1. Kemej kijtoua Efesios 6:10-13, ¿katiyejua se taman kemej Jiova okachi kinextia ke toka motekipachoua?

SE TAMAN kemej Jiova okachi kinextia ke toka motekipachoua yejua keman techpaleuia maj tikinixnamikikan akin techtauelitaj. Satanás uan iamokuali ejekauan yejuan akin okachi techtauelitaj. Jiova technejmachtia ke semi tamouililmej uan techpaleuia maj tiuelikan tikinixnamikikan (xikonixtajtolti Efesios 6:10-13). Komo tikauaj maj techpaleui uan senkis itech titakuaujtamatij, uelis tikixnamikiskej Amokuali. Uelis tikijtoskej kemej tatitanil Pablo, akin kijkuiloj: “Dios techyekpixtinemi. Ika ya nojon amo aken ongak ten uelis techixnamiktinemis” (Rom. 8:31).

2. ¿Toni tikitatij itech nejin tamachtilis?

² Akin yekmelauj tikchiuaj kemej Cristo amo semi tiktemouaj tikmatiskej tein kichiua Satanás uan amokuali ejekamej. Ta, okachi tiktemouaj tikixmatiskej Jiova uan tiktekitiliskej (Sal. 25:5). Maski ijkon, moneki tikmatiskej keniuj tekiti Satanás porin ijkon amo techkajkayauas (2 Cor. 2:11). Itech nejin tamachtilis tikitatij toni okachi kikui Satanás uan iamokuali ejekauan tein ika kitemouaj techkajkayauaskej. No tikitatij keniuj uelis tikinixnamikiskej.

3, 4. 1) ¿Toni poui itech naualot? 2) ¿Hasta kani momoyauani?

³ Satanás uan iamokuali ejekauan okachi kikuij naualot uan ika kinkajkayauaj taltikpakneminij. Akin kitekitiltiaj  kijtouaj ke kiixmatij oso uelij kichiuaj seki taman tein oksekin amo uelij. Kemej neskayot, sekin ika sitalimej oso okseki taman kijtouaj ke uelij kimatij tein panos satepan. Oksekin kichiuaj kemej yeskia tajtoskiaj iniuan mikemej. Uan oksekin kitekitiltiaj naualot uan xa kinnaualuiaj oksekin. *

⁴ Naualot motekitiltia noyampa taltikpak. Keman kintajtanijkej ox kineltokayaj naualot akin nemij itech 18 altepemej ompa Latinoamérica uan Caribe, itech eyi taltikpakneminij se kijtoj ke kemaj uan okse achiok kineltokayaj ke ueli se tajtoua iniuan espíritus. Keman itech 18 altepemej ompa África no kintajtanijkej ox kineltokayaj naualot, panoua tajko kijtojkej ke kemaj. Kemej tikitaj, kampa yeski tinemiskej, moneki timoyekpiaskej porin Satanás kitemoua kinkajkayauas “nochi in taltikpakuani” (Apoc. 12:9).

5. ¿Keniuj kiita Jiova naualot?

⁵ Jiova yejua “Dios akin kijtoua tein melauak” (Sal. 31:5). Yejua ika, kitauelita nochi tataman naualot. Yejuatsin kiniluij israelitas: “Amo moneki moajsis mouan se aksa akin kipanoltia itech tit iokichpil oso isiuapil, nion akin momachtia kiixejekos toni mochiuas satepan, akin ika naualot kijtoua maj mochiua teisa, nion akin momachtia kitemos teisa tein kinextis tein mochiuas satepan, nion aksa akin tenaualuijkej, nion akin techiualtia tein kineki ika naualot, nion akin kiitati aksa akin tajtoua iniuan espíritus oso akin ueli kijtoua tein amo akin kimati, nion aksa akin kintatajtania mikemej. Porin Jiova amo kiitstani akin kichiuaj nochi nejin” (Deut. 18:10-12). Akin tikchiuaj kemej Cristo amo monekiok tiktakamatiskej Tanauatil tein Jiova kinmakak israelitas. Sayoj ke tikmatij ke yejuatsin kisentoka kitauelita naualot (Mal. 3:6).

