1, 2. ¿Keniuj techpaleuia Romanos 5:12?

ROMANOS 5:12 kijtoua: “Itechkakopaka ne achtopa tagat Adán ten motajtakolmakak in tajtakol momauak ya tech nochi senmanauak. Uan no tikmatij ke ongak mikilis nochi senmanauak ika por ne tajtakol de Adán. Uan no ne mikilis mosouako uan takitskijtinemiko inpan nochi in taltikpakuani porin nochi in taltikpakuani motajtakolmakakke”. Nejin tajkuilol kuali tikixmatij porin tiktekitiltiaj keman tikinmachtiaj taltikpakneminij.

² Nejin tajkuilol miakpa ixnesi itech amatajkuilol ¿Toni yekmelauj tamachtia Biblia? Keman timomachtiaj capítulos 3, 5 uan 6 iniuan tokoneuan uan iniuan okseki taltikpakneminij, xa tikixtajtoltiaj Romanos 5:12. Ika tikinpaleuiaj maj kiajsikamatikan keyej taltikpak amo se xochital, keyej moneki se taxtauil uan keyej timomikiliaj. Sayoj ke nejin tajkuilol no uelis techpaleuis tinochin maj okachi tikpatiuitakan tokuali uikalis iuan Jiova. Uan no, uelis techpaleuis maj okachi tiknekikan tiktakamatiskej uan maj tiksentokakan tikchixtokan nochi tein yejuatsin motenkaua techmakas.

3. ¿Toni moneki tikelnamikiskej tinochin?

 ³ Tinochin moneki tikelnamikiskej ke titajtakouanij uan ke mojmostaj timopolouaj. Jiova kimati nejon, sayoj ke techiknelia uan kineki techtapojpoluis (Sal. 103:13, 14). Jesús techmachtij ke moneki tiktajtaniskej Dios maj techtapojpolui (Luc. 11:2-4). Komo Jiova techtapojpoluijya tein achto tikchiujkej, moneki amo tiksentokaskej itech titanemilijtoskej. ¿Keyej Jiova ueli techtapojpoluia?

4, 5. 1) ¿Toni techpaleuia maj tikajsikamatikan keyej Jiova ueli techtapojpoluia? 2) ¿Toni kijtosneki “teiknelilis tein amo tenamiki”?

⁴ Se taman tein techpaleuia maj tikajsikamatikan keyej Jiova ueli techtapojpoluia yejua amat tein kintitanilijkej Romanos, okachiok tein kijtoua capítulo 6. Itech Romanos 3:23, 24, tatitanil Pablo kijtoua ke tinochin titajtakouanij, uan ompa kijtoua: “Totajtsin Dios [...] techpouak ke tiyolchipauke sayo porin techueyiyoliknelij. Uan ijkon Dios kichiuak porin Totekotsin Cristo Jesús kixtauak ya nochi totajtakoluan uan techmakixtij”. Keman Pablo kijtoj ke Dios “techueyiyoliknelij”, kijtosnekia ke Jiova kichiuak se taman tein techtelpaleuia tein amo kichia maj tikixtauilikan, tein amo timotanilijkej uan amo technamikia tikseliskej.

⁵ Se tamatkej kijtoua ke keman Biblia ika tajtoua ueyi teiknelilis, miakpa kijtosneki tein Dios uan Cristo kichiujkej tein ika kinmakixtijkej taltikpakneminij itech tajtakol uan mikilis. Yejua ika, Traducción del Nuevo Mundo kikui tajtol “teiknelilis tein amo tenamiki”. Maj tikitakan tein Dios toka kichiuani uan keniuj iueyi teiknelilis techpaleuia axkan uan kichiua maj tikchiakan tein kuali satepan.

6. ¿Akonimej uelis kinpaleuis iueyi teiknelilis Dios, uan toni tatiochiualismej kiualkuis?

⁶ Kemej Adán tajtakoj, tinochin techpanoltilij tajtakol uan mikilis. Yejua ika, Biblia kijtoua ke mikilis momoyauak itech taltikpak porin amo tatakamatik “se tagat san”, Adán. Sayoj ke Jiova kinextij ueyi teiknelilis uan kitemakak tein kinmakixtis nochin taltikpakneminij ika “se tagat san ten monotsa Jesucristo” (Rom. 5:12, 15, 17). Yejua ika tinochin uelis techpaleuis iueyi teiknelilis Dios. Kemej Jesucristo tatakamatik, miakej kinitaskej ke yolmelaujkej uan uelis nemiskej nochipaya (Rom. 5:19, 21).

7. ¿Keyej taxtauil se netetayokolil tein amo technamikia tikseliskej uan se taman tein kinextia iueyi teiknelilis Dios?

