1, 2. ¿Akonimej sekin akin Jiova kuali iniuan mouikak?

¿AKONI kuali iuan tionmouikaskia? Xa se akin tikonuelita iuan tiontajtos, akin kualtakat uan akin tikonuelita kemej tanemilia uan tein kichiua.

² Jiova kuali iniuan mouika seki taltikpakneminij. Kemej neskayot, se akin kuali iuan mouikak yejua Abrahán (Isaías 41:8; Santiago 2:23, TNM). Jiova no kuali mouikaya iuan David. Yejuatsin kijtoj ke David kiyolpaktiaya (Hechos 13:22). Uan Jiova no semi kitasojtaya itekitikauj, Daniel (Daniel 9:23).

3. ¿Keyej Jiova kuali iniuan mouikaya Abrahán, David uan Daniel?

³ ¿Keyej Jiova kuali iniuan mouikaya Abrahán, David uan Daniel? Jiova kiluij Abrahán: “Tinechtajtolkakini” (Génesis 22:18). Jiova kuali mouika iniuan akin amo moueyimatij uan kitakamatij. Hasta uelis kuali mouikas iniuan nochin akin nemij itech se altepet, kemej ne uejkauj iuan xolal Israel. Yejuatsin kiniluij: “Xiktakamatikan notajtol, uan nejua niyeski nanmoDios uan namejuan nanyeskij noxolal” (Jeremías 7:23). No ijkon, komo tejuatsin yekmelauj tikonneki kuali tionmouikas iuan Jiova, moneki tikontakamatis.

4, 5. ¿Keniuj kinpaleuia Jiova akin kuali iuan mouikaj?

⁴ Se akin techtauelita uan semi chikauak amo kineki maj kuali timouikakan iuan Dios. Sayoj ke Jiova kineki techpaleuis uan techmatampauis (xikonixtajtolti 1 Pedro 5:7). Yejua ika Biblia kijtoua ke Jiova “techualitstok uan techyekpixtok [...]. Uan Totekotsin no kuali techkakilijtinemi  tonetatatautilis” (1 Pedro 3:12). Itech Salmo 32:8, Jiova kiniluia akin kuali iniuan mouika ke kinmakas tamatilis uan kuali kinyolmajxitis.

⁵ Kemej kuali iuan timouikaj, tiktekitiliaj ika nochi toyolo uan tiksentokaj tiktakamatij hasta keman tikpanouaj uejueyi ouijkayomej. Uan no, titakuaujtamatij iuan Jiova kemej tatitanil Pablo. Yejua kijkuiloj: “Totekotsin Yejuatsin nechpaleuijtinemi. Ika ya nojon amo nimoyolmoutis” (Hebreos 13:6).

6. ¿Toni kinijtouilia Satanás akin kinekij kuali mouikaskej iuan Dios?

⁶ Itech tamachtilis 11 tikitakej ke Satanás kiixnamikik Jiova uan kijtoj ke yejuatsin tekajkayaua. No kijtoj ke semi amo yolkuali, porin amo kinkauaya Adán uan Eva maj kinemilianij toni kuali uan toni amo kuali. Amatajkuilol Job techmachtia ke Satanás no kintakajkayauilia akin kinekij kuali mouikaskej iuan Dios. Kinijtouilia ke yejuan kitekitiliaj Dios porin yejuatsin kinmaka miak taman, uan amo porin kitasojtaj. No kijtoua ke uelis kichiuas maj akin yeski kiixnamiki Dios. Maj tikitakan toni uelis techmachtis tein kichiuak Job uan ox kisentokak kitakamatik Jiova oso amo.

7, 8. 1) ¿Akoni katka Job? 2) ¿Toni Satanás kijtouilij Job?

⁷ ¿Akoni katka Job? Katka se takat yolkuali akin nemik kemej 3,600 xiujmej achtoya. Jiova kijtoj ke itech nejon tonalmej, nikan taltikpak amo moajsia nion akin kemej Job. Yejua semi kimoujkatokaya Jiova uan kiixtopeuaya tein amo kuali (Job 1:8). Job yekmelauj kinekia kuali mouikas iuan Jiova.

