1, 2. 1) ¿Toni moneki kiitaskej taltikpakneminij ke okachi tayekantok? 2) ¿Keyej motelneki?

MIAKEJ taltikpakneminij kiitaj ke okachi tayekantok tomin. Yejua ika, okachi kitemouaj motomintiskej oso amo kipoloskej tein kipiajya. Oksekin kiitaj ke okachi tayekantok ininchankauan, kuali moajsiskej oso tein kiixtalijtokej kiajsiskej.

² Sayoj ke moajsi se taman tein okachi tayekantok uan tein moneki amo keman tikelkauaskej: iueyitaixyekanalis Jiova. Komo amo timoyekpiaj, uelis techtapololtis tein tikchiuaj mojmostaj oso semi ika timotekipachoskej tokuejmoluan uan tikelkauaskej ke motelneki nejin. Sayoj ke, komo tikpaleuiaj iueyitaixyekanalis Jiova, okachi uelis tikixnamikiskej kuejmolmej tein tikpiaskej mojmostaj uan okachi kuali iuan timouikaskej.

3. ¿Toni kijtoua Satanás ika itaixyekanalis Dios?

³ Satanás kijtoj ke Jiova amo kinamiki taixyekanas. Kineki maj tiknemilikan ke amo kuali taixyekana, ke amo kineki maj tikpiakan tein okachi kuali uan ke tinochin okachi tiyolpakiskiaj  komo toselti timoixyekanaj (Gén. 3:1-5). No kiteajsikamatiltij ke nion se taltikpaknenkej kitakamati Dios ika nochi iyolo uan ke nochin kiixtopeuaskej itaixyekanalis komo kipanouaj uejueyi ouijkayomej (Job 2:4, 5). Yejua ika, Jiova kikaujtok maj panokan tonalmej uan ijkon senkis monextis ke se kiixnamikis itaixyekanalis kiualkui tein amo kuali.

4. ¿Keyej moneki monextis ke Dios kinamiki taixyekanas?

⁴ Jiova kimati ke tein kijtoua Satanás amo melauak. Komo ijkon, ¿keyej kikaujtok maj kinexti ox melauak tein kijtoj? Taltikpakneminij uan ángeles tapaleuiaj maj monexti ox melauak tein kijtoj (xikonixtajtolti Salmo 83:18). Adán uan Eva kiixtopeujkej itaixyekanalis Jiova, uan miakej no ijkon kichiuanij. Nejin uelis kichiuas maj sekin kinemilikan ke Satanás kijtouaya tein melauak. Kemej taltikpakneminij uan ángeles ayamo kiitaj maj momelaua nejin taman, itech taltikpak amo uelis onkas yekmelauj yolseuilis uan xexeliujtoskej. Sayoj ke satepan ke monextis ke Jiova kinamiki taixyekanas, tinochin techixyekanas nochipaya ika melaujkayot uan onkas yolseuilis itech iluikak uan taltikpak (Efes. 1:9, 10).

5. ¿Keniuj tikpaleuiaj iueyitaixyekanalis Jiova?

⁵ Monextis ke iueyitaixyekanalis Dios melauak uan ke itaixyekanalis Satanás uan taltikpakneminij amo kualtia, yejua ika ixpoliuiskej. Tatanis itaixyekanalis Dios itechkopa Tekiuajyot tein moajsi imako Mesías. Akin amo kikauaskej Dios kinextiskej ke taltikpaknenkej kemaj ueli senkis kipaleuia iueyitaixyekanalis (Is. 45:23, 24). ¿Tiknekij tiyeskij semej nejin itekitikauan Dios akin amo kikauaskej? Kemaj. Yejua ika, moneki tikelnamikiskej uan tikajsikamatiskej keyej motelneki monextis ke Dios kinamiki taixyekanas.

6. ¿Motelneki maj monexti ke Jiova kinamiki taixyekanas? Xikonmelaua.

⁶ Monextis ke Jiova kinamiki taixyekanas okachi tayekantok ke tiktemoskej tiyolpakiskej. Nejin amo kijtosneki ke tonemakixtilis amo motelneki oso ke Jiova amo toka motekipachoua. ¿Keniuj tikmatij?

