1, 2. ¿Toni moneki tiksentokaskej tikchiuaskej satepan ke timoauiaj, uan keyej?

 ¿MOJMOSTAJ tiontachipaua mokalijtik? Achto ke ompa tionnemiskia xa kuali tiontachipauak. ¿Sayoj ke toni panoskia komo amo tiontachipauaskiaok? Niman oksepa motapitsotiliskia. Para maj tochan kuali moita moneki mojmostaj titachipaujtoskej.

² No ijkon moneki tikchiuaskej ika tein tiknemiliaj uan tein tikchiuaj. Achto ke timoauiskiaj tikpatakej kemej tinemiaj uan timochipaujkej “de nochi tein kipitsotilia tonakayo uan totanemilil” (2 Cor. 7:1). Sayoj ke axkan moneki tikchiuaskej tein kijtoj tatitanil Pablo: “Moneki nankisentokaskej nankipatatoskej kemej nantanemiliaj” (Efes. 4:23). ¿Keyej moneki tiksentokaskej tikchiuaskej nejin? Porin tein amo kuali tein mochiua nikan taltikpak uelis niman techijtakos uan kichiuas maj amo tichipaujkejok iixpan Jehová. Yejua ika moneki maj kuali tiknemilikan ox tein tikchiuaj, tein tiknejnekij uan tein tiknemiliaj kiyolpaktia Jehová.

3. ¿Toni kijtosneki maj tiksentokakan tikpatakan kemej titanemiliaj? (Romanos 12:2).

³ ¿Toni moneki tikchiuaskej para tikpataskej kemej titanemiliaj? (Xikonixtajtolti Romanos 12:2). Nejin amo kijtosneki ke sayoj moneki tikchiuaskej seki taman tein kuali para tiknextiskej ke kuali timonejnemiltiaj, ta  moneki kuali tiknemiliskej toni yekmelauj tiknejnekij. Komo moneki tikpataskej teisa, maj tikchiuakan. Ijkon tikchiuaskej tein Jehová technauatia. Nejin moneki tiksentokaskej tikchiujtoskej.

4. ¿Toni moneki tikchiuaskej para maj amo titanemilikan kemej akin nemij nikan taltikpak?

⁴ Nochipa tikyolpaktiskej Jehová keman amo tikpiaskejok tajtakol. Sayoj ke axkan monekiok tikchiuaskej seki taman para tikyolpaktiskej. Itech Romanos 12:2 Pablo kijtoua ke moneki tikpataskej kemej titanemiliaj para tikmatiskej toni kineki Dios maj tikchiuakan. Maj amo tikauakan maj peua titanemilikan oso tikchiuakan kemej akin nemij nikan taltikpak kampa mochiua tein tel amo kuali. Moneki tikitaskej ox tein tikixtaliaj tikchiuaskej kinextia ke titanemiliaj kemej Dios tanemilia.

5. ¿Keniuj uelis tikmatiskej ox yekmelauj tikneltokaj ke amo uejkaua ixpoliuis tein amo kuali? (Xikonita taixkopimej).

⁵ Maj tikitakan se taman. Jehová kineki maj ‘semi tikchiakan maj ejko itonal’ (2 Pedro 3:12). Yejua ika maj timotajtanikan: “¿Niknextia ika tein nikchiua ke nikajsikamati ke amo uejkaua ixpoliuis tein amo kuali? ¿Kinextia tein nikixpejpena ke niktayekanaltia niktekitilis Jehová uan amo tekit oso nemachtil? ¿Nikneltoka ke Jehová kinyekpias nochankauan uan nejua oso nochipa ika nimotekipachojtok keniuj nikpias tein moneki?”. Jehová semi yolpaki keman kiita ke timochikauaj tikchiuaskej tein yejuatsin kineki (Mat. 6:25-27, 33; Filip. 4:12, 13).

6. ¿Toni moneki tiksentokaskej tikchiuaskej?