⁸ Satanás kijtouilij Job ke kitekitiliaya Dios porin kimakatoya miak taman. Satanás kiluij Jiova: “¿Amo tejua  tiktatsakuilijtok maj amo teyi kipano yejua, ichankauan uan nochi tein kipia? Tiktiochiuani nochi tein kichiua, uan itapialuan uejkaya takuikej. Sayoj ke axkan ximomamelaua uan xikuili nochi tein kipia, uan tikitas ke mitsuijuikaltis” (Job 1:10, 11).

9. ¿Toni kikauak Jiova maj kichiua Satanás?

⁹ Satanás kijtoj ke Job kitekitiliaya Jiova sayoj porin yejuatsin kimakatoya miak taman. Kijtoj ke yejua ueliskia kichiuas maj Job amo kitekitilianiok Jiova. Maski Jiova amo kiyolpaktij tein Satanás kijtoj, kikauak maj kitajyouilti Job. Ijkon monextiskia ox Job kitekitiliaya Dios porin kitasojtaya.

10. 1) ¿Keniuj Satanás kitajyouiltij Job? 2) ¿Toni kichiuak Job?

¹⁰ Yekinika, Satanás kichiuak maj Job kiichtekilianij miak itapialuan uan tein mokaujkej kichiuak maj mikikan. Satepan kichiuak maj kinmiktianij miakej itakeualuan. Job amo kipiayaok nion teyi. Ika tamik, Satanás kichiuak maj nochi 10 ikoneuan momikilianij keman chikauak taejekak. Sayoj ke Job amo kikauak Jiova. Biblia kijtoua ke “itech nochi nejin, Job amo tajtakoj nion kijtoj ke Dios kichiua tein amo kuali” (Job 1:12-19, 22).

11. 1) ¿Toni Satanás no kichiuilij Job? 2) ¿Toni kichiuak Job?

¹¹ Satanás kisentokak kitemoj kichiuas maj Job kikaua Jiova. Yejua kiixnamikik Dios uan kiluij: “Komo [...] tikokoua itech inakayo uan iomiyouan, tikitas ke mitsuijuikaltis”. Ompa, Satanás kichiuak maj Job ueyi kokolispeuani uan nejon semi kitajyouiltij (Job 2:5, 7). Sayoj ke, Job kisentokaya kitakamatia Jiova. Kijtoj ke kisentokaskia kitakamatiskia Dios hasta keman momikiliskia (Job 27:5).

12. ¿Keniuj kinextij Job ke Satanás se takajkayaujkej?

¹² Job amo kimatia toni kijtouilijka Satanás nion keyej  semi tajyouijtoya. Hasta kinemilij ke Jiova kichiujtoya maj tajyoui (Job 6:4; 16:11-14). Maski ijkon, Job amo kikauak Jiova. Yejua senkis kinextij ke kitakamatia Dios amo porin yejuatsin kimakatoya miak taman. Kuali mouikaya iuan Dios porin kitasojtaya. Senkis moitak ke nochi tein Satanás kijtojka amo melauj katka.

13. ¿Toni monextij porin Job kitakamatik Dios?

¹³ Maski Job amo kimatia tein Satanás kijtouilijka, kisentokak kitakamatik Dios uan kinextij ke Satanás takajkayaua. Jiova kitatiochiuij Job porin nochipa kitakamatik (Job 42:12-17).

14, 15. ¿Toni techijtouiliani Satanás tinochin?

