1, 2. ¿Keyej tiitekitikauan Dios moneki timoyekpiaskej axkan? (Xikonita taixkopimej ipeujyan tamachtilis.)

MIAKEJ tapajtianij uan akin kinpaleuiaj kinpajtiaj akin kipiaj kokolismej tein temauaj. Kinpajtiaj porin kinekij kinpaleuiskej. Sayoj ke, komo amo kinekij maj kinmauakan, moneki moyekpiaskej. No ijkon, miakej tiitekitikauan Jiova tinemij uan titekitij iniuan akin itech inintanemilil uan inintachiualisuan amo kinextiaj ikualneskayouan Dios. Komo amo tiknekij maj techmauakan, moneki timoyekpiaskej.

² Itech nejin itamian tonalmej, taltikpakneminij amo kipoujkaitaj itanauatiluan Dios. Itech ojpatika amat tein tatitanil Pablo kijkuilouilij Timoteo, kimelauak keniuj yeskiaj akin amo kitasojtaj Dios. Okachi amo kuali monejnemiltiskiaj ijkon kemej okachi motokiskia tamilis (xikonixtajtolti 2 Timoteo 3:1-5, 13). Uan maski nejin tel amo techyolpaktia, uelis peuas titanemiliskej, titajtoskej uan tikchiuaskej kemej yejuan (Prov. 13:20). Yejua ika, itech nejin tamachtilis tikitaskej keniuj tel taman kemej monejnemiltiaj taltikpakneminij itech nejin itamian tonalmej uan itekitikauan Dios. No tikitaskej tein uelis techpaleuis maj amo techmaua inintanemilil keman tikinpaleuiskej oksekin maj kiixmatikan Dios.

3. ¿Akonimej ininka motajtoua itech 2 Timoteo 3:2-5?

 ³ Pablo kijkuiloj ke itamian tonalmej ouijkej yeskiaj. Satepan, kitekpanak 19 taman tein amo kuali tein motelitaskia itech totonaluan. Itech Romanos 1:29-31 no motekpana seki taman kemej nejon, sayoj ke itech amatajkuilol tein kijkuilouilijkej Timoteo kipia tajtolmej tein amo moijtouaj okseko itech Escrituras Griegas Cristianas. Itech nejon amatajkuilol Pablo peua kijtoua “nemiske in tagayot ijkuin”. Sayoj ke amo nochin ijkon monejnemiltiskiaj. Itekitikauan Dios semi tamamej yeskiaj (xikonixtajtolti Malaquías 3:18).

4. ¿Keniuj tamatij akin moueyinekij?

⁴ Satepan ke Pablo kijtoj ke miakej “motasojtatinemiske yejuan san” uan “xijxikuintinemiske ika tomin”, no kijtoj ke miakej moueyichiujtinemiskiaj uan moueyinektinemiskiaj uan ke kinemiliskiaj ke semi ueyichiuanimej. Yejuan moueyichiuaj porin uelij seki taman, kualtsin moitaj, tominpiaj oso kipiaj ueyi tanauatil, uan kinekij maj oksekin kinmoujkaitakan. Se tamatkej kijtoj nejin keman ika tajtoj akin moueyineki: “Itech iyolo moajsi se tsikitsin altar kampa yejua motankuaketsa iixpan”. Sekin kijtouaj ke ueyinekilis tel amo kualtsin uan hasta akin moueyinekij amo kinyolpaktia keman oksekin moueyinekij.

5. ¿Toni kinpanouani hasta seki itekitikauan Dios tatakamatinij?

⁵ Jiova kitauelita ueyinekilis. Biblia kijtoua ke kitauelita “ixtololomej tein moueyinekij” (Prov. 6:16, 17). Akin moueyineki mouejkatilia iuan (Sal. 10:4). Uan nejon se taman tein kinextia Amokuali (1 Tim. 3:6). Sayoj ke hasta seki itekitikauan Dios tatakamatinij no moueyinekinij. Semej yejua Uzías, akin tekiuajtik Judá. Yejua kitakamatik Dios miak xiujmej, sayoj ke Biblia kijtoua ke “niman keman kipiak chikaualis, iyolo moueyinekik uan ika moijtakoj, uan amo kitakamatik Jiova iDios porin kalakik itech itemplo Jiova kichichinoto kopal itech altar kampa mochichinoua kopal”. Miak xiujmej satepan, tekiuaj Ezequías no moueyinekik, sayoj ke sayoj seki tonalmej (2 Crón. 26:16; 32:25, 26).

6. 1) ¿Toni ueliskia kichiuas maj David moueyinekini? 2) ¿Toni kipaleuij maj nochipa kinextiani yolyemanilis?