⁶ Moneki maj nochipa tikitakan keniuj titanemiliaj uan komo teisa moneki  tikpataskej maj niman tikchiuakan. Pablo kiniluij tokniuan akin nemiaj Corinto: “Xiksentokakan ximoyekitakan para nankimatiskej ox yekmelauj nantakuaujtamatij. Xiksentokakan xiknextikan keniuj yekmelauj nantamatij” (2 Cor. 13:5). Se takuaujtamatis amo kijtosneki sayoj se yas nechikolmej oso se tanojnotsas, ta no tiknextiaj ika tein tiknemiliaj, tein tiknejnekij uan keyej tikchiuaj teisa. Moneki tiksentokaskej tikpataskej kemej titanemiliaj, yejua ika moneki tikixtajtoltiskej Biblia, titanemiliskej kemej Jehová tanemilia uan tikpataskej tein monekis para tikyolpaktiskej (1 Cor. 2:14-16).

7. Ijkon kemej kijtoua Efesios 4:31, 32, ¿toni no moneki tikchiuaskej uan keyej xa ouij techkisas?

⁷ (Xikonixtajtolti Efesios 4:31, 32). Moneki tikpataskej kemej titanemiliaj, sayoj ke no moneki maj ‘peua tinemikan ijkon kemej Dios kineki’ (Efes. 4:24). Yejua ika moneki tikchiuaskej seki taman. Kemej, amo tiyolkualantinemiskejok, nion titetauelitaskejok nion titauelmiktinemiskejok. Sayoj ke, ¿keyej xa ouij techkisas amo tikchiuaskej? Porin seki taman ipa ouij se mokixtilis. Biblia ika tajtoua akin “niman kualani” uan akin “niman kualantikisa” (Prov. 29:22). Satepan ke timoauiaj moneki tiksentokaskej timopataskej. Maj tikitakan tein kipanok se tokniuj tein kinextia ke moneki ijkon tikchiuaskej.

8, 9. ¿Keniuj tein kipanok Stephen technextilia ke moneki tiksentokaskej timopataskej?

⁸ Se tokniuj takat akin monotsa Stephen monekia kisentokas mopatas para amo niman kualanis. Yejua kijtoua: “Maski ipa nimoauijkaya, monekia niksentokas nimopatas para amo niman nikualanis. Se tonal, keman titanojnotstoyaj kajkalpan, nikitak ke se takat kiichtektoya radio tein yetoya itech nocoche. Niman niktojtokak. Keman yaya nikitskitia, kitamotteuak radio uan choloj. Keman nikintapouij tokniuan ke nejon takat amo uelik nechichtekilij radio, se tayekankej nechtajtanij: ‘¿Toni tikchiuiliskia komo tikitskiskia?’. Tein nechtajtanij nechpaleuij maj niknemili ke monekia niksentokas nimopatas”. b

⁹ Tein kipanok Stephen technextilia ke maski tiknemiliayaj ke timokixtilijkajya se taman, kemansa xa tiknekiskej oksepa tikchiuaskej. Komo techpanoua nejon, maj amo timosenkauakan nion maj tiknemilikan ke amo kuali tiktekitilijtokej Jehová. Tatitanil Pablo no ijkon kipanouaya, yejua kijtoj: “Keman nikneki nikchiuas tein kuali, tein amo kuali notech yetok” (Rom. 7:21-23). Kemej tinochin titajtakolejkej, kemansa uelis oksepa nesis teisa tein amo kuali tein achto tikchiuayaj, ijkon kemej se kali, maski se tachipauaya uelis oksepa mopitsotilis. Yejua ika, moneki tiksentokaskej tiyeskij tichipaujkej. ¿Toni techpaleuis?

10. ¿Toni uelis tikchiuaskej tein techpaleuis maj timopatakan? (1 Juan 5:14, 15).

¹⁰ Maj tikiluikan Jehová toni ouij techkisa tikpataskej. Uelis tikyekmatiskej ke yejuatsin techkakis uan techpaleuis (xikonixtajtolti 1 Juan 5:14, 15). Maski Jehová amo kichiuas maj sepasan timokixtilikan, kemaj techpaleuis maj amo tikchiuakanok maski ouij techkisas (1 Ped. 5:10). Maj tikchiuakan tein tiktajtaniaj  Jehová, uan maj amo tikchiuakan teisa tein uelis kichiuas maj oksepa tiknekikan tikchiuaskej tein tikpatakajya. Kemej, tikitaskej películas, tein panoua itech televisión oso tikixtajtoltiskej teisa tein kinextia ke kuali yetok tein tejuan amo tiknekijok tikchiuaskej. Uan no, maj amo itech titanemilikan tein amo kuali (Filip. 4:8; Col. 3:2).

