1. 1) ¿Keniuj Jiova kiita tekit? 2) ¿Toni kiolinia nejon maj kichiua?

JIOVA nochipa kiyolpaktia tekit tein kichiua (Sal. 135:6; Juan 5:17). Uan kinejneki maj ángeles uan taltikpakneminij no kimachilikan nejon, yejua ika kinmaka tekimej tein kinualkuilia yolpakilis. Kemej neskayot, kiixtalij maj iyoj Konetsin kipaleuiani keman tachijchiuak (xikonixtajtolti Colosenses 1:15, 16, TNM). Yejua ika Biblia techiluia ke Jesús, achto ke ualaskia nikan taltikpak, iuan yetoya Dios ompa iluikak “kemej se tekitikej tein ixmach” (Prov. 8:30).

2. ¿Keniuj tikmatij ke Jiova nochipa kinmakani ángeles tekimej tein motelnekij tein kinualkuilia yolpakilis?

² Itech nochi Biblia, kinextia ke Jiova nochipa kinmakani tekimej ángeles. Keman Adán uan Eva tajtakojkej uan kinkixtijkej itech xochital Edén, Dios “kintalij querubines uan se espada tein xotatoya, kisentokaya momalakachouaya uan ijkon kiyekpiaya ojti tein teuikaya itech kouit tein kiixnextia nemilis” (Gén. 3:24). Uan Apocalipsis 22:6 kinextia nejin: “Yejuatsin techualtitanilij niángel tanauatijke para technextilis tejuan ten tiitekitikauan nochi ten niman nikan kipia de mochiuati”.

3. ¿Keniuj keman Jesús nemik nikan taltikpak kitojtokak ineskayo iTajtsin?

³ Keman Jesús nemik nikan taltikpak kemej takat akin  amo kipiaya tajtakol, kichiuak ika yolpakilis tekit tein iTajtsin kimakaka. Uan ijkon kemej kichiua Jiova, Jesús no kinmakak imomachtijkauan tekimej tein motelnekij. Kichiuak maj kimachilianij yolpakilis ika tekit tein kichiuaskiaj keman kiniluij: “Nochi naken yek takuautamatiske nouantsin, yejuan nojonkes no kichiutinemiske in tachiualisme ijkon keme Nejuatsin nikchiutinemi. Uan [...] kichiuaske kachi uejueyi ok tachiualisme porin Nejuatsin niyo niyetotiu iuan Notajtsin Dios” (Juan 14:12). Uan no kiyeknextij ke nejon tekit monekia ijsiujka mochiuas keman kinmelauilij: “Mientras kuali tanestok moneki tikchiutinemiske nijin tekit ten technauatilij ya Notajtsin Dios ne naken nechualtitanik. Pero axkan tapoyautiuits ya uan ijkon satepan amo aken uelis tekitis ok” (Juan 9:4).

4-6. 1) ¿Keyej tiktasojkamatij maj Noé kitakamatini Jiova? 2) ¿Keniuj techpaleuia maj Moisés kichiuani tein Jiova kinauatijka? 3) ¿Toni ome taman kiualkui tekit tein Dios kinmaka taltikpakneminij?

⁴ Tel achtook ke Jesús ualaskia nikan taltikpak, Jiova kinmakak taltikpakneminij tekimej tein kintelyolpaktiskia. Maski Adán uan Eva amo matankej tekit tein Dios kinmakaka, oksekin kemaj matankej tein Dios kiniluijka maj kichiuanij (Gén. 1:28). Kemej neskayot, Jiova kiyekiluij Noé keniuj monekia kichijchiuas se arca, uan ijkon yejua uan ichankauan ueliskiaj momakixtiskej keman ualaskia Tetsaujkakiouit. Uan kemej Noé nochi kichiuak ijkon kemej Jiova kinauatijka, tejuan tiyoltokej axkan (Gén. 6:14-16, 22; 2 Ped. 2:5).

⁵ Jiova no kiyekiluij Moisés keniuj monekia kichijchiuaskej tabernáculo uan keniuj tekitiskiaj tiopixkamej. Uan Moisés nochi kichiuak ijkon kemej Jiova kinauatijka (Éx. 39:32; 40:12-16). ¿Keniuj techpaleuia tejuan maj Moisés kichiuani nejon tekimej ijkon kemej Jiova kinauatijka? Ijkon kemej kimelauak tatitanil Pablo, tabernáculo uan tiopixkamej kiixnextijkej seki taman tein kuali tein ualaskia satepan (Heb. 9:1-5, 9; 10:1).

