1. ¿Toni uelis panos maski aksa tel tajtakolchiuak?

 ITECH okse tamachtilis tikitakej toni kiniluij tatitanil Pablo maj kichiuanij tokniuan de Corinto keman se takat tel tajtakolchiujtoya. Kemej amo moyolpataya monekik kikalankixtiskej de nechikol. Sayoj ke kemej kijtoua texto kampa mokixtia nejin tamachtilis, Dios uelis kipaleuis aksa maj moyolpata (Rom. 2:4). Sayoj ke, ¿keniuj kichiua Jehová maj tayekananij kipaleuikan se tajtakolchiujkej maj moyolpata?

2, 3. ¿Toni uelis tikchiuaskej komo tikmatij ke se tokniuj tel tajtakolchiuak uan keyej?

² Tayekananij amo uelis kipaleuiskej aksa komo amo kimatij ke tajtakolchiuak. Yejua ika, komo tikmatij ke aksa itech nechikol tel tajtakolchiuak uan hasta uelis kikalankixtiskej, ¿toni moneki tikchiuaskej? Achto, moneki tikyolchikauaskej maj kinilui tayekananij maj kipaleuikan (Is. 1:18; Hech. 20:28; 1 Ped. 5:2).

³ Uan ¿toni uelis tikchiuaskej komo amo kineki tajtos iniuan tayekananij? Kemej tiknekij maj kipaleuikan, tejuan tikintapouiskiaj tayekananij. Keman ijkon tikchiuaj tiknextiaj ke tiktasojtaj porin tokniuan uelis kipaleuiskej. Komo amo moyolpata, okachi amo kuali mouikas iuan Jehová, uan no, komo akin amo itaixpantijkauan Jehová kimatij tein kichiuak, xa yejuan amo kuali ika tajtoskej Jehová uan inechikol. Yejua ika maski techouijmakas, timoyolchikauaskej uan tikiniluiskej tayekananij porin tiktasojtaj Jehová uan no tiktasojtaj tokniuj (Sal. 27:14).

 KENIUJ TAYEKANANIJ KIPALEUIAJ AKIN TEL TAJTAKOLCHIUAK

 4. ¿Toni kitemouaj kichiuaskej tokniuan tayekananij keman mosentiliaj iuan akin tel tajtakolchiuak?

⁴ Keman se tokniuj tel tajtakolchiua, oloch tayekananij kinixpejpenaj eyi tokniuan tayekananij para maj iuan mosentilikan. a Yejuan moneki maj yolyemankej uan maj kiajsikamatikan ke amo nochi ueli kichiuaj. No moneki kiajsikamatiskej ke maski kitemoskej kipaleuiskej akin tajtakolchiuak, amo uelis kichikaujkauiskej maj mopata (Deut. 30:19). Tayekananij kiajsikamatij ke amo nochin moyolpataj ijkon kemej moyolpatak tekiuaj David (2 Sam. 12:13). Sekin amo kinekij kikakiskej tein Jehová kinyolmajxitia (Gén. 4:​6-8). Maski ijkon, tayekananij kinekij uan kitemouaj kipaleuiskej maj moyolpata akin tajtakolchiuak. Uan, ¿toni moneki kielnamikiskej tokniuan tayekananij akin mosentiliaj iuan tajtakolchiujkej?

 5. ¿Toni moneki kielnamikiskej tokniuan tayekananij keman iuan mosentiliskej akin tajtakolchiuak? (2 Timoteo 2:​24-26; no xikonita taixkopin).

⁵ Tayekananij kimatij ke maski aksa tajtakolchiua Jehová kisentoka kipatiuita (Luc. 15:​4, 6). Keman iuan mosentiliaj amo kinextiliaj ke kualantokej, amo kiajuaj nion kiyolkokouaj. Tayekananij amo kinemiliaj ke sayoj moneki kitatsintokiskej uan kimatiskej nochi tein panok. Ta keman kinojnotsaj kinextiaj tein kijtoua 2 Timoteo 2:​24-26 (xikonixtajtolti). Yejuan yolkualmej iuan, kualtakamej uan yolnejmachmej porin kinekij maj kipata tein kinemilia.

 6. ¿Toni kichiuaj tokniuan tayekananij achto ke iuan mosentiliskej akin tajtakolchiuak? (Romanos 2:4).