11. ¿Toni moneki tiksentokaskej tikchiuaskej para tinemiskej kemej Dios kineki?

¹¹ Amo sayoj moneki tikauaskej tein achto tikchiuayaj, ta no moneki tiksentokaskej tinemiskej kemej Dios kineki. ¿Keniuj uelis tikchiuaskej? Maj tikixtalikan okachi kuali tikixmatiskej Jehová uan tikchiuaskej kemej yejuatsin (Efes. 5:1, 2). Keman tikajsiskej itech Biblia se taman tein kinextia ke Jehová tetapojpoluia, maj timotajtanikan: “¿No nikintapojpoluia oksekin?”. Oso keman tikixtajtoltiskej se taman tein kinextia ke Jehová kiniknelia akin tajyouijtokej, maj timotajtanikan: “¿No ininka nimotekipachoua tokniuan akin amo semi kipiaj tein ika moixpanoltiskej uan nikinpaleuia?”. Maj tiksentokakan tikpatakan kemej titanemiliaj, maj tinemikan kemej Dios kineki uan maj amo tiyolijsiuikan.

12. ¿Keniuj tein kipanok Stephen kinextia ke Biblia uelis techpaleuis maj timopatakan?

¹² Stephen, akin ika titajtojkej itech párrafo 8, yolik peuak kichiua tein Dios kineki. Yejua kijtoua: “Desde ke nimoauij, kemansa ouij nechkisani amo niman nikualanis. Keman nikita ke uelis timokualantiskej, semi nechpaleuiani amo ompa niksentokas uan nias okseko oso nikchiua teisa tein tapaleuia maj amo timokualantikan. Miakej uan hasta no nosiuatsin nechiluianij ke semi kuali tein nikchiua, uan hasta nejua, amo no ueli nikneltoka maj nimopatani. Amo nikijtoua ke noselti nikchiuak, ta nikneltoka ke Biblia techpaleuia maj ueli timopatakan”.

13. ¿Toni techpaleuis maj tiknekikan tikchiuaskej tein kuali? (Gálatas 5:16).

¹³ (Xikonixtajtolti Gálatas 5:16). Jehová semi yolkuali uan techmaka ichikaualis tein techpaleuia maj tiksentokakan tikchiuakan tein kuali. Keman timomachtiaj iTajtol tikauaj maj ichikaualis techpaleui. Jehová no techmaka ichikaualis keman tiouij nechikolmej. Ompa ueli tietokej iniuan tokniuan akin no kitemouaj kichiuaskej tein kuali uan nejon techyolchikaua (Heb. 10:24, 25; 13:7). Uan keman tiktataujtiaj Jehová ika nochi toyolo maj techpaleui maj amo tikchiuakanok se taman tein amo kuali, yejuatsin techmaka ichikaualis uan techpaleuia maj amo tikchiuakan. Maski nochi nejin amo kichiuas maj amo tiknemilikanok tein amo kuali, kemaj techpaleuis maj amo tikchiuakan. Kemej kijtoua Gálatas 5:16, akin moyekanaj ika ichikaualis Dios ‘amo kichiuaskej nion teyi tein kinejneki ininnakayo’.

14. ¿Keyej semi moneki maj tiksentokakan tiknemilikan tein kuali?

¹⁴ Keman peuasya tikchiuaskej tein techpaleuis maj kuali timouikakan iuan Jehová, moneki maj ijkon tiksentokakan tikchiujtokan uan maj tiknemilikan tein kuali. ¿Keyej? Porin Satanás nochipa kitemoua maj timotajtakolmakakan. Uan maski timoauijkejya xa tiknejnekiskej tikchiuaskej teisa tein tikmattokej ke amo kuali, kemej timauiltiskej ika tomin,  titeltayiskej tayil tein teuintij oso tikitaskej auilnemilis (Efes. 5:3, 4). Se tokniuj telpoch kijtoua: “Semi nechouijmakani amo nikinuelitasok notakaikniuan. Niknemiliaya ke panoskiasan tein nikmachilia, sayoj ke amo niuelini porin niksentoka nikinuelita”. ¿Toni techpaleuis komo semi tiknekij tikchiuaskej se taman tein amo kuali?

