1. ¿Keniuj kiitaj miakej tekit?

¿KENIUJ kiitaj tekit kampa tinemij? Itech miak altepemej, taltikpakneminij semi tekitij. Yejua ika amo kipiajok tiempo moseuiskej, yetoskej iniuan ininchankauan nion no kitemoskej Dios (Ecl. 2:23). Sayoj ke, sekin amo kiuelitaj tekitiskej uan kitemouaj amo kichiuaskej (Prov. 26:13, 14).

2, 3. ¿Toni techmachtiaj Jiova uan Jesús?

² Kemej tikitaj, miakej semi tekitij uan oksekin amo semi. Sayoj ke, ¿keniuj kiitaj tekit Jiova uan Jesús? Tikmatij ke Jiova kiuelita tekitis, Jesús ijkon kinextij keman kijtoj: “Notajtsin tekititiuits hasta axkan uan Nejuatsin nitekititok axkan” (Juan 5:17). Jiova kinchijchiuak tel miak ángeles, sitalimej uan okseki taman ompa iluikak. Uan nikan taltikpak kichijchiuak miak taman tein semi kualtsin. Yejua ika se akin kijkuiloj Salmo kijtoj: “¡Tel miak motachiualisuan, Jiova! Ika tamatilis tikchijchiuak nochi. Taltikpak pexontok ika nochi tein tejua tikchijchiuak” (Sal. 104:24).

³ Jesús no kichiuak kemej iPopaj. Kipaleuij Dios keman tachijchiuak ompa iluikak uan yetoya iuan “kemej se tekitikej tein ixmach” (Prov. 8:27-31). Miak xiujmej satepan, keman Jesús moajsia nikan taltikpak no kichiuak se tel kuali tekit. Yejua kijtoj ke nejon tekit katka kemej itakual uan nochi tein kichiuak kinextij ke Dios kiualtitanka (Juan 4:34; 5:36; 14:10).

4. ¿Keniuj kinextia tein kichiuanij Jiova uan Jesús ke no monekis timoseuiskej?

 ⁴ Tein Jiova uan Jesús kichiuanij amo kinextia ke amo moneki timoseuiskej. Jiova amo keman sioui, yejua ika amo moneki moseuis kemej tejuan. Sayoj ke Biblia kijtoua ke satepan ke kichijchiuak iluikak uan taltikpak, amo tekitikok uan moseuij (Éx. 31:17). Nejin kijtosneki ke satepan ke tachijchiuak yolpakik ika itachijchiualis. Uan Jesús, keman yetoya nikan taltikpak semi tekitik, maski ijkon no kitemoj moseuis uan takuas iniuan itasojikniuan (Mat. 14:13; Luc. 7:34).

5. ¿Toni kinouijmaka miakej?

⁵ Biblia techiluia akin tiitekitikauan Dios maj titekitikan uan maj amo titatsiuikan (Prov. 15:19). Xa titekitij porin moneki tikintekipanoskej tochankauan. Uan tinochin moneki titanojnotsaskej. Sayoj ke, no moneki maj kuali timoseuikan. ¿Techouijmaka tikixejekoskej kanachi tiempo titekitiskej, titanojnotsaskej uan timoseuiskej? ¿Keniuj tikmatij kemanian titekitiskej uan kemanian timoseuiskej?

6. ¿Keniuj kinextia Marcos 6:30-34 ke Jesús kiitaya ke monekia se tekitis uan no se moseuis?

⁶ Semi moneki maj tikitakan tekit kemej moneki. Tekiuaj Salomón kijkuiloj ke “ixyetok tonal keman mochiuas teisa”, uan ika tajtoj seki taman kemej se tatokas, se kalchijchiuas, se chokas, se ueuetskas uan se mijtotis (Ecl. 3:1-8). Nejon kinextia ke semi moneki maj se tekiti uan maj se moseui. Jesús kiitaya kemej moneki nejon ome taman. Se tonal tatitanilmej tanojnotsatoj, keman mokepkej, “amo kemantiaj ok para takuaskiaj” uan Jesús kiniluij: “Xiualakan nouan namejuan namoseltij tech ne lugar kampa amo aka yetok uan ximoseuikan tepitsin” (xikonixtajtolti Marcos 6:30-34). Maski Jesús uan itatojtokakauan kinekiaj okachi moseuiskej amo ueliaj. Sayoj ke Jesús kimatia ke nochin yejuan monekia moseuiskej.

7. ¿Keniuj techpaleuis komo timomachtiaj tanauatil ika tonal sábado?

⁷ Kemansa, moneki maj se moseui oso maj se kipata tein se kichiua. Ijkon kinextia se tanauatil tein Jiova kimakak Moisés. Ompa kijtouaya ke israelitas amo monekia tekitiskej itech tonal sábado. Tejuan amo monekiok tiktakamatiskej, sayoj ke uelis techpaleuis komo timomachtiaj nejon tanauatil. Tein timomachtiskej techpaleuis maj tiknemilikan keniuj tikitaj titekitiskej uan timoseuiskej.

