TAMACHTILIS 23
Amo nenkaj komo tikixtaliaj timoauiskej
Jesús kijtoj ke moneki se moauis para se kinextis ke yekmelauj se kichiua kemej yejua (xikonita Mateo 28:19, 20). ¿Toni kijtosneki se moauis? ¿Uan toni moneki se kichiuas para se moauis?
1. ¿Keniuj moneki se moauis?
Tajtol neauilis mokixtia itech se tajtol griego tein kijtosneki “se mopankalakis” itech at. Keman Jesús moauij, kipankalakijkej itech ueyiat Jordán, uan “ajkopankisak ya [...] den ueyiat” (Marcos 1:9, 10). Keman moauiaj akin yekmelauj kichiuaj kemej Cristo, no kinpankalakiaj itech at.
2. ¿Toni kinextia aksa keman moauia?
Keman aksa moauia kinextia ke motemaktijya iuan Jiova, ¿keniuj motemaktia iuan? Keman kichiua se netataujtil iselti uan kiluia Dios ke kitekitilis nochipaya, uan kichiua achto ke moauis. Itech nejon netataujtil kiluia Jiova ke sayoj yejuatsin kiueyichiuas uan ke nochipa kitayekanaltis kitakamatis. Uan kiselia nochi tein Jesús tamachtij uan tein kichiuak, yejua kijtoj: “Komo aksa kineki nechtojtokas, maj moixtopeua yejua [...] uan maj kisentoka nechtojtoka” (Mateo 16:24, TNM). Keman aksa motemaktia uan moauia, kuali mouika iuan Jiova uan no iniuan oksekin akin no kiueyichiuaj.
3. ¿Toni moneki se kichiuas para se moauis?
Komo tejuatsin tikonneki tionmoauis moneki tikonixmatis Jiova uan iuan tiontakuaujtamatis (xikonita Hebreos 11:6). Keman okachi tikonixmatis Jiova uan iuan tiontakuaujtamatis okachi tikontasojtas. Nejon kichiuas xiontanojnotsa uan xikontakamati nochi tein tanauatia itech Biblia (2 Timoteo 4:2; 1 Juan 5:3). Komo aksa nemi ijkon “kemej akin kitekitiliaj Jiova” para kiyolpaktis itech nochi, ijkuak xa kinekis motemaktis iuan Dios uan moauis (Colosenses 1:9, 10, TNM). a
MAJ OKACHI TIMOMACHTIKAN
Maj tikitakan toni techmachtia keman Jesús moauij uan tein moneki tikchiuaskej achto ke timoauiskej.
4. Tein techmachtia kemej Jesús moauij
Para nankimatiskej toni panok keman Jesús moauij, xikitakan Mateo 3:13-17 uan ika xitajtokan nejin:
-
¿Katka se konetsin Jesús keman moauij?
-
¿Keniuj moauij? ¿Sayoj kikuatekilijkej tepitsin at?
Keman Jesús moauij kipeualtij tekit tein Dios kinauatijka. Xikitakan Lucas 3:21-23 uan Juan 6:38, uan ika xitajtokan nejin:
-
Satepan ke Jesús moauij, ¿katiyejua tekit kiitak ke okachi monekia?
5. Tejuatsin uelis tikonixtalis tionmoauis
Se kinemilis se motemaktis uan se moauis uelis se kimouilis. Tejuatsin xikonsentoka xikonchiua nochi tein monekis hasta keman yekmelauj tikonnekis tionmoauis. Xikonixmati sekin akin uelik moauijkej, xikitakan VIDEO.
Xikitakan Juan 17:3 uan Santiago 1:5, uan ika xitajtokan nejin:
-
¿Toni uelis kipaleuis aksa maj moaui?
-
Timotemaktiaj iuan Jiova keman tikiluiaj ke tiknekij tiktekitiliskej nochipaya.
-
Keman timoauiaj, tiknextiaj sentaixpan ke timotemaktijkejya iuan Dios.
6. Keman timoauiaj tipouij iniuan ichankauan Jiova
Keman timoauiaj, tipouij iniuan se kalyetouanij itech nochi taltikpak uan amo xexeliujtokej. Maski seseko tikayomej uan tataman tein tikpanouanij, tinochin akin timoauijkejya tikneltokaj sayoj se taman uan tiktakamatij tein Biblia kijtoua. Xikitakan Salmo 25:14 uan 1 Pedro 2:17, uan ika xitajtokan nejin:
-
¿Keniuj techpaleuia komo timoauiaj?
TEIN SEKIN KIJTOUAJ: “Niknemilia ke ayamo uelis nimoauis”.
-
Maski ijkon tionmomachilia, ¿tikonnemilia ke moneki tikonsentokas tikonixtalis tionmoauis?
TEIN TIKITAKEJ
Jesús kijtoj ke akin yekmelauj kichiuaj kemej yejua, moneki moauiskej. Achto ke aksa moauis moneki semi takuaujtamatis iuan Jiova, kitakamatis itanauatiluan uan motemaktis iuan.
Maj tikelnamikikan
-
¿Toni kijtosneki se moauis uan keyej semi moneki?
-
¿Keyej moneki se motemaktis achto ke se moauis?
-
¿Toni moneki kichiuas aksa achto ke motemaktis uan moauis?
NO XIKONITA NEJIN
Xikonita tein kijtosneki se moauis uan tein sekin kinemiliaj.
Xikonita toni uelis tikonchiuas para uelis tionmoauis.
Xikonita keniuj se takat moauij amo sayoj porin ijsiujka kinemilij.
“Querían que descubriera la verdad por mí mismo” (La Atalaya, 1 de febrero de 2013)
Xikonita keyej amo nenkaj tikonixtalis tionmoauis uan tein uelis tikonchiuas.
a Komo aksa kiauijkajya itech okse taneltokalis, monekis oksepa moauis, porin itech nejon taneltokalis amo kimachtijkej tein yekmelauj tamachtia Biblia (xikonita Hechos 19:1-5 uan tamachtilis 13).
Xa no tikonuelitas
NETAJTANILMEJ TEIN MOCHIUAJ
¿Keniuj itaixpantijkauan Jiova kimachtiaj aksa ika Biblia?
Keman se itaixpantijkauj Jiova mitsonmachtis, tejuatsin uelis tikonkuis tein yeski Biblia. No uelis tikonyoleuas akin nemij mokalijtik oso akin yeski.
