1. ¿Toni senkis tikneltokaj, uan keyej?

 KEMAN tikonita nochi tein mochiujtok itech taltikpak, xa tikonnemilia ke ouij yeski maj se tonal motayektali. Kalyetouanij amo motasojtajok, taltikpakneminij okachi tateuiaj uan sayoj inintech tanemiliaj, uan miakej ouij kinkisa inintech takuaujtamatiskej akin kinixyekanaj. Tein melauj, nochi nejin kichiua maj tikitakan ke amo uejkaua mochiuas tein kuali. ¿Keyej? Porin Biblia ipa kijtojkaya tein kichiuaskiaj taltikpakneminij itech “itamian tonalmej” (2 Timoteo 3:1-5, TNM). Nochin akin kiseliaj tein Biblia tamachtia, kineltokaj ke yekmelauj mochiujtokya tein moijtojka, uan ke Jesucristo taixyekantokya itech iTekiuajyo Dios. Onkak okseki taman tein no moijtojka ika nejin Tekiuajyot. Tikitaskej keniuj mochiujtok seki taman tein moijtojka, tein techpaleuia maj okachi titakuaujtamatikan iuan Jiova.

2. ¿Toni tikitaskej itech nejin tamachtilis, uan keniuj techpaleuis? (Ika xiontajto taixkopin tein nesi ipeujyan amaix).

² ¿Toni tikitaskej itech nejin tamachtilis? Yekinika, tikitaskej se taman tein achtook moijtojka tein techpaleuia maj tikmatikan kemanian peuak taixyekana iTekiuajyo Dios. Ojpatika, tikitaskej okse taman tein achtook moijtojka, tein techpaleuia maj tikajsikamatikan ke Jesús tekiuajtitokya itech iTekiuajyo Dios. Uan expatika, tikitaskej seki taman tein achtook moijtojka tein kinextia keniuj kinixpoloskej akin kiixnamikij iTekiuajyo Dios. Tikitstiaskej keniuj tein achtook moijtojka ke mochiuaskia kinamiki ika tein axkan mochiujtok, kemej yeskia keman se kisajsaloua se taixkopin tein tatetejtek. Nejin techpaleuis maj tikitakan itech katiyejua tonalmej tinentokej.

3. ¿Toni kiyeknextia Daniel 7:13, 14?

³ Tein achtook moijtojka itech Daniel 7:13, 14 kiyeknextia ke Jesucristo yejua akin okachi kuali taixyekanaskia itech iTekiuajyo Dios uan ke amo akin kiixpataskia. Kijtoua ke miakej akin seseko kayomej yolpakiskiaj kitekitiliskej. ¿Uan kemanian peuaskia taixyekanaskia Jesús? Okse taman tein moijtojka itech amatajkuilol Daniel, kinextia ke yeskia satepan ke panoskia chikome xiuit, ¿keniuj uelis tikmatiskej kemanian panok nejon? Maj tikitakan.

4. ¿Keniuj techpaleuia tein kijtoua Daniel 4:10-17 maj tikmatikan kemanian peuak taixyekana Jesús? (No xikonita nota).

⁴ (Xikonixtajtolti Daniel 4:10-17). “Chikome xiuit” kiixnextia 2,520 xiujmej. Nejin xiujmej peujkej mopouaj itech xiuit 607 achto ke ualaskia Cristo, keman babilonios kiajchiujkej tekiuaj akin Jiova kikaujka maj kemej yeskia motali itech itrono ompa Jerusalén. Nejin xiujmej tankej itech xiuit 1914, keman Jiova kichiuak maj Jesús peua taixyekana itech iTekiuajyo, porin yejua “akin senkis kinamiki” taixyekanas (Ezeq. 21:25-27). *

5. ¿Keniuj techpaleuia tikajsikamatiskej tein kijtosneki “chikome xiuit”?

⁵ ¿Keniuj techpaleuia nejin tein achtook moijtojka? Keman tikajsikamatij tein kijtosneki “chikome xiuit” techpaleuia maj titakuaujtamatikan ke Jiova kichiua tein motenkaua keman moneki. Jiova kiixtalijkaya kemanian peuaskia tekiuajtiskia Jesús, uan ijkon kichiuak keman ajsik nejon tonal. No ijkon, Jiova kichiuas tein motenkauak itech tonal tein kiixtalijtok, nejin kinextia ke itonal Jiova “amo motajkajtilis” (Hab. 2:3).