⁶ Sekin peua moueyinekij porin kualtsin moitaj, kintelixmatij, ueli tatsotsonaj, chikaujkej oso porin oksekin kinmoujkaitaj. David ijkon katka, sayoj ke nochipa kinextij yolyemanilis. Kemej neskayot, keman kimiktij Goliat, tekiuaj Saúl kiluij ke ueliskia monamiktis iuan iichpoch. Sayoj ke David kinankilij: “¿Niakoni nejua uan akonimej nochankauan, ichankauan nopopaj itech xolal Israel, uan ijkon maj nimochiua imontikauj tekiuaj?” (1 Sam. 18:18). ¿Toni kipaleuij David maj nochipa kinextiani yolyemanilis? Kimatis ke kualneskayomej, tatiochiualismej uan miak taman tein uelia kichiuaya kiselijka porin Dios kinextijka yolyemanilis uan kipaleuij (Sal. 113:5-8). Yejua kiajsikamatia ke nochi tein kuali tein kipiaya Jiova kimakaka (no xikonita 1 Corintios 4:7).

7. ¿Toni techpaleuis maj tiyolyemankej?

⁷ Axkan, tiitekitikauan Jiova timochikauaj tiyeskij tiyolyemankej kemej David. Tikmoujkaitaj tikmatiskej ke Jiova yolyemanik maski yejuatsin akin okachi Ueyichiujkej (Sal. 18:35). Timochikauaj tiktakamatiskej nejin tajtolmej: “Ximoyankuikatalilikan ne teiknelilis uan ne tetasojtalis. Uan amo no ximoueyinektinemikan. Ta, xikpixtiyakan ne yolyemanilis uan no xikijyouikan nochi tataman ouijkayot” (Col. 3:12). Uan no, tikmatij ke  akin tetasojta “amo moueyinektinemi uan amo no moueyimatinemi” (1 Cor. 13:4). Uan tikelnamikij ke, ijkon kemej takamej akin amo itaixpantijkauan Jiova uelis motokiskej iuan porin ininnamik akin itekitikauj Dios kuali monejnemiltia, taltikpakneminij no kinekiskej kiixmatiskej Jiova komo kiitaj ke tiyolyemankej (1 Ped. 3:1).

8. 1) ¿Keniuj axkan kiitaj sekin maj amo se kintakamati se itatuan? 2) ¿Toni Biblia kinnauatia konemej?

⁸ Pablo no kijtoj keniuj teitaskiaj taltikpakneminij itech itamian tonalmej. Kemej neskayot, kijtoj ke konemej amo kintakamatiskiaj inintatuan. Axkan, amatajkuilolmej, películas uan tein panoua itech televisión kinextiaj nejon kemej se taman tein ipa mochiua uan ke kuali yetok. Sayoj ke tein melauj, amo se tatakamatis kichiua maj amo kuali se mouika kemej kalyetouanij, uan nejin kinijtakoua nochin taltikpakneminij. Nejin uejkaujya ipa moajsikamati. Kemej neskayot, ne uejkauj ompa Grecia, komo se takat kinteuiaya itatuan, kitamikuiliayaj nochi tein kipiaya uan tein ueliskia kiselis. Uan inintanauatil romanos kijtouaya ke se kiteuis se ipopaj moitaya kemej yeskia se kimiktiskia aksa. Itech Escrituras Hebreas uan itech Escrituras Griegas Cristianas kinnauatiaj konemej maj kinpoujkaitakan inintatuan (Éx. 20:12; Efes. 6:1-3).

9. ¿Toni kinpaleuis telpochmej maj kintakamatikan inintatuan?

⁹ ¿Toni kinpaleuis konemej maj kintakamatikan inintatuan maski oksekin amo kichiuaskej? Komo itech tanemiliaj tein inintatuan ininka kichiuanij. Uan no, komo kiajsikamatij ke Dios, toTajtsin tinochin, kineki maj titatakamatikan, motasojkamatiskej. Keman telpochmej kuali ininka tajtouaj inintatuan, kinpaleuiaj okseki telpochmej maj okachi kinpoujkaitakan inintatuan. Melauak ke komo tetatmej amo kintasojtaj ininkoneuan, xa ouij kinkisas kintakamatiskej. Sayoj ke komo kimachiliaj ke inintatuan yekmelauj kintasojtaj, kinekiskej kinyolpaktiskej maski kinekiskej amo kintakamatiskej. Austin, se tokniuj telpoch, kijtoua: “Miakpa niktelnekia nikchiuas teisa tein amo kuali, sayoj ke notatuan nechtaliliayaj tanauatilmej ika taixejekolis, nechmelauiliayaj keyej kitaliayaj uan nechkakiaj keman niknekia. Nochi nejin nechpaleuij maj nitatakamati. Nochipa nikitak ke noka motekipachouayaj, uan nejon kichiuak maj niknekini nikinyolpaktis”.

