Keman tikpanouaj se ueyi ouijkayot semi timotekipachouaj. Yejua ika, tonakayo kichiua seki taman tein ika mopaleuia. Itech tokuatixyo peuaj momiakiliaj seki taman tein moixmatij kemej hormonas tein momoyauaj itech nochi tonakayo. Nejon kichiua maj toyolo okachi ijsiujka tekiti, maj okachi ijsiujka nejnemi esti, maj okachi ijsiujka timijyotikan uan maj takuauaya seki taman itech tonakayo. Achto ke tikmatiskej tein techpanoua, tonakayo kichiuakya seki taman tein ika mopaleuis. Keman amo timotekipachouajok, tonakayo amo kitemouaok mopaleuis uan kuali tekitia.

Keman semi timotekipachouaj porin tikpanouaj ouijkayomej oso keman teisa uelis techijtakos, tonakayo kichiua seki taman tein ika mopaleuia. Yekinika, tokuatixyo kitemoua maj tonakayo mopaleui. Kemansa, techpaleuia keman timotekipachouaj porin kichiua maj niman tikchiuakan teisa oso maj tiijsiuikan. No techpaleuia maj tikchiuakan tein tikixtaliaj oso maj okachi kuali tikchiuakan teisa. Uelis ijkon techpanos keman tikchiuaj examen, keman titajtanij tekit oso keman timauiltiaj.

Sayoj ke, komo nochipa timotekipachouaj oso semi timotekipachouaj uelis semi techijtakos. Keman tonakayo nochipa kitemoua mopaleuis, uelis moijtakos uan xa amo kuali timomachiliskej. Xa no tikchiuaskej seki taman tein amo tikchiuayaj oso amo timouikaskejok iniuan oksekin kemej achto tikchiuayaj. Akin nochipa motekipachouaj peua tauanaj, kikuij droga, semi tayij pajti, semi takuaj, semi tachichinaj oso kichiuaj okseki taman tein amo kipaleuia ininnakayo. Sekin semi motayokoltiaj, semi siouij oso hasta kinemiliaj momiktiskej.

Amo nochin semi kinijtakoua keman semi motekipachouaj. Sayoj ke, kemansa uelis kichiuas maj tikokolispeuakan oso maj amo kuali tekiti seki taman itech tonakayo.