1. ¿Keyej Jiova kijtoj ke yejuatsin kemej yeskia se temomaj?

ITECH itonaluan tanauatijkej Isaías, Jiova kiluij ixolal: “¿Uelis se siuat kielkauas ikonetsin [...]? Maski nejin siuamej kielkauaskiaj, nejua amo keman nimitselkauaskia” (Is. 49:15). Amo miakpa Jiova kijtoua ke yejuatsin kemej yeskia se temomaj. Sayoj ke nikan, ika tajtoj netasojtalis tein se temomaj kipialia ikonetsin uan ijkon kinextij ke semi kintasojta itekitikauan. Miakej siuamej akin kipiaj ininkoneuan no tanemiliaj kemej Jasmín, se tokniuj siuat akin kijtoj ke keman se kipia se konetsin, peua se mopialia iuan se netasojtalis tein uejkaua nochipaya.

2. ¿Keniuj momachilia Jiova keman semej ikoneuan amo tanojnotsaok nion monechikouaok?

² Jiova kiita keman semej ikoneuan amo tanojnotsaok nion monechikouaok. Yejua ika, ueli tiknemiliaj ke semi kiyolkokoua kiitas ke xijxiujtika miakej itekitikauan amo tanojnotsajok nion monechikouajok. *

3. ¿Toni kineki Jiova?

³ Miakej nejin tokniuan akin tikintasojtaj mokepaj itech nechikol, uan kuali tikinseliaj. Jiova kineki maj mokepakan, uan tejuan no (1 Ped. 2:25). ¿Keniuj uelis tikinpaleuiskej? Achto ke tiknankiliskej nejin netajtanil, moneki tikmatiskej keyej sekin amo monechikouajok nion tanojnotsajok.

4. ¿Toni uelis kinpanos sekin akin peua semi tekitij?

⁴ Sekin peua semi tekitij. Se tokniuj akin monotsa Hung, * akin nemi Asia, kijtoua: “Peuak semi nitekiti. Niknemilij ke komo okachi niktania tomin ueliskia okachi niktekitilis Jiova. Yejua ika peuak nitekiti okachi horas uan peuak okachi nitapoloua nechikolmej. Uan satepan senkis amo niyajkiok nechikolmej. Satanás kikui tein onkak itech taltikpak uan ijkon kichiua maj taltikpakneminij yolik kikaujtiyakan Dios”.

5. ¿Toni kipanok se tokniuj siuat porin kipiaya miak kuejmolmej?

⁵ Okseki tokniuan kipanouaj miak kuejmolmej tein semi kintekipachoua. Maj tikitakan tein kipanok Anne, akin kayot Gran Bretaña uan kipia makuil ikoneuan. Yejua kijtoua: “Semej nokoneuan yolik ika uejueyi kokolismej. Satepan se noichpoch kikalankixtijkej itech nechikol, uan okse nokoneuj kiajxilijkej se kokolis itech itsontekon. Semi nimotayokoltij uan peuak amo nimonechikouaok nion nitanojnotsaok”. Semi techyolkokoua maj tokniuan kemej Anne uan ichankauan kipanokan uejueyi ouijkayomej.

6. ¿Toni uelis panos komo amo tikchiuaj tein kijtoua Colosenses 3:13?

⁶ (Xikonixtajtolti Colosenses 3:13.) Seki itekitikauan Jiova kualanij porin se tokniuj kinchiuilij teisa tein kinyolkokoj. Tatitanil Pablo kijtoj ke kemansa xa onkas keyej tikualaniskej iuan se tokniuj. Xa hasta techchiuilijkej tein amo kuali. Sayoj ke komo amo timoyekpiaj, nochipa tikelnamiktoskej tein techchiuilijkej uan nejon uelis kichiuas maj tikauakan ixolal Jiova. Maj tikitakan tein kipanok Pablo, akin kayot Sudamérica. Kijtouilijkej ke kichiujka se taman tein amo kuali, uan nejon kichiuak maj kipolo se tekit tein kipiaya itech nechikol. ¿Toni kichiuak? Yejua kijtoua: “Kemej semi nikualantoya, yolik nikaujtiyajki nechikol”.

7. ¿Toni uelis panos komo tiksentokaj titanemiliaj itech tein achto tikchiujkaj?

⁷ Uan no, akin achto kichiujkaj se ueyi tajtakol xa kisentokaj amo kuali momachiliaj uan hasta kinemiliaj ke amo kinnamiki maj Dios kintasojta. Maski xa moyolnonotskej oso moyolnemilijkej uan kinnextilijkej teiknelilis, xa kimachiliaj ke amo kinnamikiok yetoskej itech ixolal Jiova. Ijkon momachiliaya se tokniuj takat akin monotsa Francisco, akin kimelaujkej porin auilnemik. Yejua kijtoua: “Maski niksentokaya niyaya nechikolmej, nimotayokoltij uan nikmachilij ke amo nechnamikia niyetos itech ixolal Jiova. Amo kuali nimomachiliaya uan niknemiliaya ke Jiova amo nechtapojpoluijka. Satepan amo nitanojnotsakok nion nimonechikojok”. ¿Keniuj tikinitaj tokniuan akin kipanouaj ouijkayomej kemej tein ika titajtojkej? ¿Tikinajsikamatij? Uan tein okachi moneki, ¿keniuj kinita Dios?

