Tepitsin achto ke mochiuaskia Pascua itech xiuit 32, tatitanilmej mokepkej satepan ke miakkan tanojnotsatoj. Kemej sioujtoyaj, Jesús kinuikak itech se barco hasta Betsaida kampa ueliskiaj moseuiskej. Sayoj ke keman ajsitiyayaj atenoj, Jesús kiitak ke miakej taltikpakneminij ajsikajya ompa. Maski kinekia yetos sayoj iniuan itatitaniluan, kuali kinselij taltikpakneminij. Kinpajtij akin mokokouayaj uan peuak kinmachtia miak taman. Ika kinnojnotsak iTekiuajyo Dios nochi tonal. Tiotakpa, tatitanilmej kiluijkej: “Taltikpakneminij xa mayanajya. Xikinilui maj yakanya uan maj kitemotij tein kikuaskej”.

Sayoj ke Jesús kinnankilij: “Amo moneki yaskej. Namejuan xikintamakakan”. Tatitanilmej kitajtanijkej: “¿Tikneki maj tikinkouilitij pantsin?”. Felipe, semej tatitanilmej, kijtoj: “Maski tikpiaskiaj miak tomin, amo ueliskia tikouaskej pantsin tein kinajsis”.

Jesús kintajtanij: “¿Kanachi pantsin nankipiaj?”. Andrés kinankilij: “Tikpiaj makuil pantsin uan ome amichimej. Sayoj ke amo ajsis”. Jesús kijtoj: “Xinechualkuilikan pantsin uan amichimej”. Satepan kijtoj maj moolochtalianij 50 uan 100 taltikpakneminij. Ompa kikuik pantsin uan amichimej, ajkotachiak uan kichiuak se netataujtil. Satepan kinmakak tatitanilmej maj kixejxelouanij. Nochin 5,000 takamej, uan no siuamej uan konemej, takuajkej hasta ixuikej. Satepan, tatitanilmej kiololojkej tein  mokaujka uan ijkon amo teyi moauiloskia. ¡Kisentilijkej 12 chikiujmej! ¿Melauj ke se kimoujkaita nejin ueyi tachiualis?

Nochin semi kimoujkaitakej nejon uan hasta kinekiaj maj Jesús mochiuani inintekiuaj. Sayoj ke Jesús kimatia ke Jiova ayamo kinekia maj mochiua tekiuaj. Yejua ika monauatij iniuan taltikpakneminij uan kiniluij itatitaniluan maj yanij oksekopa itech ueyiat tein poui Galilea. Yejuan yajkej itech barco, uan Jesús pankisak iselti itech se tepet. ¿Keyej? Porin kinekia tajtos iuan iTajtsin. Jesús nochipa kitemouaya kichiuas netataujtil maski kipiaskia miak tekit.