Timoteo katka se telpoch akin pouia itech nechikol tein moajsia Listra. Ipopaj katka griego, uan imomaj katka judía. Imomaj monotsaya Eunice, uan iueyinan monotsaya Loida. Yejuan kipaleuijkej Timoteo keman katka nojnelok maj kiixmatini Jiova.

Keman Pablo takalpanoj Listra keman ika ojpa tanojnotstinemik, kiitak ke Timoteo yekmelauj kintasojtaya tokniuan uan nochipa kinekia kinpaleuis. Yejua ika kiyoleuak maj iuan tanojnotstinemi. Satepan, Pablo kinextilij Timoteo keniuj kuali tamachtis uan kiteixmatiltis tein kuali tein kichiuas Dios.

Yektikatsin espíritu kinyekanaya Pablo uan Timoteo kampa yeski yayaj. Se youak, Dios kiitaltij Pablo se taman. Kiitak se takat akin kiluij maj youi Macedonia maj kinpaleuiti. Yejua ika Pablo, Timoteo, Silas uan Lucas ompa tanojnotsatoj uan kipeualtitoj nechikolmej.

Itech xolal Tesalónica tein pouia Macedonia, miakej takamej uan siuamej mochiujkej itatojtokakauan Cristo. Sayoj ke seki judíos kinexikoluiayaj Pablo uan akin iuan yayaj. Yejua ika kinsentilijkej miakej taltikpakneminij akin amo yolkualmej uan kintitilatskej tokniuan hasta kampa moajsiaj akin tekiuajtiaj itech xolal, uan tsajtsitiyayaj: “¡Nejin takamej kiixnamikij tekiuaj!”. Pablo uan Timoteo ueliskia kinmiktiskej, yejua ika monekik youak choloskej hasta xolal Berea.

Akin nemiaj Berea kinekiaj kikakiskej tein kuali tein kichiuas Dios, uan miakej griegos uan judíos mochiujkej itatojtokakauan Cristo. Sayoj ke keman seki judíos kayomej Tesalónica takuejmolchiuatoj, Pablo yajki Atenas. Timoteo uan Silas mokaujkej Berea uan kinyolchikaujkej tokniuan. Satepan, Pablo kititanik Timoteo maj oksepa yani Tesalónica maj kinyolchikauati tokniuan porin semi  kintajyouiltiayaj. Satepan, Pablo kititanik Timoteo maj takalpanoti itech okseki nechikolmej uan maj tayolchikauati.

Pablo kiluij Timoteo: “Akin kinekiskej kitekitiliskej Jiova kintajyouiltiskej”. Timoteo kitajyouiltijkej uan no kitsakkej porin katka itatojtokakauj Cristo. Sayoj ke yolpakia porin ijkon kinextiaya ke semi kitasojtaya Jiova.

Pablo kiniluij akin nemiaj Filipos: “Namechtitaniliti Timoteo. Yejua namechmachtis keniuj nankitekitiliskej Dios uan keniuj nantanojnotsaskej”. Pablo kiyekmatia ke Timoteo kuali kichiuaskia tekit. Miak xiujmej kisentekitilijkej Dios uan tel kuali mouikakej.