Maski ijkon, Jehová amo kineki maj tiyolijsiuikan, ta maj timochiakan hasta maj yejuatsin techpaleui keman kiixtalijtok. ¿Keyej Jehová kineki maj timochiakan? Uan, ¿toni techpaleuis maj tiksentokakan tiyolpakikan?

¿KEYEJ JEHOVÁ KINEKI MAJ TIMOCHIAKAN?

Biblia kijtoua: “Jehová kisentoka mochia para namechpaleuis, uan namechnextilis ke namechiknelia. Porin Jehová se Dios akin kichiua tein kuali yetok. Yolpakij nochin akin kisentokaj kichiaj” (Is. 30:18). Isaías kiniluij nejin judíos akin amo takakiaj (Is. 30:1). Sayoj ke itech nejon tonalmej, no nemiaj sekin judíos akin kemaj tatakamatiaj. Tein kiniluij kinpaleuij maj kichiakan tein kuali, uan tejuan no techpaleuia maj tikchiakan tein kuali axkan.

Komo ijkon, ¿keyej moneki timochiaskej? Porin Jehová no kisentoka mochia. Yejuatsin kiixtalijya kemanian uan toni hora kiixpolos tein amo kuali, uan mochixtok maj ajsi nejon tonal (Mat. 24:36). Keman ijkon kichiuas, monextis ke amo melauj tein Satanás kijtouilij Jehová uan itekitikauan. Yejua ika Dios kiixpolos Amokuali uan nochin akin kipaleuiaj. Sayoj ke motenkauak ke itekitikauan ‘kiniknelisʼ.

Axkan ke timochixtokejok, Jehová xa amo techajchiuilis nochi tokuejmoluan. Sayoj ke techyekiluia ke uelis tiyolpakiskej. Kemej kijtoj Isaías, uelis tiyolpakiskej axkan ke tikchixtokej maj mochiua tein tiknejnekij (Is. 30:18). a ¿Keniuj uelis tiyolpakiskej? Maj tikitakan naui taman tein uelis tikchiuaskej.

¿KENIUJ UELIS TIYOLPAKISKEJ AXKAN KE TIMOCHIXTOKEJ?

Maj itech titanemilikan tein kuali. Tekiuaj David kiitak miak taman tein amo kuali (Sal. 37:35). Maski ijkon, yejua kijkuiloj: “Amo xiyolijsiui iuan Jehová uan xikchia ika nochi moyolo. Maj amo mitskualanti akin kichiua tein amo kuali” (Sal. 37:7). David kichiuak tein nikan kijtoua. ¿Keniuj? Itech tanemilij ke Jehová motenkaujka ke kimakixtiskia. Uan no kitasojkamatik sejse taman tein Jehová kichiujka para kipaleuis (Sal. 40:5). Komo tejuan no tikitaj sayoj tein kuali tein techpanoua, uan amo tein amo kuali, okachi amo ouij yeski tiksentokaskej tikchiaskej maj Jehová kichiua tein motenkaujtok.

 Xikontemo nochipa tikonueyichiuas Jehová. Nesi ke David kijkuiloj Salmo 71, yejua kiluij Jehová: “Nejua, niksentokas nimochias; okachi nimitsueyichiuas” (Sal. 71:14). ¿Toni kichiuaya para kiueyichiuas? Ika tajtouaya Jehová uan mokuikatiaya (Sal. 71:​16, 23). Tejuan uelis tikchiuaskej kemej David uan tikueyichiuaskej Dios keman titanojnotsaj, keman ika titajtouaj Jehová iniuan totasojikniuan uan tochankauan, uan keman timokuikatiaj. Yejua ika, keman oksepa tionmokuikatis kuali xikonkaki toni kijtoua nekuikatil. Nochi nejin techpaleuia maj tiksentokakan tiyolpakikan axkan ke tikchixtokej maj Jehová kichiua tein motenkaujtok.

Xionmokaua maj tokniuan mitsonyolchikauakan keman iniuan tionyetos. Keman David kipiak ouijkayomej, kiluij Jehová: “Niknextis ininixpan akin amo mitskauaj ke itech nitakuaujtamati motokay” (Sal. 52:9). Ijkon kemej David kuali mouikaya iniuan itekitikauan Jehová uan ijkon moyolchikauak, tejuan amo no moneki sayoj timouikaskej iniuan tokniuan keman timonechikouaj oso keman titanojnotsaj, ta no keman timoixpetaniaj (Rom. 1:​11, 12).

Maj okachi titakuaujtamatikan ke mochiuas tein tikchiaj. Salmo 62:5 kijtoua: “Nejua nimochia maj Dios nechpaleui porin nikchia nochi tein ualeua imako”. Semi moneki maj tikneltokakan ke yekmelauj mochiuas tein tikchiaj uan okachiok komo uejkaujya tikchixtokej. Maski amo niman mochiuas moneki tikneltokaskej ke Jehová yekmelauj kichiuas tein motenkaujtok. ¿Uan keniuj uelis okachi titakuaujtamatiskej? Maj timomachtikan iTajtol Dios, maj itech titanemilikan keniuj mochiuakya seki taman tein Biblia kijtojka ke mochiuaskia, keniuj nochin akin kijkuilojkej Biblia ika tajtojkej sayoj se taman, uan toni techmachtia de Jehová (Sal. 1:​2, 3). Jehová kijtoj ke tinemiskej nochipaya, yejua ika moneki tiksentokaskej tiktataujtiskej maj techpaleui para tiksentokaskej kuali iuan timouikaskej axkan ke tikchixtokej maj kichiua tein motenkauak (Jud. 20, 21).

Ijkon kemej kichiuak tekiuaj David, tejuan no uelis tikneltokaskej ke Jehová nochipa kintasojta uan kinita akin kichixtokej maj mochiua tein kiixtalijtok (Sal. 33:​18, 22). Yejua ika, para tiksentokaskej tiyolpakiskej axkan ke tikchixtokej maj Jehová kichiua tein motenkaujtok, maj itech titanemilikan tein kuali, maj tikueyichiuakan Dios, maj tikauakan maj tokniuan techyolchikauakan keman iniuan tietokej, uan maj okachi titakuaujtamatikan ke yekmelauj mochiuas tein tikchiaj.