7, 8. ¿Keniuj techpaleuia maj Jiova kichiua tein motenkaua?

⁷ Jiova semi techpatiuita. Kemej semi techtasojta, hasta kitemakak iKonetsin maj techmakixtiki uan ijkon uelis tinemiskej nochipaya (Juan 3:16; 1 Juan 4:9). Komo Jiova amo kichiuaskia tein motenkaua, Satanás kemaj ueliskia kijtos ke Dios takajkayaua uan ke amo kuali taixyekana porin amo kinmaka tein kuali taltikpakneminij. No kinextiskia ke melauak tein kijtouaj akin kiixnamikij, akin kikejkelouaj uan tajtanij: “‘¿Keye amo mochiua ya ijkon keme Cristo motenkauak touan de ke oksepa moualuikas?ʼ [...] ‘Touejkautatuan momikilijke ya uan desde ne tonal hasta axkan amo teyi tikitaj ten yankuik. Uan kachi no ijkon san desde ne tonalme kuak tsinpeuak in taltikpak’” (2 Ped. 3:3, 4). Yejua ika, Jiova kiitas maj ika ininnemakixtilis taltikpakneminij no monexti ke kinamiki taixyekanas (xikonixtajtolti Hebreos 6:17, 18). Uan no, Jiova taixyekana ika netasojtalis. Yejua ika uelis tikyekmatiskej ke nochipa kintasojtas uan kinpatiuitas itekitikauan akin amo kikauaj (Éx. 34:6).

 ⁸ Tikitaskej ke okachi tayekantok iueyitaixyekanalis Jiova amo kijtosneki ke tonemakixtilis amo motelneki oso ke Dios amo semi techpatiuita. Yejuatsin semi toka motekipachoua. Sayoj ke moneki tikelnamikiskej toni okachi tayekantok uan senkis tikpaleuiskej iueyitaixyekanalis.

9. ¿Toni Satanás kijtouilij Job? (Xikonita taixkopin ipeujyan tamachtilis.)

⁹ Amatajkuilol Job, semej amatajkuilolmej tein yekinika moijkuiloj tein poui itech Biblia, senkis kinextia ke motelneki maj tikitakan ke tayekantok iueyitaixyekanalis Jiova. Ompa tikixtajtoltiaj ke Satanás kijtoj ke Job kiixnamikiskia Dios komo tel tajyouiaya. Kiluij Jiova maj yejuatsin kitajyouiltiani. Dios amo kichiuak, maski kemaj kikauak Satanás maj kitajyouiltiani. Yejuatsin kiluij: “Momako yetok nochi tein kipia” (xikonixtajtolti Job 1:7-12). Itech amo miak tonalmej, Job kipoloj nochi tein kipiaya, momikilijkej itekitikauan uan no nochin majtakti ikoneuan. Satanás kichiuak maj moitani ke katka itajtakol Dios maj tajyouiani (Job 1:13-19). Satepan kichiuak maj Job kipiani se kokolis tein kiteltajyouiltiaya uan tein tetajyaltij (Job 2:7). Uan amo sayoj nejon, ta inamik uan eyi takamej akin kijtouayaj ke katkaj itasojikniuan kichiujkej maj okachi amo kuali momachiliani (Job 2:9; 3:11; 16:2).

10. 1) ¿Keniuj kinextij Job ke amo kikauaya Dios? 2) ¿Toni nepolol kipiak?

¹⁰ ¿Melauak tein kijtouaya Satanás? Amo, porin Job amo kikauak Dios (Job 27:5). Maski ijkon, itech seki tonalmej kielkauak tein okachi tayekantok. Kitayekanaltij kinextis ke amo kichiujka tein amo kuali uan hasta kinemilij ke kinamikia maj kimelauilianij keyej tajyouijtoya (Job 7:20; 13:24). Xa tiknemiliskej ke kemej tel tajyouijkaya, taixejekol maj ijkon momachiliani. Sayoj ke Dios kiitak ke monekia kimelauas. ¿Toni kiluij?

