Seki tajkuilolmej tein nikan ixnesij kinextiaj seki taman tein mosenchiua. Nochi nejin tajkuilolmej kinextiaj ke tinemij itech itamian tonalmej (Dan. 12:4).

• Tajkuilolmej: Apoc. 11:7; 12:13, 17; 13:1-8, 12.

  Tein moijtojka: “Ueyi okuilin” taixyekanani itech taltikpak panoua 3,000 xiujmejya. Itech itamian tonalmej, kikokouaj chikometika itsontekon. Satepan, itsontekon pajti uan “nochi in taltikpakuani” kitojtokaj nejin “ueyi okuilin”. Satanás kichiua maj nejin “ueyi okuilin” kinteui “nochi in oksekin [...] ipiluan de ne siuatsin”.

  Keniuj mochiuak: Satepan ke panok tetsaujkakiouit, peuak moajsij tekiuajyomej tein kiixnamikij Jiova. Panoua 3,000 xiujmej satepan, tekiuajyot tein moajsia Gran Bretaña kipoloj chikaualis itech Yekinika Ueyi Neteuilis. Sayoj ke oksepa kipiak chikaualis keman tekiuajyot tein moajsia Estados Unidos peuak tekiti iuan. Itech itamian tonalmej, Satanás kichiuani maj tekiuajyomej kiixnamikikan ixolal Dios.

• Tajkuilolmej: Dan. 11:25-45.

  Tein moijtojka: Tekiuaj akin taixyekana norte uan tekiuaj akin taixyekana sur moteuiaj porin kinekij kipiaskej okachi chikaualis.

  Keniuj mochiuak: Tekiuajyot tein moajsia Alemania moteuij iuan tekiuajyot tein moajsia Gran Bretaña uan Estados Unidos. Itech xiuit 1945, Unión Soviética uan akin kipaleuiayaj mochiujkej tekiuaj akin taixyekana norte. Itech xiuit 1991 poliuik Unión Soviética, uan satepan, Rusia uan akin kipaleuiaj mochiuaj tekiuaj akin taixyekana norte.

• Tajkuilolmej: Is. 61:1; Mal. 3:1; Luc. 4:18.

  Tein moijtojka: Jiova kititani ‘akin kiuika itanauatil’ maj kemej yeskia kitapo ojti achto ke moixtalis Tekiuajyot tein moajsi imako Mesías. ‘Akin kiuika itanauatil’ Jiova, peua kinmatiltia “kuali tanauatilmej akin yolnejmachmej”.

  Keniuj mochiuak: Itech xiuit 1870, Charles Russell uan oksekin peuak mosenmachtiaj Biblia porin kinekiaj kimatiskej toni yekmelauj tamachtia. Itech xiuit 1881, kiajsikamatkej ke semi moneki maj itekitikauan Dios tanojnotsakan. Kikixtijkej tamachtilismej kemej “Se solicitan 1,000 predicadores” uan “Ungidos para predicar”.

• Tajkuilolmej: Mat. 13:24-30, 36-43.

  Tein moijtojka: Se takat kitoka trigo. Ompa, akin kitauelita kitoka amo kuali xiuit kampa toktok trigo. Amo kuali xiuit okachi moskaltia ke trigo. Itech tatekilis, kixelouaj trigo uan amo kuali xiuit.

  Keniuj mochiuak: Itech xiuit 1870, peuak okachi moita akonimej yekmelauj kichiuayaj kemej Cristo uan akonimej amo. Itech itamian tonalmej, kinsentiliaj akin yekmelauj kichiuaj kemej Cristo uan kinxelouaj akin amo.

• Tajkuilolmej: Dan. 2:31-33, 41-43.

  Tein moijtojka: Ueyi takat tein chijchiujtok ika tataman teposmej, kipia imetsuan tein maneliujtok ika tepos uan sokit.

  Keniuj mochiua: Sokit kinixnextia taltikpakneminij akin kinixyekana inintekiuajyot Gran Bretaña uan Estados Unidos. Nejon taltikpakneminij kinixnamikij tekiuanij. Yejua ika tekiuanij amo ueli senkis kikuij tanauatil tein kipiaj tein kemej yeskia tepos.

• Tajkuilolmej: Mat. 13:30; 24:14, 45; 28:19, 20.

  Tein moijtojka: Kisentiliaj “trigo” uan kitaliaj itech “trigojkal”, uan kiixtaliaj takeual takuaujtamach uan tamatkej maj kinixyekana “oksekin takeualme”. Peua moteixmatiltia “yankuik Tajtoltsin de [...] Dios” itech “nochi senmanauak”.

  Keniuj mochiua: Itech xiuit 1919 kiixtaliaj takeual takuaujtamach uan tamatkej maj kiixyekana ixolal Dios. Ijkuak, Momachtianij ika Biblia peuak okachi tanojnotsaj. Itech nejin tonalmej, itaixpantijkauan Jiova tanojnotsaj itech panoua doscientos uejueyi altepemej uan xolalmej, uan kikixtiaj amaixmej tein kimelauaj tein Biblia kijtoua itech panoua mil tataman tajtolmej.