⁶ Tayekananij kitemouaj maj Jehová kinixyekana. Kielnamikij tein kijtoj tatitanil Pablo: “Dios yolkuali uan kitemojtok mitspaleuis ximoyolpata” (xikonixtajtolti Romanos 2:4). Yejua ika kitemouaj kichiuaskej kemej Jehová uan kinikneliaj akin tajtakolchiujkej. Tayekananij moneki kielnamikiskej ke kinixyekana Cristo uan yejuan ichkatajpianij, yejua ika moneki kiyekpiaskej nechikol kemej Jesús kichiuak (Is. 11:​3, 4; Mat. 18:​18-20). Achto ke iuan mosentiliskej akin tajtakolchiuak, kitataujtiaj Jehová para maj kipaleui maj moyolpata. Kitemouaj tamachtilis itech Biblia uan itech toamaixuan uan kitataujtiaj Jehová maj kinpaleui maj kiajsikamatikan keniuj momachilia uan tein panok. Tayekananij ika monojnotsaj tein kinekij  kimatiskej, xa kemej toni kinemilijtoya uan keyej tajtakolchiuak (Prov. 20:5).

7, 8. ¿Keniuj tayekananij uelis kichiuaskej kemej Jehová keman iuan tajtoskej akin tajtakolchiuak?

⁷ Ijkon kemej Jehová, tayekananij amo no yolijsiuij. Yejuan kielnamikij toni kichiuak Jehová keman ne uejkauj itekitikauan tajtakolchiujkej. Jehová amo yolijsiuik keman Caín tajtakolchiuak uan kiluij toni panoskia komo amo mopataya uan no kiluij ke kitatiochiuiskia komo kitakamatia (Gén. 4:​6, 7). Okse tonal, Jehová kititanik tanauatijkej Natán maj kiyolmajxititi David uan yejua kitapouij se taman para kipaleuis maj moyolpata (2 Sam. 12:​1-7). Uan no, Jehová miakpa kintitanik itanauatijkauan keman israelitas amo kitakamatiaj (Jer. 7:​24, 25). Amo mochiak maj itekitikauan achto moyolpatanij uan satepan kinpaleuiskia, ta keman tajtakolchiujtoyajok miakpa kiniluiaya maj moyolpatakan.

⁸ ¿Keniuj tayekananij kichiuaj kemej Jehová keman kitemouaj kipaleuiskej aksa akin tel tajtakolchiuak? Ijkon kemej kijtoua 2 Timoteo 4:​2, moneki maj ‘amo yolijsiuikan’ keman kinojnotsaskej. Yejua ika tayekananij moneki amo yolijsiuiskej, ta yolseujtoskej para uelis kipaleuiskej akin tajtakolchiuak maj kineki moyolpatas. Komo tayekananij kualanij oso yolijsiuij, xa akin tajtakolchiuak amo kinekis kikakis tein kiyolmajxitiaj oso hasta amo kinekis moyolpatas.

9, 10. ¿Keniuj tayekananij uelis kipaleuiskej tokniuj akin tajtakolchiuak maj yektanemili?

⁹ Tayekananij kitemouaj kimatiskej keyej tokniuj tajtakolchiuak. Xa motajtaniaj, ¿toni kichiuak maj amo semi kuali mouikaok iuan Jehová? ¿Xa amo momachtiayaok Biblia oso amo tanojnotsayaok? ¿Amo semi kitataujtiayaok Jehová? ¿Peuak okachi kinejneki kichiuas tein amo kuali? ¿Itasojikniuan uan tein ika moixpetaniaya kichiuak maj amo kuali tanemiliok uan maj kinejneki kichiuas tein amo kuali? ¿Kiajsikamati ke tein kichiuak semi kiyolkokoj iTajtsin Jehová?

¹⁰ Tayekananij kitajtaniskej seki taman akin tajtakolchiuak, sayoj ke amo moneki kitajtaniskej okseki taman komo tayekananij kimatijya toni panok. Komo yejuan kuali kinojnotsaj kinekis kiniluis nochi uan kiajsikamatis keyej tajtakolchiuak (Prov. 20:5). Uan ijkon kemej Natán kipaleuij David, tayekananij no uelis kitapouiskej se taman akin tajtakolchiuak para maj kiita ke amo kuali yetok tein kichiuak. Xa keman yekinika iuan mosentiliskej, semi kiyolkokos tein kichiuak oso hasta moyolpatas.