¹⁴ Itech nejin tonalmej, Satanás kintakajkayauilia nochin itekitikauan Dios. Kijtoua ke tiktekitiliaj sayoj porin techmaka miak taman. Satanás kijtoj: “Taltikpaknenkej kitemakas nochi tein kipia uan ijkon momakixtis” (Job 2:4). Nejin kinextia ke Satanás amo kijtouilij nejon sayoj Job, ta tinochin. Miak xiujmej satepan ke Job momikilij, Satanás kisentokaya kiixnamikia Jiova uan kintakajkayauiliaya itekitikauan. Kemej neskayot, Proverbios 27:11 kijtoua: “Xitamatkej, nokonetsin, uan xinechyolpakti, uan ijkon uelis niknankilis akin nechixnamiki”.

¹⁵ Tejuatsin uelis tikonixtalis nochipa tikontekitilis Jiova uan tikontakamatis. Ijkon tikonnextis ke Satanás takajkayaua. Xa monekis amo tikonchiuasok tein Dios amo kiyolpaktia uan ijkon uelis kuali tionmouikas iuan. Maski xa ouij mitsonkisas, yejua nejon tein okachi kuali tein uelis tikonixtalis. Nejin semi moneki, porin Satanás kijtoua ke tejuatsin tikonkauas Jiova keman tikonpias kuejmolmej. Yejua kichiua miak taman tein ika kitemoua maj amo tiktakamatikanok Dios.

16. ¿Toni kikui Satanás tein ika kitemoua maj amo tiktekitilikanok Jiova?

 ¹⁶ Satanás kikui miak taman tein ika kitemoua maj amo kuali timouikakanok iuan Dios. Kemansa, techtajyouiltia kemej yeskia “se kuoutajtekuani” tein kitemoua tekuas (1 Pedro 5:8). Yejua ika, akin kuali iniuan tionmouika, mochankauan oso oksekin xa kitemoskej amo xionmomachtiok Biblia nion xikonchiua tein kuali. Keman tikonpanos nejon, xa tikonnemilis ke Satanás kichiujtok maj mitsonixnamikikan (Juan 15:19, 20). * Satanás no “monextijtinemi [...] keme yeskia se ángel takeual de Dios”. Yejua ika, kiteixmatiltia takajkayaualis tein uelis techyolnotsas. Komo tikneltokaj nejon takajkayaualis, Satanás uelis kichiuas maj amo tiktakamatikanok Jiova (2 Corintios 11:14). Okse taman tein Satanás ika kitemoua maj amo tiktekitilikanok Jiova yejua keman kichiua maj tiknemilikan ke amo keman uelis tikyolpaktiskej Dios (Proverbios 24:10).

17. ¿Keyej tiktakamatij Jiova?

¹⁷ Keman tiktakamatij Jiova, tiknextiaj ke Satanás takajkayaua. ¿Toni techpaleuis maj titatakamatikan? Biblia kijtoua: “Xiktasojta Moueyitekotsin Dios ika nochi moyolo, uan no ika nochi motalnamikilis, uan no ika nochi mochikaualis” (Lucas 10:27). Tiktakamatij Jiova porin tiktasojtaj. Ijkon kemej okachi tiktasojtaskej, okachi tiknekiskej tikchiuaskej nochi tein yejuatsin technauatia. Tatitanil Juan kijkuiloj: “Nestinemi ke melau tikpiaj ne tetasojtalis de Dios, kuak no tiktakamatij ya in  tanauatil ten Dios technauatilia ma tikchiutinemikan. Uan in tanauatilme de Dios amo techmachililtia ke kox semi oui para se kintakamatinemis” (1 Juan 5:3).

18, 19. 1) ¿Katiyejua seki taman Jiova kijtoua ke amo kuali? 2) ¿Keniuj tikmatij ke Jiova amo technauatia maj tikchiuakan tein amo tiuelij?

