1-3. ¿Keyej seki tokniuan amo ueliok kitekitiliaj Dios nochi tonalmej?

KEMAN Robert uan Mary Jo kiuikayajya veintiún xiujmej kemej misioneros inintatuan kokolispeujkej. Yejuan kijtouaj: “Maski techyolpaktiaya tikinyekpiaskej, techyolkokoj tikauaskej xolal kampa semi timomatkajya”.

² William uan Terrie akin namikuanij, kijtouaj: “Keman tikmatkej ke amo ueliskiaok timokepaskej kampa titapaleuijtoyaj porin tikokolispeujkej, peujkej tichokaj. Nochipa tiknejnekkej titapaleuiskej itech okse altepet, sayoj ke amo tiueliajok”.

³ Alexéi kijtoua: “Tikmatiaj ke tekiuanij kinekiaj kitsakuaskej sucursal kampa nejua niyetoya. Keman ijkon panok, semi nechyolkokoj porin monekik tikauaskej Betel”.

4. ¿Toni netajtanilmej tiknankilitij itech nejin tamachtilis?

⁴ Uan no ijkon kinpanouani tel miakej tokniuan akin tekitiaj Betel uan oksekin akin kitekitilianij Dios nochi tonalmej. * Xa nejin tokniuan kinouijmaka kikauaskej tekit tein semi kinyolpaktia kichiuaskej. ¿Toni uelis kinpaleuis? ¿Keniuj uelis tikinpaleuiskej? Tikmatiskej itanankililuan nejin netajtanilmej techpaleuis tinochin keman mopatas seki taman itech tonemilis.

5. ¿Keniuj timomachiliaj keman tikauaj tekit tein tikchiuayaj?

⁵ Kampa titapaleuiaj, yeski Betel oso itech okse taman  tekit, peua tikintasojtaj taltikpakneminij uan hasta ompa timomatij. Yejua ika, semi techyolkokoua komo amo ueliok ompa tiksentokaj. Tikintemouaj tokniuan uan ininka timotekipachouaj, okachiok komo tinemitoj okseko porin tekiuanij amo techkaujkejok maj tikchiuakan itekiyo Dios (Mat. 10:23; 2 Cor. 11:28, 29). Uan no, techouijmakas titapaleuitiuj okseko porin taman kemej ompa nemij, hasta komo oksepa timokepaj kampa tikayomej. Robert uan Mary Jo kijtouaj: “Amo timomatiajok maski ompa tikayomej uan taman timomachiliayaj keman titanojnotsayaj itech totajtol. Tikmachiliayaj kemej yeskia amo ompa tikayomej”. Uan no, xa kemansa amo techajsis tomin. Xa amo kuali timomachiliskej uan tiknekiskej timosenkauaskej. ¿Toni uelis techpaleuis?

6. ¿Keniuj tiksentokaj timotokiaj iuan Jiova?

⁶ Maj tiksentokakan timotokikan iuan Jiova (Sant. 4:8). ¿Keniuj tikchiuaj? Keman titakuaujtamatij ke yejuatsin ‘kikaki tonetataujtil’ (Sal. 65:2). Uan 1 Pedro 5:7 kijtoua: “Xikpanoltilijtiyakan Dios nochi namoyolkuejmololisuan”. Jiova uelis kichiuas okachiok ke tein tiktajtaniaj oso tiknemiliaj (Efes. 3:20). Yejuatsin amo techmaka sayoj tein tiktajtaniaj. Jiova uelis kiyektalis tokuejmoluan kemej amo tiknemiliayaj.

7. 1) ¿Toni techpaleuis maj tiksentokakan timotokikan iuan Jiova? 2) Kemej kijtoua Hebreos 6:10-12, ¿toni tikseliskej komo tiksentokaj tiktekitiliaj Jiova?

⁷ No techpaleuis maj tiksentokakan timotokikan iuan Jiova keman mojmostaj tikixtajtoltiaj Biblia uan itech titanemiliaj. Se tokniuj akin katka misionero, kijtoua: “Moneki tiksentokaskej titaueyichiuaskej kemej kalyetouanij uan timomachtiskej tein moitas itech nechikolmej, ijkon kemej tikchiuayaj kampa titapaleuiayaj”. Uan no, hasta kampa tiueliskej maj titanojnotsakan iniuan tokniuan itech yankuik nechikol. Jiova amo kinelkaua akin kisentokaj kitekitiliaj, maski amo uelij kichiuajok kemej achto (xikonixtajtolti Hebreos 6:10-12).

8. ¿Keniuj techpaleuia 1 Juan 2:15-17 maj tinemikan ika amo miak taman?