15. ¿Keyej techyolchikaua tikmatiskej ke amo sayoj tejuan tikixnamikij tein amo kuali? (Xikonita taixkopin).

¹⁵ Komo semi ouij techkisa amo tiknemiliskej se taman tein amo kuali, maj tikelnamikikan ke amo tietokej toselti. Biblia kijtoua: “Nochi tein namechyoltilana para ximotajtakolmakakan no yejua tein kinyoltilana nochin” (1 Cor. 10:13a). Nejin kinijkuilouilijkaj tokniuan kayomej Corinto. Achto ke momachtiskiaj, sekin auilnemiaj, motekayaj iniuan inintakaikniuan uan tauanayaj (1 Cor. 6:9-11). Satepan ke moauijkej xa monekik amo itech tanemiliskejok tein amo kuali tein achto kichiuayaj. Maski nochin yaskiaj iluikak, katkaj tajtakolejkejok. Yejua ika monekia amo itech tanemiliskejok. Nejon uelis techyolchikauas porin kinextia ke sekin no kipanouanij seki taman kemej tejuan uan uelini kiixnamikinij. Yejua ika uelis ‘semi titakuaujtamatiskej uan tikmatiskej ke nochi tokniuan no kipanotokej tein tejuan tikijyouijtokej’ (1 Ped. 5:9).

16. ¿Toni amo moneki tiknemiliskej uan keyej?

¹⁶ Maj amo tiknemilikan ke amo akin techajsikamati, porin nejon ueliskia kichiuas maj tiknemilikan ke amo keman uelis timokixtiliskej tein amo kuali tein tiknejnekij tikchiuaskej. Biblia kijtoua nejin: “Dios nochipa kichiua tein kijtoua, uan yejua amo namechkauas xikixnamikikan nejon kuejmol kemej amo  uelis nankixikoskej, ta keman namechyoltilanas teisa para ximotajtakolmakakan, yejua namechpaleuis xitaxikokan” (1 Cor. 10:13b). Yejua ika, maski semi tiknekiskej tikchiuaskej teisa tein amo kuali, uelis tikixnamikiskej uan amo tikauaskej Jehová. Yejuatsin techpaleuis maj amo tikchiuakan tein amo kuali.

17. Maski amo uelis timokixtiliskej tein amo kuali tein tiknejnekij, ¿toni kemaj uelis tikchiuaskej?

¹⁷ Maj tikelnamikikan ke kemej titajtakouanij amo nochipa uelis timokixtiliskej tein amo kuali tein tiknejnekij. Keman techpanos nejon, moneki maj tikixtopeuakan, ijkon kemej kichiuak José keman kicholuij inamik Potifar (Gén. 39:12). Nejin techmachtia ke uelis tikixtopeuaskej tein amo kuali uan amo tikchiuaskej.

18, 19. ¿Katiyejua netajtanilmej techpaleuiskej maj tiksentokakan tikpatatokan kemej titanemiliaj?

¹⁸ Komo tiknekij tikyolpaktiskej Jehová, moneki tiksentokaskej tikpatatoskej tein tiknemiliaj uan tein tikchiuaj. Yejua ika, maj timotajtanikan: “¿Kinextia tein nikchiua ke nikneltoka ke amo uejkaua ixpoliuis tein amo kuali? ¿Niksentoka ninemi kemej Dios kineki? ¿Nikaua maj Jehová nechixyekana ika ichikaualis para amo nikchiuas tein amo kuali?”.

¹⁹ Keman timotajtaniskej nejin, xa tikitaskej ke amo nochi tikchiujtokej, sayoj ke maj tiyolpakikan ika tein tikchiujtokejya. Komo tikitaj ke moneki tikpataskej teisa, maj amo timosenkauakan. Ta okachi kuali maj tikchiuakan tein kijtoua Filipenses 3:16: “Maski kuali tiktekitilijtokejya Dios, maj ijkon tiksentokakan tikchiujtokan”. Komo ijkon tikchiuaj Jehová techtatiochiuis, porin tiksentokaj tikpataj kemej titanemiliaj.