8. Kemej kijtoua Éxodo 31:12-15, ¿toni monekia kichiuaskej israelitas tonal sábado?

⁸ ITajtol Dios kijtoua ke itech chikuasen “tonal” Jiova kichijchiuak nochi tein onkak (Gén. 2:2). Sayoj ke, kemej Jiova kiuelita tekitis, kichiujtok okseki taman tekit (Juan 5:17). Jiova tekitik chikuasen tonal uan moseuij itech chikometika tonal uan kinnauatij israelitas maj no ijkuak moseuianij. Dios kijtoj ke tonal sábado kinextiaya ke israelitas katkaj iaxkauan. Nejon tonal monekia senkis moseuiskej uan sayoj kiueyichiuaskej Jiova (xikonixtajtolti Éxodo 31:12-15). Amo akin monekia tekitis, nion  konemej, nion takeualmej uan nion no monekia kintekitiltiskej inintapialuan (Éx. 20:10). Nejon kinpaleuiaya israelitas maj okachi kitayekanaltianij kiueyichiuaskej Dios.

9. ¿Toni kiixtalijkej itech itonaluan Jesús maj mochiua itech tonal sábado?

⁹ Tonal sábado kinpaleuiaya itekitikauan Dios. Sayoj ke, itech itonaluan Jesús miakej akin taixyekanayaj itech taneltokalis kiixtalijkej maj mochiua seki taman tein amo taixejekol nejon tonal. Kijtouayaj ke amo ueliskiaj kiuiuitaskej teisa tein kikuaskej nion no kipajtiskej se akin mokokouaya (Mar. 2:23-27; 3:2-5). Yejuan amo kiitayaj nejon tonal kemej Jiova kiitaya uan Jesús ijkon kinmatiltij akin kikakiaj.

10. Kemej kijtoua Mateo 12:9-12, ¿keniuj kiitaya Jesús tonal sábado?

¹⁰ Jesús uan itatojtokakauan, akin katkaj judíos, moseuiayaj itech tonal sábado porin kitakamatiaj Tanauatil tein Dios kimakak Moisés. * Ika tein Jesús kijtoj uan kichiuak kinextij ke nejon tonal ueliskiaj kinpaleuiskej oksekin. Kijtoj ke kuali yetoya maj mochiua “ten kuali tech in tonal de neseuilis” (xikonixtajtolti Mateo 12:9-12). Yejua amo kiitaya ke kitapanauiliayaj Tanauatil komo kichiuayaj tein kuali itech tonal sábado. Tein kichiuak kinextij keyej moixtalijka  maj amo se tekiti nejon tonal. Kemej israelitas amo tekitiaj, ueliaj kitayekanaltiayaj kiueyichiuaskej Dios. Ichankauan Jesús kiueyichiuayaj Dios itech tonal sábado, kemej kinextia tein kichiuak ompa Nazaret kampa kayot katka. Biblia kijtoua ke kemej ipa momattoya kichiuas “kalakik tech in tiopan de judíos, [...] moketsak uan peuak kinleerouilia in takakini in Tajtoltsin de Dios” (Luc. 4:15-19).

11. ¿Akoni kimachtij Jesús maj chikauak tekiti?

¹¹ Keman José kinextilij Jesús maj koujxijxima xa no kimachtij keniuj Dios kiitaya tekit (Mat. 13:55, 56). Uan Jesús xa kiitaya keniuj José mojmostaj chikauak tekitia uan ijkon kintekipanouaya ikalyetouanij. Yejua ika, satepan kiniluij imomachtijkauan: “Ten tekititinemi, yejua ne moneki kiselis ajsitok itaxtauil” (Luc. 10:7). Jesús kimatia toni kijtosneki se tekitis chikauak.

12. ¿Katiyejua textos kinextiaj ke moneki titekitiskej chikauak?

¹² Tatitanil Pablo no kimatia toni se tekitis chikauak. Kitayekanaltij kiteixmatiltis Jesús uan tein tamachtij. Sayoj ke no yejua motekipanouaya. Akin nemiaj Tesalónica kimatiaj ke chikauak tekitia uan ijkon amo akin ‘kikuejmoloskia ika tensa’ (2 Tes. 3:8; Hech. 20:34, 35). Pablo xa ika tajtojtoya tekit tein kichiuak ompa Corinto. Mokauak ichan Áquila uan Priscila uan iniuan tekitik porin yejuan kichijchiuayaj takenkalmej. Keman Pablo kijtoj ke tekitia youal uan tonal, amo kijtosnekik ke amo moseuiaya. Kemej neskayot, itech tonal sábado ika kinnojnotsaya Jesús akin katkaj judíos, akin amo no tekitiaj nejon tonal (Hech. 13:14-16, 42-44; 16:13; 18:1-4).