11. ¿Keniuj Jesús kinpaleuij akin tajtakolchiuayaj?

¹¹ Tayekananij mochikauaj kichiuaskej kemej Jesús. Yejua kitajtanij Saulo de Tarso: “Saulo, Saulo, ¿keyej tinechtajyouiltijtok?”. Kitajtanij nejin para kiajsikamatiltis ke tein kichiujtoya amo kuali yetoya (Hech. 9:​3-6). Uan itech Apocalipsis 2:​20, 21 ika tajtoj se siuat akin monotsa “Jezabel” uan kijtoj: “Nikchixtoya maj moyolpata”.

12, 13. ¿Toni uelis kichiuaskej tayekananij para kipaleuiskej akin tajtakolchiuak maj moyolpata? (No xikonita taixkopimej).

¹² Tayekananij no kichiuaj kemej Jesús keman amo niman kinemiliaj ke akin tajtakolchiuak amo kineki moyolpatasok. Sekin xa niman moyolpataj keman yekinika mosentiliaj iniuan tayekananij akin kinixtaliaj maj kipaleuikan, sayoj ke oksekin amo niman kichiuaj. Yejua ika tayekananij amo moneki sayoj sepa iuan tajtoskej. Xa satepan ke yekinika iuan mosentiliskej, itech tanemilijtos tein tayekananij kiluijkej  uan kitataujtis Jehová maj kitapojpolui (Sal. 32:5; 38:18). Uan xa keman oksepa iuan mosentiliskej amo tanemilisok kemej achto.

¹³ Para uelis kipaleuiskej akin tajtakolchiuak maj moyolpata, tayekananij moneki kinextiskej ke teajsikamatij uan ke yolkualmej. Moneki kitataujtiskej Jehová maj kitiochiua tein kichiujtokej uan maj ueli kipaleuikan tokniuj maj yektanemili uan maj moyolpata (2 Tim. 2:​25, 26).

14. ¿Akoni yekmelauj kipaleuia akin tajtakolchiuak maj moyolpata?

¹⁴ Tinochin semi tiyolpakij keman se tajtakolchiujkej moyolpata (Luc. 15:​7, 10). Maski tayekananij mochikauaj kipaleuiskej akin tajtakolchiuak, ¿akoni yekmelauj kipaleuia maj moyolpata? Maj tikelnamikikan ke Pablo kijtoj ke “Dios xa kinkauas maj moyolpatakan” akin tajtakolchiujkej (2 Tim. 2:25). Yejua ika, yejua Jehová akin kipaleuia maj se tokniuj kipata tein kinemilia uan tein kichiua uan amo aksa. Satepan, Pablo kimelauak sekin taman tein kuali tein panoua keman aksa moyolpata: okachi kuali kiixmati tein melauak, yektanemilia uan momakixtia imako in Amokuali (2 Tim. 2:26).

15. ¿Keniuj tayekananij uelis kisentokaskej kipaleuiskej akin moyolpata?

¹⁵ Keman se tajtakolchiujkej moyolpata, tayekananij moneki kisentokaskej kikalpanoskej para kipaleuiskej maj okachi takuaujtamati iuan Jehová. No moneki kikalpanoskej para kipaleuiskej maj kiixtopeua tein amo kuali uan maj kichiua tein kuali (Heb. 12:​12, 13). Tayekananij amo akin kiluiskej tein kichiuak akin tajtakoj. Sayoj ke, ¿toni moneki kimatiskej tokniuan?

XIKONNEXTI “SENTEIXTENOJ” KE TAJTAKOL TEIN KICHIUAK AMO KUALI YETOK

16. Itech 1 Timoteo 5:20 Pablo kijtoj ke tayekananij moneki kinextiskej ke amo kuali yetok tajtakol tein aksa kichiuak, ¿akonimej ininixtenoj moneki kinextiskej?

¹⁶ (Xikonixtajtolti 1 Timoteo 5:20). Pablo kiluij Timoteo akin no katka  tayekankej, ke keman aksa kichiuaskia se tajtakol monekiskia kinextis “senteixtenoj” ke amo kuali yetoya tein kichiujka. ¿Akonimej ininixtenoj? Amo nochipa yeski ininixtenoj nochin tokniuan den nechikol, ta sayoj akin kimatij tajtakol tein kichiuak. Xa porin kiitakej oso porin yejua kiniluij. Tayekananij sayoj yejuan kiniluiskej ke kinojnotskejya uan kipaleuijkejya akin tajtakolchiuak.