• Tajkuilolmej: Dan. 12:11; Apoc. 13:11, 14, 15.

  Tein moijtojka: Se “okuilin” tein kipia ome ikuaomiyouan kiniluia taltikpakneminij “ma kichijchiuakan se tatadios ten ixtamati keme ne [ueyi] okuilin” uan “kimaka ijiyot”.

  Keniuj mochiuak: Inintekiuajyot Gran Bretaña uan Estados Unidos kiixtalijkej Sociedad de Naciones. No kiselijkej ininnepaleuil okseki altepemej. Tekiuaj akin taixyekana norte no moajsik itech Sociedad de Naciones itech xiuit 1926 hasta xiuit 1933. Taltikpakneminij kinemilijkej ke Sociedad de Naciones ueliskia kichiuas maj onka yolseuilis itech nochi taltikpak, se taman tein sayoj iTekiuajyo Dios uelis kichiuas. No ijkon kinemilijkej keman moixtalij Naciones Unidas (ONU).

• Tajkuilolmej: Dan. 8:23, 24.

  Tein moijtojka: Se tekiuaj akin ixtamouilil “semi tauejuelos”.

  Keniuj mochiuak: Inintekiuajyot Gran Bretaña uan Estados Unidos kichiuak maj miakej mikikan uan semi tauejueloj. Kemej neskayot, itech Ojpatika Ueyi Neteuilis, tateuianij kayomej Estados Unidos kitamotkej ome bombas itech se altepet kampa nemiaj akin kinixnamikiaj yejuan uan Gran Bretaña, tein kinmiktij miakej uan semi tauejueloj kemej amo keman ijkon mochiujtoya.

• Tajkuilolmej: Dan. 11:31; Apoc. 17:3, 7-11.

  Tein moijtojka: “Chichiltik okuilin” tein kipia majtakti ikuaomiyouan kisa itech ueyi taltekoch, uan yejua se chikueyitika tekiuaj. Amatajkuilol Daniel kijtoua ke nejin tekiuaj se taman “tein tetajyaltij uan tein taixpoloua”.

  Keniuj mochiuak: Itech Ojpatika Ueyi Neteuilis poliuik Sociedad de Naciones. Satepan ke tamik neteuilis, kiixtalijkej ONU. Ijkon kemej panok iuan Sociedad de Naciones, taltikpakneminij kinemiliaj ke ONU uelis kichiuas maj onka yolseuilis itech nochi taltikpak, se taman tein sayoj iTekiuajyo Dios uelis kichiuas. ONU kinixnamikis uan kinixpolos taneltokalismej.

• Tajkuilolmej: 1 Tes. 5:3, TNM; Apoc. 17:16.

  Tein moijtojka: Tekiuajyomej kijtouaj ke onkak “yolseuilis uan yekyetolis”, ompa “ueyi okuilin” uan majtakti ikuaomiyouan kiixnamikij “siuaauilnenke” uan kiixpolouaj. Satepan, kinixpolouaj tekiuajyomej.

  Keniuj mochiuas: Tekiuajyomej kijtoskej ke onkakya yolseuilis uan yekyetolis. Ompa, tekiuajyomej tein moajsij itech ONU kinixpoloskej taneltokalismej tein amo melaujkej. Ijkon peuas ueyi tajyouilis tein tamis itech Armagedón, keman Jesús kiixpolos nochi tein Satanás kiixyekana.

• Tajkuilolmej: Ezeq. 38:11, 14-17; Mat. 24:31.

  Tein moijtojka: Gog kiixnamiki ixolal Dios. Satepan, ángeles kinsentiliaj taixpejpenalmej.

  Keniuj mochiuas: Tekiuaj akin taixyekana norte uan okseki tekiuajyomej kiixnamikiskej ixolal Dios. Satepan ke peuas nejin taixnamikilis, kintamisentiliskej taixpejpenalmej ompa iluikak.

• Tajkuilolmej: Ezeq. 38:18-23; Dan. 2:34, 35, 44, 45; Apoc. 6:2; 16:14, 16; 17:14; 19:20.

  Tein moijtojka: Akin youi itech “istak caballo” senkis tatani keman kiixpoloua Gog uan itateuijkauan. “Ueyi okuilin” kipantamotaj kampa “xotatok tit uan ka azufre” uan se ueyi tet kiixpoloua ueyi takat tamachijchiuj.

  Keniuj mochiuas: Jesús, Tekiuaj itech iTekiuajyo Dios, kimakixtis ixolal Jiova. Iniuan 144,000 uan ángeles kinixpolos nochi tekiuajyomej tein kiixnamikiskej ixolal Dios. Ijkon ixpoliuis nochi tein kiixyekana Satanás.