11, 12. 1) ¿Toni kiajsikamatik Job ika inepaleuil Jiova? 2) ¿Keniuj tanankilij Job?

¹¹ Tein Jiova kiluij Job tikajsij itech amatajkuilol Job capítulos 38 hasta 41. Sayoj ke itech nion se tajkuilol tikixtajtoltiaj maj kimelauiliani keyej tajyouijtoya, kemej yeskia motenpaleuijtoskia. Yejuatsin kinekia kipaleuis maj kiajsikamatini ke Job semi amo ueyi katka iixpan uan maj kiitani ke onkak okseki taman tein okachi tayekantok  (xikonixtajtolti Job 38:18-21). Itajtoluan Jiova kipaleuijkej Job maj kipatani kemej tanemiliaya.

¹² ¿Kinextij Jiova ke amo kitasojtaya Job keman ijkon kinojnotsak satepan ke tel tajyouijkaya? Amo, uan Job amo no kinemilij nejon. Job kiajsikamatik uan kitasojkamatik tein Jiova kiyolmajxitij uan ika kiyolseuij. Hasta kijtoj: “Maj amo teyi nikijtouani, uan nimoyolnonotsa ika talnex uan koujnex” (Job 42:1-6). Achto, se telpoch akin monotsaya Elihú no kipaleuij maj kipata kemej tanemiliaya (Job 32:5-10). Jiova kiitak ke Job kipatak itanemilil uan kijtoj ke semi kiyolpaktiaya porin amo kikauak (Job 42:7, 8).

13. ¿Keniuj kisentokak kipaleuij Job tein Jiova kiluijka satepan ke tamik itajyouilis?

¹³ Tein Jiova kiluijka Job kisentokak kipaleuij hasta satepan ke tamik itajyouilis. Jiova “okachiok kitiochiuak inemilis Job satepan ke ipeujyan”. Satepan, “kinpiakok chikome telpochmej uan eyi ichpochmej” (Job 42:12-14). Maski kintasojtaya nejin ikoneuan, xa kintelelnamikiaok ikoneuan akin momikilijkaj. Uan xa seki tonalmej amo kielkauaya nochi tein kijyouijka. Hasta komo kiajsikamatik keyej tajyouij, xa kemansa motajtaniaya keyej Dios kikaujka maj tel tajyoui. Maski kinemiliskia nejon oso amo, uelia tanemiliaya itech tein Dios kiluijka. Nejon kipaleuij maj kipia se kuali tanemilil uan kiyolseuij (Sal. 94:19).

14. ¿Toni techmachtia tein kipanok Job?

¹⁴ Tein Job kipanok uelis techpaleuis maj tikpiakan se kuali tanemilil uan techyolseuis. Jiova kichiuak maj moijkuilo amatajkuilol Job “para tejuan ika timomachtiske kachi ok. Ika ya nojon tikpiaske kachi ok takuautamatilis iuan Dios porin ompa tikajsij de keniu titaxikojtiyaske ika ne tajyouilis uan no tikajsij de keniu timoyoltalijtiyaske” (Rom. 15:4). Nejin techmachtia ke moneki amo semi itech titanemiliskej tein techpanoua porin uelis tikelkauaskej iueyitaixyekanalis Jiova. Uan maj tikelnamikikan ke tiknextiaj ke tikpaleuiaj itaixyekanalis Dios keman amo tikauaj hasta ijkuak tikpanouaj uejueyi ouijkayomej, ijkon kemej Job.

15. ¿Keniuj techpaleuia komo amo tikauaj Dios keman tikpanouaj ouijkayomej?