10, 11. 1) ¿Toni tein amo kuali kinextiaj akin amo kintasojtaj oksekin? 2) ¿Keniuj kinextiskiaj itekitikauan Dios ke kintasojtaj oksekin?

¹⁰ Pablo no kijtoj okseki taman tein amo kuali tein kinextia ke miakej amo kintasojtaj oksekin. Satepan ke kijtoj ke “amo kintakamatiske ok nintatuan”, kijtoj ke amo motasojkamatiskiaj, porin ijkon kichiuaj akin amo kipatiuitaj tein kuali tein oksekin ininka kichiuaj. Miakej no amo yeskiaj takuaujtamachmej uan amo kitemoskiaj kiyektaliskej kuejmolmej iniuan oksekin. Teuijuikaltiskiaj uan tenekepiliskiaj, porin kinijtouiliskiaj tein amo kuali taltikpakneminij, uan hasta Dios. Uan no tetakajkayauiliskiaj uan ika kitemoskiaj maj amo teyekitakanok. *

¹¹ Maski miakej amo tetasojtaj, akin kiueyichiuaj Jiova kinextiaj ke yekmelauj kintasojtaj oksekin. Nejin ipa ijkon mochiuani. Jesús kijtoj ke tanauatilmej tein okachi tayekantoyaj itech tanauatil tein kiselij Moisés yekinika katka maj se kitasojta Dios uan ojpatika maj se kintasojta oksekin  (Mat. 22:37-39). No kijtoj ke akin yekmelauj kichiuaj kemej Cristo kinixmatiskiaj porin motasojtaskiaj (xikonixtajtolti Juan 13:34, 35). Hasta kintasojtaskiaj akin kinixnamikij (Mat. 5:43, 44).

12. ¿Keniuj kinextij Jesús ke kintasojtaya oksekin?

¹² Jesús kinextij ke kinteltasojtaya taltikpakneminij. Kiteixmatiltijtinemik itech tataman xolalmej tein kuali tein kichiuas iTekiuajyo Dios. Kinpajtij akin amo tachiayaj, koxojmej, akin kipiayaj lepra uan akin amo uelia takakiaj, uan hasta kinajokuik mikemej (Luc. 7:22). Hasta ininka momikilij nochin taltikpakneminij, maski miakej kitauelitayaj. Senkis kinextij netasojtalis tein kinextia iPopaj. Axkan, itaixpantijkauan Jiova itech nochi taltikpak kichiuaj kemej Jesús uan kinextiaj ke kintasojtaj oksekin.

13. ¿Toni uelis panos komo tiknextiaj netasojtalis?

¹³ Netasojtalis tein tiknextiaj uelis kichiuas maj taltikpakneminij kinekikan kiixmatiskej toTajtsin. Kemej neskayot, se takat ompa Tailandia yajka se ueyi nechikol tein uejkaua eyi tonal uan kimoujkaitak maj tokniuan monextilianij netasojtalis. Keman mokepak ichan, tajtanik maj kimachtikan ika Biblia ojpa semana. Kinnojnotsak nochin ichankauan, uan sayoj chikuasen metsti satepan ke yajka ueyi nechikol yekinika kiixtajtoltij Biblia sentaixpan itech Kali kampa tiMosentiliaj. Komo tiknekij tikmatiskej ox tikintasojtaj oksekin, maj timotajtanikan: “¿Nimochikaua nikinpaleuis oksekin itech nochankauan, itech nechikol uan itech tanojnotsalis? ¿Nimochikaua nikinitas oksekin kemej Jiova kinita?”.

14, 15. 1) ¿Toni taman tein amo kuali kinextiaj miakej? 2) ¿Keniuj mopatanij sekin?

¹⁴ Itech itamian tonalmej, taltikpakneminij kinextiskiaj okseki taman tein amo kuali tein moneki tikixtopeuaskej. Kemej neskayot, miakej amo kitasojtaskiaj tein kuali. Itech okseki biblias moijtoua ke “kitauelitaskej tein kuali” oso ke “kiixnamikiskej nochi tein kuali”. Amo kimatiskiaj motsakuiliskej uan yeskiaj tamouililmej. Uan sekin amo kipataskiaj inintanemilil. Yejuan amo kinemiliaj  tein kichiuaj uan amo kintekipachoua keniuj taijtakos tein kichiuaskej.

