Satepan ke mochiuak Pascua, Jesús uan imomachtijkauan mokepkej Galilea. Keman ojtokatoyaj, panokej Samaria uan moseuijkej ompakauin itech xolal Sicar, itech iatekoch Jacob. Jesús ompa moseuij keman imomachtijkauan yajkej xolal kikouatoj takual.

Se siuat kikixtiko at itech atekoch, uan Jesús kiluij: “Xinechuanti tepitsin at”. Siuat kitajtanij: “¿Keyej titajtoua nouan, ta nejua nikayot Samaria? Judíos amo tajtouaj iniuan samaritanos”. Jesús kiluij: “Komo tikmatiskia niakoni, tinechtajtaniskia at, uan nejua nimitsmakaskia at tein kitemaka nemilis”. Siuat kitajtanij: “¿Toni tikijtosneki? Nion tikpia tein ika tikixtis at”. Jesús kinankilij: “Akin tayis at tein nejua nikmakas amo kemanok amikis”. Siuat kijtoj: “Xinechmaka nejon at, tejuatsin”.

Ompa Jesús kiluij: “Xikilui monamik maj uiki”. Siuat kinankilij: “Amo nikpia nonamik”. Jesús kiluij: “Melauak, porin makuilpaya timonamiktijka uan axkan tinemi iuan se takat, sayoj ke amo iuan timonamiktij”. Siuat kinankilij: “Nikita ke titanauatijkej. Itech noxolal kinemiliaj ke uelis tikueyichiuaskej Dios itech nejin tepet, sayoj ke judíos kijtouaj ke moneki se kiueyichiuas Dios sayoj ompa Jerusalén. Niknemilia ke keman ejkos Mesías, techmachtis keniuj tikueyichiuaskej Dios”. Ompa Jesús kijtoj se taman tein amo akin kiluijtoya: “Nejua niMesías”.

 Siuat tsikuinteuak hasta ixolal uan kiniluij samaritanos: “Niknemilia ke nikajsik Mesías. Kimati nochi tein nikchiuani. Xiualakan uan xikitakan”. Yejua ika yajkej iuan kampa yetoya atekoch kikakitoj tein Jesús tamachtiaya.

Samaritanos kiluijkej Jesús maj iniuan mokauani. Yejua mokauak ome tonal uan kinmachtij miak taman, uan miakej iuan takuaujtamatkej. Satepan, kiluijkej siuat: “Satepan ke tikakkej nejin takat, tikyekmatij ke yejua yekmelauj temakixtijkej”.