1, 2. 1) ¿Toni kijtoskej taltikpaktekiuajyomej amo uejkaua? 2) ¿Katiyejua netajtanilmej tiknankilitij?

MAJ tiknemilikan ke taltikpaktekiuajyomej kijtouajya ke onkakya “yolseuilis uan yekyetolis”. Xa hasta noyampa kitematiltiaj ke amo keman ijkon onkani yekyetolis. Uan kinekij techtaneltoktiskej ke uelis kiyektaliskej kuejmolmej tein onkak. Sayoj ke tein melauj, amo uelis kitsakuiliskej tein mochiuati. ¿Keyej amo? Porin Biblia kijtoua ke “ijkuak ejkotiuetsis ininixpoliuilis, [...] uan amo uelis mopaleuiskej” (1 Tes. 5:3, TNM).

² Yejua ika, moneki tiknankiliskej seki netajtanilmej: ¿Toni panos itech “ueyi tajyouilis”? ¿Toni kichia Jiova maj tikchiuakan ijkuak? Uan ¿toni uelis tikchiuaskej axkan tein techpaleuis maj titaxikokan itech ueyi tajyouilis? (Mat. 24:21).

3. Kemej kijtoua Apocalipsis 17:5, 15-18, ¿keniuj Dios kiixpolos Ueyi Babilonia?

³ (Xikonixtajtolti Apocalipsis 17:5, 15-18). ¡Ueyi Babilonia kiixpoloskej! ¿Keniuj? ‘Dios kinyoltanemililtis [taltikpaktekiuajyomej] maj kichiuakan ijkon kemej Yejuatsin kimonekiltia’. ¿Toni kintanemililtis? Maj kinixpolokan nochi taneltokalismej hasta tein  kijtouaj ke kitojtokaj Cristo. Dios kichiuas nejon itechkopa “majtakti ikuakuau” oso ikuaomiyouan “chichiltik okuilin”. Majtakti kuaomimej kinixnextia nochi taltikpaktekiuajyomej tein kipaleuiaj nejon “ueyi okuilin” tein kiixnextia Naciones Unidas (Apoc. 17:3, 11-13; 18:8). Keman taltikpaktekiuajyomej kinixnamikiskej taneltokalismej tein amo melaujkej, ijkuak peuas ueyi tajyouilis. Nejin peujtiuetsis uan semi kinmoujtis taltikpakneminij.

4. 1) ¿Toni kijtoskej taltikpaktekiuajyomej tein ika motenpaleuiskej keman kiixpoloskej Ueyi Babilonia? 2) ¿Toni xa kichiuaskej akin ompa pouiaj?

⁴ Amo tikmatij toni ika motenpaleuiskej taltikpaktekiuajyomej keman kiixpoloskej Ueyi Babilonia. Xa kijtoskej ke taneltokalismej amo tapaleuiaj maj onka yolseuilis, ke semi mokalakiaj itech política oso ke kisentilianij miak tomin uan okseki taman (Apoc. 18:3, 7). Uan no, taixejekol maj se kinemili ke keman kiixnamikiskej Ueyi Babilonia amo kinmiktiskej nochin akin pouij itech taneltokalismej. Ta nesi ke taltikpaktekiuajyomej kinixpoloskej taneltokalismej. Keman kinixpoloskej, akin ompa pouiaj kiitaskej ke inintayekankauan amo yekmelauj kinpaleuijkej uan xa hasta kijtoskej ke amo ompa pouiaj.

5. ¿Toni motenkauani Jiova ke kichiuas itech ueyi tajyouilis uan keyej?

⁵ Biblia amo kijtoua kanachi tiempo panos hasta ke kitamiixpoloskej Ueyi Babilonia, sayoj ke tikmatij ke amo semi uejkauas (Apoc. 18:10, 21). Jiova motenkauani ke “kitokotsos in tajyouilis” porin ijkon momakixtiskej tokniuan taixpejpenalmej uan akin pouij itech taneltokalis tein melauak (Mar. 13:19, 20). Axkan, ¿toni kichia Jiova maj tikchiuakan keman peuas ueyi tajyouilis uan hasta Armagedón?

6. ¿Toni kichia Jiova maj tikchiuakan tiitekitikauan?