13. ¿Toni techmachtia ineskayo Pablo?

¹³ Tatitanil Pablo kikauak se kuali neskayot. Maski monekik tekitis, kitayekanaltij kiteixmatiltis iTajtol Dios (Rom. 15:16; 2 Cor. 11:23). Kinyolchikauak oksekin maj no ijkon kichiuanij. Yejua ika, Áquila uan Priscila okachi kipaleuijkej maj kiteixmatilti Cristo (Rom. 12:11; 16:3). Pablo kinyolmajxitij tokniuan akin nemiaj Corinto: “Xiksentokakan xitekititiyakan kachi ok tech ne tekitsin ten Totekotsin Cristo” (1 Cor. 15:58; 2 Cor. 9:8). Uan no kijtoj: “Nochi nekes ten amo kinekiske tekitiske, ma amo no takuakan” (2 Tes. 3:10).

14. ¿Toni kinekik kijtos Jesús itech Juan 14:12?

¹⁴ Tekit tein okachi moneki tikchiuaskej axkan yejua titanojnotsaskej uan tikinchiuaskej imomachtijkauan Cristo. Jesús kijtoj ke itatojtokakauan kichiuaskiaj okachi ueyi tekit (xikonixtajtolti Juan 14:12). Amo kijtosnekia ke kichiuaskiaj mouiskatekimej kemej yejua, ta ke okachi miakkan tanojnotsaskiaj uan tamachtiskiaj, kinojnotsaskiaj okachi taltikpakneminij uan kichiuaskiaj nejon tekit okachi xiujmej ke yejua.

15. ¿Toni moneki timotajtaniskej uan keyej?

¹⁵ Komo tikpiaj se tekit, maj timotajtanikan: “¿Nechixmatij ke kuali nitekiti? ¿Niktamia tekit keman ixyetok uan nimochikaua kuali nikchiuas?”. Komo tikijtouaj ke kemaj, xa akin tiktekitiliaj touan takuaujtamati uan totekitikaikniuan techkakiskej keman tikinnojnotsaskej ika Biblia. Uan no, keman titanojnotsaj uan titamachtiaj, maj timotajtanikan: “¿Kiitaj ke nimochikaua kuali nikchiuas?  ¿Kuali nimomachtia keniuj peuas nikinnojnotsas taltikpakneminij? ¿Oksepa nikinkalpanoua akin kinextiaj ke kinekij kimatiskej okachi? Uan ¿nitapaleuia kemej moixtalia motanojnotsas?”. Komo ijkon, xa techyolpaktia tikchiuaskej nejon tekit.

16. ¿Keniuj kiitaya Jesús uan tatitanilmej moseuiskej uan keniuj axkan miakej kiitaj?

¹⁶ Jesús kimatia ke yejua uan itatojtokakauan kemansa monekia moseuiskej. Sayoj ke ne uejkauj uan axkan miakej kichiuaj kemej se tominpixkej akin Jesús ika tajtoj. Nejin takat kijtouaya: “Xitakua uan ximoseui uan xitayi vino uan ximoyolpaktijtiu” (Luc. 12:19; 2 Tim. 3:4). Nejon takat kitayekanaltiaya moseuis uan moyolpaktis. Sayoj ke Jesús uan tatitanilmej amo kitayekanaltiayaj nejon.

17. ¿Toni tikchiuaj keman timoseuiaj?

¹⁷ Timochikauaj tikchiuaskej kemej Jesús porin keman amo titekitij amo sayoj timoseuiaj, ta titanojnotsatij uan tiyouij nechikolmej. Tikitaj ke semi moneki titanojnotsaskej uan timonechikoskej, yejua ika timochikauaj nochipa tikchiuaskej (Heb. 10:24, 25). Uan keman tipaxalotij kampa yeski, tiyouij nechikolmej uan tiktemouaj titajtoskej ika Biblia kampa yeski tiyetoskej (2 Tim. 4:2).

18. ¿Toni kineki maj tikchiuakan toTekiuaj Jesucristo?

¹⁸ Semi tiktasojkamatij maj toTekiuaj Jesucristo kiita ika taixejekolis se tekitis uan se moseuis uan maj techpaleui maj no ijkon tikitakan (Heb. 4:15). Kineki maj timoseuikan keman monekis. Uan no kineki maj chikauak titekitikan uan ijkon timoixpanoltiskej uan maj tikinpaleuikan oksekin maj no mochiuakan imomachtijkauan. Itech okse tamachtilis tikitaskej tein kichiuani Jesús uan ijkon techmakixtia.