TIMOAJSIJ itamiampa metsti noviembre xiuit 1932 itech xolal México, kampa nemij panoua se millón taltikpakneminij. Se semana achto kitalijkej yekinika semáforos. Sayoj ke axkan, taltikpakneminij kielkaujkejya nejon. Akin kiteixmatiltiaj tanauatilmej kichixtokej maj mochiua tein okachi ika motajtoua itech semana. Maktokej inincámaras kampa moketsa tren porin kichixtokej se takat: Joseph F. Rutherford, akin kiixyekana Sociedad Watch Tower. Itaixpantijkauan Jiova no ompa moajsij porin kinekij kuali kiseliskej tokniuj Rutherford, akin uitse se ueyi nechikol tein uejkauas eyi tonal.

Itech amaix The Golden Age (axkan ¡Despertad! itech español) moijtoj: “Tikyekmatij ke nejin ueyi nechikol moelnamikis kemej se taman tein motelneki tein tapaleuij maj moteixmatilti tein melauak itech ueyi altepet México”. Sayoj ke ¿keyej semi ika motajtoj nejin ueyi nechikol kampa sayoj mosentilijkej 150 taltikpakneminij?

Achto ke mochiuaskia nejon ueyi nechikol, tel amo miakej kiselijkaj tamachtilis tein melauak. Maski itech xiuit 1919 peuak mochiuaj seki uejueyi nechikolmej kampa amo miakej mosentilijkaj, satepan ixpoliujkej seki nechikolmej. Itech xiuit 1929, moixtalij se sucursal itech xolal México. Moitaya ke nejin tapaleuiskia maj okachi motanojnotsa, sayoj ke mochiujkej seki kuejmolmej. Kemej neskayot, keman motanauatij ke monekia amo se tanamakas keman se tanojnotsa, se colportor (precursor) tel kualanik uan hasta kikauak nechikol uan kiixtalij okse nechikol kampa no momachtiayaj ika Biblia. Ijkuak, no monekik moixpatas akin taixyekanaya itech sucursal porin amo kuali monejnemiltij. Itaixpantijkauan Jiova akin kisentokayaj kitekitiliayaj monekia maj kinyolchikauanij.

Keman tokniuj Rutherford takalpanoj ompa, semi kinyolchikauak tokniuan. Kitemakak ome tanojnotsmej itech ueyi nechikol tein semi tayolchikauak uan makuil tanojnotsmej itech radio. Ijkuak, yekinika moteixmatiltij tein tamachtia Biblia itech radio ompa México. Satepan ke mochiuak ueyi nechikol, tokniuj akin peuak taixyekana itech sucursal kiixtalij keniuj mochiuas tanojnotsalis. Ijkuak, tokniuan kimachilijkej ke Jiova kintatiochiuijtoya uan kisentokakej kitekitilijkej ika yolpakilis uan yolchikaualis.

Se xiuit satepan, mochiujkej ome uejueyi nechikolmej itech ueyi altepet, se itech xolal Veracruz uan okse itech xolal México. Tokniuan kiselijkej tein kuali porin mochikaujkej tanojnotsaskej,. Kemej neskayot, itech xiuit 1931, onkayaj 82 tanojnotsanij, sayoj ke majtakti xiuit satepan onkayaj panoua 800. Itech xiuit 1941, kemej mil taltikpakneminij mosentilijkej itech ueyi nechikol ompa xolal México.

Itech xiuit 1943, itaixpantijkauan Jiova kiteixmatiltitoj itech ojmej ika seki uejueyi amamej ke mochiuaskia ueyi nechikol “Nación Libre”, tein  mochiuaskia itech 12 xolalmej. * Mopilouiliayaj ininkechko ome uejueyi amamej, se taixpan uan se taikan. Tokniuan ijkon peuak kichiuaj itech xiuit 1936.

Itech amaix La Nación, tein mokixtia México, moijtoj keniuj semi tapaleuij keman tokniuan nejnenkej ika uejueyi amamej itech ojmej. Moijtoj: “Yekinika tonal, kiniluijkej maj kinuikanij okachi taltikpakneminij. Uan mostika, amo akiajok kampa mosentilijkej”. Akin taixyekanayaj itech Iglesia Católica semi kualankej porin kiitakej ke semi tapaleuiaya keman tokniuan yayaj itech ojmej uan yejua ika peuak kinixnamikij. Maski ijkon, tokniuan kisentokakej yajtinenkej itech ojmej. Itech amaix La Nación no moijtoj ke itech nochi xolal México, kinitakej takamej uan siuamej akin mopilouilijkaj uejueyi amamej. Ompa no nesia se taixkopin kampa moitayaj seki tokniuan itech ojmej ompa xolal México. Tatsintan itech taixkopin kijtouaya: “Sentakuikej itech ojmej”.

Itech nejon xiujmej, tel miakej tokniuan ika miak chikaujkayot ueliaj yayaj uejueyi nechikolmej, tein amo miakej mochiuayaj ompa México. Miakej nemiaj itech xolalkonemej tein tel uejka moajsiaj, kampa amo ajsia tren nion onkayaj carreteras. Tokniuan monekia yaskej itech mula oso nejnemiskej miak tonalmej uan ijkon ajsiskej kampa kisaya se tren tein kinuikaskia itech xolal kampa mochiuaskia ueyi nechikol.

Tel miakej tokniuan sayoj kinajsia tomin tein ika yaskiaj. Miakej mokauayaj ininchan tokniuan, akin semi kinyolpaktiaya kinseliskej. Oksekin kochiaj itech Kalmej kampa tiMosentiliaj. Se tonal, kemej noventa tokniuan mokaujkej itech sucursal uan kochkej itech cajas tein kinpatachojkaj uan kinnepanojkaj. Itech Anuario moijtoj ke tokniuan semi motasojkamatiaj uan kijtojkej ke nejon tapechmej katkaj “okachi yemankej uan totonkej ke talpan tein chijchiujtok ika cemento”.

Tokniuan semi kitasojkamatiaj nejin tonalmej uan niman kichiuayaj tein yeski tein kinpaleuiskia maj yakan ueyi nechikol. Tokniuan tanojnotsanij ompa México, akin ajsitokejya se millón, kisentokaj kipiaj nejin tanemilil. * Itech Anuario 1949, moijtoj: “Tonalmej tein ouijkej amo kichiuanij maj tokniuan amo kiueyichiuakanok Jiova kemej moneki. Satepan ke mochiua se ueyi nechikol, miak tonalmej ika tajtouaj uan nochipa tajtanij: ‘¿Kemanian tikpiaskej okse ueyi nechikol?’”. (Tein moajsi itech sucursal tein poui Centroamérica).