1, 2. ¿Keyej monekia maj Jesús kitemakani inemilis?

ADÁN amo tajtakolej katka. Keman tajtakoj, yejua uan ikoneuan akin satepan yoliskiaj amo ueliskiajok nemiskej nochipaya. Adán monekia mikis porin yejua kiixtalij tajtakos, sayoj ke ikoneuan amo kichiujkaj nion teyi tein amo kuali (Rom. 5:12, 14). ¿Ueliskia Jiova kichiuas teisa tein tapaleuiskia maj amo momikilikan? Kemaj. Niman ke Adán tajtakoj, Jiova kinextijtiaj keniuj kinmakixtiskia itech tajtakol uan mikilis millones ikoneuan Adán (Gén. 3:15). Keman Jiova kiixtaliskia, kiualtitaniskia iKonetsin maj kitemakaki inemilis ‘para ijkon kinmakixtis miak tagayot’ (Mar. 10:45; Juan 6:51).

² Kemej Adán kichiuak maj amo ueliskiaok tinemikan nochipaya, Jesús kitemakak inemilis (1 Cor. 15:22). ¿Keyej monekik kitemakas inemilis? Porin itech Tanauatil, Jiova kiixtalijka maj motemakaskia “nemilis ika nemilis”, uan ijkon mochiuaskia tein melauak (Éx. 21:23, 24). Yejua ika Jesús monekia kitemakas inemilis porin amo tajtakolej katka, ijkon kemej katka Adán achto ke tajtakoskia (Rom. 5:17). Ijkon, Jesús nochipaya yeski ininPopaj nochin akin takuaujtamatij itech inemilis tein kitemakak (Is. 9:6; Rom. 3:23, 24).

3. Kemej kijtoua Juan 14:31 uan 15:13, ¿keyej Jesús kinekik kitemakas inemilis?

³ Jesús kinekik kitemakas inemilis porin semi kitasojta iTajtsin uan tejuan (xikonixtajtolti Juan 14:31; 15:13). Nejon  netasojtalis kiolinij maj kisentokani kitakamatini Jiova hasta keman kimiktijkej uan maj kichiuani tein yejuatsin kinekia. Tein kichiuak tapaleuis maj taltikpakneminij nemikan kemej Jiova kiixtalijtoya uan maj taltikpak moajsi kemej kinekia. Itech nejin tamachtilis tikitaskej keyej Jiova kikauak maj Jesús semi tajyouiani achto ke kimiktiskiaj. No tikitaskej ineskayo tatitanil Juan, akin semi kitasojkamatia inemilis Jesús tein kitemakak. Uan no tikitaskej keniuj tejuan no uelis tiknextiskej ke timotasojkamatij uan ke semi tikpatiuitaj tein Jiova uan Jesús toka kichiujkej.

4. Xikonijto keniuj momikilij Jesús.

⁴ Maj tiknemilikan tein Jesús kipanok achto ke kimiktiskiaj. Kikauak maj tateuianij romanos kikitskianij uan maj kiuijuitekinij maski ueliskia kinnotsas miakej ángeles maj kipaleuitij (Mat. 26:52-54; Juan 18:3; 19:1). Kikuetaxuijkej ika se látigo tein kiejkeuaya inakayo. Ipanko semi eskisaya. Satepan kimamaltijkej se kouit tein semi etik katka uan peuak kiuiuilatsa. Sayoj ke tateuianij romanos niman kichikaujkauijkej se takat maj yejua kiuikani hasta kampa kimiktiskiaj Jesús (Mat. 27:32). Keman ajsikej, tateuianij romanos kisojsokej imauan uan imetsuan itech kouit. Keman kiketskej kouit, okachiok tsayania kampa kisojsokaj. Akin kuali mouikayaj iuan uan imomaj semi tajyouiayaj uan chokayaj, sayoj ke taixyekananij judíos kipijpinaujtiayaj (Luc. 23:32-38; Juan 19:25). Uejkauak tajyouijtoya. Iyolo uan ipulmones amo taxikouayajok, uan okachi ouij kikisaya mijyotis. Kemej kimatia ke nochipa kitakamatik Jiova, achto ke momikiliskia kitataujtij. Ompa, moixpiloj uan mikik (Mar. 15:37; Luc. 23:46; Juan 10:17, 18; 19:30). Achto ke momikiliskia, uejkauak tajyouijtoya uan semi kipinaujtijkej.