¹⁸ Jiova kijtoua ke seki taman amo kuali maj se kichiua. Tikonajsis seki neskayomej kampa kijtoua “ Xikonixtopeua tein Jiova kitauelita”. Yekinika xa tikonnemilis ke seki nejon taman amo uejueyi tajtakolmej. Sayoj ke, keman tikonixtajtoltis tajkuilolmej tein moajsij itech Biblia uan itech tiontanemilis, tikonajsikamatis ke semi tapaleuia se kitakamatis itanauatiluan Dios. Xa no tikonitas ke moneki amo tikonchiuasok seki taman tein amo kuali. Kemansa, nejon uelis yeski ouij. Sayoj ke, komo amo tikonchiuaok, tionyolseuis uan tionyolpakis kemej akin kuali mouikaj iuan Jiova uan kitakamatij (Isaías 48:17, 18). ¿Keniuj tikmatij ke uelis tikauaskej tein amo kuali?

 ¹⁹ Jiova amo keman technauatia maj tikchiuakan tein amo tiuelij (Deuteronomio 30:11-14). Yejuatsin semi techtasojta uan kuali techixmati. Kimati toni kuali tikchiuaj uan toni amo (Salmo 103:14). Tatitanil Pablo kijtoj nejin tein semi techyolchikaua: “Totekotsin Yejuatsin Yolmelauaktsin, uan Yejuatsin namechyolchikautiyas uan namechyekpixtiyas” (2 Tesalonicenses 3:3). Uelis titakuaujtamatiskej ke Jiova nochipa techmakas chikaualis tein techpaleuis maj tikchiuakan tein kuali. Uan mitsonmakas tejuatsin “chikaukauelilis [tein] ualeutok imako” tein mitsonpaleuis xiontaxiko keman tikonpias ouijkayomej (2 Corintios 4:7).

20. ¿Toni no moneki tikchiuaskej, uan keyej?

²⁰ Komo tiknekij kuali timouikaskej iuan Jiova, amo sayoj moneki amo tikchiuaskejok tein yejuatsin  kijtoua ke amo kuali yetok, ta no moneki tikchiuaskej okse taman (Romanos 12:9). Akin kuali mouikaj iuan Dios kichiuaj tein yejuatsin kiyolpaktia uan kinextiaj tein yejuatsin kinextia. Seki taman yejua nejin: “Ma se tetasojtatinemi; uan ma se yolpaktinemi; uan ma se yolseukanentinemi; uan ma se kipixtinemi paciencia; uan ma se teyoliknelijtinemi; uan ma se kichiutinemi ten kuali; uan ma se takuautamakatagat; uan ma se yolyemankanemi; uan ma se moyekantinemi ika nejmach” (Gálatas 5:22, 23). Komo tikonneki tikonmatis akonimej uelis kuali mouikaskej iuan Dios, xikonixtajtolti Salmo 15:1-5.

21. ¿Toni mitsonpaleuis xikonnexti kualtsitsin taman tein Dios kinextia?

²¹ ¿Toni mitsonpaleuis xikonnexti nejon kualtsitsin taman tein Dios kinextia? Moneki tikonmatis toni kiyolpaktia Jiova. Yejua ika, nochipa xikonixtajtolti uan xionmomachti Biblia (Isaías 30:20, 21). Komo ijkon tikonchiua, okachi tikontasojtas Jiova. Nejon kichiuas xikonneki tikontakamatis.

22. ¿Toni panos komo tiktakamatij Jiova?

²² Keman tikauaj tein amo kuali kemej yeskia ijkuak timokixtiliaj taken tein soltik oso tein patikya uan timotaliliaj taken tein yankuik. Biblia kijtoua ke moneki timokixtiliskej ‘soltik talnamikilis’ uan ke moneki ‘timoyankuikatakentiskej ika ne chipauak talnamikilis’ (Colosenses 3:9, 10). Maski ouij techkisas, Jiova kijtoua ke techmakas se ueyi netetayokolil komo tiktakamatij uan amo tikchiuajok tein yejuatsin kitauelita (Salmo 19:11). Xikontakamati Jiova porin yekmelauj tikontasojta, uan amo porin tikonchia tikonselis tatiochiualismej satepan. Ijkon, tikonnextis ke Satanás takajkayaua uan ke yekmelauj tikonneki kuali tionmouikas iuan Jiova.