⁶ Tekimej tein Dios kinmaka itekitikauan mopatatiuij ijkon kemej mochiua itanejnekilis; sayoj ke nochipa kiueyitaliaj yejuatsin uan kinpaleuia taltikpakneminij tatakamatinij. Yejua nejon kinextia nochi tein Jesús kichiuak achto ke ualaskia nikan taltikpak uan keman nemik kemej taltikpaknenkej (Juan 4:34; 17:4). No ijkon panoua ika tekit tein axkan techkauilijtokej maj tikchiuakan (Mat. 5:16; xikonixtajtolti 1 Corintios 15:58). ¿Keniuj kiueyitalia Jiova nejin tekit?

7, 8. 1) Xikonmelaua toni tekit kipiaj tatiochiualis kichiuaskej itekitikauan Dios itech totonaluan. 2) ¿Keniuj moneki tikitaskej itaixyekanalis Jiova?

⁷ ¿Melauj ke semi teyolpaktia maj Jiova kinmakani taltikpakneminij tajtakouanij ueyi tatiochiualis maj iuan tekitikan? (1 Cor. 3:9.) Ijkon kemej Noé uan Moisés tapaleuijkej itech kalchiualis, seki tokniuan kipiaj tatiochiualis tapaleuiskej maj mochijchiua Kalmej kampa mochiuaj Uejueyi Nechikolmej, Kalmej kampa tiMosentiliaj uan kalmej Betel. Tejuan xa titapaleuijtokej maj moyekchijchiua se Kali kampa tiMosentiliaj oso maj mochijchiua ueyi kali kampa techixyekanaj ompa Warwick (Nueva York) (xikonita taixkopin ipeujyan tamachtilis). Komo ijkon, maj tikpatiuitakan nejon tatiochiualis, porin se tekit tein ika tikueyitaliaj Jiova. Sayoj ke, onkak se tekit tein tapaleuia maj mochiuakan itatojtokakauan Cristo, kampa tinochin tiitekitikauan Dios techyoleuaj maj titapaleuikan. Nejin yejua tanojnotsalis, tein kiueyitalia Jiova uan kinpaleuia akin kitakamatij (Hech. 13:47-49). Inechikol Dios techpaleuia maj okachi kuali tikchiuakan nejin tekit. Yejua ika kemansa tikseliaj yankuik tekimej.

⁸ Itekitikauan Jiova akin amo kikauaj ika yolpakilis nochipa kitojtokanij taixyekanalis tein kitemaka inechikol (xikonixtajtolti Hebreos 13:7, 17). Yekinika xa amo senkis  tikajsikamatiskej keyej moneki ijkon tikchiuaskej seki taman. Sayoj ke, senkis tikmatij ke kiualkui tein kuali ijkuak tikpaleuiaj tein yeski taman tein Jiova kiita ke moneki mopatas.

9. ¿Toni kuali neskayot tayekananij kinkauiliaj tokniuan?

⁹ Neskayot tein tayekananij kinkauiliaj tokniuan akin mosentiliaj kinextia ke kinejnekij kichiuaskej itanejnekilis Jiova (2 Cor. 1:24; 1 Tes. 5:12, 13). Yejuan kiixtaliaj tekitiskej chikauak uan kipataskej tein monekis. Ika yolpakilis kiseliaj uan kipeualtiaj yankuik taman kemej moixtalia moteixmatiltis iTekiuajyo Dios. Maski sekin yekinika xa omeyolouayaj kiixtaliskej maj motanojnotsa ika teléfono, kampa tanamakaj oso kampa moajsij miakej taltikpakneminij, niman kiitanij tein kuali tein kiualkui nejon. Kemej neskayot, naui tokniuan akin tekitij kemej precursor ompa Alemania kiixtalijkej tanojnotsaskej tanamakaloyamej kampa uejkaujya amo motanojnotsaya. Semej nejon tokniuan akin monotsa Michael uan tekiti kemej tayekankej, kijtoj ke semi yolmouiaj porin miak xiujmejya amo kichiuayaj nejon taman tanojnotsalis. Yejua no kijtoj: “Uan Jiova, akin nochi kiita, techpaleuij maj kuali tikpanouanij itech tanojnotsalis nejon kualkan tein amo tikelkauaskej. ¡Semi tiyolpakiaj porin iuan titakuaujtamatkej uan tikchiujkej tein tayolmajxitia amaix ITekiyo Dios tein Tikchiuaj!”. ¿No tiknejnekij tikpeualtiskej yankuik taman kemej moixtalia moteixmatiltis kuali tanauatilmej kampa titanojnotsaj?

