TINOCHIN tikmatij ke Jiova kinixyekana itekitikauan uan kinmaka tein kinpaleuia maj kisentokakan kuali mouikakan iuan itech nejin itamian tonalmej (2 Tim. 3:1). Sayoj ke moneki tiktakamatiskej. Tejuan timoajsij kemej moajsiaj israelitas akin nemiaj taluakyan. Yejuan monekia tatakamatiskej keman kakistiaj trompetas.

Jiova kiluij Moisés: “Ximochijchiuili ome trompetas ika plata tein tikyektalijtiyas ika martillo uan ika xikmatilti xolal ke moneki mosentilis uan ke moneki kiajokuis takenkalmej” (Núm. 10:2). Tiopixkamej monekia tataman kipitsaskej trompetas uan ijkon israelitas kimatiskiaj toni monekia kichiuaskej (Núm. 10:3-8). Axkan, tiitekitikauan Dios no tataman kemej techmatiltiaj tein moneki tikchiuaskej. Maj tikitakan eyi taman tein kemej yeskia keman kipitsayaj trompetas ne uejkauj: keman techyoleuaj uejueyi nechikolmej, keman kinyoleuaj tayekananij maj kiselikan tamachtilis uan keman mopata seki taman itech nechikol.

Keman Jiova kinekia maj “nochi xolal” mosentiliani ikalakyan tabernáculo tein moajsia kampa ika kisa Tonaltsin, tiopixkamej kipitsayaj nochi ome trompetas (Núm. 10:3). Nochin uejueyi kalyetouanij tein naujkan xejxeliujtoyaj uan kiyoualojtoyaj tabernáculo kikakiaj trompetas. Xa israelitas akin inintakenkal yetoya kampa ika ikalakyan tabernáculo niman ajsiaj. Sayoj ke akin uejka yetoyaj xa okachi uejkauayaj uan monekia okachi mochikauaskej. Maski uejka moajsiaj oso amo, Jiova kinekia maj nochin mosentilianij uan maj kikakinij itanauatiluan.

Itech nejin tonalmej, no techyoleuaj maj tiyakan uejueyi nechikolmej. Sayoj ke amo itech se tabernáculo, ta itech uejueyi nechikolmej tein uejkauaj eyi tonal uan okseki nechikolmej kampa tikseliaj tamachtilis uan techmatiltiaj tein moneki tikchiuaskej. Itech nochi taltikpak, itekitikauan Dios akin tatakamatij uan youij nejin uejueyi nechikolmej kikakij sayoj se taman tamachtilis kemej se xolal tein yolpaki. Sekin ompakauin nemij, sayoj ke oksekin uejka ualeuaj. Maski ijkon, nochin akin youij kimatij ke semi kinpaleuis.

¿Ueli kiseliaj nejon tamachtilis tokniuan akin semi uejka monechikouaj? Teposmej tein axkan motekitiltiaj semi tapaleuiaj, porin miakej ueli kiitaj nejon uejueyi nechikolmej uan hasta kimachiliaj ke ompa moajsij. Kemej neskayot, keman semej tokniuan akin takalpanoua itech kalmej Betel, takalpanoto Betel tein moajsi Benín, nechikol tein mochiuak no kiitakej tokniuan akin nemij Arlit (Níger), se xolalkonet tein moajsi itech taluakyan tein moixmati kemej Sahara. Mosentilijkej 21, sekin katkaj tokniuan uan oksekin yankuixtok peujkaj momachtiaj. Maski semi uejka moajsiaj, kimachilijkej  ke iniuan yetoyaj 44,131 akin kiitakej nejon ueyi nechikol. Se tokniuj takat kijkuiloj: “Tiknekij tamechtasojkamatiliskej porin uelik tikitakej nejin nechikol. Nejin oksepa techmatiltiani ke semi nantechtasojtaj”.

Keman tiopixkamej kipitsayaj sayoj se trompeta, sayoj uejueyi taixyekananij monekia mosentiliskej itech tabernáculo (Núm. 10:4). Ompa Moisés kinmachtiaya uan kinmatiltiaya tein monekia kichiuaskej. Nejin kinpaleuiaya maj kuali kichiuanij tekit tein kipiayaj itech uejueyi kalyetouanij tein kinixyekanayaj. Komo tiyeskiaj semej nejon taixyekananij, ¿melauj ke timochikauaskiaj ompa tiyetoskej uan tikseliskej nejon tamachtilis?