6. 1) ¿Keniuj Satanás ika naualot kinchiuilia tein amo kuali taltikpakneminij? 2) Kemej kijtoua Eclesiastés 9:5, ¿keniuj moajsij akin momikilijkejya?

⁶ Jiova techiluia maj tikixtopeuakan naualot porin kimati ke Satanás ika kinchiuilia tein amo kuali taltikpakneminij. Kemej neskayot, kikui uan ika takajkayaua kemej ijkuak tamachtia ke mikemej nemitij okseko (xikonixtajtolti Eclesiastés 9:5). No ika kinmojmoujtia taltikpakneminij uan kichiua maj amo motokikan iuan Dios. Satanás kitemoua maj takuaujtamatikan iniuan amokuali ejekamej uan amo itech Jiova.

7. ¿Toni techiluia Jiova?

⁷ Kemej tikitakejya, Jiova techiluia tein moneki tikmatiskej uan ijkon Satanás uan amokuali ejekamej amo techkajkayauaskej. Maj tikitakan seki taman tein uelis tikchiuaskej tein techpaleuis maj tikinixnamikikan.

8. 1) ¿Toni taman okachi techpaleuis maj tikinixnamikikan amokuali ejekamej? 2) ¿Toni techyekiluia Salmo 146:4 ke kinpanoua mikemej?

⁸ Maj tikixtajtoltikan iTajtol Dios uan maj itech titanemilikan. Yejua nejin tein okachi techpaleuis maj amo techkajkayauakan amokuali ejekamej. ITajtol Dios kemej yeskia se machete tein semi tenej tein techpaleuia maj Satanás amo  techkajkayaua (Efes. 6:17). Kemej neskayot, techmatiltia ke mikemej amo uelij tajtouaj iniuan akin yoltokej (xikonixtajtolti Salmo 146:4). No techelnamiktia ke sayoj Jiova ueli kijtoua tein mochiuas satepan (Is. 45:21; 46:10). Komo nochipa tikixtajtoltiaj uan itech titanemiliaj, tikixtopeuaskej uan tiktauelitaskej nochi tein ika takajkayauaj amokuali ejekamej.

9. ¿Toni taman tachiualismej tein mouikaj ika naualot tikixtopeuaj?

⁹ Maj amo tikchiuakan nion teyi tein mouika ika naualot. Akin yekmelauj tikchiuaj kemej Cristo amo tiktemouaj ininnepaleuil naualmej nion tiktemouaj titajtoskej iniuan mikemej. Kemej tikitakej itech okse tamachtilis, amo titapaleuiaj itech tein miakej kichiuaj keman aksa momikilia tein ika kinextiaj ke kineltokaj ke mikemej nemitij okseko. Uan nion no tiktemouaj tikmatiskej tein panos satepan ika tein kichiuaj sitalixmatinij oso okseki taman (Is. 8:19). Amo tiknekij tikchiuaskej nion teyi tein mouikas ika naualot. Tikmatij ke semi tamouilil uan uelis techuikas maj tiktekitilikan Satanás uan amokuali ejekamej.

10, 11. 1) ¿Toni kichiujkej sekin akin nemiaj Éfeso itech yekinika siglo keman momachtijkej iTajtol Dios? 2) Kemej kijtoua 1 Corintios 10:21, ¿keyej moneki tikchiuaskej kemej yejuan uan keniuj uelis tikchiuaskej?

