1, 2. 1) ¿Keyej akin nemiaj itech itonaluan Pablo kintekipachouaya teikamauiltilis uan yeknemilis? 2) ¿Akoni kijtoj Pablo ke yekmelauj temakixtia?

AKIN nemiaj kampa romanos taixyekanayaj semi moueyitaliayaj ika tanauatilmej tein ika moixyekanayaj, kemej motamelauaya uan porin kuali nemiaj. Sayoj ke, ijkon nemiaj porin kinkoujkaj taltikpakneminij uan kinteltekitiltiayaj. Itech seki tonalmej, kemej 30% akin ompa nemiaj kinteltekitiltiayaj. Senkis moita ke teikamauiltilis uan yeknemilis semi kintekipachouaya akin ompa nemiaj, uan no tokniuan.

² Tatitanil Pablo miakpa ika tajtoj yeknemilis. Sayoj ke amo kitemouaya kiyektalis kuejmolmej tein onkayaj, kemej miakej kinekiaj kichiuaskej. Yejua uan okseki tokniuan mochikaujkej kinixmatiltiskej taltikpakneminij iTekiuajyo Dios uan kinajsikamatiltiskej ke inemilis Jesús tein kitemakak kitelpia ipatiuj. Tatitanil kiniluij tokniuan ke yejua Jiova akin yekmelauj temakixtia. Yejua kijkuiloj: “Kampa tekititok in [y]ektikatsin [e]spíritu ten ualeuak imako Totekotsin, ompa  [...] kintojtomilijtok de nojon kinixtsakuiltijtok itaneltokakauan” (2 Cor. 3:17).

3, 4. 1) ¿Toni ika tajtoj Pablo achto ke kijtoskia tein moajsi itech 2 Corintios 3:17? 2) ¿Toni moneki tikchiuaskej komo tiknekij tikpiaskej yekmelauj yeknemilis tein kitemaka Jiova?

³ Itech nejin amat tein Pablo kintitanilij tokniuan akin nemiaj Corinto, tepitsin achto ika tajtoj tein panok keman Moisés temok itech tepet Sinaí satepan ke moajsik iixpan se iángel Jiova. Iixko pepetania. Keman israelitas kiitakej, momoujtijkej, uan yejua ika Moisés moixpikik ika se tilmaj (Éx. 34:29, 30, 33; 2 Cor. 3:7, 13). Pablo kijtoj ke keman aksa mokepa iuan Jiova, kemej yeskia kisa tilmaj tein “kitamachilistsajtsakuiliaya” (2 Cor. 3:16). ¿Toni kijtosnekik?

⁴ Itech tamachtilis tein achto tikitakej, timomachtijkej ke sayoj Jiova, akin kichijchiuak nochi, ueli kichiua nochi tein kineki. Taixejekol maj onka yekmelauj yeknemilis kampa moajsi iespíritu. Sayoj ke komo no tiknekij tikpiaskej nejon, moneki timokepaskej iuan Jiova. Nejin kijtosneki ke moneki kuali iuan timouikaskej. Itech taluakyan, israelitas amo kiitakej nochi kemej Jiova kiitaya. Kemej yeskia se tilmaj kipikia inintanemilil uan ininyolo. Kemej Dios kinmakixtijkaya, sayoj kinekiaj kichiuaskej inintanejnekilis (Heb. 3:8-10).

5. 1) ¿Keniuj techmakixtia iespíritu Jiova? 2) ¿Keniuj tikmatij ke hasta akin moajsi kemej takeual tanamak oso akin tsaktok ueli kipia nemakixtilis tein kitemaka Jiova? 3) ¿Toni ome taman tikitaskej?

⁵ Nemakixtilis tein kitemaka iespíritu Jiova okachi kuali ke keman kimakixtiaj aksa akin kiteltekitiltiayaj. Iespíritu techmakixtia itech tajtakol uan mikilis, uan itech taneltokalis tein amo melauak uan tein ompa kichiuaj. Nejin okachi kuali ke tein uelis temakaskej taltikpakneminij (Rom. 6:23; 8:2). Nejin nemakixtilis semi kualtsin. Uelis kipias hasta akin moajsi kemej takeual tanamak oso akin tsaktok (Gén. 39:20-23). Yejua nejin kinpanok tokniuj Eric Frost uan tokniuj Harold King. Yejuan tsaktoyaj miak xiujmej porin amo kikaujkej Dios. Uelis tikitaskej tein kinpanok itech JW Broadcasting (VIDEOS > KINCHIUILIAJ NETAJTANILMEJ UAN TEIN KIPANOUANIJ > KIPANOUAJ TAYEJYEKOLIS). Axkan maj tikitakan ome taman: keniuj uelis tiknextiskej ke tikpatiuitaj maj Dios techmakixtiani uan toni tein kuali uelis tikchiuaskej.

