Jesús mochiuak Tayekankatiopixkat keman moauij, itech xiuit 29. ¿Keniuj tikmatij? Maj tikitakan. Keman moauij, Jesús kiixtalij kichiuas tein “kimonekiltij Totajtsin Dios”. Nejin kijtosneki ke kiixtalij kitemakas inemilis uan ika kinmakixtis taltikpakneminij (Gál. 1:4; Heb. 10:5-10). Tein “kimonekiltij Totajtsin Dios” kemej yeskia altar kampa kitemakayaj netemaktilmej itech templo. Keman Jesús kitemakak inemilis, kemej yeskia motemaktij itech nejon altar, tein peuak moajsi keman Jesús moauij. Templo yejua kemej Jiova kiixtalij maj tikueyichiuakan, tein uelik moixtalij porin Jesús kitemakak inemilis. Nejin templo xa no peuak moajsi keman Jesús moauij. Kemej altar semi monekia itech templo, tein ‘kimonekiltia Totajtsin Dios’ no semi moneki itech totaueyichiualis (Mat. 3:16, 17; Heb. 5:4-6).

Keman peuak moajsi templo, no monekia maj moajsi se tayekankatiopixkat. Yejua ika Jiova kiixpejpenak Jesús “ika in ichikaualis den [y]ektikatsin [e]spíritu” (Hech. 10:37, 38; Mar. 1:9-11). ¿Keniuj tikmatij ke Jiova kiixtalij Jesús kemej Tayekankatiopixkat achto ke momikiliskia uan oksepa nemiskia? Tikmatij nejon keman tikitaj ineskayo Aarón uan ininneskayo akin satepan no mochiujkej tayekankatiopixkamej.

Tanauatil tein kiselijka Moisés kijtouaya ke sayoj tayekankatiopixkat uelia kalakia kampa “Kachi Ueyi Tamouisyojkan” tein moajsia itech tabernáculo uan satepan itech templo. Se ueyi “tilma” kixelouaya kampa yetoya “Tamouisyojkan” uan kampa yetoya “Kachi Ueyi Tamouisyojkan”, uan tayekankatiopixkat sayoj kipanauiaya ueyi tilmaj itech tonal keman ixyetoya “kuika[s] esti para kinixtauilis nintajtakoluan den ne pueblojuani de Israel” (Heb. 9:1-3, 6, 7). Aarón uan akin satepan no mochiujkej tayekankatiopixkamej kinixpejpenkej achto ke kipanauiskiaj ueyi tilmaj tein moajsia itech tabernáculo. No ijkon, Jesús xa kiixtalijkej kemej Tayekankatiopixkat achto ke momikiliskia, uan satepan kipanauij ueyi tilmaj, oso inakayo, uan ijkon ueliskia nemis iluikak (Heb. 10:20, TNM). Yejua ika, tatitanil Pablo kijtoj ke “uala ya Cristo uan Yejuatsin Totayekankatiopixkau [...]. Uan ne itiopantsin de Dios kampa tekititinemi Cristo keme ueyi tiopixkatsin, ompa ya ne semi kachi kuali porin [...] amo matachijchiu de se tagat” uan moajsi “nepa eluiyaktsinko” (Heb. 9:11, 24).

Keman Jesús mokepak iluikak uan yajki iixpan Jiova kiixtauato totajtakoluan ika inemilis tein kitemakak, kichiuak se taman tein peuaskia tapaleuiskia maj yankuik netenkaualis kipiani chikaualis uan maj peuaskia motekitilti. Maj tikitakan eyi taman tein tapaleuij maj peua motekitilti yankuik netenkaualis.

Yekinika, Jesús yajki iixpan Jiova. Ojpatika, kimaktilij iTajtsin inemilis tein kitemakak. Uan expatika, Jiova kiselij inemilis kemej taxtauil. Satepan ke mochiuak nejin eyi taman peuakya motekitiltia yankuik netenkaualis.

Biblia amo kijtoua kemanian Jiova kiselij inemilis Jesús kemej taxtauil. Yejua ika, amo ueli senkis tikijtouaj kemanian peuak kipia chikaualis uan peuak motekitiltia yankuik netenkaualis. Sayoj ke kemaj tikmatij ke Jesús mokepak iluikak majtakti tonalmej achto ke mochiuaskia iluit tein moixmatia kemej Pentecostés (Hech. 1:3). Itech semej nejon tonalmej, Jesús yajki iixpan Jiova kimaktilito inemilis kemej taxtauil uan Jiova kiselij (Heb. 9:12). Itech Pentecostés, moitak ke Dios kiselijka inemilis Jesús (Hech. 2:1-4, 32, 33). Ijkuak senkis monextij ke yankuik netenkaualis peujkaya motekitiltia.

Maj tikijtokan nochi nejin ika amo miak tajtolmej: keman Jiova kiselij inemilis Jesús kemej taxtauil, yankuik netenkaualis peuak kipia chikaualis uan peuak motekitiltia ika inepaleuil Tayekankatiopixkat Jesús (Heb. 7:25; 8:1-3, 6; 9:13-15).