Itech se xolal tein motokaytiaya Uz, nemia se takat akin kiueyichiuaya Jiova. Motokaytiaya Job, katka tominpixkej uan kinpiaya miakej ichankauan. Uan no, katka kualtakat uan kinpaleuiaya akin kipanouayaj tatasojtilis, siuamej akin amo nemiaok ininnamik, uan konemej akin amo kipiayaj inintatuan. ¿Tiknemilia ke kemej Job kichiuaya tein kuali amo keman kipiaya kuejmolmej?

Job amo kimatia, sayoj ke Amokuali kiitstoya. Jiova kiluij Satanás: “¿Tikitani notekitikauj Job? Amo moajsi nion akin kemej yejua itech taltikpak. Nechtakamati uan kuali monejnemiltia”. Satanás kinankilij: “Mitstakamati porin tikmatampauia, tiktatiochiuia uan tikmaka talmej uan tapialmej. Xikuili nochi, uan amo mitsueyichiuasok”. Jiova kiluij: “Uelis tikuilis nochi tein kipia, sayoj ke amo xikmikti”. Jiova kikauak Satanás maj kitajyouiltiani Job. ¿Tikmati keyej? Porin kiyekmatia ke Job kisentokaskia kitakamatiskia.

Satanás kitajyouiltij Job ika miak taman. Yekinika kichiuak maj seki taltikpakneminij akin moixmatiaj kemej sabeos kiichtekilianij kuakuejmej uan burros. Satepan motatikuik uan mikkej nochin iichkauan. Okseki taltikpakneminij akin moixmatiaj kemej caldeos kiichtekilijkej camellos. No momikilijkej itakeualuan akin kinyekpixtoyaj itapialuan. Sayoj ke satepan panok tein okachi amo kuali: nochin ikoneuan momikilijkej keman kali kampa takuajtoyaj kinpechij. Job moteltayokoltij, sayoj ke kisentokak kiueyichiuak Jiova.

Satanás kinekia maj Job okachiok tajyouiani, yejua  ika kichiuak maj palani nochi inakayo. Nejon kitelkokouaya. Yejua amo kimatia keyej kipanouaya tel miak taman tein amo kuali, maski ijkon kisentokak kiueyichiuak Jiova. Dios kiitak nejon uan semi kiyolpaktij tein kichiuak Job.

Satepan, Satanás kintitanik eyi takamej uan no ika kitajyouiltij Job. Yejuan kiluijkej: “Titajtakoj uan tikneki tiktatis. Yejua ika Dios mitstatsakuiltijtok”. Job tanankilij: “Nejua amo nikchiuak nion teyi tein amo kuali”. Sayoj ke satepan peuak kinemilia ke Jiova kichiujtoya maj kipia nejon ouijkayomej uan kijtoj ke Dios amo kuali tein kichiuilijtoya.

Se telpoch akin monotsaya Elihú kikaktoya nochi tein kiluiayaj Job, uan amo teyi kijtouaya. Sayoj ke satepan kijtoj: “Nochin namejuan nanmopolojtokej. Jiova semi ueyi, okachi ke tein ueli tiknemiliaj, yejuatsin amo keman kichiuaskia tein amo kuali. Kiita nochi uan kinpaleuia akin kipanouaj ouijkayomej”.

Jiova no iuan tajtoj Job. Yejuatsin kiluij: “¿Kani tiyetoya keman nikchijchiuak iluikak uan taltikpak? ¿Keyej tiknemilia ke nikchiua tein amo kuali? Titajtoua maski amo tikmati keyej panoua seki taman”. Job kiajsikamatik ke mopoloj uan kijtoj: “Nimopoloj. Xinechtapojpolui tein nikijtoj. Niktekakilijka ke tinemi, sayoj ke axkan yekmelauj nimitsixmati uan nikita ke nochi ueli tikchiua”.

Keman tamik itajyouilis Job, Jiova kipajtij uan kimakak okachi ke tein achto kipiaya. Job nemik miak xiujmej ika yolpakilis. Jiova kitatiochiuij porin nochipa tatakamatik, maski kemansa ouij kikisak. ¿Uan tejua? ¿Tiyeski kemej Job uan nochipa tikueyichiuas Jiova, maski titajyouis?