BIBLIA TAYOLMAJXITIA: “Akin ika nejmachkayot niman kiixtalia keniuj kichiuas teisa yekmelauj kuali kisas, sayoj ke nochin akin moijsiuiliaj yekmelauj kipiaskej tatasojtilis” (Proverbios 21:5).

TEIN KIJTOSNEKI: Semi tepaleuia keman se kiixtalia keniuj se kichiuas teisa uan ijkon se kichiua. Yejua ika, kuali xikonixtali tein tikonkouas. Xikonelnamiki ke amo uelis tikonkouas nochi tein tikonnekis. Yejua ika, kuali xikonixejeko keniuj tikontekitiltis tomin.

TEIN UELIS TIKONCHIUAS:

• Xikonixtali keniuj tikontekitiltis tomin. Xikonijkuilo tein moneki tikonkouas uan xikonixtali ox yeski takual, tilmaj oso tein moneki kalijtik. Satepan xikonixtali kanachi tomin tikonkuis itech sejse taman. Komo tikonita ke amo mitsonajsis tomin itech se taman, xikonkui tein ixyetoya ika tikonkouas okse taman. Xikonnemili ke amo mitsonajsi tomin tein ika tikonkouas gas. Komo ijkon, xikonkui tomin tein ika tikonkouaskia okse taman tein amo semi moneki.

• Amo xionmotauikalti komo amo moneki. Achto ke tikonkouas teisa, yekinika xikonsentili tomin. Komo tikonkoua teisa tein satepan uelis tikonixtauas, xikonixtaujtiyouj sejse metsti tein moneki uan ijkon amo okachi tiontaxtauas. Uan komo tiontauikaya, xikonixtali keniuj uelis tikonixtauas uan ijkon xikonchiua.

  Moijtoua ke okachi se taxtaua keman se kikoua teisa tein satepan uelis se kiixtauas. Yejua ika, komo ijkon tiontakoua, kuali xiontaixejeko.

BIBLIA TAYOLMAJXITIA: “Akin tatsiui amo kineki kikaxanis tal keman taseseya; yejua ika tatemojtinemis keman mosentilis tatet, keman amo teyi kipias” (Proverbios 20:4).

TEIN KIJTOSNEKI: Komo se tatsiui, xa amo semi teyi se kipias. Yejua ika, xiontekiti uan kuali xikontekitilti motomin, porin nejon mitsonpaleuis satepan.

TEIN UELIS TIKONCHIUAS:

• Xiontekitikej. Komo kuali tiontekiti uan tiontakuaujtamach, akin mitsontakeua kinekis xikonsentoka xikontekitili.

• Amo xiontakajkayaua. Komo tiontakajkayaua, oksekin ijkon mitsonixmatiskej uan amo kinekiskej mitsontakeuaskej.

• Amo xikontemo tionmotomintis. Komo tikontelneki tionmotomintis, xa tionkokolispeuas uan xa amo kuali tionmouikasok iniuan oksekin. Xikonelnamiki ke tomin amo yejua tein okachi tayekantok.

MAJ AMO SE TONALPOLO NION MAJ SE KIAUILO TOMIN ITECH TEIN AMO KUALI

“Akin mouintia uan akin kanpets kipanoskej tatasojtilis, uan akin sayoj kochij motilmajtiskej ika tasal kotoltik.” (PROVERBIOS 23:21.)

MAJ AMO SEMI SE MOTEKIPACHO IKA TOMIN

“Amo ximoyolkuejmolojtinemikan de namonemilis, de namotakualis, de namoatilis. Uan amo no ximoyolkuejmolokan de namotaken.” (MATEO 6:25.)

MAJ AMO SE KINNEXIKOLUI OKSEKIN

“Takat akin tenexikoluia kinejneki motomintis, uan amo kimati ke kipanos tatasojtilis.” (PROVERBIOS 28:22.)