ITECH tonal 6 metsti septiembre xiuit 1926, se peregrino (tokniuj takalpanojkej) akin kayot Japón tein nemia Estados Unidos mokepak Japón kemej misionero. Ompa kichiaya se takat akin sayoj yejua tajtantoya maj kititanilianij amaix La Torre del Vigía, akin kinsentilijka seki taltikpakneminij uan kinmachtiaya ika Biblia ompa Kobe. Itech nejon altepet, Momachtianij ika Biblia kipiakej yekinika ueyi nechikol itech tonal 2 metsti enero xiuit 1927. Mosentilijkej 36 taltikpakneminij, uan 8 moauijkej. Semi kuali tein peuak mochiua, sayoj ke nejon tokniuan amo miakej katkaj uan itech nochi Japón nemiaj 60 millones, ¿keniuj ueliskiaj kinuikiliskej tamachtilis tein melauak tein kemej yeskia tanex?

Itech metsti mayo xiuit 1927, Momachtianij ika Biblia kiixtalijkej keniuj kiteixmatiltiskiaj ke motemakaskiaj seki tanojnotsmej ika Biblia. Yekinika tanojnots motemakaskia Osaka, uan tokniuan kitematiltijkej itech nochi altepet ika miak uejueyi amat kampa kijkuilojkej ika uejueyi letra. Uan no, kintitanilijkej 3,000 tayoleualis akin katkaj uejueyi chiuanimej uan kimoyaujkej okseki 150,000. No kiteixmatiltijkej itech periódicos tein okachi moixmatiaj uan itech 400,000 boletos tein kikuij itech tren. Uan itech tonal keman motemakaskia tanojnots, ika ome avionetas kipanxinijkej itech nochi altepet okseki 100,000 tayoleualis. ¿Keniuj tapaleuij nejon? Itech Kali Asahi amo akiajok. Kemej 2,300 kikakkej tanojnots “ITekiuajyo Dios moualtokijya”. Okseki 1,000 monekik mokauaskej kalampa porin amo akiajok. Keman tamik tanojnots, kemej 600 mokaujkej keman mochiuak netajtanilmej uan tanankililmej. Itech seki metsti tein panok, no motemakakej tanojnotsmej ompa Kioto uan itech okseki altepemej tein pouiaj Japón.

Itech metsti octubre xiuit 1927, tokniuan kiixtalijkej kitemakaskej eyi tanojnotsmej ompa Tokio. Uan ijkuak no kinyoleujkej uejueyi chiuanimej, kemej tekiuaj, akin tapaleuiayaj maj moixtali tanauatilmej itech altepet, tayekananij itech taneltokalis uan akin kinixyekanayaj tateuianij. Uan no, kampa yeski kitalijkej uejueyi amat uan kichiujkej maj motematilti itech periódico, uan kimoyaujkej 710,000 tayoleualis. Mosentilijkej 4,800 itech eyi tanojnotsmej.

Colportores (precursores) semi tapaleuijkej maj motanojnotsa kajkalpan. Matsue Ishii, semej akin yekinika mochiuak colportora akin kayot Japón, uan itakauj, Jizo, yajtinenkej panoua tajko Japón, tein peujkej norte kampa motatokaytia Sapporo, hasta Sendai, Tokio, Yokohama, Nagoya, Osaka, Kioto, Okayama uan Tokushima. Matsue uan se tokniuj siuat akin xiuejya akin monotsaya Sakiko Tanaka, keman kinkalpanouayaj uejueyi chiuanimej, motakentiayaj ika kimonos kemej kinamikia. Se tonal, se ueyichiujkej tajtanik 300 amaixmej El Arpa de Dios uan Liberación tein kintaliskia kampa kintsakuayaj akin kichiuayaj tein amo kuali.

 Keman Katsuo uan Hagino Miura kiixtajtoltijkej amaixmej tein kinmakak tokniuj Matsue, kiajsikamatkej ke kiajsikej tamachtilis tein melauak. Moauijkej itech xiuit 1931 uan mochiujkej colportores. Haruichi uan Tane Yamada, ijkon kemej miakej ininchankauan, kiselijkej tamachtilis tein melauak tepitsin achto ke ajsiskia 1930. Haruichi uan Tane no mochiujkej colportores, uan ininichpoch, Yukiko, tekitito Betel ompa Tokio.

Nejon tonalmej tel patiyoj katkaj carros uan amo kuali yetoyaj ojmej kampa panouayaj. Yejua ika, Kazumi Minoura uan okseki colportores telpochmej kitekitiltiayaj carros tein chijchiujtoyaj kemej kalmej tein amo kipiayaj motor. Kintokaytiayaj Jehús porin itech Biblia ixnesi ke Jehú kipiaya se carro tein ijkon kinejnemiltiaya (2 Rey. 10:15, 16). Itech Betel tein moajsi Japón kinchijchiujkej eyi Jehús tein uejueyi, tein katka ueyak 2,2 metros, uan patauak uan uejkapan 1,9 metros kampa akiaj chikuasen colportores. No kinchijchiujkej 11 Jehú konemej tein kitilanayaj ika bicicleta uan ueliaj mokauayaj ome tokniuan. Kiichi Iwasaki, akin kinchijchiuak nejon, kielnamiki: “Sejse Jehú kipiaya tein ika kipantsakuaskiaj uan kipiaya se batería tein kikuia carro tein kinmakaya tanex”. Colportores kinuikayaj Jehús ijkuak panotiyayaj itech se tepet iuan okse keman kimoyaujkej tamachtilis tein melauak tein kemej yeskia tanex itech nochi Japón tein peujkej norte ompa Hokkaido hasta sur ompa Kyushu.

Ikumatsu Ota kimelaua: “Keman tiajsiaj itech se xolal, tiketsayaj Jehú ueyiatenoj oso kampa tasempayan. Achto tikinkalpanouayaj akin kipiayaj tanauatil, kemej akin taixyekanaya itech xolal, uan satepan tipanouayaj kajkalpan uan ika titajtouayaj amaixmej uan tikauayaj. Keman titamitanojnotsayaj itech xolal, tipanouayaj itech okse”.

Keman 36 Momachtianij ika Biblia akin nemiaj Kobe kipiakej yekinika ueyi nechikol, katkaj “tonalmej keman peua tein amo ueyi” (Zac. 4:10). Makuil xiuit satepan, itech xiuit 1932, kitematiltijkej tekit tein kichiujkej 103 colportores uan tanojnotsanij. ¡Kitemakakej panoua 14,000 libros! Axkan kemej 220,000 tanojnotsanij kichiuaj maj taui tanex itech Ueyi altepet kampa Pankisa Tonaltsin. (Tein tikixtijkej tein mochiuak Japón.)