Timouikaskej iuan aksa komo kuali tikixmatij. No ijkon, kuali timouikaskej iuan Dios komo tikixmatij. Keman okachi kuali tikixmatiskej okachi iuan timotokiskej. Yejuatsin kinextia miak taman tein kualtsin, sayoj ke naui taman okachi tayekantokej: chikaualis, tamatilis, melaujkayot uan netasojtalis.

“¡ToTajtsin Jiova akin okachi Ueyi Taixyekankej! ¡Xikita! Tejua tikchijchiuak iluikak uan taltikpak ika moueyi chikaujkauelilis.” (JEREMÍAS 32:17.)

Itachijchiualis Dios kinextia ichikaualis. Xikonnemili, ¿melauj ke keman tona tikmachiliaj ichikaualis Tonaltsin? Tein melauj, nejon kinextia ichikaualis Jiova tein ika tachijchiuak. ¿Hasta kani ajsi ichikaualis Tonaltsin? At momoloka keman kauani 100 grados. Sayoj ke iijtik Tonaltsin kauantok kemej 15,000,000 grados. Sejse segundo, kikixtia chikaualis kemej ijkuak toponij miak millones bombas nucleares.

Sayoj ke, moajsij okachi uejueyi sitalimej ke Tonaltsin. Tamatinij kiixejekouaj ke sitalij UY Scuti, semej sitalimej tein okachi uejueykej, okachi ueyi 1,700 ke Tonaltsin. Komo UY Scuti kiixpataskia Tonaltsin kipanauiskia taltikpak uan no kipanauiskia planeta tein itokay Júpiter. Nejin xa techpaleuis maj okachi kuali tikajsikamatikan keyej Jeremías  kijtoj ke Jiova kichijchiuak iluikak uan taltikpak ika iueyi chikaualis.

¿Keniuj techpaleuia ichikaualis Dios? Nochi tein Jiova kichijchiuak techpaleuia maj tiyoltokan, kemej Tonaltsin uan miak taman tein onkak itech taltikpak. Uan no, Dios kikui ichikaualis uan ika techpaleuia tisejsemej. ¿Keniuj? Keman Jesús nemik taltikpak, Dios kimakak chikaualis uan ika kichiuak uejueyi tachiualismej. Biblia kijtoua: “Ixpojpoyome Nejuatsin nikintachialij ya. Uan in koxojme, axkan nikinnejnemiltij ya. Uan nochi kokoyani ten kokotokatoyaj ninakayo, axkan Nejuatsin nikinchipauak ya [...]. Uan nochi naken amo takakiaj, axkan nikintakakiltij ya. Uan in taka ten momikilijkaj ya, yejuan nojonkes nikinpankixtij yoltokke” (Mateo 11:5). Biblia kijtoua tein Dios kichiua axkan: “Kimaka chikaualis akin sioujtok”. Uan no kijtoua: “Akin mochixtokej itech Jiova oksepa kipiaskej chikaualis” (Isaías 40:29, 31). Dios uelis techmakas “chikaukauelilis” uan ijkon uelis tikixnamikiskej kuejmolmej (2 Corintios 4:7). Tikonmatis ke Dios techpaleuia ika iueyi chikaualis porin semi techtasojta, kichiua okachi iuan xionmotoki.

“¡Tel miak motachiualisuan, Jiova! Ika tamatilis tikchijchiuak nochi.” (SALMO 104:24.)

Keman okachi tikixmatij tein Dios kichijchiuak, okachi tikmoujkaitaj itamatilis. Tamatinij momachtiaj se taman tein moixmati kemej biomimética kampa kiitaj tein Jiova kichijchiuak uan kitemouaj no ijkon kichijchiuaskej teisa, kemej se cámara oso se avión.

Sayoj ke, kemej tejuan tichijchiujtokej okachi kinextia iueyi tamatilis Dios. Maj tiknemilikan keniuj mochijchiua se konetsin. Yekinika, se célula mosentilia iuan okse uan itech moajsi keniuj tamatis konetsin. Nejin célula momiakilia. Sayoj ke, satepan peua mopataj uan mochiuaj tataman células, kemej tein ika chijchiujtok esti, omit uan taluamej. Satepan, mochijchiua okseki taman itech inakayo uan peuaj tekitij. Itech sayoj chiknaui metsti, nejon yekinika célula moskaltia hasta mochiuas se konetsin tein chijchiujtok ika millones células. Keman miakej kiitaj ke tichijchiujtokej ika tamatilis, no kijtouaj kemej se akin kijkuiloj Biblia: “Nimitsueyichiuas porin necholinia maj nitamoujkatoka porin tel kualtsin nichijchiujtok” (Salmo 139:14).

¿Keniuj techpaleuia itamatilis Dios? ToTachijchiujkauj kimati tein techpaleuis maj tiyolpakikan. Kemej semi tamatkej, kuali techyolmajxitia ika iTajtol, Biblia. Yejuatsin techiluia: “Ximotapojpoluijtiyakan se uan okse” (Colosenses 3:13). ¿Keniuj techpaleuia nejin? Tamatinij kiajsinij ke se tetapojpoluis uelis techpaleuis maj okachi kuali tikochikan, maj kuali tekiti toyolo, maj amo timotayokoltijtokan uan maj amo semi tikokolispeuakan. Dios kemej yeskia se akin kuali iuan timouikaj akin toka motekipachoua uan nochipa techiluia tein techpaleuis (2 Timoteo 3:16, 17). ¿Tikonuelitaskia kuali iuan tionmouikas?