5. ¿Toni okachi kitajyouiltij Jesús?

⁵ Jesús okachi kitajyouiltij tein kipantijkej uan amo tein kichiuilijkej keman kimiktijkej. Kipantijkej ke kiuijuikaltijka Dios (Mat. 26:64-66). Kemej semi kitekipachouaya maj kipantianij nejin, kichiaya maj iTajtsin amo kikauani maj ijkon kipinaujtianij (Mat. 26:38, 39, 42). ¿Keyej kikauak Jiova maj iKonetsin semi kitajyouiltianij uan maj kimiktianij? Maj tikitakan eyi taman.

6. ¿Keyej monekia kipiloskej Jesús itech se kouit?

⁶ Yekinika, Jesús monekia kipiloskej itech se kouit porin ijkon kinmakixtiskia judíos akin kintatsakuiltijkaj (Gál. 3:10, 13). Kintatsakuiltijkaj porin kijtojkaj ke kitakamatiskiaj itanauatiluan Dios sayoj ke amo kichiujkej, yejua ika kinnamikia mikiskej. Uan no, porin kemej katkaj ikoneuan Adán katkaj tajtakolejkej (Rom. 5:12). Komo se israelita kichiuaya se ueyi tajtakol uan Tanauatil kijtouaya ke monekia mikis, monekia kimiktiskej. Satepan ke kinmiktiayaj, sekin kinpilouayaj itech se kouit. Ijkon monextiaya ke Dios kinixtopeujka (Deut. 21:22, 23; 27:26). * Yejua ika, keman Jesús kipilojkej itech se kouit kiselij tatsakuiltilis tein kiselijkaj judíos uan ijkon uelik kinmakixtij. Inemilis tein kitemakak kinpaleuij hasta akin kiixtopeujkaj.

7. ¿Keyej Dios no kikauak maj iKonetsin tajyouiani?

⁷ Ojpatika, Dios kikauak maj iKonetsin tajyouiani porin nejon kipaleuiskia maj satepan kuali kichiua tekit tein kipias kemej Tayekankatiopixkat. Ika tein kipanok, Jesús  kimati ke semi ouij tekisa se kitakamatis Dios keman se kipanoua uejueyi ouijkayomej. Kemej semi motekipachojtoya, kitajtanij Jiova maj kipaleuiani “ika ne itatautilis uan hasta no ka chokilis”. Yejua ika, techajsikamati uan “uelis techpaleuijtinemis para [...] no tikxijxikojtinemiske tataman tajyouilisme”. Semi tiktasojkamatij maj Jiova kiixtaliani se Tayekankatiopixkat akin “techyoliknelijtiyas” (Heb. 2:17, 18; 4:14-16; 5:7-10).

8. ¿Keyej Jiova no kikauak maj Jesús semi kitajyouiltianij?

⁸ Expatika, Jiova kikauak maj Jesús semi tajyouiani porin monekia monankilis nejin netajtanil: ¿taltikpakneminij uelis kisentokaskej kitakamatiskej Jiova maski kipanoskej uejueyi ouijkayomej? Satanás kijtoua ke amo. Kijtoua ke tiktekitiliaj Dios porin tiknekij tikseliskej teisa. Uan no, kinemilia ke amo tiktasojtaj Jiova, ijkon kemej Adán amo kitasojtak (Job 1:9-11; 2:4, 5). Kemej Jiova kimatia ke iKonetsin nochipa kitakamatiskia, kikauak maj semi kitajyouiltianij. Kemej Jesús nochipa kitakamatik Jiova, kinextij ke Satanás se takajkayaujkej.

9. ¿Toni neskayot techkauilij tatitanil Juan?