10. ¿Toni taman kipatani inechikol Dios itech seki xiujmej achto?

¹⁰ Kemansa, moneki mopatas seki taman itech kalmej Betel. Itech seki xiujmej achto, tekit tein mochiuaya itech seki kalmej Betel kipanoltijkej itech okseki tein okachi uejueyi tein moajsij itech okseki altepemej. Tokniuan akin ompa tekitiaj monekik kipataskej seki taman maski ouij. Sayoj ke, nochin niman kiitakej tein kuali tein kiualkuik (Ecl. 7:8). ¡Se ueyi tatiochiualis kipiaj nejon tokniuan akin tekitij ika yolpakilis porin tapaleuiaj itech tekit tein ixolal Jiova kichiujtok itech nejin tonalmej!

11-13. ¿Toni taman tein ouij kichiuanij seki tokniuan keman inechikol Jiova kipata seki taman?

¹¹ Tokniuan akin monekik kipataskej seki taman keman okseko kipanoltijkej tekit tein kichiuayaj itech kalmej Betel, uelis techmachtiskej miak taman. Sekin ompa tekitikej panoua sempoual xiujmej. Se takat uan se siuat namikuanij akin tekitiaj itech se kali Betel tein amo ueyi tein moajsia Centroamérica, kiniluijkej maj yanij México kampa tekitiskiaj itech se kali Betel tein okachi ueyi. Rogelio kijtoua: “Semi techouijmakak timonauatiskej iniuan tochankauan uan totasojikniuan”. Uan Juan, okse tokniuj akin yajki México, kijtoua: “Kemej yeskia tiyankuikapeuaj; se kintemoua yankuik tasojiknimej uan moneki se momatis se nemis kemej ompa nemij uan se kiselis kemej tanemiliaj”.

¹² Akin tekitiaj itech seki kalmej Betel tein moajsiaj Europa, no kinouijmakak keman kiniluijkej maj yanij Betel tein moajsi Alemania. Nochin akin kiuelitaj nemiskej kampa moitaj tepemej ueli kiajsikamatij keniuj tokniuan akin tekitiaj Betel tein moajsia Suiza semi kinouijmakak kikauaskej kualtsitsin tepemej kampa tasekpochintok. Uan tokniuan akin ualeuayaj Austria yekinika semi kielnamikiaj keniuj kualtsin momachiliayaj itech kali Betel kampa amo miakej katkaj.

¹³ Akin tekititoj Betel itech okse altepet, monekik momatiskej kampa axkan mokauaj, tekitiskej iniuan tokniuan akin amo kinixmatiaj uan xa moneki momachtiskej kichiuaskej okse taman tekit. Uan no moneki mosentiliskej itech se yankuik nechikol uan xa hasta tanojnotsaskej itech okse tajtol uan kampa taltikpakneminij taman tanankiliaj. Maski kinouijmaka kipataskej tein moneki, miakej akin tekitij Betel kiselianij kichiuaskej. ¿Keyej?

14, 15. 1) ¿Keniuj kinextianij miakej tokniuan ke kipatiuitaj ueyi tatiochiualis tein kipiaj tekitiskej iuan Jiova kampa yeski? 2) ¿Keniuj uelis tikchiuaskej kemej yejuan?

 ¹⁴ Grethel kijtoua: “Nikselij tayoleualis porin ijkon uelik nikiluij Jiova ke netasojtalis tein nikpialia okachi ueyi ke tein nikpialia se altepet, se ueyi kali oso se taman tekit”. Dayska kijtoua: “Jiova nechyoleujtoya maj nikchiua nejon, yejua ika amo niomeyolouak nikchiuas”. André uan Gabriela no ijkon kiitaj. Yejuan kijtouaj: “Tikitakej ke katka okse taman kemej ueliskia tiktekitiliskej Jiova uan amo tiktayekanaltiskej totanejnekilis”. Yejuan kinemiliaj ke ijkuak inechikol Jiova kipata seki taman, okachi kuali maj se kiseli ika yolpakilis uan amo maj se kiixnamiki.