¹⁰ Maj tikixpolokan tein yeski taman tein mouikas ika naualot. Itech yekinika siglo, sekin akin nemiaj Éfeso kitekitiltiayaj naualot. Sayoj ke, keman peuak momachtiaj iTajtol Dios, niman kichiujkej tein monekia. Biblia kijtoua ke “miakke ualayaj ten tekititinemiaj ika naualot. Uan yejuan kualkuikke ninlibros tenika momachtiayaj uan ompa kitatijke senteixteno” (Hech. 19:19). Kemej tikitaj, senkis kiixtalijkej kinixnamikiskej amokuali ejekamej. Maski nejon amatajkuilolmej katkaj tel patiyojkej, amo kintetayokolijkej nion kinnamakakej,  ta kintatijkej. Amo kinyolkokoj kichiuaskej nejon porin okachi kinekiaj kiyolpaktiskej Jiova.

¹¹ ¿Keniuj no ijkon uelis tikchiuaskej? Komo tikpiaj se taman tein mouika ika naualot, kemej se teisa tein tikneltokaj ke techpaleuis maj amo timoejekauikan, se teisa tein tikpilouaj tokalijtik porin tikneltokaj ke techpaleuis maj amo teyi techchiuilikan amokuali ejekamej, moneki maj tikinixpolokan (xikonixtajtolti 1 Corintios 10:21).

12. ¿Toni moneki timotajtaniskej?

¹² Maj kuali tikitakan ika toni timoixpetaniaj. Maj timotajtanikan: “¿Nikixtajtoltia amatajkuilolmej oso nikita itech Internet tein ika tajtoua naualot? ¿Mouika ika naualot tatsotson tein nikaki, tein nikita itech películas uan itech televisión uan videojuegos tein ika nimauiltia? ¿Nikuelita nimoixpetanis ika seki taman kampa moitaj vampiros, zombis oso tein kichiuaj amokuali ejekamej? ¿Kinextia naualot kemej teisa tein amo teijtakoua?”. Amo nochi neixpetanilis mouika ika naualot. Keman timochiuiliskej nejon netajtanilmej, maj tikitakan ke ika tein timoixpetaniskej maj amo kipia nion teyi tein Dios kitauelita. Tiknekij tikchiuaskej nochi tein techpaleuis maj tikpiakan se tanemilil chipauak iixpan Jiova (Hech. 24:16). *

13. ¿Toni amo tiknekij tikchiuaskej?

¹³ Maj amo titetapouikan tein kichiuaj amokuali ejekamej. Maj tikchiuakan kemej Jesús (1 Ped. 2:21). Keman nemia ompa iluikak, kimatik miak taman tein  Satanás uan amokuali ejekamej kichiuayaj. Sayoj ke, keman ualaj nikan taltikpak, amo kitetapouijtinemik tein kichiuayaj, ta okachi kinekia kiteixmatiltis Jiova, amo Satanás. Ijkon kemej Jesús, tejuan amo titetapouijtinemij tein kichiuaj amokuali ejekamej. Ta okachi kuali, tiknextiaj ika totajtoluan ke semi tiyolpakij ika “se taman tein teyolpaktia”, nejin yejua tamachtilis tein melauak (Sal. 45:1).

14, 15. 1) ¿Keyej amo moneki tikinmouiliskej amokuali ejekamej? 2) ¿Toni kinextia ke Jiova axkan kimatampauia ixolal?

¹⁴ Maj amo tikinmouilikan amokuali ejekamej. Tinochin uelis techpanos se taman tein amo kuali. Keman amo tikchiaskej, uelis techpanos se ijsiujkayot, tikokolispeuaskej oso hasta timikiskej. Sayoj ke ¿moneki tiknemiliskej ke inintajtakol amokuali ejekamej? Biblia kimelaua ke tinochin uelis techpanos tein amo tikchiaj oso se “tachiualis tein amo momattok” (Ecl. 9:11). Jiova kinextiani ke okachi chikauak ke amokuali ejekamej. Kemej neskayot, amo kikauak maj Satanás kimiktiani Job (Job 2:6). Uan itech itonaluan Moisés, kinextij ke okachi chikauak ke tiopixkamej akin kitekitiltiayaj naualot ompa Egipto (Éx. 8:18; 9:11). Satepan, Jiova kimakak Jesús chikaualis tein ika kinualpantamotak Satanás uan amokuali ejekamej. Uan amo uejkaua kinpantamotas itech se ueyi taltekoch, kampa amo uelis kichiuaskejok tein amo kuali (Apoc. 12:9; 20:2, 3).