6. ¿Keniuj kinextijkej israelitas ke amo kipatiuitayaj maj Jiova kinmakixtiani?

⁶ Keman aksa techtayokolia teisa, semi tiktasojkamatiliaj. Israelitas amo kitasojkamatilijkej Jiova porin kinmakixtijka. Seki metsti satepan ke kinkixtij Egipto, peuak kinejnekij takual tein onkaya ompa, uan kiixtopeujkej tein Jiova kinmakaya. Hasta kijtojkej ke kinekiaj mokepaskej. Maski ueliajya kiueyichiuayaj Jiova, okachi kitayekanaltiayaj amichij, xonakat, pepinos, sandías, puerros uan ajos. Yejua ika Jiova tel kualanik iniuan (Núm. 11:5, 6, 10; 14:3, 4). Nejin techmachtia se taman tein motelneki.

7. 1) ¿Keniuj Pablo kichiuak tein tayolmajxitij itech 2 Corintios 6:1? 2) ¿Keniuj uelis tikchiuaskej kemej yejua?

⁷ Pablo kinyolchikauak tokniuan maj kitasojkamatinij porin Jiova techmakixtij itechkopa iKonetsin, Jesucristo  (xikonixtajtolti 2 Corintios 6:1). Pablo amo kuali momachiliaya porin tajtakolej katka uan yejua ika momikiliskia. Sayoj ke, kijtoj: “Niktasojkamachilia ke Totajtsin Dios nechmakixtis ika por ichikaualis de Totekotsin Jesucristo”. ¿Keyej kijtoj nejon? Yejua kimelauak: “Porin ne [y]ektikatsin [e]spíritu kualkui uelilis tenika Yejuatsin techmaka yankuik nemilis nochi tejuan ten tipoutinemij iuan Cristo Jesús. Uan no [...] techualkixtij ya imako de ne tajtakol uan [...] mikilis” (Rom. 7:24, 25; 8:2). Kemej Pablo, nochipa moneki tikelnamikiskej ke Jiova techmakixtij itech tajtakol uan mikilis. Ika inemilis Jesús tein kitemakak, ueli tiktekitiliaj Jiova ika se tanemilil tein amo techkuejmoloua, uan nejin techualkuilia yekmelauj yolpakilis (Sal. 40:8).

8, 9. 1) ¿Toni tayolmajxitij tatitanil Pedro kemej moneki titaixpejpenaskej? 2) ¿Keniuj aksa uelis amo kuali taixpejpenas?

⁸ Moneki amo sayoj tiktasojkamatiliskej Jiova, ta no moneki kuali titaixpejpenaskej. Tatitanil Pedro technejmachtij maj amo keman tikchiuakan tein amo kuali uan maj timotenpaleuikan ke toselti tiuelij titaixpejpenaj (xikonixtajtolti 1 Pedro 2:16). Nejin techelnamiktia tein israelitas kichiujkej taluakyan. Axkan no moneki tiktakamatiskej nejin tanejmachtilis, hasta xa okachiok ke ijkuak. Satanás uan nochi tein kiixyekana okachi tetanejnektiaj ika seki taman kemej tilmaj, takual uan tayil uan neixpetanilis. Tanamakanij kinnextiaj taltikpakneminij akin kuakualtsitsin uan ika kitemouaj maj tiknemilikan ke moneki tikouaskej tein amo yekmelauj techpoloua. Niman uelis se mokauas maj tekajkayauakan uan uelis kichiuas maj amo kuali se taixpejpena.