“Jiova kitasojta melaujkayot.” (SALMO 37:28.)

Dios nochipa kichiua tein melauak. Akin kipia nochi chikaualis amo kichiua tein amo kuali (Job 34:10). Nochipa tamelaua ika melaujkayot, ijkon kemej kijtoj semej akin kijkuiloj salmos: “Tikinmelauas altepemej ika melaujkayot” (Salmo 67:4). Kemej kimati tein tiknemiliaj uan tein tikmachiliaj amo ueli tikajkayauaj, ta nochi kimati uan tamelaua ika melaujkayot (1 Samuel 16:7). Uan no, Dios kiita teikamauiltilis tein mochiua noyampa uan motenkaua ke akin amo yolkualmej amo uejkaua “kinajchiuaskej itech taltikpak” (Proverbios 2:22).

Nejon amo kijtosneki ke Dios amo teiknelia uan ke yolpaki tetatsakuiltis. Keman kiita ke taixejekol, teiknelia. Biblia kijtoua ke Jiova “teiknelia uan kineki tapaleuis”, hasta iniuan akin kichiuaj tein amo kuali uan mopataj. Kemej tikitaj, Dios kinextia melaujkayot (Salmo 103:8; 2 Pedro 3:9).

¿Keniuj techpaleuia imelaujkayo Dios? Pedro, se imomachtijkauj Cristo, kijtoj: “Dios amo kinchichikojtasojta in tagayot. Ta, Yejuatsin kiniknelia tagayot tech nochi in senmanauak komo yejuan kimouistiliaj Yejuatsin uan chipaukanentinemij” (Hechos 10:34, 35). Kemej Dios amo keman techikotasojta, tinochin techpaleuia imelaujkayo. Maski kampa yeski tikayomej, tiyeskij titamachtilmej oso amo, tikpiaskej tomin oso amo yejuatsin techselia.

ToTachijchiujkauj techmakak totanemilil porin kineki maj tikajsikamatikan imelaujkayo uan maj techpaleui. Biblia kijtoua ke totanemilil kemej yeskia se tanauatil tein totech moajsi uan techpaleuia maj tikmatikan ox kuali yetok oso amo tein tikchiujtokej (Romanos 2:15). ¿Keniuj techpaleuia nejon? Komo kuali tikmachtiaj totanemilil techpaleuis maj amo tikchiuakan tein amo kuali oso tein techijtakos. Uan komo tikchiuaj se tajtakol, uelis techolinis maj tikauakan nejon tajtakol. Senkis tikitaj  ke tikajsikamatiskej imelaujkayo Dios techpaleuia uan techtokia iuan.

“Dios Yejuatsin tetasojtatinemi.” (1 JUAN 4:8.)

Biblia amo kijtoua ke Dios yejua chikaualis, tamatilis oso melaujkayot. Sayoj ke, kemaj kijtoua ke Dios yejua netasojtalis. ¿Keyej? Porin maski ika ichikaualis kichiua miak taman uan ika imelaujkayo uan itamatilis moixyekana keman kichiua teisa, netasojtalis kiolinia maj kichiua. Nochi kichiua porin tetasojta.

Maski Jiova amo moneki maj aksa kipaleui, inetasojtalis kiolinij maj kinchijchiua itech iluikak uan taltikpak akin ueliskia kinnextilis inetasojtalis. Ika miak pakilis kichijchiuak taltikpak kemej ueliskia kuali tinemiskej. Uan kisentoka technextilia inetasojtalis porin “kichiua ma pankisa in tonaltsin para kinpaleuis nochi naken yolkualime uan naken amo yolkualime. Uan Yejuatsin no kualtitani in kioutsin para kinpaleuis naken yolchipauke uan naken amo” (Mateo 5:45).

Uan no, Jiova “semi teyoliknelia uan teyoltasojta” (Santiago 5:11). Kinnextilia ke kintasojta akin yekmelauj kitemouaj kiixmatiskej uan motokiskej iuan. Dios kinixmati sejsemej. Tein melauj, “amo uejka yetika de cada senme de tejuan” (Hechos 17:27).

¿Keniuj techpaleuia inetasojtalis Dios? Dios technextilia inetasojtalis ika miak taman, kemej keman se konetsin ixuetska, tiyetoskej iniuan tochankauan uan tikitaskej keniuj pankalaki Tonaltsin. Maski nejin amo techpaleuia maj tiyoltokan, semi techyolpaktia.

Dios no technextilia inetasojtalis ika netataujtil. Biblia kijtoua: “Amo teyika ximoyolkuejmolokan. Ta, nachipa ximoteixpantikan iixpantsinko Totajtsin Dios ika namonetatatautilis uan xiktasojkamachilikan Dios. Uan no xiktajtanilikan Dios nochi ten namechpoloa”. ToTajtsin Jiova techtasojta uan kineki maj tiktapouikan nochi tein techtekipachoua. Komo tikchiuaj, motenkaua techmakas iyolseuilis “ten kachi kuika uelilis” (Filipenses 4:6, 7).

Itech nejin tamachtilis, tikitakej kualtsitsin taman tein Dios okachi kinextia: chikaualis, tamatilis, melaujkayot uan netasojtalis. Axkan timitsonyoleuaj xikonsentoka xikonixtajtolti nejin amaix uan xikonmati tein Dios moka kichiuani uan tein kichiuas.