6. 1) ¿Toni kinextia ke Jesús taixyekantokya iluikak? 2) ¿Keniuj tein kijtoua Apocalipsis 6:2-8 no kinextia ke mochiuaskia nejon?

⁶ Tepitsin achto ke momikiliskia, Jesús kijtoj seki taman tein mochiuaskia, tein kinpaleuiskia itatojtokakauan maj kimatikan ke peujkaya taixyekana iluikak. Kemej neskayot, Jesús kijtoj ke onkaskia mayan, neteuilis uan taloliniskia. No kijtoj ke miakkan onkaskiaj tetsaujkakokolismej, ijkon kemej COVID-19. Itech Biblia kijtoua ke nochi nejin kinextiskia ke Cristo mokepakya (Mat. 24:3, 7; Luc. 21:7, 10, 11). Uan kemej 60 xiujmej satepan ke momikilij uan yajki iluikak, Jesús kiyekiluij tatitanil Juan ke panoskia nochi nejon (xikonixtajtolti Apocalipsis 6:2-8). Nochi nejin peuak mochiua itech xiuit 1914 keman Jesús peuak taixyekana itech iTekiuajyo Dios.

7. ¿Keyej keman Jesús peuak tekiuajti okachi motaouijkantalij nikan taltikpak?

⁷ ¿Keyej keman Jesús peuak tekiuajti okachi motaouijkantalij nikan taltikpak? Apocalipsis 6:2 kinextia ke Jesús moteuij iuan Satanás uan iamokuali ejekauan, uan nejon yejua yekinika taman tein kichiuak kemej Tekiuaj. Itech Apocalipsis capítulo 12 kijtoua ke Satanás tapoloj, yejua ika kiualpantamotkej nikan taltikpak iuan iamokuali ejekauan. Uan kemej semi kualantok kinchiuilia taltikpakneminij miak taman tein amo kuali. Yejua ika, Biblia kijtoua ke teikneltijkej akin nemij nikan taltikpak porin Satanás  kichiua miak taman tein amo kuali (Apoc. 12:7-12).

8. ¿Keniuj techpaleuia tikitaskej ke mochiujtokya tein achtook moijtojka keman ika motajtoua iTekiuajyo Dios?

⁸ ¿Keniuj techpaleuia nejin tein achtook moijtojka? Nochi tein mochiujtok itech taltikpak uan tein kichiuaj taltikpakneminij kinextia ke Jesús taixyekantokya. Yejua ika amo tikmoujkaitaj maj taltikpakneminij sayoj inintech tanemilikan uan maj okachi tetauelitakan, ta tikelnamikij ke nejon kinextia ke mochiujtokya tein Biblia achtook kijtojka. ¡Senkis moita ke iTekiuajyo Dios taixyekantokya! (Sal. 37:1). Uan no, tikchiaj maj okachi motaouijkantali porin amo uejkaua mochiuas Armagedón (Mar. 13:8; 2 Tim. 3:13). Kemej Jiova techtasojta techmatiltia keyej okachi motaouijkantalia. ¿Melauj ke uelis tiktasojkamatiliskej maj ijkon kichiua?

9. Kemej kijtoua Daniel 2:28, 31-35 ¿keniuj yeskia ueyi tekiuajyot tein nesiskia keman Jesús taixyekantoskia, uan kemanian nesik?

⁹ (Xikonixtajtolti Daniel 2:28, 31-35). Nejin mochiujtok axkan. Tekiuaj Nabucodonosor kikochitak tein panoskia itech “itamian tonalmej”, satepan ke Jesús taixyekantoskiaya. Yejua kikochitak se ueyi takat tamachijchiuj. Imetsuan chijchiujtoyaj ika tepos uan sokit, tein kiixnextiaya se ueyi tekiuajyot. Biblia kijtojka ke satepan amo nesiskiaok okse tein kiixnamikiskia Jesús. Nejin tekiuajyot nesik itech Yekinika Ueyi Neteuilis tein mochiuak itech nochi taltikpak keman Reino Unido uan Estados Unidos mosenpaleuijkej. Tein kikochitak Nabucodonosor kinextia ome taman keyej nejin ueyi tekiuajyot amo kemej okseki.

