toni amo kuali. ¿Toni kichiuaskia Jiova? Ueliskia kinixpolos uan ijkon amo akinok kiixnamikiskia. Sayoj ke ijkon amo kinextiskia ke Satanás se takajkayaujkej.
9 Jiova amo niman kinixpoloj taixnamikinij, ta kikauak maj ininselti moixyekananij. ¿Keyej? Porin ijkon monextiskia ke Satanás se takajkayaujkej uan ke Jiova kimati toni okachi techpaleuis. Sayoj ke amo nochipa kikauaskia maj ininselti moixyekananij. Uan tejuatsin, ¿keniuj tikonita tein kichiujkej Adán uan Eva? ¿Tikonnemilia ke kuali maj kineltokilianij Satanás uan maj amo kitakamatinij Dios? Jiova kinmakaka nochi tein kipiayaj: amo tajtakolejkej katkaj, nemiaj itech se kualtsin xochital uan kipiayaj se kualtsin tekit. Sayoj ke Satanás amo kinmakaka nion teyi.
10. ¿Toni moneki tikixtaliskej?
10 Tejuan no moneki tikixtaliskej ox tiknekij maj techixyekana Jiova oso Satanás. Komo tiktakamatij Jiova, tiknextiskej ke Satanás takajkayaua. Sayoj ke komo tiktakamatij Satanás timomikiliskej (Salmo 73:28; xikonixtajtolti Proverbios 27:11). Amo miakej kitakamatij Dios itech nejin taltikpak. Tein melauj, yejuatsin amo taixyekana nikan taltikpak. Komo ijkon, ¿akoni taixyekana?
¿AKONI TAIXYEKANTOK NIKAN TALTIKPAK?
¿Ueliskia Satanás kiluis Jesús ke kimakaskia nochi tekiuajyomej komo amo iaxka yeskiaj?
11, 12. 1) ¿Toni techmachtia tein Satanás kiluij Jesús ke kimakaskia? 2) ¿Toni tajkuilolmej itech Biblia kinextiaj ke Satanás taixyekantok nikan taltikpak?
11 Jesús kimatia akoni yekmelauj taixyekantok nikan taltikpak. Se tonal, Satanás “kinextilijtiuetsik Jesús nochi in pueblojme kampa tayekanaj in ueyi chiuanime de nikan taltikpak”. Ompa kiluij: “Nimitsmaktilis nochi in chikaualisme de nojon pueblojme iuan ninueyipanchiukayot uan ninricojyot ten yejuan kipixtinemij. Porin nochi nojon chikaualis nomako yetok. Uan uelis nikmakas ne chikaualis aken yeski niknekis” (Lucas 4:5, 6; Mateo 4:8, 9). Nejin senkis kinextia ke nochi tekiuajyomej iaxka Satanás.
12 Xa tejuatsin tionmotajtanis: “¿Keyej Satanás taixyekana nikan taltikpak? ¿Amo Jiova yejua Dios akin nochi ueli kichiua akin kichijchiuak nochi tein onkak?” (Apocalipsis 4:11). Tikmatij ke nochi iaxka Jiova, sayoj ke Jesús senkis kijtoj ke Satanás yejua “tayekanke [...] nikan taltikpak” (Juan 12:31; 14:30; 16:11). Tatitanil Pablo kijtoj ke Satanás “tayekantinemi nikan taltikpak” (2 Corintios 4:3, 4). Uan tatitanil Juan kijkuiloj ke “nochi in taltikpakuani kinyekana ok yejua in amokuali Satanás” (1 Juan 5:19).
¿KENIUJ IXPOLIUIS TEIN SATANÁS KIIXYEKANA?
13. ¿Keyej moneki maj ixpoliui tein amo kuali?
13 Ijkon kemej panouaj tonalmej, okachi mochiua miak taman tein tamouilil. Onkak neteuilismej, takajkayaualis, tateuilis uan miakej kinchiuiliaj tein amo kuali. Maski miakej kitemouaj kiixpoloskej nejin kuejmolmej, amo uelij. Yejua ika, amo uejkaua Dios kiixpolos nochi tein amo kuali itech ueyi neteuilis tein motokaytia Armagedón. Ompa, kichiuas se xochital nikan taltikpak kampa okachi kuali tinemiskej (Apocalipsis 16:14-16). (Xikonita tajtolmelaualis 10.)
14. 1) ¿Akoni yeski Tekiuaj itech iTekiuajyo Dios? 2) ¿Toni kijtojka Biblia ke kichiuaskia Jesús?
14 Ika se taixyekanalis tein moajsi iluikak, Jiova kiixpolos tein amo kuali tein mochiujtok. Nejin taixyekanalis moixmati kemej iTekiuajyo Dios. Jiova kiixpejpenak Jesucristo maj tekiuajti itech nejon Tekiuajyot, uan itaixyekanalis amo keman tamis (Lucas 1:32, 33). Biblia kijtojka: “Nochi in pueblojme uan nochi senmanauak moinaxkatilij ya Totekotsin Dios uan Jesucristo” (Apocalipsis 11:15). Itech tamachtilis 8 timomachtiskej keniuj sayoj iTekiuajyo Dios taixyekanas itech nochi taltikpak (xikonixtajtolti Daniel 2:44). Satepan, iTekiuajyo Dios kichiuas maj nejin taltikpak mochiua se xochital. (Xikonita tajtolmelaualis 11.)