8. ¿Keniuj tikmatij ke Jiova amo kinelkaua akin kitekitiliayaj achto?

⁸ Jiova amo kinelkaua itekitikauan akin mouejkatilijkej, nion kielkaua nochi tekit tein kichiujkej (Heb. 6:10). Tanauatijkej Isaías kinextij keniuj Jiova kitasojta uan kiyekpia ixolal ika se neskayot: “Kinyekpias iichkauan kemej se ichkatajpixkej. Ika imay kinsentilis ichkamej, uan kinuikas iyolixko” (Is. 40:11). ¿Keniuj momachilia Jiova, akin Ueyi Ichkatajpixkej, keman semej itekitikauan mouejkatilia? Jesús kinextij keniuj momachilia Jiova keman kintajtanij imomachtijkauan: “¿Toni nankixejekoa de nijin nexkuitil? Se tagat  kipiaya makuilpoal ichkame uan senme de ne poliu. ¿Kox amo in tapixke kinkaua ne kuouta in oksekin nauipoal uan kaxtolo naui ichkame uan youi kitemoti in ichkatsin ten poliuik ya? Pues kema. Uan takan ueli kajsis in ichkat ten poliuik, ijkuakon [...] kachi moyolpaktia porin kajsik in ichkatsin ten poliuka ya uan ke ne nauipoal uan kaxtolonnaui ten amo poliukaj” (Mat. 18:12, 13).

9. ¿Keniuj kinyekpia iichkauan se kuali ichkatajpixkej? (Xikonita taixkopin ipeujyan amaix.)

⁹ ¿Keyej kinamiki maj tikijtokan ke Jiova kemej yeskia se ichkatajpixkej? Porin se kuali ichkatajpixkej semi kintasojta iichkauan. Kemej neskayot, David moteuij iuan se león uan se oso keman kinekiaj kinkuaskej iichkauan (1 Sam. 17:34, 35). Se kuali ichkatajpixkej kiita komo se ichkatsin poliui (Juan 10:3, 14). Kinkaua 99 iichkauan itech corral oso kiluia okse ichkatajpixkej maj kinyekpia keman kitemoti tein poliuik. Ika nejin neskayot, Jesús techmachtij keniuj kinita Jiova itekitikauan akin mouejkatiliaj. Yejua kijtoj: “Toueyitajtsin Dios [...] amo no kimonekiltia de ke ma xiixpoliuikan senme de namejuan ten nanpouij iuantsinko” (Mat. 18:14).

10. Kemej kijtoua Ezequiel 34:11-16, ¿toni kijtoj Jiova ke kichiuaskia ininka akin mouejkatilijkej?

¹⁰ Jiova techtasojta tinochin, hasta itekitikauan akin mouejkatilijkej. Itechkopa tanauatijkej Ezequiel, Dios kijtoj ke kintemoskia itekitikauan akin mouejkatilijkej uan kinpaleuiskia maj oksepa kuali mouikakan iuan. Uan kijtoj keniuj kinpaleuiskia. Kichiuaskia tein se ichkatajpixkej israelita kichiuaya keman kipolouaya se ichkatsin (xikonixtajtolti Ezequiel 34:11-16). Yekinika, ichkatajpixkej kitemouaya iichkatsin, maski xa monekia miak tonalmej uan chikaualis. Ompa, keman kiajsia kiuikaya iniuan okseki ichkamej. Uan no, komo ichkatsin mokokojka oso mayanaya, ika netasojtalis kipaleuiaya, kipajtiaya, kinapalojtiyaya uan kitamakaya. Tayekananij, akin kemej yeskia ichkatajpianij itech nechikol, no moneki kichiuaskej  nochi nejin keman kinpaleuiskej akin mouejkatilijkej (1 Ped. 5:2, 3). Tayekananij kintemouaj, kinpaleuiaj maj mokepakan itech nechikol uan kinnextiliaj ke kintasojtaj keman kinpaleuiaj maj oksepa kuali mouikakan iuan Jiova. *

11. ¿Toni kimatia se kuali ichkatajpixkej?

¹¹ Se kuali ichkatajpixkej kimatia ke iichkauan ueliskia mopoloskej. Yejua ika, komo panouaya nejon, amo kintatsakuiltiaya. Maj tikitakan tein kichiuak Jiova keman seki itekitikauan akin nenkej ne uejkauj amo kichiujkej tein yejuatsin kinekia.

12. ¿Keniuj Jiova kipaleuij Jonás?