⁷ Taxtauil se netetayokolil tein amo technamikia tikseliskej uan se taman tein kinextia iueyi teiknelilis Dios. Maj tiknemilikan nejin: Jiova semi techiknelij uan yejua ika kiixtalij tein techmakixtis itech tajtakol uan mikilis. Sayoj ke amo monekia kitemakas iKonetsin kemej taxtauil. Uan no, nion semej technamiki tikseliskej tein Jiova uan Jesús kichiujkej tein techpaleuia maj Dios ueli techtapojpolui uan maj tikchiakan tinemiskej nochipaya. Ika tein tikchiuaj uelis tiknextiliskej Dios ke tiktasojkamatiliaj.

8. ¿Toni tanemilil moneki tikixtopeuaskej?

⁸ Tikmatij ke Dios kineki techtapojpoluis, hasta keman tiueyitajtakouaj. Sayoj ke moajsi se tanemilil tein moneki tikixtopeuaskej. Maj amo keman tiknemilikan ke kemej Jiova semi teiknelia uelis tikchiuaskej teisa tein amo kuali, uan amo teyi panos porin techtapojpoluis. Seki tokniuan itech yekinika siglo ijkon tanemiliayaj, maski seki tatitanilmej yoltoyajok (xikonixtajtolti Judas 4). Axkan no moneki timoyekpiaskej uan amo tikauaskej maj okseki taltikpakneminij yolik kichiuakan maj ijkon titanemilikan.

9, 10. ¿Keyej kijtoj Pablo ke yejua uan okseki tokniuan kemej yeskia momikilijkajya itech ‘inintalnamikilis de tajtakol’?

⁹ Pablo kiniluij tokniuan ke amo kuali yetoya maj kinemilianij ke Dios kintapojpoluiskia komo kisentokayaj tajtakouayaj. Uan kiniluij keyej monekia amo ijkon tanemiliskej: “Ximopouakan ke nanmomikilijke ya, kijtosneki in soltik namotalnamikilis de tajtakol” (xikonixtajtolti Romanos 6:1, 11). ¿Toni kijtosnekia Pablo?

¹⁰ Ika inemilis Jesús tein kitemakak, Dios kitapojpoluij Pablo uan okseki tokniuan itech yekinika siglo. Jiova kinixpejpenak maj mochiuanij ikoneuan ika yektikatsin espíritu. Komo amo kikauayaj, nemiskiaj ompa iluikak uan tekiuajtiskiaj iuan Cristo. Sayoj ke nemiajok nikan taltikpak. Komo ijkon, ¿keyej Pablo kiniluij: “Ximopouakan ke nanmomikilijke ya, kijtosneki in soltik namotalnamikilis de tajtakol”? Porin senkis kipatakaj kemej monejnemiltiayaj. Pablo kikuik ineskayo Jesús uan ika kimelauak nejin. Kijtoj ke “mikilis amo uelis ok tamapachojtos ok ipan Cristo” porin moajokkaya kemej se espíritu tein amo kemanok momikilis. No ijkon, nejon tokniuan kemej yeskia momikilijkajya itech ‘inintalnamikilis de tajtakol’, sayoj ke yoltoyaj ‘para kiueyipanchiuaskej Totajtsin Dios porin poujtinemiaj iuan Totekotsin Cristo Jesús’ (Rom. 6:9, 11). Senkis kipatakaj ininnemilis, porin amo kikauayajok maj kinyekanani ininamo kuali tanejnekilis. Axkan mochikauayaj kiyolpaktiskej Dios.

11. ¿Keniuj ueli tikijtouaj ke timomikilijkejya itech ‘totalnamikilis de tajtakol’?

¹¹ ¿Keniuj axkan no ueli tikijtouaj ke timomikilijkejya itech ‘totalnamikilis de tajtakol’? Achto, xa tikchiujkej miak taman tein amo kuali porin amo tikmatiaj toni kinemiliaya Jiova. Tajtakol ‘techmajpachojtinemia’ (Rom. 6:19, 20). Sayoj ke keman timomachtijkej itech Biblia keniuj kineki Dios maj tinemikan, tikixtalijkej tikpataskej kemej timonejnemiltiayaj, iuan timotemaktiskej uan timoauiskej. Tiknekiaj tiktakamatiskej Jiova ika nochi toyolo uan tinemiskej kemej yejuatsin kiyolpaktia. Tajtakol amo techyekanayaok uan peuak tikchiuaj tein melauak (Rom. 6:17, 18).

12. ¿Toni moneki tikixpejpenaskej?

