Se kintakakiltis kijtosneki se kinixyekanas, se kinmachtis uan kemansa, se kinpaleuis para maj kiyekchiuakan teisa. Sayoj ke, no kijtosneki maj no tikinpaleuikan maj kichiuakan tein kuali uan ijkon kuali taixpejpenaskej.

Itech nejin tonalmej, miakej tetatmej amo semi kintakakiltiajok inikoneuan, porin amo kinekij kinyolxokoliskej. Sayoj ke, tetatmej akin kintasojtaj ininkoneuan kiixtaliaj uan kinmachtiaj tein moneki uan tein amo moneki kichiuaskej.

“Tetatmej amo moneki kinkauaskej ininkoneuan maj kichiuakan nochi tein yejuan kinekiskej. Ijkon keman uejueykej yeskij kuali taixpejpenaskej. Komo amo ijkon kinpaleuiaj amo kimatiskej toni kichiuaskej uan amo kuali taixpejpenaskej” (Pamela).

Amo xikonelkaua. Komo mokoneuj amo mitsontakamati, xikonnextili ke tein kichiuas uelis kitajyouiltis. Sayoj ke, keman mitsontakamatis, no xikonilui ke kuali tein kichiuak.

“Kemej axkan miakej amo tatakamatij, nochipa keman nokoneuan nechtakamatij nikiniluia ke kuali kichiujkej. Ijkon amo ouij kinkisa nechkakiskej keman nikintakakiltia” (Christine).

BIBLIA KIJTOUA: “Tein se kitoktos yejua tein se kisentilis” (Gálatas 6:7).

Amo xionyolijsiui. Keman tikontakakiltis mokoneuj, xikonita kanachi xiujmej kipia, toni ueli kichiua uan ox semi amo kuali tein kichiuak. Moitani ke tikintakakiltis mokoneuan keman mopolouaj, kinpaleuia. Xikonnemili nejin, komo mokoneuj amo kitakamatik tein tejuatsin tikonixtalij kemej moneki kitekitiltis celular, xa ueliskia tikonkuilis seki tonalmej. Sayoj ke xikonchiua ika taixejekolis.

“Nochipa niktemoua nikmatis keyej nokoneuj amo nechtakamatik. Xa porin ipa ijkon kinekia kichiuas oso mopoloj. Taman se kitakakiltia porin ipa amo kineki tatakamatis uan taman keman sayoj mopoloj” (Wendell).

BIBLIA KIJTOUA: “Amo xikinkualantikan namokoneuan, para maj yejuan amo moyolkokokan” (Colosenses 3:21).

Xikonnextili ke tikintasojta. Komo ika netasojtalis tikintakakiltia mokoneuan, yejuan kiitaskej nejon uan ijkon amo ouij kinkisas mitsonkakiskej uan kichiuaskej tein tikinyolmajxitia.

“Keman tokoneuj mopolouaya, nochipa tikiluiayaj ke techyolpaktiaya nochi tein kuali tein kiixpejpenaya kichiuas. No tikiluiayaj ke maski mopolojka, sayoj katka se nepolol uan ke tejuan tikpaleuiskiaj” (Daniel).

BIBLIA KIJTOUA: “Akin tetasojta amo yolijsiui uan kualtakat” (1 Corintios 13:4).