AKIN NEMIJ ITECH TALTIKPAK

¿Toni kijtoua Biblia? Dios amo “nenkaj kichijchiuak [taltikpak], ta kichijchiuak maj ompa nemikan” (ISAÍAS 45:18).

TALTIKPAK

¿Toni kijtoua Biblia? “Sekin youij, sekin uitsej; sayoj ke taltikpak nochipa yetok” (ECLESIASTÉS 1:4).

¿TONI KIJTOSNEKI? Biblia tamachtia ke taltikpak amo keman ixpoliuis uan nochipa miakej ompa nemiskej. Yejua ika, ¿keyej Biblia kijtoua ke ixpoliuis taltikpak?

XIKONNEMILI NEJIN. Biblia kijtoua ke keman ixpoliuis taltikpak mochiuas kemej itech itonaluan Noé. Nejon tonalmej ‘tel onkaya tateuilis’ itech taltikpak (Génesis 6:13). Sayoj ke Noé kitakamatia Dios, yejua ika yejuatsin kimakixtij yejua uan ichankauan. Uan akin amo yolkualmej kinixpoloj ika se tetsaujkakiouit. Biblia kijtoua tein panok: “Tech ne uejkauxiume [...] kinixpoloj nochi in taltikpakuani ika ne tetsaukakiouit” (2 Pedro 3:6). Itech nejon tonalmej ijkon mochiuak ixpoliuilis. Sayoj ke, ¿toni ixpoliuik? Amo taltikpak, ta akin amo yolkualmej. Yejua ika, keman Biblia ika tajtoua ixpoliuilis amo kijtosneki ke ixpoliuis taltikpak. Ta kijtosneki ke ixpoliuiskej nochin akin amo yolkualmej uan nochi tein amo kuali tein kichiuanij.

KUEJMOLMEJ UAN TEIN AMO KUALI

¿Toni kijtoua Biblia? “Amo uejkauaok, akin amo yolkualmej amo nemiskejok; titachias kampa yetoyaj, uan amo ompa yetoskej. Sayoj ke akin yolnejmachmej ininaxkatis taltikpak uan yolpakiskej porin kipiaskej ueyi yolseuilis” (SALMO 37:10, 11).

¿TONI KIJTOSNEKI? Keman panok tetsaujkakiouit, akin amo yolkualmej oksepa peuak kintajyouiltiaj oksekin. Yejua ika, tetsaujkakiouit amo senkis kiixpoloj tein amo kuali. Sayoj ke, amo uejkaua Dios senkis kiixpolos. Kemej kijtoj akin kijkuiloj se salmo, “akin amo yolkualmej amo nemiskejok”. Dios kiixpolos nochi tein amo kuali ika iTekiuajyo, se taixyekanalis tein yetok iluikak uan kinixyekanas akin kitakamatij Dios itech nochi taltikpak.

XIKONNEMILI NEJIN. ¿Toni panos iniuan tekiuanij itech taltikpak? ¿Kipaleuiskej iTekiuajyo Dios? Biblia kijtoua ke amo, ta kichiuaskej se taman tein semi amo kuali, kiixnamikiskej iTekiuajyo Dios (Salmo 2:2). ¿Toni kinpanos? ITekiuajyo Dios kinixpatas akin taixyekanaj taltikpak uan “sayoj yejua yetos nochipaya” (Daniel 2:44). Sayoj ke, ¿keyej amo monekiok maj taixyekanakan akin nemij taltikpak?

¿Toni kijtoua Biblia? “Nion kinamiki takat akin nejnentok kiyekanas itaksalis” (JEREMÍAS 10:23).

¿TONI KIJTOSNEKI? Amo tichijchiujtokej maj toselti timoixyekanakan. Yejua ika, amo ueli tikinixyekanaj oksekin nion ueli tikyektaliaj ininkuejmoluan.

XIKONNEMILI NEJIN. Enciclopedia Britannica Academic kijtoua ke tekiuanij itech tataman altepemej, amo uelij “kiyektaliaj nochi uejueyi ouijkayomej tein mochiua itech nochi taltikpak, porin tikokolispeuaj, onkak tatasojtilis, mayan, tetsaujmej, uejueyi neteuilismej uan okseki taman kemej kinteuiaj oksekin”. Uan no kijtoua: “Sekin [...] kinemiliaj ke komo aksa taixyekanaskia itech nochi taltikpak ueliskia kiixpolos nochi tein amo kuali nochipaya”. Sayoj ke, maski nochin tekiuanij mosenpaleuiskiaj, kisentokaskiaj techixyekanaskiaj akin tajtakolejkej, akin amo uelij techijkuaniliaj kuejmolmej tein moijtoj achto. Sayoj iTekiuajyo Dios uelis kiixpolos nochipaya nochi tein amo kuali.

Kemej kijtoua Biblia, akin kichiuaj tein kuali amo moneki kimouiliskej keman ixpoliuis nochi tein amo kuali. Ta moneki kichiaskej ika yolpakilis porin nejin taltikpak kampa semi mochiua tein amo kuali kiixpatas yankuik taltikpak tein Dios kichiuati.

¿Kemanian mochiuas nejin? Itech okse tamachtilis tikitaskej tein Biblia kijtoua.