¹² Pablo kijtoj: “Amo xiktakauilikan ok ne tajtakol ke ma namechmapachojtiu tech namotakayo. Uan amo no [...] ma namechyoltanejnekiltij” (Rom. 6:12). Yejua ika moneki tikixpejpenaskej se taman: tikauaskej maj techyekana toamo kuali tanemililuan uan toamo kuali tanejnekilis, oso timoijkuaniliskej. Maj timotajtanikan: “¿Nikaua maj noamo kuali tanejnekilis nechuika maj nikchiua tein amo kuali? ¿Oso niman nikixtopeua?”. Komo yekmelauj tiktasojkamatij  iueyi teiknelilis Dios, timochikauaskej tikyolpaktiskej.

13. ¿Toni tein panok itech yekinika siglo techpaleuia maj tikneltokakan ke uelis tikchiuaskej tein kuali?

¹³ Maj tikitakan tein panok itech yekinika siglo tein techpaleuis maj tikneltokakan ke uelis tikchiuaskej tein kuali. Itech xolal Corinto, sekin tachtekiaj, motekayaj iniuan inintakaikniuan oso ininsiuaikniuan, auilnemiaj, kinueyichiuayaj tiotsitsin uan tauanayaj. Sayoj ke keman kiixmatkej Jiova, kitasojtakej uan mopatakej. Mopinaujmatkej ika tein kichiujkaj (Rom. 6:21; 1 Cor. 6:9-11). Tokniuan akin nemiaj Roma no monekik kipataskej seki taman kemej nejon. Pablo kiniluij: “Amo xiktemaktijtiyakan ok namotakayo tech in tajtakol para ke ma in tajtakol namechtekitiltijtiu tech in amokuali tachiualisme. Ta, namechilia kachi ok ximotemaktijtiyakan imako Totajtsin Dios para ke ijkon Dios namechtekitiltijtiyas ika ten kuali. Uan ijkon xikchiuakan namejuan ten nanyoltinemij iuan Cristo porin Dios namechpouak ke namechpankixtij ya nanyoltokke ya para xinentinemikan tech ne yek nemilis” (Rom. 6:13). Pablo senkis kineltokaya ke nejon tokniuan ueliskiaj kichiuaskej tein kuali uan ijkon kipiaskiaj iueyi teiknelilis Dios.

14, 15. ¿Toni netajtanilmej xa timochiuiliaj?

¹⁴ No ijkon panoua axkan. Seki tokniuan kichiuayaj kemej akin nenkej Corinto. Sayoj ke keman kiixmatkej Jiova, mopatakej uan kemej yeskia kinchipaujkej. Tinochin monekik tikpataskej seki taman uan ijkon ueliskia tikyolpaktiskej Jiova. Sayoj ke maj tiksentokakan tiknextikan ke tiktasojkamatij iueyi teiknelilis. ¿Keniuj uelis tikchiuaskej? Komo timochikauaj timoijkuaniliskej amo kuali tanejnekilis uan tiksentokaj tiktekitiliaj Jiova.

¹⁵ Sayoj ke moneki amo tikchiuaskej uejueyi tajtakolmej kemej akin nemiaj Corinto. Moneki amo tiksentokaskej tiueyitajtakoskej uan tikchiaskej maj Jiova technextili iueyi teiknelilis uan maj techtapojpolui. Sayoj ke xa timotajtaniskej: “¿Toni panoua ika tajtakolmej tein sekin kinemiliaj ke amo uejueyi? ¿Senkis tikixtalijtokej timochikauaskej nochipa tiktakamatiskej Jiova?” (Rom. 6:14, 17).

16. ¿Keniuj technextilia ineskayo Pablo ke no moneki tikixtopeuaskej tajtakolmej tein amo moijtouaj itech 1 Corintios 6:9-11?

¹⁶ Maj titanemilikan itech tatitanil Pablo. Yejua kijkuiloj: “Notalnamikilis momautok ika tajtakol uan nejua majya niteaxkatitok tech in tajtakol”. Uan ompa kijkuiloj: “Porin amo nikchiutinemi ne ten nikneki nikchiuas. Ta, nejua nikchiuati ne ten niktauelitstinemi” (Rom. 7:14, 15). Maski amo kichiujtoya tein moijtoua itech 1 Corintios 6:9-11, Pablo kijtoj ke maski ijkon no tajtakouaya. Kinekia kiyolpaktis Dios, yejua ika mochikauak kichiuas tein kuali (xikonixtajtolti Romanos 7:21-23). Moneki tikchiuaskej kemej yejua uan timochikauaskej tiktakamatiskej Jiova.

17. ¿Keyej akin tikchiuaj kemej Cristo amo titakajkayauaj?