⁸ Maj tinemikan ika amo miak taman. Nikan kampa Satanás taixyekana,  miakej kinejnekij kipiaskej miak taman. Maj amo tikauakan maj nejon kichiua maj amo tiktekitilikanok Dios (Mat. 13:22). Maj amo tikintajtolkakikan totasojikniuan, tochankauan oso oksekin keman techiluiskej maj tiktemokan titominpiaskej (xikonixtajtolti 1 Juan 2:15-17, TNM). Maj titakuaujtamatikan iuan Jiova akin motenkaua techmakas “tech ne momento kuak moneki” nochi tein techpaleuis maj kuali iuan timouikakan, maj kuali timomachilikan uan maj tikpiakan tein ika timoixpanoltiskej (Heb. 4:16; 13:5, 6).

9. Kemej kijtoua Proverbios 22:3, 7, ¿keyej amo moneki timotauikaltiskej uan toni techpaleuis maj kuali titaixejekokan?

⁹ Maj amo timotauikaltikan komo amo moneki (xikonixtajtolti Proverbios 22:3, 7). Keman se mokalpata uelis yeski semi patiyoj uan uelis se motauikaltis. Yejua ika maj amo tikouakan tein amo moneki. Keman tikpanouaj se taman tein techtekipachoua kemej se kiyekpias se tochankauj akin mokokoua, xa techouijmakas tikmatiskej kanachi tomin titajtaniskej maj techtaneujtikan. Ijkuak, semi kuali maj tikelnamikikan ke ‘timoteixpantiskej iixpantsinko Totajtsin Dios’ techpaleuis maj kuali titaixejekokan. Yejuatsin techyolseuis uan techpaleuis maj kuali tiknemilikan tein tikchiuaskej (Filip. 4:6, 7; 1 Ped. 5:7).

10. ¿Toni techpaleuis maj kuali timouikakan iniuan oksekin?

¹⁰ Maj kuali timouikakan iniuan totasojikniuan uan tochankauan. Maj tikintapouikan totasojikniuan tein tikmachiliaj uan tein tikpanouaj, okachiok akin kipanouanij tein tejuan tikpanotokej. Nejon techpaleuis maj kuali timomachilikan (Ecl. 4:9, 10). Maski tiksentokaj kuali timouikaj iniuan tokniuan kampa achto titapaleuijtoyaj, moneki tikintemoskej okseki totasojikniuan. ¿Keniuj tikchiuaskej? Maj tikintapouikan keniuj Jiova techtatiochiuiani, ijkon kiitaskej ke tiyolpakij tiktekitiliskej. Maski sekin amo kiajsikamatiskej keyej techyolpaktia tiktekitiliskej Dios nochi tonalmej, xa oksekin uelis kinyolnotsas uan mochiuaskej totasojikniuan. Sayoj ke maj amo semi ika titajtokan tein tikchiuanij nion maj amo tikijtokan tein amo tikuelitaj.

11. ¿Keniuj uelis tiksentokaskej tiyolpakiskej kemej namikuanij?

¹¹ Komo amo uelikok tiksentokakej titapaleuijkej porin tonamik kokolispeuak, maj amo tiktajtakoltikan. Uan komo tejuan tikokolispeujkej, maj amo timotajtakoltikan nion maj tiknemilikan ke  tikyolkokouaj tonamik. Maj tikelnamikikan ke axkan tipouij “sanse san” uan tikiluijkej Jiova ke nochipa timoyekpiaskej (Mat. 19:5, 6). Uan komo amo uelikok titapaleuijkej porin tikpiakej se konetsin, maj amo tiktajtakoltikan, ta maj tikiluikan ke okachi tikpatiuitaj ke tekit tein tikchiuayaj uan ke yejua se tatiochiualis (Sal. 127:3-5). Uan no, maj tiktapouikan tein kualtsin tein tikpanokej keman tiktekitiliayaj Jiova nochi tonalmej porin nejon uelis kiolinis maj no ijkon kitekitili Dios.

12. 1) ¿Keniuj uelis tikinpaleuiskej akin kitekitiliaj Dios nochi tonalmej maj kisentokakan kichiuakan? 2) ¿Keniuj uelis tikinpaleuiskej maj amo kinouijmaka momatiskej itech tonechikol?

¹² Onkak miak nechikolmej, ijkon kemej miakej tokniuan akin kinpaleuiaj akin kitekitiliaj Dios nochi tonalmej maj kisentokakan itech nejon tekit. Kemej neskayot, kinyolchikauaj maj amo kikauakan, kinmakaj tomin uan okseki taman tein kinpoloua oso kinyekpiaj ininchankauan. ¡Semi kuali tein kichiuaj! (Gál. 6:2.) ¿Toni uelis tikchiuaskej komo itech tonechikol ejko akin tapaleuijtoya okseko? Maj amo tiknemilikan ke kipatakej porin amo kuali kichiuak itekiuj oso porin kichiuak tein amo kuali. * Ta okachi kuali, maj tikpaleuikan maj niman momati. Maski axkan amo ueliok kitekitilia Jiova kemej achto porin mokokoua, maj tikselikan ika netasojtalis uan maj tikiluikan ke tel kuali tein kichiuani. Maj timochikauakan tikixmatiskej. Maj tiktemokan timomachtiskej ika nochi tein kimati, tein momachtiani uan tein kuali kichiua.