Axkan, tokniuan tayekananij amo uejueyi taixyekananij itech nechikol nion kichiuaj maj tokniuan kimachilikan ke yejuan inintekouan (1 Ped. 5:1-3). Sayoj ke kemaj mochikauaj kuali kinyekpiaskej tokniuan. Yejua ika, keman kinyoleuaj maj kiselikan okachi tamachtilis, kemej tein motemaka itech Tamachtilis tein kiseliaj Tayekananij uan Tapaleuianij, kiseliaj tayoleualis ika pakilis. Nejin kinpaleuia maj okachi kuali kichiuakan tekimej tein kipiaj itech nechikol. Tamachtilis tein kiseliaj tapaleuia maj tayekananij uan okseki tokniuan itech nechikol uelikan okachi motokikan iuan Jiova. Hasta komo amo tikselianij semej nejin tamachtilismej, uelis techpaleuis tein tayekananij kinmachtianij.

Kemansa, tiopixkamej miakpa kipitsayaj trompetas uan amo uejkauayaj. Ijkon kinmatiltiayaj israelitas ke Jiova kinekia maj kiajokuinij takenkalmej uan maj yanij (Núm. 10:5, 6). Maski kuali ixyetoya keniuj kichiuaskej, no monekia semi mochikauaskej. Uan kemansa sekin xa ouij kinkisaya tatakamatiskej. ¿Keyej?

Xa sekin kinemiliayaj ke tiopixkamej aachka kipitsayaj trompetas uan keman amo kichixtoyaj. Biblia kijtoua ke kemansa “mixti motsakuiliaya sayoj se youal” uan ke kemansa uejkauaya “ome tonal, se metsti oso okachi” (Núm. 9:21, 22). ¿Uan kanachpa monekik kiajokuiskej inintakenkaluan uan yaskej okseko? Números capítulo 33 ika tajtoua kemej cuarenta talmej kampa israelitas kitalijkaj inintakenkaluan.

Xa kemansa seki israelitas kiajsiaj kampa tayekauilaj uan ompa kitaliayaj inintakenkaluan, se taman tein semi kualtsin katka porin moajsiaj itech “taluakyan tein semi ueyi uan tamouilil” (Deut. 1:19). Yejua ika xa kinemiliayaj ke komo yayaj okseko amo kiajsiskiajok kampa okachi kuali yetoskiaj.

Keman tiopixkamej kipitsayaj trompetas uan amo uejkauayaj, nochin uejueyi kalyetouanij kikakiaj, sayoj ke amo nochin senkisayaj. Seki israelitas monekia mochiaskej hasta keman yejuan monekiskia kisaskej. Keman tiopixkamej yekinika kipitsayaj trompetas kinextiaya ke uejueyi kalyetouanij tein moajsiaj kampa ika kisa tonaltsin monekia yaskej. Nejin katkaj Judá, Isacar uan Zabulón (Núm. 2:3-7; 10:5, 6). Satepan ke tamikisayaj, tiopixkamej oksepa kipitsayaj trompetas uan ijkon kinextiayaj ke monekia kisaskej okseki eyi uejueyi kalyetouanij tein moajsiaj kampa ika sur. Uan ijkon kisentokayaj kichiuayaj hasta keman nochin uejueyi kalyetouanij tamiyayaj.

Xa ouij techkisak titatakamatiskej keman mopatak teisa itech nechikol. Xa tiknemilijkej ke mopata miak taman. Oso xa tikuelitayaj kemej mochiuaya seki taman uan amo tiknekiaj maj mopata. Xa ouij techkisak amo tiyolijsiuiskej uan timomatiskej. Sayoj ke tikmatij ke moneki tikchiuaskej. Komo timochikauaj titatakamatiskej, tikitaskej keniuj Dios techtatiochiuia.

Itech itonaluan Moisés, Jiova kinixyekanak millones takamej, siuamej uan konemej itech taluakyan. Komo yejuatsin amo kinyekpiaskia nion kinixyekanaskia ueliskia momikiliskej. Itech nejin itamian tonalmej kampa mochiujtok miak taman tein amo kuali, Jiova no techixyekana uan techpaleuia maj tiksentokakan kuali timouikakan iuan uan maj chikauak totakuaujtamatilis. Yejua ika, maj timochikauakan titatakamatiskej ijkon kemej kichiujkej israelitas keman kikakiaj ke tiopixkamej kipitsayaj trompetas.