 ¹⁷ Kemej neskayot, tikmatij ke komo tiknekij tiktekitiliskej Jiova moneki timonejnemiltiskej timelaujkej uan nochipa tikijtoskej tein melauak (xikonixtajtolti Proverbios 14:5 uan Efesios 4:25). Amo tiknekij tiyeskij kemej Satanás, “tetat den nochi nekes ten xolopijtijtinemij”. No tikelnamikij ke Ananías uan inamik momikilijkej porin takajkayaujkej. Yejua ika tejuan amo titakajkayauaj (Juan 8:44; Hech. 5:1-11). Sayoj ke timonejnemiltiskej timelaujkej amo sayoj kijtosneki ke amo titakajkayauaskej. Komo yekmelauj tiktasojkamatij iueyi teiknelilis Dios, timonejnemiltiskej timelaujkej itech okseki taman. Maj tikitakan toni.

18, 19. ¿Toni moneki amo tikchiuaskej tein ika tiknextiskej ke timonejnemiltiaj timelaujkej?

¹⁸ Komo tiknekij timonejnemiltiskej timelaujkej, amo sayoj amo titakajkayauaskej, ta no amo tikchiuaskej okseki taman. Kemej neskayot, Jiova kiniluij israelitas: “Moneki amo xitachtekikan, moneki amo xitakajkayauakan, uan moneki amo ximokajkayauakan”. ¿Keyej monekia amo kichiuaskej nejon? Porin Jiova kiniluij: “Moneki  nanyeskij nanyektikej, porin nejua, Jiova nanmoDios, niyektik” (Lev. 19:2, 11). Maski amo titakajkayauaskej, amo tiknextiskej ke timonejnemiltiaj timelaujkej komo tikchiuaj maj oksekin kineltokakan se taman tein amo melauak.

¹⁹ Kemej neskayot, maj tiknemilikan ke se takat kiluia iteko oso akin iniuan tekiti ke moneki niman kisas itech itekipan porin kiitati tapajtijkej. Sayoj ke nejon amo senkis melauak. Tein melauj, yejua youi paxaloti okseko uan kineki achto kisas. Sayoj moneki ijsiujka panos kampa kinamakaj pajti oso kitaxtauitiuj tapajtijkej. ¿Tikijtoskiaj ke nejon takat monejnemiltia melauak? ¿Oso tikijtoskiaj ke kitemoj takajkayauas? Nejin takat kichiuak maj oksekin kineltokanij se taman tein amo melauak. Kemansa, taltikpakneminij takajkayauaj porin kinekij kiseliskej teisa oso porin amo kinekij maj kintatsakuiltikan. Sayoj ke tejuan tiktakamatij Jiova, akin kijtoua: “Moneki amo xitakajkayauakan”. Tiknekij tikchiuaskej tein Dios kijtoua ke melauak uan yektik (Rom. 6:19).

20, 21. ¿Toni amo tikchiuaskej komo tiktasojkamatij iueyi teiknelilis Dios?

²⁰ Tejuan tikixtopeuaj auilnemilis, tauanalis uan okseki uejueyi tajtakolmej. Sayoj ke komo tiktasojkamatij iueyi teiknelilis Dios, no amo tikchiuaskej tein yeski taman tein amo kiyolpaktia. Kemej neskayot, amo sayoj amo tiauilnemij, ta no amo timoixpetaniaj ika tein pitsotik. Uan amo sayoj amo titauanaj, ta no amo titeltayij tayil tein teuintij. Xa techouijmakas amo tikchiuaskej nejin, sayoj ke uelis tikixtopeuaskej.

²¹ Maj timochikauakan tiktakamatiskej nejin tayolmajxitilis tein kitemakak Pablo: “Amo xiktakauilikan ok ne tajtakol ke ma namechmapachojtiu tech namotakayo. Uan amo no [...] ma namechyoltanejnekiltij” (Rom. 6:12; 7:18-20). Melauak ke amo ueli senkis tikixtopeuaj tajtakol. Sayoj ke keman timochikauaj amo tikchiuaskej nion se taman tajtakol tiknextiaj ke tiktasojkamatij ueyi teiknelilis tein Jiova uan Jesús technextiliaj.

22. ¿Toni panos komo tiktasojkamatij iueyi teiknelilis Dios?

²² Jiova techtapojpoluijya uan uelis kisentokas techtapojpoluis. Semi tiktasojkamatiliaj iueyi teiknelilis. Maj timochikauakan amo tikchiuaskej nochi tein Dios kijtoua ke amo kuali, maski oksekin kijtoskej ke amo tajtakol. ¿Toni panos komo tiktasojkamatij iueyi teiknelilis? Pablo kijtoua: “Axkan Dios namechtesekokaualtij ya de tajtakol para ma amo namechyekantinemi ok in tajtakol keme yeskia se patrón. Uan axkan nanpeuke namotekitiltijtinemij sayo para Dios. [...] Uan ijkon mosta mosta Totajtsin Dios kachi ok namechyolchipautiu. Uan ne chipaukanemilis kimajxitijtiu namopan ne yek nemilis ten amo keman tamis” (Rom. 6:22).