⁹ Miakej itekitikauan Dios kinixnamikinij uan kipanouanij tataman ouijkayomej. Sayoj ke taxikouanij uan kisentokanij tanojnotsanij porin takuaujtamatij itech inemilis Jesús tein kitemakak. Maj tikitakan ineskayo tatitanil Juan. Kiteixmatiltij Cristo uan ke toka momikilij xa panoua 60 xiujmej. Kiajxitijtoyaya 100 xiujmej keman tekiuanij romanos kiuikakej Patmos, tein “kiyeualojtok in at den mar”, porin kipantijkej ke kichiujka tein amo kuali. ¿Toni kichiujka? Yejua kijtoj: “Porin nitanojnotstinemik ika in Tajtoltsin Dios, uan no porin nitetapouijtinemik nochi ten Cristo Jesús kichiutinemia” (Apoc. 1:9). ¡Juan techkauilij se kuali neskayot porin semi takuaujtamatik uan taxikoj!

10. Itech amatajkuilolmej tein kijkuiloj Juan, ¿keniuj kinextij ke semi kitasojkamatia inemilis Jesús tein kitemakak?

¹⁰ Itech amatajkuilolmej tein tatitanil Juan kijkuiloj, kinextij ke semi kitasojtaya Jesús uan ke semi kitasojkamatia inemilis tein kitemakak. Itech nejon amatajkuilolmej, miakpa ika tajtoj inemilis Jesús tein kitemakak oso keniuj techpaleuia. Panoua 100 ika tajtoj nejon. Kemej neskayot, kijkuiloj: “Takan aksa motajtakolmaka, ijkuakon xikmatikan ke tikpiaj se naken Totetajtouijkau nepa iixpantsinko Totajtsin Dios, uan Yejuatsin ne in Jesucristo in Yolmelauaktsin” (1 Juan 2:1, 2). Uan no kijtoj ke semi moneki se kiteixmatiltis Jesús (Apoc. 19:10). Nejin kinextia ke Juan semi kitasojkamatia inemilis Jesús tein kitemakak. ¿Keniuj no uelis tiknextiskej ke semi tiktasojkamatij?

11. ¿Toni uelis techpaleuis maj amo titajtakolchiuakan?

¹¹ Maj amo titajtakolchiuakan. Komo yekmelauj tiktasojkamatij inemilis Jesús tein kitemakak, amo tiknemiliskej: “Amo moneki nimoxikos. Uelis nitajtakos uan satepan niktajtanis Jiova maj nechtapojpolui”. Okachi kuali, keman ueliskia tikchiuaskej tein amo kuali, maj tikijtokan: “¡Amo uelis nikchiuas nejin! Jiova uan Jesús miak taman noka kichiuanij”. Uan no, uelis tiktajtaniskej Jiova maj techpaleui uan maj tiktataujtikan: “Xitechonajchiuili den chikaualis den amokuali” (Mat. 6:13).

12. ¿Keniuj uelis tikchiuaskej tein kijtoua 1 Juan 3:16-18?

 ¹² Maj tikintasojtakan tokniuan. Keman ijkon tikchiuaj no tiknextiaj ke tiktasojkamatij inemilis Jesús tein kitemakak, porin amo sayoj toka momikilij, ta no ininka tokniuan. Jesús semi kintasojta, yejua ika ininka momikilij (xikonixtajtolti 1 Juan 3:16-18). Tiknextiaj ke tikintasojtaj ika tein tikchiuaj (Efes. 4:29, 31–5:2). Tikinpaleuiaj keman mokokouaj oso keman kipanouaj uejueyi ouijkayomej, kemej neskayot, keman mochiua se tetsauit kampa nemij. Sayoj ke, ¿toni moneki tikchiuaskej keman se tokniuj kijtoua oso kichiua teisa tein techyolkokoua?

13. ¿Keyej moneki titetapojpoluiskej?

¹³ ¿Ouij techkisa tikintapojpoluiskej akin techyolkokouaj? (Lev. 19:18). Komo kemaj, maj tikchiuakan nejin tein Biblia tayolmajxitia: “Ximopaleuikan ika tetasojtalis se uan okse. Uan xikiniknelikan se uan okse. Uan no ximotapojpoluikan se uan okse ijkon keme Totajtsin Dios namechtapojpoluilij ya namotajtakoluan” (Efes. 4:32). Nochipa keman tiktapojpoluiaj se tokniuj, tiknextiliaj toTajtsin Jiova ke tiktasojkamatij inemilis Jesús tein kitemakak. ¿Toni techpaleuis maj okachi tikpatiuitakan nejin netetayokolil tein Jiova techmakak?