¹⁵ Miakej akin katkaj kemej tapialmej kipatanij ininnemilis. Nejin se kualtsin taman tein moijtojka itech Biblia ke mochiuaskia (xikonixtajtolti Isaías 11:6, 7). Ompa tikixtajtoltiaj ke koujtajtapialmej kemej tepeitskuinti uan tekuani nemiskiaj ika yolseuilis iniuan tapialtsitsin kemej ichkat uan kuakuejkonet. Uan maj tikitakan ke nejon yolseuilis noyampa moitas, “porin itech taltikpak yekmelauj pexontos itaixmatilis Jiova” (Is. 11:9). Tapialmej amo ueli kiixmatij Jiova, yejua ika nejin tein moijtojka kiixnextia keniuj taltikpakneminij kipataskiaj ininnemilis.

16. ¿Keniuj Biblia kinpaleuiani sekin maj kipatakan ininnemilis?

¹⁶ Moajsij miakej akin achto katkaj tamouililmej kemej tepeitskuimej, sayoj ke axkan nemij ika yolseuilis iniuan oksekin. Uelis tikixtajtoltiskej ininneskayo sekin itech tamachtilis “ITajtol Dios kipatak ininnemilis”, tein ixnesi itech jw.org. Akin kiixmatij uan kitekitiliaj Jiova amo monejnemiltiaj kemej akin kijtouaj ke kimoujkatokaj Dios sayoj ke amo kinextiaj. Yejuan kijtouaj ke kiueyichiuaj Dios, sayoj ke amo kinextiaj ika inintachiualisuan. Seki itekitikauan Jiova akin katkaj tamouililmej kitakamatinij nejin tayolmajxitilis: “Ximotakentijtiyakan ika ne yankuikatalnamikilis ten Dios kitalij [...]. Uan ika ne yankuik talnamikilis xiknextijtiyakan ne chipaukanemilis ika nochi ne yolchipaualis” (Efes. 4:23, 24). Keman taltikpakneminij momachtiaj keniuj tamati Dios, kiajsikamatij ke moneki kitakamatiskej itanauatiluan. Nejin kinpaleuia maj kipatakan tein kineltokaj, kemej tanemiliaj uan tein kichiuaj. Ouij kinkisa mopataskej, sayoj ke yektikatsin espíritu kinpaleuia akin kinekij kiyolpaktiskej Dios.

17. ¿Toni techpaleuis maj amo tikchiuakan kemej akin amo kitekitiliaj Jiova?

¹⁷ Okachi moita ke semi tamamej akin kitekitiliaj Dios uan akin amo kitekitiliaj. Akin kemaj tiktekitiliaj moneki timoyekpiaskej maj amo tikchiuakan tein amo kuali tein kichiuaj akin amo kitekitiliaj. Tiknekij tiktakamatiskej Jiova keman techiluia maj amo timouikakan iniuan akin ininka motajtoua itech 2 Timoteo 3:2-5. Melauak ke amo ueli senkis amo tikinnotsaj, porin xa moneki iniuan titekitiskej, tiyaskej kaltamachtiloyan oso iniuan tinemiskej. Tein kemaj ueli tikchiuaj yejua amo titanemiliskej nion timonejnemiltiskej kemej yejuan. ¿Toni techpaleuis? Moneki tikchikauaskej tokuali uikalis iuan Jiova keman timomachtiaj Biblia uan timouikaj iniuan akin kitasojtaj.

18. ¿Keniuj kemej titajtouaj uan timonejnemiltiaj uelis kinpaleuis oksekin maj kiixmatikan Jiova?

¹⁸ No moneki timochikauaskej tikinpaleuiskej oksekin maj kiixmatikan Jiova. Maj tiktemokan tikinnojnotsaskej uan maj tiktajtanikan Jiova maj techpaleui maj tikijtokan tein moneki keman monekis. Maj tikiniluikan ke tiitaixpantijkauan Jiova. Ijkon, kemej kuali timonejnemiltiaj kuali ika motajtos Dios uan amo tejuan. Jiova techmachtiani maj “tiksekokautiyakan ne amokuali nemilis uan ma tikmajpeutiyakan ne tanejnekilisme ten ualeutok iuan in taltikpakuani [...,] ma tiyekchipaukanemikan ika ne kuali taixejekolis, uan ma tikpiakan ne yolmelaukanemilis uan ma tikmouistilijtiyakan Totajtsin Dios nikan taltikpak” (Tito 2:11-14). Komo tikchiuaj kemej Jiova uan tiktakamatij, taltikpakneminij techitaskej uan xa sekin hasta kijtoskej: “Tiknekij tiyaskej namouan, porin tikakinij ke Dios yetok namouan” (Zac. 8:23).