⁶ Kemej tikitakej itech okse tamachtilis, Jiova kichia maj tiitekitikauan nion tepitsin tikpaleuikan Ueyi Babilonia. Sayoj ke monekiok okse taman. Moneki tikixtaliskej tiksentokaskej tiktekitiliskej Dios. Maj tikitakan ome taman keniuj tikchiuaskej.

7. 1) ¿Keniuj tiknextiaj ke tiksentokaj timonejnemiltiaj kemej Jiova tanauatia? 2) Kemej kijtoua Hebreos 10:24, 25, ¿keyej okachiok axkan moneki maj timonechikokan?

⁷ Yekinika, moneki tiksentokaskej timonejnemiltiskej kemej Dios tanauatia. Amo tikitaj ke kuali yetok kemej monejnemiltiaj taltikpakneminij. Kemej neskayot, amo kuali tikitaj nion se taman auilnemilis, kemej ijkuak monamiktiaj ome takamej oso ome siuamej uan okseki tachiualismej tein mouikaj ika nejon (Mat. 19:4, 5; Rom. 1:26, 27). Ojpatika, moneki tiksentokaskej tikueyichiuaskej Dios iniuan tokniuan. Tikueyichiuaj itech Kalmej kampa tiMosentiliaj, uan komo moneki, itech ininchan tokniuan oso ichtaka. Tein yeski tein panos, nochipa timosentiliskej uan tikueyichiuaskej Dios. Uan moneki tikchiuaskej “porin tikitaj ke kachi motokijtiuits ya ne tonal” (xikonixtajtolti Hebreos 10:24, 25).

8. ¿Toni xa mopatas tein tikijtoskej itech tanojnotsalis?

⁸ Itech ueyi tajyouilis xa mopatas tein tikijtoskej itech tanojnotsalis. Axkan tikteixmatiltiaj kuali tanauatilmej ika iTekiuajyo Dios uan tikinchiuaj imomachtijkauan Jesús, sayoj ke ijkuak amo ijkon yeskiok. Biblia kijtoua ke tein tikijtoskej itech tanojnotsalis yeski kemej uejueyi tesiuit (Apoc. 16:21). Xa tiktematiltiskej ke Satanás uan nochi tein kiixyekana senkis ixpoliuis. Satepan, tikmatiskej toni tikijtoskej uan keniuj tikchiuaskej. ¿Titanojnotsaskej ijkon kemej tikchiuanij itech cien xiujmej tein panouanijya oso tikpataskej? Amo tikmatij. Maski ijkon, nesi ke tiktematiltiskej ika yolchikaualis ke Jiova kiualkuis tatsakuiltilis (Ezeq. 2:3-5).

9. ¿Toni xa kichiuaskej taltikpaktekiuajyomej keman kikakiskej tein tiktematiltiskej, sayoj ke toni senkis tikmatij?

⁹ Tein tiktematiltiskej xa kichiuas maj taltikpaktekiuajyomej kitemokan techtsakuiliskej maj amo titanojnotsakanok. Ijkon kemej axkan titakuaujtamatij ke Jiova techpaleuia keman titanojnotsaj, ijkuak no monekis ijkon tikchiuaskej. Senkis tikmatij ke toDios techyolchikauas uan ijkon tikchiuaskej itanejnekilis (Miq. 3:8).

10. Kemej kijtoua Lucas 21:25-28, ¿toni kimachiliskej taltikpakneminij keman kiitaskej tein mochiuas itech ueyi tajyouilis?

¹⁰ (Xikonixtajtolti Lucas 21:25-28). Itech ueyi tajyouilis, taltikpakneminij semi motekipachoskej keman kiitaskej ke tein itech takuaujtamatiaj amo ueli kinpaleuia. Tajyouijtoskej uan tel moujtoskej maj kinmiktikan itech nejon tonalmej tein yeskij semi tamouililmej (Sof. 1:14, 15). Ijkuak, xa okachi ouij se nemis hasta akin tiktekitiliaj Dios. Kemej amo titapaleuiaj itech tein mochiua nikan taltikpak xa tikpanoskej ouijkayomej. Xa amo tikpiaskej tein ika timoixpanoltiskej.

11. 1) Satepan ke kinixpoloskej taneltokalismej, ¿keyej taltikpakneminij uan taltikpaktekiuajyomej kinekiskej techixpoloskej? 2) ¿Keyej amo moneki timouiskej itech ueyi tajyouilis?