17. Komo miakej itech nechikol kimatijya ke aksa tajtakolchiuak oso satepan uelis kimatiskej, ¿toni monekiskia kitematiltiskej uan keyej?

¹⁷ Kemansa, nochin tokniuan itech nechikol kimatij keman aksa tajtakolchiua oso xa satepan kimatij. Keman ijkon panoua, tajtol “senteixtenoj” kijtosneki nochin tokniuan den nechikol. Yejua ika semej tokniuan tayekananij, kitematiltis itech nechikol ke tokniuj kimelaujkej. ¿Keyej? Pablo kijtoj ke “para maj oksekin” amo no tel tajtakolchiuakan kemej yejua.

18. ¿Toni kichiuaj tayekananij keman se tokniuj akin ayamo kiajxitia 18 xiujmej tel tajtakolchiua? (No xikonita taixkopin).

¹⁸ ¿Toni kichiuaj tayekananij keman akin tel tajtakolchiuak ayamo kiajxitia 18 xiujmej? Oloch tayekananij moneki kinixpejpenaskej ome tokniuan tayekananij para maj iuan mosentilikan, uan no iuan itatuan akin itaixpantijkauan Jehová. b Tokniuan tayekananij kitemoskej kimatiskej toni kichiuanijya tetatmej para kipaleuiskej ininkonetsin maj kipata tein kichiujtok uan maj moyolpata. Komo telpoch oso ichpoch kinkaki itatuan uan mokaua maj kipaleuikan, nejon ome tayekananij  xa kiixejekoskej ke amo monekiok maj moixtali tayekananij akin iuan mosentiliaj se tajtakolchiujkej. Tayekananij kimatij ke Jehová kinkaujtok tetatmej maj kinmelauakan ininkoneuan kemej yejuatsin kineki (Deut. 6:​6, 7; Prov. 6:20; 22:6; Efes. 6:​2-4). Satepan, tayekananij kemansa moneki tajtoskej iniuan tetatmej para kiitaskej ox kisentokaj kipaleuiaj ininkonetsin. ¿Toni kichiuaj tayekananij keman telpoch oso ichpoch akin moauijya kisentoka kichiua tein amo kuali? Kemaj ijkon panoua, tayekananij akin kipaleuiaj se tajtakolchiujkej mosentiliskej iuan yejua uan itatuan akin itaixpantijkauan Jehová.

“JEHOVÁ SEMI TETASOJTA UAN TEIKNELIA”

19. ¿Keniuj tayekananij kichiuaj kemej Jehová keman kinojnotsaj akin tel tajtakolchiuak?

¹⁹ Tayekananij akin mosentiliaj iuan tajtakolchiujkej kinekij kinyekpiaskej tokniuan itech nechikol porin Jehová ijkon kinnauatia. Nejin tapaleuia para maj tokniuan amo kichiuakan kemej akin amo kinekij kitakamatiskej itanauatiluan Dios (1 Cor. 5:7). Sayoj ke no mochikauaj kipaleuiskej akin tajtakolchiuak maj moyolpata uan keman kipaleuiaj kinemiliaj ke uelis mopatas. Ijkon kichiuaj kemej Jehová akin “semi tetasojta uan teiknelia” (Sant. 5:11). Maj tikitakan nejin tajtolmej tein tatitanil Juan kijkuiloj keman katka xiuejya: “Nokoneuantsitsin, namechijkuilouilia nejin para amo xikchiuakan se tajtakol. Sayoj ke, komo aksa kichiua se tajtakol, tikpiaj se akin techpaleuia akin yetok iuan toTajtsin: Jesucristo, se akin yolmelauak iixpan Dios” (1 Juan 2:1).

20. ¿Toni tikitaskej itech okse tamachtilis?

²⁰ Kemansa, akin tel tajtakolchiuak amo kineki moyolpatas. Keman ijkon panoua, moneki kikalankixtiskej de nechikol. ¿Uan toni kichiuaj tayekananij? Tikitaskej itech okse tamachtilis.