¹⁵ Moajsi miak taman tein kinextia ke axkan Jiova kimatampauia ixolal. Maj titanemilikan itech nejin: titanojnotstokej uan titamachtijtokej tein melauak noyampa taltikpak (Mat. 28:19, 20). Ijkon tiknextiaj tein amo kuali tein Satanás kichiua. Komo yejua ueliskia, kitsakuiliskia tanojnotsalis. Sayoj ke amo ueli. Yejua ika amo moneki tikinmouiliskej amokuali ejekamej. Tikmatij ke “iixtololouan Jiova tachixtinemij itech nochi taltikpak uan ijkon kinextis ichikaualis uan ika kinpaleuis akin kipiaj ininyolo ajsitok iuan yejuatsin” (2 Crón. 16:9). Komo nochipa tiktakamatij Dios, amokuali ejekamej amo uelis techchiuiliskej teisa tein amo uelis moyektalis.

16, 17. Xikonijto se neskayot tein kinextia ke moneki tiyeskij tiyolchikaujkej uan ijkon tikinixnamikiskej amokuali ejekamej.

¹⁶ Moneki tiyeskij tiyolchikaujkej uan ijkon tikinixnamikiskej amokuali ejekamej, okachiok keman totasojikniuan oso tochankauan kinekij techchikaujkauiskej maj tikinpaleuikan itech seki taman tein momattokej kichiuaskej. Sayoj ke Jiova kintatiochiuia akin yolchikaujkej. Maj tikitakan tein kipanok se tokniuj siuat akin itokay Erica akin nemi ompa Ghana. Kipiaya 21 xiujmej keman peuak momachtia Biblia. Kemej ipopaj katka se tanaualuijkej, nochin kichiayaj maj kichiua se taman tein mouika ika naualot: maj kikua nakat tein kinmaktiliayaj mikemej. Keman amo kinekik kichiuas, ichankauan kijtojkej ke amo kinpoujkaitaya tiotsitsin. Yejuan kineltokayaj ke kintatsakuiltiskiaj ika kokolismej.

¹⁷ Kitemojkej kichikaujkauiskej sayoj ke yejua amo kichiuak tein kinekiaj, maski monekik nemitiuj okseko. Miakej itaixpantijkauan Jiova kiselijkej ininkalijtik. Jiova kichiuak maj kinpia okseki ichankauan akin no kitekitiliayaj yejuatsin (Mar. 10:29, 30). Maski ichankauan kiixtopeujkej uan hasta kichichinouilijkej tein kipiaya, yejua amo kikauak Jiova, moauij uan axkan tekiti kemej precursora regular. Amo kinmouilia amokuali ejekamej. Uan keman ininka tajtoua ichankauan, kijtoua: “Mojmostaj niktajtanilia Dios akin tetasojta maj kiixmatikan uan maj no yolpakikan kitekitiliskej”.

18. ¿Keniuj techtatiochiuis Jiova komo itech titakuaujtamatij?

¹⁸ Amo tinochin moyejyekos ijkon totakuaujtamatilis. Sayoj ke tinochin moneki tikinixnamikiskej amokuali ejekamej uan titakuaujtamatiskej iuan Jiova. Komo tikchiuaj, tikseliskej miak tatiochiualismej. Kemej neskayot, Satanás amo uelis techkajkayauas. Uan no, amo keman tikauaskej Dios porin tikinmouiliaj amokuali ejekamej. Uan okachi kuali timouikaskej iuan Jiova. Santiago se imomachtijkauj Jesús, kijkuiloj: “Ximotemaktikan iuan Dios. Uan no xikixtopeuakan in amokuali Satanás uan ijkon yejua namechtapatauilis. Ximotokikan iuan Dios uan Yejuatsin no motokis namouan” (Sant. 4:7, 8).