¹¹ Itech ueyi tajyouilis, ejkos tonal  keman akin kiitakej keniuj ixpoliuik inintaneltokalis kualaniskej porin kiitaskej ke totaneltokalis amo kiixpolojkej. Kampa yeski kiteixmatiltiskej hasta itech Internet, ke amo kiuelitaj ke tiksentokaj titaueyichiuaj. Nejon no kichiuas maj taltikpaktekiuajyomej uan inintaixyekankauj Satanás techtauelitakan porin amo uelik kinixpolojkej nochin taneltokalismej. Yejua ika kinekiskej techixpoloskej. Ijkuak, taltikpaktekiuajyomej mochiuaskej Gog tein poui Magog. * Yejuan kisenixnamikiskej ixolal Jiova (Ezeq. 38:2, 14-16). Kemej amo tikmatij nochi tein mochiuas itech ueyi tajyouilis, xa techtekipachos tein ijkuak panos. Sayoj ke amo onkak keyej timouiskej porin Jiova techiluis toni tikchiuaskej tein ika timopaleuiskej (Sal. 34:19). Ijkuak uelis ‘tiajkotachiaskej porin ejkotos ya ne tonal kuak Dios [...] techmakixtis’. *

12. ¿Toni techmakani “takeual ten yolkuali uan ten kuatamatke” tein techpaleuis satepan?

¹² “Takeual ten yolkuali uan ten kuatamatke” techmakani tein techpaleuis maj amo tikauakan Dios itech ueyi tajyouilis (Mat. 24:45). Techmakani miak tamachtilis, kemej neskayot, uejueyi nechikolmej tein tikpianij itech xiuit 2016 hasta xiuit 2018. Nejon techyolchikauanij maj okachi tiknextikan kualneskayomej tein techpaleuiskej maj titaxikokan ijkon kemej moualtokia itonal Jiova. Maj ininka titajtokan.

13. ¿Toni techpaleuis maj amo tikauakan Jiova uan keyej okachi moneki axkan?

¹³ Maj amo titekauakan. Ueyi nechikol “Maj amo tikauakan Jiova” tein mochiuak itech xiuit 2016, techmachtij ke komo kuali timouikaj iuan Jiova amo tikauaskej. Techelnamiktij ke timotokiaj iuan Dios keman timotataujtiaj uan timomachtiaj iTajtol. Nejon techpaleuis maj tikixnamikikan hasta tein uejueyi ouijkayomej. Ijkon kemej moualtokia tonal keman kiixpoloskej Satanás uan nochi tein kiixyekana, okachi moyejyekos totakuaujtamatilis. Xa kisentokaskej techkejkeloskej (2 Ped. 3:3, 4). Kichiuaskej porin amo tikpaleuiaj nion se taman tein Satanás kiixyekana. Yejua ika axkan moneki amo tikauaskej Jiova porin nejon techpaleuis maj titaxikokan itech ueyi tajyouilis.

14. 1) ¿Toni mopatas kemej axkan techixyekanaj? 2) ¿Keyej ijkuak monekis amo tikauaskej Dios?

¹⁴ Itech ueyi tajyouilis, amo techixyekanaskejok tokniuan akin axkan kichiuaj. Ijkuak, ejkos tonal keman nochin taixpejpenalmej akin yetoskejok taltikpak yaskej iluikak uan tateuiskej itech Armagedón (Mat. 24:31; Apoc. 2:26, 27). Nejon kijtosneki ke Oloch Taojtokaltianij amo touan yetoskejok. Sayoj ke, “uel miak tagayot” kisentokaskej tekititoskej. Tokniuan akin pouij itech okseki ichkamej kiixyekanaskej ixolal Dios. Monekis tikinpaleuiskej nejin tokniuan uan tiktakamatiskej nochi tein technauatis Jiova inintechkopa, ijkon tiknextiskej ke amo tikauaj  yejuatsin. Uan ijkon moneki tikchiuaskej komo tiknekij timomakixtiskej.

15. ¿Keniuj uelis tiksentokaskej titaxikoskej uan keyej okachi moneki axkan?