¹² Tanauatijkej Jonás choloj porin amo kinekia kichiuas tein Jiova kinauatijka. Sayoj ke Jiova amo kinemilij ke amo keman mopataskia. Kemej kichiuaskia se kuali ichkatajpixkej, Jiova kipaleuij uan kimakak chikaualis uan ijkon uelik kichiuak tein kinauatijka (Jon. 2:7; 3:1, 2). Ompa, ika se xikalkomekat kimachtij ke inemilis se taltikpaknenkej kipia ipatiuj (Jon. 4:10, 11). ¿Toni techmachtia nejon? Ke tayekananij amo moneki kinemiliskej ke akin amo tanojnotsajok nion monechikouajok amo keman mokepaskej, ta moneki mochikauaskej kiajsikamatiskej keyej mouejkatilijkej. Uan keman mokepaskej iuan Jiova, moneki kisentokaskej kinnextiliskej ke kintasojtaj uan ininka motekipachoskej.

13. ¿Toni techmachtia tein kichiuak Jiova ika tein kijtoj akin kijkuiloj Salmo 73?

¹³ Keman akin kijkuiloj Salmo 73 kiitak ke akin kichiuayaj tein amo kuali moitaya ke nochipa kuali kinyaya, kinemilij ke nenkaj katka kitakamatis Dios (Sal. 73:12, 13, 16). ¿Toni kichiuak Jiova? Yejuatsin amo kitatsakuiltij, ta hasta kichiuak maj itajtoluan moijkuilouanij itech Biblia. Satepan, nejin salmista kiajsikamatik ke okachi kipia ipatiuj maj kuali se mouika iuan Jiova (Sal. 73:23, 24, 26, 28). ¿Toni techmachtia nejon? Ke tayekananij amo moneki kinemiliskej tein amo kuali keman sekin peua motajtaniaj ox amo nenkaj maj se  kitekitili Jiova. Okachi kuali, moneki mochikauaskej kiajsikamatiskej keyej kijtouaj nejon uan keyej kichiuaj seki taman. Ijkon uelis kinyolchikauaskej ika Biblia.

14. ¿Keyej monekia maj kipaleuikan Elías, uan keniuj kipaleuij Jehová?

¹⁴ Tanauatijkej Elías kicholuij Jezabel (1 Rey. 19:1-3). Kinemilij ke amo moajsiaj okseki tanauatianij uan ke tein kichiujtoya nenkaj katka. Semi motayokoltij uan hasta kinekia momikilis (1 Rey. 19:4, 10). Jiova amo kiajuak Elías, ta kiluij ke amo iselti yetoya, ke ueliskia takuaujtamatis ke yejuatsin kipaleuiskia uan ke monekiaok kichiuas miak tekit. Kuali kikakik keman kitapouijtoya tein kitekipachouaya, uan kimakak okseki tekimej (1 Rey. 19:11-16, 18). ¿Toni techmachtia nejon? Ke tinochin uan okachiok tayekananij, moneki tiyeskij tikualtakamej iniuan itekitikauan Jiova. Komo se tokniuj kiniluia tayekananij ke kualantok oso ke kinemilia ke Jiova amo keman kitapojpoluis, yejuan kuali kikakiskej. Satepan, kipaleuiskej maj kiajsikamati ke Jiova semi kipatiuita.

15. Kemej kijtoua Juan 6:39, ¿keniuj kinitaya Jesús iichkauan iTajtsin?

¹⁵ ¿Keniuj kineki Jiova maj tikinitakan itekitikauan akin mouejkatilijkej? Jesús technextilij keniuj. Yejua kimatia ke Dios semi kinpatiuita nochin itekitikauan. Yejua ika,  mochikauak kinpaleuis maj mokepanij iuan Jiova “ichkame ten poliutokke, yejuan ten pouij iuan in pueblojuani de Israel” (Mat. 15:24; Luc. 19:9, 10). Kemej Jesús kuali ichkatajpixkej, no semi mochikauak kinpaleuis iichkauan iTajtsin maj mokepanij iuan (xikonixtajtolti Juan 6:39).

16, 17. ¿Keniuj moneki kiitaskej tayekananij keman monekis kinpaleuiskej akin amo tanojnotsajok nion monechikouajok? (Xikonita recuadro “ Keniuj xa momachiliaj akin mouejkatilijkej”.)

¹⁶ Tatitanil Pablo kiniluij tayekananij akin moajsiaj itech nechikol ompa Éfeso ke monekia kichiuaskej kemej Jesús uan kinpaleuiskej akin amo chikauak inintakuaujtamatilis. Uan no kiniluij: “Kachi yolpaktok in tagat ten tapaleuijtinemi [...] ke ne tagat ten sayo kiselia tapaleuilis” (Hech. 20:17, 35). Kemej tikitaj, tayekananij moneki kinyekpiaskej itekitikauan Jiova. Salvador, se tayekankej ompa España, kijtoua: “Keman niknemilia ke Jiova semi kintasojta iichkauan akin poliujkej, nejon kichiua maj semi nimochikaua nikinpaleuis. Senkis nikmati ke Jiova kineki maj nikinyekpia”.

¹⁷ Nochin akin amo tanojnotsayajok nion monechikouayajok akin ininka titajtojkej itech nejin tamachtilis kiselijkej nepaleuil uan mokepkej iuan Jiova. Sayoj ke axkan moajsij miakejok akin no kinekij mokepaskej. ¿Keniuj uelis tikinpaleuiskej? Itech okse tamachtilis okachi ika titajtoskej nejon.