⁹ Tein Pedro tayolmajxitij no techpaleuia itech okseki taman tein okachi moneki, kemej nemachtil oso tekit tein tikseliskej. Kemej neskayot, telpochmej kinteliluiaj kampa momachtiaj maj kitemokan kalakiskej itech uejueyi tamachtiloyamej. Kiniluiaj ke komo kiseliaj se ueyi nemachtil kipiaskej se kuali tekit uan kitaniskej miak tomin. Uan miakpa kinnextiliaj kampa nesi ke akin kiseliaj se ueyi nemachtil okachi tatanij ke akin amo kiseliaj. Nochi nejin uelis kintanejnektis telpochmej, akin tein kiixpejpenaskej uelis kinpaleuis oso kijtakos ininnemilis. ¿Toni moneki kielnamikiskej yejuan uan inintatuan?

10. ¿Toni moneki tikelnamikiskej keman titaixpejpenaskej?

¹⁰ Sekin xa kinemiliskej ke kemej nejin se iselti se kiixpejpena, yejuan moneki kiixpejpenaskej tein kinekiskej komo amo kinkuejmoloua inintanemilil. Melauak ke ueli tikixpejpenaj toni nemachtil tikseliskej oso toni ika titekitiskej. Sayoj ke, moneki tikelnamikiskej ke amo nochi ueli tikchiuaj uan ke tein tikixpejpenaskej kiualkuis tein kuali oso tein amo kuali. Yejua ika, Pablo kijtoj: “Taneltokani kijtoaj ijkuin: ‘Nochi uelis tikchiuaj ten tiknekiske uan amo aken uelis techtakaualtis’. Pero nejua namechilia ke amo nochi technamiki ma tikchiuakan. Uan sekin no kijtoaj ijkuin: ‘Nochi uelis tikchiuaske ten tiknekiske’. Pero nejua namechilia ke amo nochi tataman chiualis techyolmajxitis tech totakuautamatilis” (1 Cor. 10:23). Nejin techajsikamatiltia ke tein tiknejnekij amo yejua tein okachi tayekantok keman titaixpejpenaj.

11. ¿Keyej techmakixtij Dios?

¹¹ Keman Pedro technejmachtij maj kuali titaixpejpenakan, kijtoj ke uelis tikchiuaskej komo timochiuaj ‘tiitekitikauan Dios’. Jiova techmakixtij itech tajtakol uan mikilis itechkopa Jesús porin kineki maj nochipa tiktekitilikan yejuatsin.

12. ¿Toni neskayot techkauilijkej Noé uan ichankauan?

¹² Okachi kuali titaixpejpenaskej komo tikuij totiempo uan tochikaualis itech itekiyo Jiova. Nejin techpaleuis maj amo tiktayekanaltikan totanejnekilis oso tein onkak itech taltikpak (Gál. 5:16). Maj tikitakan tein kichiujkej Noé uan ichankauan. Maski itech inintonaluan taltikpakneminij tel auilnemiaj uan teikamauiltiayaj, yejuan amo kichiujkej nejon. ¿Toni kinpaleuij? Kiixpejpenkej nochipa kichiujtoskej tein Jiova kinnauatijka: kichijchiuaskej arca, kisentiliskej takual tein yejuan uan tapialmej kikuaskiaj, uan kinnejmachtiskej oksekin ke tetsaujkakiouiskia. Biblia kijtoua: “Noé kichiuak nochi tein Dios kinauatijka. Senkis ijkon kichiuak” (Gén. 6:22). Yejua ika, Noé uan ichankauan makiskej (Heb. 11:7).

13. ¿Toni technauatia Jiova?

¹³ ¿Toni technauatia Jiova? Tiitatojtokakauan Cristo kuali tikmatij ke technauatia maj titanojnotsakan (xikonixtajtolti Lucas 4:18, 19). Axkan, Satanás kemej yeskia kinixtsakuani taltikpakneminij uan yejuan amo kiitaj ke moajsij ininmako tekiuajyomej, taneltokalis tein amo melauak uan ke kitayekanaltiaj motomintiskej (2 Cor. 4:4). Ijkon kemej Jesús, tikpiaj tatiochiualis tikinpaleuiskej oksekin maj kiixmatikan uan maj kiueyichiuakan Jiova, Dios akin temakixtia (Mat. 28:19, 20). Uelis yeski ouij se kinnojnotsas oksekin. Miakkan, taltikpakneminij okachi amo kinyolnotsa kiixmatiskej Dios, uan  sekin hasta kualanij keman tikinnojnotsaj. Sayoj ke moneki timotajtaniskej ox uelis okachi tikteixmatiltiskej iTekiuajyo Dios.