¹⁵ Maj titaxikokan. Ueyi nechikol “¡Amo xionmosenkaua!” tein mochiuak itech xiuit 2017, techpaleuij maj tiksentokakan tikxikokan ouijkayomej. Timomachtijkej ke titaxikouaj amo porin momelauaj ouijkayomej tein tikpiaj, ta porin senkis titakuaujtamatij iuan Jiova (Rom. 12:12). Maj amo tikelkauakan nejin tein kijtoj Jesús: “Akin taxikos hasta ijkuak ejkos tamilis yejua akin makisas” (Mat. 24:13, TNM). Nejon kijtosneki ke moneki tiktakamatiskej Dios maski tikixnamikiskej ouijkayomej. Titaxikoskej axkan techpaleuis maj titaxikokan itech ueyi tajyouilis.

16. ¿Toni techpaleuia maj tiyolchikaujkej uan keniuj uelis okachi tiknextiskej axkan?

¹⁶ Maj tiyolchikaujkej. Ueyi nechikol “¡Xikonnexti yolchikaualis!” tein mochiuak itech xiuit 2018, techelnamiktij ke tiyolchikaujkej amo porin tiuelij tikchiuaj miak taman, ta porin titakuaujtamatij iuan Jiova. ¿Toni techpaleuis maj okachi iuan titakuaujtamatikan? Maj tikixtajtoltikan Biblia mojmostaj uan maj titanemilikan keniuj Dios kinmakixtij itekitikauan ne uejkauj (Sal. 68:20; 2 Ped. 2:9). Keman taltikpaktekiuajyomej techixnamikiskej itech ueyi tajyouilis, monekis tiknextiskej yolchikaualis uan titakuaujtamatiskej iuan Jiova kemej amo keman ijkon tikchiuanij (Sal. 112:7, 8; Heb. 13:6). Komo axkan iuan titakuaujtamatij, tiyeskij tiyolchikaujkej keman techixnamikis Gog. *

17. ¿Keyej amo moneki tikmouiliskej Armagedón? (Xikonita taixkopin ipeujyan amaix.)

¹⁷ Kemej tikitakej itech okse tamachtilis, timiakej tineminij itech itamian nejin tonalmej. Sayoj ke no tikchiaj timakisaskej itech ueyi tajyouilis. Neteuilis Armagedón senkis kitamis nochi tein amo kuali. Sayoj ke amo moneki  timouiskej. ¿Keyej? Porin akin tateuis yejua Jiova, amo tejuan (Prov. 1:33; Ezeq. 38:18-20; Zac. 14:3). Keman Jiova kijtos, Jesucristo kiixyekanas nejon neteuilis. Iuan yetoskej taixpejpenalmej uan tel miakej ángeles. Yejuan kiteuiskej Satanás uan iamokuali ejekauan uan nochin akin kipaleuiaj nikan taltikpak (Dan. 12:1; Apoc. 6:2; 17:14).

18. 1) ¿Toni Jiova motenkauani? 2) ¿Keniuj techpaleuia Apocalipsis 7:9, 13-17 maj titakuaujtamatikan ke Jiova techmakixtis?

¹⁸ Jiova motenkaua: “Nion se tepos tein kichijchiuaskej tein ika mitsixnamikiskej, amo kualtias” (Is. 54:17). “Uel miak tagayot” akin kitekitiliaj Dios makisaskej itech “ueyi tajyouilis” uan kisentokaskej kitekitiliskej (xikonixtajtolti Apocalipsis 7:9, 13-17). Tein kijtoua Biblia techpaleuia maj titakuaujtamatikan ke Jiova techmakixtis. Tikmatij ke “Jiova kimatampauia akin amo kikaua” (Sal. 31:23). Tinochin akin tiktasojtaj uan tikueyichiuaj Jiova semi tiyolpakiskej keman senkis moueyitalis itokay yejuatsin (Ezeq. 38:23).

19. ¿Toni tein kualtsin tein tikchiaj amo uejkaua mochiuas?

¹⁹ Maj tiknemilikan keniuj kijtoskia 2 Timoteo 3:2-5 komo ininka tajtoskia akin nemiskej itech yankuik taltikpak, kampa Satanás amo taixyekantosok (xikonita recuadro “ Keniuj yeskij taltikpakneminij”). Tokniuj George Gangas, * akin pouia iniuan Oloch Taojtokaltianij, kijtoj: “¡Semi kualtsin tinemiskej itech taltikpak keman nochin kiueyichiuaskej sayoj Jiova! Amo uejkaua, nannemiskej itech yankuik taltikpak. Nannemiskej tonalmej tein Jiova nemis. Tinemiskej nochipaya”. ¿Melauj ke semi kualtsin tein tikchiaj?