10. 1) ¿Keniuj kijtojka Daniel ke yeskia ueyi tekiuajyot Reino Unido uan Estados Unidos? 2) ¿Ika toni moneki timoyekpiaskej? (Xikonita recuadro “ ¡Xionmoyekpia ika tein kichiuaj taltikpakneminij tein kinixnextia sokit!”).

 ¹⁰ ¿Keyej ueyi tekiuajyot Reino Unido uan Estados Unidos amo kemej okseki tekiuajyomej tein moajsikej achto? Yekinika, porin okseki uejueyi tekiuajyomej moixnextiaj ika sayoj se taman tepos kemej plata oso oro. Sayoj ke nejin ueyi tekiuajyot moixnextia ika ome taman: tepos uan sokit. Sokit kinixnextia “taltikpakneminij” (Dan. 2:43). Yejuan amo kikauaj maj nejin ueyi tekiuajyot senkis kichiua tein kiixtalia porin moxexelouaj keman kinixtaliaj tekiuanij, takuejmolchiuaj keman teisa amo kiuelitaj uan kiixnamikij tekiuaj.

11. ¿Toni okse taman techpaleuia maj senkis tikneltokakan ke tinentokej itech itamian tonalmej?

¹¹ Ojpatika taman, nejin ueyi tekiuajyot Reino Unido uan Estados Unidos moixnextia ika imetsuan ueyi takat tamachijchiuj. Nejin kijtosneki ke kemej kijtojka Biblia, satepan amo nesisok okse ueyi tekiuajyot. Uan itech Armagedón Dios kiixpolos nejin uan okseki tekiuajyomej (Apoc. 16:13, 14, 16; 19:19, 20). *

12. ¿Toni okseki taman tein kijtojka Daniel kinextia ke tinemij itech itamian tonalmej, uan keniuj nejon techyolchikaua uan techpaleuia maj tikchiakan tein kuali?

¹² ¿Keniuj techpaleuia nejin tein achtook moijtojka? Tein achtook kijtojka Daniel kinextia ke tinemij itech itamian tonalmej. Panoua 2,500 xiujmej achto, kijtoj ke satepan ke ixpoliuiskia Babilonia nesiskiaj okseki naui uejueyi tekiuajyomej akin no taixyekanaskiaj kampa nemiskiaj itekitikauan Dios. No kijtoj ke ueyi tekiuajyot Reino Unido uan Estados Unidos nesiskia keman Cristo peuaskia taixyekanaskia. Nejin techyolchikaua uan techpaleuia maj tikchiakan tein kuali porin iTekiuajyo Dios kinixpolos nochi tekiuajyomej uan sayoj yejua taixyekanas itech taltikpak (Dan. 2:44).

13. Kemej kijtoua Apocalipsis 17:9-12, ¿akoni “chikueyi tayekanke” uan “majtakti tayekanani”, uan keniuj mochiuakya nejin tein achtook moijtojka?

¹³ (Xikonixtajtolti Apocalipsis 17:9-12). Yekinika Ueyi Neteuilis tein mochiuak itech nochi taltikpak semi taijtakoj, uan ijkon mochiuak okse taman tein moijtojka ke panoskia itech itamian tonalmej. Kemej tayekananij itech nochi taltikpak kinekiaj maj nochin yolseujtokan, itech metsti enero xiuit 1920 kiixtalijkej Sociedad de Naciones, sayoj ke itech metsti octubre xiuit 1945 kiixpatakej ika Naciones Unidas. Biblia kijtoua ke nejin yejua “chikueyi tayekanke”. Sayoj ke amo se ueyi tekiuajyot porin tekiuanij kipaleuiaj uan yejua ika kipia tanauatil. Biblia no kijtoua ke nejin tekiuanij yejuan “majtakti tayekanani”.

14, 15. 1) ¿Toni kijtoua Apocalipsis 17:3-5 de “Ueyi Babilonia”? 2) ¿Toni kinpanotok taneltokalismej tein amo melaujkej?

