Keman tiknekij tikixmatiskej aksa, yekinika xa tiktajtaniaj: “¿Keniuj tionmonotsa?”. Komo tiktajtaniskiaj Dios nejon, ¿toni technankiliskia?

“Nejua niJiova. Yejua nejon notokay.” (Isaías 42:8.)

Dios kiita ke motelneki. Amo akin kitalilij nejon tokayit Dios, ta yejuatsin kiixpejpenak. Jiova kijtoua: “Yejua nejin notokay nochipaya, uan ika nejin nechelnamikiskej axkan uan nochipaya” (Éxodo 3:15). Itech Biblia, itokay Dios okachi miakpa ixnesi ke okseki tajtolmej tein ika kiixmatij kemej Akin kipia nochi chikaualis, toTajtsin, toTeko oso Dios, uan okachi ixnesi ke okseki tokaymej kemej Abrahán, Moisés, David oso Jesús. Uan no, Jiova kineki maj tikixmatikan itokay. Biblia kijtoua: “Maj taltikpakneminij kimatikan ke motokay Jiova uan ke sayoj tejua okachi tiUeyichiujkej itech nochi taltikpak” (Salmo 83:18).

Jesús kiita ke motelneki. Ika netataujtil tein moixmati kemej padrenuestro, Jesús kinmachtij imomachtijkauan maj kitataujtikan Dios ijkon: “Maj mochipaujkatali motokay” (Mateo 6:9, TNM). Uan no kitataujtij Dios: “Notajtsin Dios, xikueyipanchiua motokaytsin” (tejuan tiktalilijkej cursivas; Juan 12:28). Jesús kiitaya ke motelnekia kiueyitalis itokay Dios. Yejua ika kiluij: “Nikinnextilijtinemik [...] motokaytsin de akoni Tejuatsin. Uan nikinmachtijtinemis” (Juan 17:26).

Akin kiixmatij Dios kiitaj ke motelneki. Ne uejkauj, itekitikauan Dios kimatiaj ke yejuatsin kinpaleuiskia uan kinmakixtiskia komo kiixmatiaj itokay uan komo sayoj yejua kiueyichiuayaj. Semej kijtoj: “Itokay Jiova se uejkapan tepankali. Ompa youi  akin yolmelauak uan kiselia nepaleuil”. Uan okse kijtoj: “Nochin akin kijtoskej itokay Jiova makisaskej” (Proverbios 18:10; Joel 2:32). Biblia kijtoua ke itekitikauan Dios moixnextiskiaj ika itokay. “Nochin xolalmej nentinemiskej, sejse itech itokay idios, sayoj ke tejuan tinentinemiskej itech itokay Jiova toDios nochipaya.” (Miqueas 4:5; Hechos 15:14.)

Kinextia ke amo onkak okse Dios. Miakej motelmachtianij kijtouaj ke tokayit Jiova kijtosneki “Yejuatsin Kichiua maj Mochiua”. Kemej Jiova moixnextij iuan Moisés techpaleuia maj tikajsikamatikan tein kijtosneki itokay. Dios kijtoj: “Nejua nimochiuas tein nikixpejpenas nimochiuas” (Éxodo 3:14). Yejua ika, itokay techmachtia ke yejua Tachijchiujkej, akin kichiua maj nochi onka. Uan no, techmachtia ke yejuatsin ueli mochiua oso kichiua maj itachijchiualis mochiua tein moneki uan ijkon maj mochiua itanejnekilis. Maski tajtolmej tein ika kiixmatij kinextia tanauatil tein kipia oso ichikaualis, sayoj itokay, Jiova, kinextia keniuj tamati uan tein ueli kichiua.

Kinextia ke Dios toka motekipachoua. Tein kijtosneki itokay Dios kinextia ke yejuatsin kitasojta nochi tein kichijchiuani, kampa tejuan no tipouij. Yejuatsin kineki maj tikixmatikan uan yejua ika techmatiltij itokay. Tein melauj, Dios techmatiltij itokay achto ke timotajtaniskiaj keniuj monotsa. Kemej tikitaj, yejuatsin amo kineki maj tiknemilikan ke amo ueli se kiixmati oso ke uejka moajsi, ta ke yekmelauj nemi uan ke ueli iuan se motokia (Salmo 73:28).

Keman tiktokaytiaj, tiknextiaj ke tiknekij tikixmatiskej. Xikonnemili ke tikonneki tionmouikas iuan aksa uan tikoniluia maj mitsontokayti. ¿Keniuj tionmomachiliskia komo amo kineki? Xa tikonnemiliskia ke amo kineki mouan mouikas. No ijkon panoua iuan Jiova. Yejuatsin techmatiltij itokay uan kineki maj tikuikan. Keman tikchiuaj, tiknextiaj ke tiknekij timotokiskej iuan. Biblia kijtoua ke Dios kimati akoni tanemilijtok itech itokay (Malaquías 3:16).

Motelneki tikmatiskej keniuj monotsa Dios porin nejon techpaleuis maj peua tikixmatikan. Uan no, moneki tikmatiskej keniuj tamati.