14. ¿Toni techpaleuis maj okachi tikpatiuitakan inemilis Jesús tein kitemakak?

¹⁴ Maj tiktasojkamatilikan Jiova inemilis Jesús tein kitemakak. Joanna, se tokniuj siuat akin kipia 83 xiujmej uan nemi India, kijtoua: “Niknemilia ke mojmostaj keman niktataujtia Jiova moneki niktasojkamatilis inemilis Jesús tein kitemakak”. Keman tiktataujtiskej Jiova, maj tikiluikan tein amo kuali tein tikchiujkej nejon tonal uan maj tikiluikan maj techtapojpolui. Sayoj ke komo tikchiujkej se ueyi tajtakol, no monekis tikintajtaniskej tayekananij maj techpaleuikan. Yejuan techkakiskej uan ika netasojtalis techyolmajxitiskej ika Biblia. Uan no, touan kichiuaskej netataujtil uan kitajtaniskej Jiova maj techtapojpolui uan ijkon uelis oksepa kuali timouikaskej iuan (Sant. 5:14-16).

15. ¿Keyej moneki okachi timomachtiskej tein Jesús kichiuak uan itech titanemiliskej?

¹⁵ Maj itech titanemilikan inemilis Jesús tein kitemakak. Rajamani, se tokniuj siuat akin kipia 73 xiujmej, kijtoua: “Nichoka keman nikixtajtoltia  nochi tein Jesús kijyouij”. Tejuan xa no techtayokoltia keman tiknemiliaj ke iKonetsin Dios semi tajyouij. Sayoj ke komo okachi titanemiliaj itech inemilis Jesús tein kitemakak, okachi tiktasojtaskej yejua uan iTajtsin. ¿Ueliskia okachi timomachtiskej tein Jesús kichiuak? Nejin techpaleuis maj okachi tikintasojtakan Jiova uan Jesús.

16. ¿Keniuj techpaleuia tikintapouiskej oksekin tein Jesús toka kichiuak? (Xikonita taixkopin ipeujyan amaix).

¹⁶ Maj tikintapouikan oksekin tein Jesús toka kichiuak. Okachi tikpatiuitaj inemilis Jesús tein kitemakak keman tikintapouiaj oksekin tein kichiuak. Tikpiaj amaixmej uan videos tein techpaleuiaj maj tikinnextilikan keyej monekik toka momikilis. Kemej neskayot, uelis tikuiskej folleto Kuali tanauatilmej tein Dios kitemaka itech tamachtilis 4, tein motokaytia “¿Akoni Jesucristo?”. Oso uelis tikuiskej amatajkuilol ¿Toni techmachtia Biblia? itech tamachtilis 5, tein motokaytia “Dios kitemakak inemilis iKonetsin”. Uan keman xijxiujtika timosentiliaj keman tikelnamikij imikilis Cristo uan keman tikinyoleuaj oksekin maj touan mosentilikan, techpaleuia maj okachi tiktasojkamatikan inemilis tein kitemakak. ¡Se ueyi tatiochiualis maj Jiova technauatiani maj tikinpaleuikan oksekin maj kiixmatikan iKonetsin!

17. ¿Keyej inemilis Jesús okachi ueyi netetayokolil tein Dios techmakak?

¹⁷ Miak taman kichiua maj tikpatiuitakan uan maj tiktasojkamatikan inemilis Jesús tein kitemakak. Techpaleuia maj kuali timouikakan iuan Jiova maski titajtakolejkej. No “kinuejuelos in chikaualisme den amokuali Satanás” (1 Juan 3:8). Uan no, mochiuas se xochital nikan taltikpak kemej Jiova kinekia uan nochin kitekitiliskej uan kitasojtaskej. Yejua ika, maj mojmostaj tiknextikan ke tiktasojkamatij inemilis Jesús, okachi ueyi netetayokolil tein Dios techmakak.