¹⁵ Tein kipanok Job uelis techyolseuis porin kinextia ke tein tikpanouaj amo kijtosneki ke Dios touan kualantok, ta ika nejon ueli tiknextiaj ke tiknekij maj yejuatsin techixyekana (Prov. 27:11). Komo titaxikouaj, tikseliskej  itatiochiualis Jiova uan techpaleuis maj okachi titakuaujtamatikan ke mochiuas tein tikchiaj (xikonixtajtolti Romanos 5:3-5). Tein kipanok Job kinextia ke Jiova “semi teyoliknelia uan teyoltasojta” (Sant. 5:11). Yejua ika uelis tikyekmatiskej ke yejuatsin kintatiochiuis nochin akin kipaleuiaj iueyitaixyekanalis. Tikmatiskej nejin techpaleuia maj tikxikokan nochi ouijkayomej ika yolpakilis uan maj amo tiyolijsiuikan (Col. 1:11).

16. ¿Keyej motelneki maj tikelnamikikan ke tayekantok iueyi taixyekanalis Jiova?

¹⁶ Melauak ke uelis ouij yeski tikelnamikiskej ke tayekantok iueyitaixyekanalis Jiova keman tikpanouaj ouijkayomej. Hasta komo tikpiaj ouijkayomej tein amo uejueyi uelis tikitaskej ke uejueyi komo nochipa itech titanemilijtokej. Yejua ika, moneki nochipa tikelnamikiskej ke motelneki tikpaleuiskej iueyitaixyekanalis Jiova keman tikpanouaj ouijkayomej.

17. ¿Keyej komo nochipa se kichiua itekiyo Jiova techpaleuia maj tikelnamikikan iueyitaixyekanalis Dios?

¹⁷ Komo nochipa tikchiujtokej itekiyo Jiova uelis techpaleuis maj tikelnamikikan iueyitaixyekanalis Dios. Kemej neskayot, se tokniuj siuat kipiak derrame cerebral, nochipa kitelkokouaya inakayo uan no kipiaya cáncer. Keman yaya tapajtiloyan, kinnojnotsaya akin ompa tekitij, oksekin akin no mokokouayaj uan akin kikalpanouayaj. Keman ompa moajsik ome semana uan tajko tanojnotsak ochenta horas. Nochipa kielnamikik iueyitaixyekanalis Jiova hasta keman yaya momikiliti. Nejon kipaleuij maj amo okachi itech tanemili itajyouilis.

18. ¿Toni techmachtia tein kipanok se tokniuj keman se kipaleuia iueyitaixyekanalis Jiova?

¹⁸ No uelis tikpaleuiskej iueyitaixyekanalis Jiova keman tikpiaskej ouijkayomej tein amo uejueyi uan tein mojmostaj tikpanouaj. Se tokniuj akin motokaytia Jennifer moajsik eyi tonal kampa kisaj aviones porin kichixtoya maj kisani se avión tein kiuikaskia ixolal. Sejse avión tein yaya kisati amo kisaya. Kemej momachiliaya iselti uan sioujtoya, ueliskia peuas motayokoltis. Sayoj ke amo panok nejon, ta kitajtanij Jiova maj kipaleuiani maj kinmatilti kuali tanauatilmej oksekin akin no ompa mochixtoyaj. Jennifer kinnojnotsak miakej uan kinkauilij miak amaixmej. Yejua kijtoua: “Maski katka se ouijkayot, nikmachilij ke Jiova nechtatiochiuij uan nechmakak chikaualis tein nechpaleuij maj nikueyitali itokay”.

19. ¿Toni kinixnextia akin yekmelauj itekitikauan Dios?

¹⁹ Sayoj akin pouij itech ixolal Jiova kiajsikamatinij ke iueyitaixyekanalis Jiova motelneki. Nejon kinixnextia kemej akin yekmelauj itekitikauan. Yejua ika tisejsemej moneki tiksentokaskej tikchiuaskej tein kinextis ke tikpaleuiaj iueyitaixyekanalis Jiova.

20. ¿Keniuj kiita Jiova keman tikpaleuiaj iueyitaixyekanalis?

²⁰ Jiova semi kipatiuita maj tikpaleuikan iueyitaixyekanalis keman titaxikouaj uan amo tikauaj (Sal. 18:25). Itech okse tamachtilis, tikmelauaskej keyej moneki senkis tikpaleuiskej iueyitaixyekanalis Jiova uan keniuj uelis tikchiuaskej.