¹⁴ (Xikonixtajtolti Apocalipsis 17:3-5). Jiova kichiuak maj tatitanil Juan kiita se siuaauilnenkej tein monotsa “Ueyi Babilonia”. Nejin kinixnextia nochi taneltokalismej tein amo melaujkej, tein miak xiujmejya kinpaleuianij tekiuanij. Sayoj ke, amo uejkaua Jiova kinyoltanemililtis nejon tekiuanij maj kichiuakan tein yejuatsin kiixtalijtok. Nejon “majtakti tayekanani” oso tekiuajyomej kinixpoloskej nochin taneltokalismej tein amo melaujkej (Apoc. 17:1, 2, 16, 17).

 ¹⁵ ¿Keniuj tikmatij ke amo uejkaua ixpoliuis Ueyi Babilonia? Komo tikelnamikij keniuj katka xolal ne uejkauj techpaleuis maj tikmatikan. Nejin xolal kiyoualouaya ueyiat Éufrates uan nejon katka se taman tein kipaleuiaya. Apocalipsis kijtoua ke nochin millones akin kipaleuiaj Ueyi Babilonia kemej yeskiaj miak “ame” (Apoc. 17:15). Sayoj ke no kijtoua ke nejon amej uakiskiaj, tein kijtosneki ke miakej amo kinpaleuiskiajok taneltokalismej tein amo melaujkej (Apoc. 16:12). Nochi nejon mochiujtokya axkan porin miakej kikauanij inintaneltokalis uan kitemouaj okseko tein kinpaleuis maj kiixnamikikan ininkuejmoluan.

16. ¿Keniuj techpaleuia tikajsikamatiskej tein achtook moijtojka kampa ika motajtoua Naciones Unidas uan Ueyi Babilonia?

¹⁶ ¿Keniuj techpaleuia nejin tein achtook moijtojka? Tikmatij ke tinemij itamian tonalmej porin nesik Naciones Unidas uan porin amo miakejok kinpaleuiaj taneltokalismej tein amo melaujkej. Axkan, “ame” tein kipaleuiayaj Ueyi Babilonia uaktokejya, sayoj ke nejon amo kijtosneki  ke yejua tein kiixpolos. Kemej tikitakej, Jiova kichiuas maj “majtakti tayekanani” oso tekiuajyomej tein kipaleuiaj Naciones Unidas kichiuakan tein yejuatsin kiixtalijtok. Keman kinixpoloskej taneltokalismej tein amo melaujkej nochin kimoujkaitaskej (Apoc. 18:8-10). * Keman ixpoliuis Ueyi Babilonia, miakej momoujtiskej uan nejon kichiuas maj okachi motaouijkantali itech nochi taltikpak. Sayoj ke akin tiktekitiliaj Jiova, tiyolpaktoskej porin amo yetoskejok taneltokalismej tein amo melaujkej tein semi kiixnamikij Dios, uan no porin ejkotosya tonal keman timakisaskej (Luc. 21:28).

17, 18. 1) ¿Toni moneki tikchiuaskej tein techpaleuis maj okachi titakuaujtamatikan? 2) ¿Toni tikitaskej itech okse tamachtilis?

¹⁷ Daniel achtook kijtoj: “Momiakilis tein yekmelauj taixmatilis”. Nejon mochiujtokya porin kuali tikajsikamatijya tein achtook moijtojka ke mochiuaskia axkan (Dan. 12:4, 9, 10). Keman tikitaj ke yekmelauj mochiua tein achtook moijtojka kichiua maj okachi tikpoujkaitakan Jiova uan iTajtol (Is. 46:10; 55:11). Yejua ika, maj timochikauakan timomachtiskej Biblia uan maj tikinpaleuikan oksekin maj kuali mouikakan iuan Jiova, nejon techpaleuis maj okachi titakuaujtamatikan. Jiova kinyekpias akin senkis itech mopaleuiaj uan kichiuas maj yolseujtokan nochipaya (Is. 26:3).

¹⁸ Itech okse tamachtilis tikitaskej seki taman tein achtook moijtojka ke kichiuaskiaj itekitikauan Dios axkan. Tikitaskej ke senkis mouika ika okseki taman tein achtook moijtojka ke panoskia itech itamian tonalmej. Uan no, tikitaskej okseki taman tein no kinextia ke Jesús, akin tekiuajtitokya ne iluikak kinixyekantok itatojtokakauan.