13. ¿Keniuj uelis tikpaleuiskej se tokniuj akin ajsi tonechikol?

 ¹³ Xa yekinika monekis tikpaleuiskej maj kiajsi kani nemis, keniuj uelis yas kansaika, maj kiajsi tekit oso okseki taman tein monekis. Xa monekis tikiluiskej keniuj mochiua seki taman kemej se kiixtauas impuestos oso keniuj mopajtis. Sayoj ke maj okachi tiktemokan tikajsikamatiskej. Xa yejua mokokoua oso se ichankauj. Oso xa yoltajyouijtok porin momikilij aksa akin kitasojta. * Uan maski amo kijtos, uelis tayokoxtos porin kintemoua itasojikniuan. Moneki maj pano miak tonalmej uan ijkon kuali momachilis.

14. ¿Keniuj tokniuan kipaleuijkej se tokniuj siuat maj yolpaki itech tanojnotsalis?

¹⁴ Tein ika tikpaleuiskej uan tein tikchiuaskej uelis kipaleuis maj niman momati. Se tokniuj siuat akin tapaleuij miak xiujmej itech okse altepet, kijtoua: “Kampa nitapaleuijtoya mojmostaj nitamachtiaya ika Biblia. Sayoj ke kampa axkan niyetok nechouijmaka hasta nikixtajtoltis se texto oso niknextis se video itech tanojnotsalis. Sayoj ke, tokniuan nechyoleuayaj maj titakalpanotij uan maj titamachtitij ika Biblia. Nikitas keniuj nejin tokniuan ika miak pakilis kinmachtiayaj uan kinpaleuiayaj oksekin maj kitekitilikan Dios, nechpaleuij maj nikpia se kuali tanemilil. Nimomachtij keniuj peuas nitajtos iniuan taltikpakneminij, nejon nechpaleuij maj oksepa niyolpaki”.

15. ¿Keniuj uelis tiyolpakiskej kampa yeski titapaleuiskej?

¹⁵ Uelis tiyolpakiskej kampa yeski titapaleuiskej. Maj amo tiknemilikan ke amo kuali tikchiujkej tekit oso ke axkan amo teyi tichiuanimej. Maj tiknemilikan keniuj Jiova techpaleuijtok axkan uan maj tiksentokakan titanojnotsakan. Maj tikchiuakan kemej tokniuan itech  yekinika siglo, akin “tanojnotstinenke ika in Tajtoltsin de Dios nouiyampa kampa moajsiaj” (Hech. 8:1, 4). Komo tiksentokaj titanojnotsaj Jiova techtatiochiuis. Kemej neskayot, seki precursores akin kinkixtijkej itech altepet kampa tapaleuijtoyaj yajkej itech okse kampa tajtouayaj inintajtol uan no monekia nepaleuil. Itech sayoj seki metsti peujkej mosentiliaj miakej.

16. ¿Toni techpaleuis maj tikintasojtakan taltikpakneminij kampa titapaleuijtokej?

¹⁶ Nehemías kiniluij judíos ke yolpakilis tein ualeua itech Jiova kiyolchikauaya (Neh. 8:10). Maski semi tikuelitaj kampa titapaleuiaj tein okachi kichiua maj tiyolpakikan yejua kuali timouikaskej iuan Jiova. Yejua ika, maj tiksentokakan timotokikan iuan Dios uan maj titakuaujtamatikan ke techmakas tamatilis, techixyekanas uan techpaleuis. Maj tikelnamikikan ke tein kichiuak maj tikintasojtakan taltikpakneminij kampa tiyetoyaj yejua tiktemoskej tikinpaleuiskej. No ijkon maj tikchiuakan kampa axkan tiyetokej uan maj tikitakan keniuj Jiova techpaleuia maj no tikintasojtakan taltikpakneminij (Ecl. 7:10).

17. ¿Toni moneki tikelnamikiskej ika tekit tein axkan tikchiuaj?

¹⁷ Maj tikelnamikikan ke nochipaya tiktekitiliskej Jiova, sayoj ke kemej tiktekitiliaj uelis mopatas. Itech yankuik taltikpak, xa amo tikchiuaskej tekit tein axkan tikchiuaj. Alexéi, akin ika titajtojkej ipeujyan tamachtilis, kinemilia ke kemej axkan kitekitilijtok Dios kimachtijtok keniuj kitekitilis satepan. Kijtoua: “Nochipa nikmatini ke Jiova yekmelauj nemi uan ke yankuik taltikpak yekmelauj mochiuas, sayoj ke nikmachiliaya ke semi uejka yetoyaj. Axkan kemej yeskia nikitstok Jiova uan senkis nikneltoka ke amo uejkaua niyetos itech yankuik taltikpak” (Hech. 2:25). Kampa yeski titapaleuijtoskej, maj tiksentokakan timotokikan iuan Jiova. Yejuatsin amo keman techkauas, ta techpaleuis maj tikchiuakan nochi tein tiueliskej uan maj tiyolpakikan kampa yeski tiktekitilijtoskej (Is. 41:13).