Tokniuantsitsin:

Itech miak tataman tajtolmej noyampa taltikpak, itech amaix Tanejmachtijkej tein titemakaj itech tanojnotsalis, kipiani seki tamachtilismej tein motokaytia “Kikaujkej neskayot ika takuaujtamatilis”. Nejin tamachtilismej monemilij mochijchiuas kemej kinpaleuis akin kiixtajtoltiskej, maj kiitakan keniuj katka ininnemilis taltikpakneminij akin ininka motajtoua itech Biblia, uan kemej kiajsikamatiskej takuaujtamatilis tein kinextijkej keman kipanokej ouijkayomej. ¿Keniuj kiitanij akin kiixtajtoltianij?

Satepan ke se siuat kiixtajtoltij tamachtilis kampa ika tajtoua Marta, kijtoj: “Niueuetskak keman nikixtajtoltij porin nitamati kemej yejua, nochipa nitekititok uan nimochikaua kuali nikinselis akin nechkalpanouaj, sayoj ke nikelkaua ke moneki nimoketsas tepitsin uan niyolpakis iniuan notasojikniuan”. Se ichpoch akin kiixtajtoltij tamachtilis kampa ika tajtoua Ester, kijtoj: “Nejin tamachtilis nechtanemililtij ke ijsiujka uelis se kitelnejnekis se kipias kuajkuali tilmaj uan se kikouas nochi tein yankuik kisa. Kemaj, moneki kuali timochijchiuaskej, sayoj ke maj amo yejua techteltekipacho”. Uan no kijtoj: “Jiova kiita ke okachi moneki tein tikpiaj itech toyolo”. Uan satepan ke se tokniuj siuat kiixtajtoltij se tamachtilis kampa ika tajtoua Pedro, kijtoj ika yolpakilis: “Senkis itech nitanemilijtoya tein nikixtajtoltijtoya. ¡Kemej yeskia ompa niyetoya! Amo sayoj nikixtajtoltijtoya tein mochiujtoya, ta kemej yeskia uelia nikitaya, nikakia uan nikmachiliaya”.

Tein kijtouanij nejin taltikpakneminij uan oksekin tein ika kitasojkamatij, kinextia ke melauak tein tatitanil Pablo kijtoj seki xiujmej achto: “Nochi tanextililis ten tikajsij tech in Tajkuilolamatsin de Dios, nochi nojon techijkuilouilijke para tejuan ika timomachtiske” (Rom. 15:4). Jiova kichiuak maj moijkuilouani nejin neskayomej itech Biblia uan ijkon techmachtis miak taman tein moneki. Yejua ika, maski uejkaujya oso amo miak xiujmej timomachtijtokej Biblia, ininneskayo uelis techpaleuis tinochin.

Ika nochi toyolo tamechyoleuaj niman xikixtajtoltikan nejin amatajkuilol. ¿Uelis nanmomachtiskej itech Youak keman nanTaueyichiuaj kemej Kalyetouanij? Tikyekmatij ke konemej kintelyolpaktis. Uan keman timomachtiskej itech Nemachtil ika Biblia itech Nechikol, tamechyolmajxitiaj amo ximopolouilikan nion se nechikol. Keman nankiixtajtoltiskej nejin amatajkuilol, maj amo ijsiujka, ta ika nejmachkayot. Xiknemilikan kemej yeskia no nankichiujtokej tein ompa mochiujtok. Xitanemilikan uan ijkon uelis nankiitaskej uan nankimachiliskej tein kipanokej akin ininka motajtoua, uan xiknemilikan toni nankichiuaskiaj namejuan ika tein mochiujtok ompa.

Semi techyolpaktia tamechmakaskej nejin yankuik amatajkuilol. Tikchiaj maj namechtelpaleui tejuatsin uan nochin mochankauan uan xikitakan kemej se tatiochiualis. Nochipa xikelnamikikan ke tamechteltasojtaj.

Oloch Taojtokaltianij akin kinixyekanaj iTaixpantijkauan Jiova