14, 15. ¿Toni kiixpejpenanij miakej itekitikauan Jiova? (Xikonita taixkopimej ipeujyan tamachtilis.)

¹⁴ Semi techyolchikaua tikitaskej ke tel miakej itekitikauan Jiova akin kiajsikamatij ke amo uejkaua ixpoliuis tein amo kuali, kikauanij seki taman uan okachi kitekitiliaj yejuatsin (1 Cor. 9:19, 23). Sekin kisentokaj tapaleuiaj itech ininnechikoluan, uan oksekin yanij kampa monekij okachi tanojnotsanij. Itech makuil xiujmej tein panouanij, panoua 250,000 tokniuan mochiuanij precursores. Axkan, moajsij panoua 1,100,000 precursores regulares. ¡Tel kualtsin maj miakej kiixpejpenakan ijkon kitekitiliskej Jiova! (Sal. 110:3.)

¹⁵ ¿Toni kinpaleuiani maj ijkon kichiuakan? Maj tikitakan tein kichiujkej John uan Judith. Itech treinta xiujmej tein panouanij, tapaleuianij itech miak uejueyi altepemej. Kielnamikij ke keman peuak Tamachtilis tein kiselia akin tekiti kemej Precursor, itech xiuit 1977, kiniluiayaj akin ompa momachtiayaj maj yanij kampa monekiaj okachi tanojnotsanij. John kijtoua ke miakpa monekik kipatas tekimej tein kipiaya uan ijkon amo kipiaskej miak taman uan kichiuaskej tein kiixtalijtoyaj. Satepan tapaleuitoj okse ueyi altepet. Ompa kiitakej ke kitataujtiskej Jiova uan iuan takuaujtamatiskej kinpaleuiaya maj kiixnamikinij ouijkayomej, kemej momachtiskej okse tajtol oso nemiskej kemej ompa nemij uan momatiskej keman tel tona oso tel taseseya. ¿Keniuj kiitaj nejin xiujmej tein kitekitilianij Jiova? John kijtoua: “Nikchiuani okachi kuali tekit tein nikixmatini. Nikita ke Jiova yekmelauj nemi, kemej se tepopaj akin tetasojta. Axkan okachi kuali nikajsikamati tein kijtosneki Santiago 4:8, kampa kijtoua: ‘Ximotokikan iuan Dios uan Yejuatsin no motokis namouan’. Nikmatia ke nikajsika tein niktemouaya: yolpakilis itech nonemilis”.

16. ¿Keniuj taixpejpenanij tel miakej tokniuan?

¹⁶ Seki tokniuan amo ueli kitekitiliaj Jiova kemej precursores miak xiujmej. Sayoj ke miakej motemakaj tapaleuiskej itech kalchiualis semanauak taltikpak. Kemej neskayot, kemej 27,000 tokniuan tapaleuijkej keman mochijchiuak yankuik kali kampa techixyekanaj, ompa Warwick (Nueva York). Sekin tapaleuijkej ome semana, oksekin miak metsti uan sekin se xiuit oso okachi. Miakej kikaujkej seki taman porin kinekiaj tapaleuiskej. Nochin kiixpejpenkej kiueyitaliskej uan kiueyichiuaskej Jiova, uan ijkon kikaujkej se kuali neskayot.

17. ¿Toni tein kualtsin kiseliskej akin axkan kuali taixpejpenaj?

¹⁷ Semi tiktasojkamatiliaj Jiova porin tikixmatij uan porin ueli tikixpejpenaj tikueyichiuaskej. Maj tiknextikan ke tikpatiuitaj nejon. Maj amo tikixpejpenakan tein amo kuali, ta maj tikixpejpenakan tiktekitiliskej Dios kemej okachi kuali tiueliskej. Komo ijkon tikchiuaj, uelis titakuaujtamatiskej ke tikseliskej tatiochiualismej tein yejuatsin motenkauak ika nejin tajtolmej: “Se tonal Totajtsin Dios techyankuikatalikiu nochi tejuan tiikoneuan [...]. Ijkuakon nochi ten Dios kichijchiuak, nochi yejua Dios kiajchiuakiu de ne ijtakauilis” (Rom. 8:21).