Timomachtijkejya ke amo uejkaua mochiuas ixpoliuilis, tein kijtosneki ke Dios niman kiixpolos nochi tein amo kuali uan akin amo yolkualmej. ¿Keyej titakuaujtamatij ke ijkon mochiuas? Porin iTajtol Dios ijkon kijtoua:

“Taltikpak panotiuj” (1 JUAN 2:17, TNM).

Sayoj ke senkis tikneltokaj ke miakej makisaskej porin nejin texto no kijtoua:

“Akin kichiua itanejnekilis Dios mokaua sennochipaya”.

Yejua ika, timakisaskej komo tiktakamatij Dios. Sayoj ke para tiktakamatiskej moneki kuali tikixmatiskej.

Jesús kijtoj: “Nachipa nemilis kijtosneki yejua nijin: [...] ma mitsonixmatikan [...] ke [...] sayo Tejuatsin tion Dios” (Juan 17:3). Para timakisaskej keman ixpoliuis nochi tein amo kuali uan tinemiskej nochipaya moneki tikixmatiskej Dios, nejin kijtosneki ke amo sayoj moneki tikneltokaskej ke Dios nemi oso tikmatiskej seki taman de yejuatsin, ta moneki kuali iuan timouikaskej. Komo tiknekij okachi kuali timouikaskej iuan aksa moneki tiempo para iuan tiyetoskej, no ijkon iuan Dios. Maj tikitakan toni tamachtia Biblia tein techpaleuis maj nochipa kuali timouikakan iuan Dios.

Para tiyoltoskej moneki mojmostaj titakuaskej, sayoj ke Jesús kijtoj: “In taka ma nemikan amo sayo ika in takualis san. Ta, no [...] ika nochi in tajtolme ten Dios techmaktilijtinemi” (Mateo 4:4).

Axkan tikajsij itajtoluan Jiova itech Biblia. Ijkon kemej timomachtijtiouij nejin amatajkuilol, tikitaj tein Dios kichiuak ne uejkauj, tein kichiujtok axkan uan tein kichiuatiok.

Komo tiknekij tiktakamatiskej Dios sayoj ke techouijmaka amo tikchiuaskejok tein yejuatsin kijtoua ke amo kuali, ¿toni uelis tikchiuaskej? Semi techpaleuis komo tikixmatij Dios.

Maj tikitakan tein kipanok se siuat akin tiktokaytiskej Sakura. Yejua auilnemia, sayoj ke keman peuak momachtia Biblia kiitak ke Dios tanauatia: “Xikcholouilikan [...] ne auilnemilis” (1 Corintios 6:18). Sakura kitajtanij Dios maj kipaleui uan uelik kikauak tein kichiuaya. Sayoj ke moneki kisentokas kiixtopeuas tein amo kuali. Yejua kijtoj: “Keman ika nitanemilia auilnemilis nikiluia Jiova keniuj nimomachilia porin nikmattok ke amo uelis noselti nikixnamikis. Netataujtil okachi nechtokiani iuan Jiova. Kemej Sakura, millones momachtijtokej akoni Dios uan yejuatsin kinpaleuijtok maj kipatakan tein moneki para kiyolpaktiskej (Filipenses 4:13).

Komo okachi tikixmatij Dios, yejuatsin okachi kuali techixmatis uan kuali mouikas touan (Gálatas 4:9; Salmo 25:14). Ijkon timakisaskej keman ixpoliuis nochi tein amo kuali uan uelis tinemiskej itech yankuik taltikpak tein Dios kichiuas. ¿Keniuj yeski nejin taltikpak? Okse tamachtilis kimelauas.