¹⁵ Keman tekit tein mochiua itech seki kalmej Betel kipanoltiaj okseko, sekin akin ompa tekitij kinyoleuaj maj peuakan tekitikan kemej precursor. Yejua nejon panok iniuan miakej tokniuan keman tekit tein mochiuaya itech kalmej Betel tein moajsiaj Dinamarca, Noruega uan Suecia kipanoltijkej itech kali Betel tein moixmati kemej Escandinavia. Seki nejon tokniuan yejuan Florian uan Anja akin namikuanij. Yejuan kijtojkej: “Tikitaj tekit tein tikselijkej kemej se taman tein ouij tein teyolpaktia. Semi kualtsin maj Jiova techkui maj tiktekitilikan kampa yeski. Ika nochi toyolo ueli tikijtouaj ke tikselianij miak tatiochiualismej”. Maski timiakej xa amo keman monekis tikpataskej seki taman kemej nejon, ¿melauj ke ijkon kemej yejuan uelis ika miak pakilis tiktayekanaltiskej iTekiuajyo Dios itech tonemilis? (Is. 6:8.) Jiova nochipa kintatiochiuia akin kipatiuitaj ueyi tatiochiualis tein kipiaj tekitiskej iuan kampa yeski.

16. 1) ¿Toni techyolmajxitia Gálatas 6:4? 2) ¿Toni okachi ueyi tatiochiualis ueli kipia aksa?

¹⁶ Taltikpakneminij tajtakouanij miakpa kitamachiuaj tein ueli kichiuaj yejuan ika tein kichiuaj oksekin. Sayoj ke iTajtol Dios techyolmajxitia maj tikitakan tein tejuan ueli tikchiuaj (xikonixtajtolti Gálatas 6:4). Timiakej amo tikpiaj tatiochiualis titekitiskej  kemej tayekananij, precursor, misionero oso titekitiskej Betel. Sayoj ke maj amo keman tikelkauakan ke tinochin tikselianij okachi ueyi tatiochiualis tein aksa ueli kipia: titekitiskej iuan Jiova kemej tanojnotsanij. ¿Melauj ke se ueyi tatiochiualis?

17. 1) Axkan ke taixyekantokok Satanás nikan taltikpak, ¿toni xa amo uelis tikchiuaskej? 2) ¿Keyej moneki maj nejon amo kichiua maj timosenkauakan?

¹⁷ Axkan ke taixyekantokok Satanás nikan taltikpak, xa amo uelis tikchiuaskej itekiyo Jiova nochi tein tiknekiskiaj. Xa moneki tikinixpanoltiskej oso tikinyekpiaskej tochankauan, xa timokokouaj oso tikpanouaj okseki taman. Sayoj ke nejon moneki maj amo kichiua maj timosenkauakan. Tein yeski tein tikpanotoskej, uelis titekitiskej iuan Dios keman tikteixmatiltiskej itokay uan iTekiuajyo nochipa keman uelis. Motelneki maj tikchiuakan nochi tein tiueliskej, uan maj tiktajtanikan Jiova maj kintiochiua tokniuan akin kemaj ueli kichiuaj okachi ke tein tejuan tiuelij. Maj tikelnamikikan ke akin kiueyitalia itokay Jiova, yejuatsin kiita ke kitelpia ipatiuj.

18. ¿Toni ika miak pakilis moneki tikchiuaskej, uan keyej?

¹⁸ Maski titajtakouanij uan timopolouaj, Jiova kiyolpaktia maj iuan titekitikan. ¿Tikpatiuitaj ueyi tatiochiualis tein tikpiaj titekitiskej iuan Jiova itech nejin itamian tonalmej? Komo ijkon, ika miak pakilis tikauaskej tein tikyolnejnekij axkan uan timochiaskej tikchiuaskej hasta itech yankuik taltikpak, porin tikmatij ke ijkuak tiyolpakiskej ika “ten melau nemilis”, se nemilis nochipaya keman tikpiaskej yolseuilis uan yolpakilis (1 Tim. 6:18, 19).

19. ¿Toni Jiova motenkaua techmakas satepan?

¹⁹ Axkan ke amo uejkaok moajsi yankuik taltikpak, maj tiknemilikan tein Moisés kiniluij israelitas tepitsin achto ke kalakiskiaj itech Tal tein Dios motenkaujka kinmakas: “Jiova moDios kichiuas maj tel kuali kisa nochi tekit tein tikchiuas ika momay” (Deut. 30:9). Satepan ke panos Armagedón, Jiova kichiuas tein motenkauak uan kinmakas taltikpak akin iuan tekitikej. Ijkuak tikseliskej se yankuik tekit: monekis tikchiuaskej nejin taltikpak se kualtsin xochital.