AMO UEJKAUA TINEMISKEJ ITECH SE XOCHITAL
15. ¿Akonimej moajsiskej itech “yankuik taltikpak”?
15 Biblia kijtoua: “Tikchixtoke ne tonal kuak Dios kichijchiuas se yankuik eluiyak uan ne yankuik taltikpak, kampa mochiutos sayo ten kualtsin chipaukanemilis” (2 Pedro 3:13; Isaías 65:17). Tajtol “taltikpak” nikan kijtosneki taltikpakneminij. Nejin kijtosneki ke itech “yankuik taltikpak” moajsiskej akin kitakamatiskej Dios uan kipiaskej itatiochiualis. Yejuan nemiskej itech Xochital nikan taltikpak.
16. 1) ¿Toni kinmakas Dios nochin akin nemiskej itech Xochital? 2) ¿Keniuj uelis tikseliskej nejon netetayokolil?
16 Jesús kijtoj ke nochin akin nemiskej itech Xochital, Dios kinmakas ininnemilis tein “amo keman tamis” (Marcos 10:30). ¿Keniuj uelis tikseliskej nejon netetayokolil? Tanankilil moajsi itech Juan 3:16 uan 17:3 (xikonixtajtolti). Axkan maj tikitakan keniuj kijtoua Biblia ke tinemiskej itech Xochital.
17, 18. ¿Keniuj tikmatij ke itech Xochital onkas yolseuilis uan amo timouiskejok?
17 Neteuilis, tein amo kuali uan okseki taman tein techtajyouiltia ixpoliuis. Akin kichiuaj tein amo kuali amo nemiskejok (Salmo 37:10, 11; Mateo 5:5). Itech taltikpak sayoj moajsiskej akin kitasojtaskej uan kitakamatiskej Dios. Onkas yolseuilis nochipaya (Salmo 72:7). Dios kiixpolos neteuilismej (Salmo 46:9; Isaías 2:4).
18 Itekitikauan Jiova amo mouiskejok. Ne uejkauj, keman israelitas kitakamatiaj Dios, yejuatsin kinmatampauiaya uan amo mouiaj (Levítico 25:18, 19). Itech Xochital, tejuan amo no tikmouiliskej nion teyi uan nion akin, uan nochipa ijkon tinemiskej (xikonixtajtolti Isaías 32:18; Miqueas 4:4).
19. ¿Keyej tikneltokaj ke tinochin tikpiaskej tein tikuaskej itech Xochital?
19 Tinochin tikpiaskej tein tikuaskej. Biblia kijtoua: “Itech taltikpak onkas miak tatet, semi miak onkas ininkuapan tepemej” (Salmo 72:16). Jiova “techtatiochiuis”, uan “taltikpak kitemakas itakilo” (Salmo 67:6).
20. ¿Keniuj tikmatij ke taltikpak mochiuas se xochital?
20 Nochi taltikpak yeski se xochital. Tikpiaskej kualtsitsin kalmej uan takualtsinkan yeski (xikonixtajtolti Isaías 65:21-24; Apocalipsis 11:18). Itech nochi taltikpak semi takualtsinkan yeski ijkon kemej katka xochital tein moajsia Edén. Jiova techmakas nochi tein monekis. Biblia kijtoua tein Dios kichiua: “Tiktapoua momay uan tikmaka tein kineki nochi tein yoltok” (Salmo 145:16).
21. ¿Keniuj tikmatij ke taltikpakneminij uan tapialmej yolseujkanemiskej?
21 Taltikpakneminij uan tapialmej yolseujkanemiskej. Tapialmej amo teyi techchiuiliskejok. Uan konemej amo teyi kinpanos maski yetoskej iniuan tapialmej tein axkan tamouililmej (xikonixtajtolti Isaías 11:6-9; 65:25).
22. Xikonmelaua keniuj Jesús kinpaleuis akin mokokouaj.
22 Amo akin kokolispeuas. Keman Jesús yetoya nikan taltikpak, kinpajtij miakej (Mateo 9:35; Marcos 1:40-42; Juan 5:5-9). Uan kinpajtis nochin akin mokokouaj keman taixyekantosya kemej Tekiuaj itech iTekiuajyo Dios. Amo akin kijtos: “Nimokokoua” (Isaías 33:24; 35:5, 6).
23. ¿Toni panos iniuan akin momikilijkejya?
23 Mikemej oksepa nemiskej. Dios kijtoua ke oksepa nemiskej nochin akin momikilijkejya. “Totajtsin Dios kinpankixtis yoltokke nochi in animajme.” (Hechos 24:15; xikonixtajtolti Juan 5:28, 29.)
24. ¿Tikonuelitaskia tionnemis itech Xochital?
24 Tinochin uelis tikixtaliskej ox tikixmatiskej Jiova uan tiktakamatiskej oso tikchiuaskej tein tejuan tiknekiskej. Komo tiktakamatij Jiova, kualtsin tinemiskej satepan. Sayoj ke no moneki maj tikmatikan akoni Jesucristo uan keniuj kichiuas tein Dios kijtoj.
